ရွှေဈေး

October 27, 2021

ကန်ဒေါ်လာဈေး၊ ရွှေဈေး ဆက်လက်ကျဆင်း

စစ်အာဏာသိမ်းပြီးနောက် နိုင်ငံရေး၊ စီးပွားရေး မတည်ငြိမ်မှုတွေနဲ့အတူ တရိပ်ရပ်မြင့်တက်ခဲ့တဲ့ ဒေါ်လာဈေး နဲ့ ရွှေဈေးနှုန်းတွေဟာ အခုရက်ပိုင်းမှာ ပြန်လည်ကျရိပ်ပြလာပါတယ်။

တစ်လအတွင်း ဒေါ်လာဈေး တစ်ဒေါ်လာကျပ် ၉၀၀နီးပါး ကျဆင်းခဲ့ပြီး၊ ရွှေဈေးက တစ်လအတွင်း ကျပ် ၅ သိန်းနီးပါး ပြန်ကျဆင်းလာတာပါ။

ပြီးခဲ့တဲ့ စက်တင်ဘာလ နှောင်းပိုင်းမှာ မြန်မာကျပ်ငွေနဲ့ကန်ဒေါ်လာငွေလဲနှုန်း တစ်ဒေါ်လာကို ကျပ် ၃၀၀၀ နီးပါးထိ စံချိန်တင်ဈေးမြင့်တက်ခဲ့ပေမဲ့ အောက်တိုဘာ ၂၇ရက်နေ့မှာတော့ တစ်ဒေါ်လာကို ကျပ် ၁၈၃၀ထိ ပြန်ကျဆင်းလာပါတယ်။ 

အလားတူ ရွှေဈေးနှုန်းကလည်း တစ်ကျပ်သားကို ကျပ် ၂၂၀၀၀၀၀ ထိ စံချိန်မြင့်တက်ခဲ့ရာကနေ အခုအခါမှာ ကျပ် ၁၇၁၀၀၀၀ ကို ပြန်ကျဆင်းခဲ့တာပါ။

စစ်ကောင်စီ ဗဟိုဘဏ်ကလည်း ဒေါ်လာစျေးကျဆင်းဖို့အတွက် စျေးကွက်အတွင်း ဒေါ်လာထုတ် ရောင်းချတာကို ပမာဏတိုးပြီး ခပ်စိပ်စိပ်လုပ်ဆောင်လာပါတယ်။ 

အခုလအတွင်းမှာပဲ  ဒေါ်လာသန်း ၁၁၀ အထိ စံချိန်တင် ထုတ်ရောင်းချထားပြီး အရင်လတွေထက် ၂ ဆလောက် ပိုများလာပါတယ်။

လက်ရှိမှာ ဒေါ်လာစျေး၊ ကမ္ဘာ့ရွှေစျေးနဲ့အတူ ပြည်တွင်းရွှေစျေး လိုက်ပါကျဆင်းနေပြီး၊ ရန်ကုန်တိုင်း ရွှေလုပ်ငန်းရှင်တွေ အသင်းကလည်း စျေးကွက်ကလိုအပ်တဲ့ ရွှေကို ထုတ်ရောင်းချပေးနေတဲ့အတွက် ရွှေက အကျဘက်ကို သွားနေတာလို့ အသင်းတာဝန်ရှိသူက ပြည်တွင်းမီဒီယာတစ်ခုကို ပြောကြားထားပါတယ်။ 

ကမ္ဘာ့ရွှေစျေးကလည်း အခုအခါမှာ ကျရိပ်ပြနေပြီး ဒီကနေ့မှာတော့ ရွှေတစ်အောင်စကို အမေရိကန် ဒေါ်လာ၁၇၈၉ ရှိနေပါတယ်။ ပြီးခဲ့တဲ့ အောက်တိုဘာ ၂၅ ရက်နေ့ကတော့ ရွှေတစ်အောင်စကို အမေရိကန်ဒေါ်လာ ၁၇၉၉ ဒါ်လာထိရှိခဲ့ပါတယ်။

အဲလိုကျရိပ်ပြနေပေမဲ့လည်း ပြီးခဲ့တဲ့ စက်တင်ဘာ ၂၉ရက်နေ့က ကမ္ဘာ့ရွှေတစ်အောင်စကို အမေရိ ကန်ဒေါ်လာ ၁၇၃၉ ဒေါ်လာသာရှိခဲ့ပြီး ဒေါ်လာစျေးမြင့်တက်နေတာကြောင့် ပြည်တွင်းရွှေစျေးက တစ်ကျပ်သား ကို ကျပ် ၂၂ သိန်းဝန်းကျင်ထိ စံချိန်တင်အမြင့်ဆုံးစျေးကို ရောက်ရှိခဲ့ပါတယ်။

3 months Ago

October 5, 2021

ရွှေဈေး တပတ်အတွင်း ကျပ် ၄ သိန်းခန့် ပြုတ်ကျ

ပြည်တွင်းအကယ်ဒမီရွှေတကျပ်သားစျေးက ရက်သတ္တပတ် တပတ်အတွင်းမှာ ကျပ် ၄ သိန်းခန့် ပြုတ်ကျသွားပြီး ဝယ်လိုအားလည်း ကျသွားတဲ့အကြောင