ရွှေတူးဖော်မှု

January 24, 2022

ဝိုင်းမော်မြို့နယ်တွင် ရွှေတူးဖော်မှုများကြောင့် သောက်သုံးရေ အခက်အခဲကြုံ

ကချင်ပြည်နယ်၊ ဝိုင်းမော်မြို့နယ်ထဲက နမ်ဆန်ယန်ကျေးရွာနဲ့ ပတ်ဝန်းကျင်တွေမှာ ရေတွင်းထဲက ရေတွေခန်းခြောက်ကုန်ပြီး ကုမ္ပဏီတွေက ရွှေတူးဖော်နေတာကြောင့်လည်း စမ်းချောင်းထဲကရေတွေညစ်ညမ်းပြီး ဒေသခံတွေ သောက်သုံးရေမရတဲ့ အခက်အခဲနဲ့ ရင်ဆိုင်နေရတယ်လို့ ရွာခံတွေကနေ သိရပါတယ်။

လက်ရှိအချိန်မှာ သောက်သုံးရေအတွက် RC ဘုရားကျောင်းဝင်းထဲက ရေကိုသာ အသုံးပြုနေရပြီး ရွှေလာတူးတဲ့ ကုမ္ပဏီတွေကတော့ စက်ရုံထုတ် ရေသန့်တွေကို အသုံးပြုကြတယ်လို့ ဒေသခံတယောက်က ပြောပါတယ်။

“အရင်ရွာပြန်တုန်းကတော့ ရေတွင်းတွေအများကြီး၊ ဆယ်တွင်းကျော်မယ်ထင်တယ်၊ အခုတော့ အကုန်ခန်းကုန်လို့ သုံး၊ လေး တွင်းပဲကျန်တာ တချို့ရေတွင်းတွေက အနယ်ပါတော့ ခပ်ခဲ့ပြီး အိမ်မှာ အနည်ထိုင်ပြီးသုံးရတာ၊ ကျမတို့က ပိုက်ဆံမရှိ‌တော့ ရေဝယ်မသောက်နိင်လို့ ‌ရေသန့်တဲ့ RC ဘုရားကျောင်းက ရေတွင်းကနေပဲ သောက်ရေ အတွက်သုံးနေတယ်၊ ဟိုရွှေလာလုပ်တဲ့သူတွေက ရေသန့်တွေ ဝယ်သောက်ကြတာပေါ့”

အခုလိုရေခန်း‌ခြောက်လာတာဟာ စက်ယန္တရားကြီးတွေနဲ့ ကျေးရွာမှာ ရွှေတူးဖော်ရာကနေ သိသိသာသာ ရေခန်းခြောက်လာတာဖြစ်ပြီး ရွာအနီးက စမ်းချောင်းတွေလည်း သုံးမရအောင် ရေလမ်းကြောင်းပြောင်းတာ ၊ ရေညစ်ညမ်းတာတွေ ဖြစ်ပေါ်နေတယ်လို့သိရပါတယ်။

၂၄ နာရီ အချိန်ပြည့်လည်ပတ်နေတဲ့ ရွှေလုပ်ငန်းက စက်ယန္တရားသံတွေကြောင့် ကျေးရွာနေပြည်သူတွေ ညအိပ်ချိန်ကောင်းစွာမအိပ်ရဘဲ ကလေးငယ်နဲ့ သက်ကြီးရွယ်အိုတွေ အတွက်လည်း အခက်ခဲဖြစ်နေတယ်လို့ သိရပါတယ်။

အမည်မဖော်လိုတဲ့‌ ဒေသခံတစ်ဦးက“စက်အသံက နှစ်ဆယ့်လေးနာရီ မြည်နေတော့ အဘိုးအဘွားတွေလည်း အိမ်မရကြဘူး။ အိပ်ရေးမဝတော့ နေမကောင်းတာတွေ ဖြစ်လာတယ်၊ ကျမကလေးဆိုရင် ညဆို စက်သံတွေကြောင့် ခဏခဏ လန့်နိုးတယ်” လို့ ပြောပါတယ်။

လက်ရှိ နမ့်ဆန်ယန်ကျေးရွာမှာ ၂၀၁၇ ခုနှစ်ကတည်းက နေရပ်ပြန်ပြီးနေထိုင်နေတဲ့ အိမ်ထောင်စုပေါင်း ၁၅၀ နီးပါး နေထိုင်နေတာပါ။  အိမ်ထောင်စု ၅၀၀ ‌ကျော်ရှိခဲ့တဲ့ နမ်ဆန်ယန်ကျေးရွာဟာ ၂၀၁၁ ခုနှစ်ကတည်းက တိုက်ပွဲတွေကြောင့် တစ်ရွာလုံး တိမ်းရှောင်ခဲ့ရတာပါ။ 

2 days Ago

December 15, 2021

ကချင်ပြည်နယ်အတွင်း အထိန်းအကွပ်မရှိ ရွှေတူးဖော်နေ (ဓာတ်ပုံ)

သဘာဝသယံဇာတတွေ ပေါကြွယ်ဝတဲ့ ကချင်ပြည်နယ်မှာ နေ့စဥ်နေ့တိုင်း တွင်းထွက်သယံဇာတတွေကို ပုံစံမျိုးစုံနဲ့ တူးဖော်နေကြရာမှာ အခုအချိန်တော့  ရွှေတူးဖော်မှုတွေကို ပြည်နယ် နေရာအနှံ့မှာ အထိန်းအကွပ်မရှိ တူးဖော်နေကြတာပါ။

စစ်အာဏာသိမ်းပြီးနောက်ပိုင်း တရားမဝင် ရွှေတူးဖော်တွေနဲ့ပတ်လို့  တာဝန်ယူဖြေရှင်းပေးနိုင်တဲ့ သူတွေလည်း မရှိတာကြောင့် အာဏာပိုင်တွေနဲ့ နီးစပ်ရာလုပ်ငန်းရှင်တွေ အပြိုင် လုပ်ကိုင်နေကြတာလို့လည်း ဒေသခံတွေက ပြောပါတယ်။

တရားမဝင် စည်းစနစ်မကျ ရွှေတူးဖော်မှုတွေကြောင့် သဘာဝပတ်ဝန်းကျင် ပျက်စီးတာ၊ စိုက်ပျိုးလယ်ယာမြေတွေ ပျက်စီးတာ၊ သဘာဝ ချောင်းရေ၊ မြစ်ရေ ညစ်ညမ်းတာတွေကို ပြည်သူတွေက ရင်ဆိုင်နေရပါတယ်။ 

မြန်မာနိုင်ငံရဲ့ အသက်သွေးကြောဖြစ်တဲ့ ဧရာဝတီမြစ်ကြီးရဲ့ မြစ်ဖျားခံရာ မေခနဲ့မလိခ ပေါင်းဆုံရာ မြစ်ဆုံဒေသတွေမှာ စက်ယန္တရားကြီးတွေ တူးဖော်နေကြပြီး မြစ်ဆုံအထက်ပိုင်းနဲ့ မြစ်ဆုံအောက်ပိုင်း မြစ်ကြောင်းတလျှောက်မှာလည်း ‌ရွှေတူးဖော်မှုတွေကို တနိုင်တပိုင် လက်လုပ်တူးဖော်မှုတွေကနေ စက်ယန္တရားကြီးတွေနဲ့ တူးဖော်နေကြပါတယ်။ 

ကချင်ပြည်နယ်က ဒေသခံပြည်သူတွေကတော့ မြစ်ဆုံဒေသ‌ ရွှေတူးဖော်မှုတွေနဲ့ သဘာဝပတ်ဝန်းကျင်ကို ပျက်စီးစေတဲ့ တရားမဝင် စည်းကမ်းမဲ့ရွှေတူးဖော်မှုတွေကို ပုံစံမျိုးစုံနဲ့ ကန့်ကွက်နေကြပါတယ်။

1 month Ago
Up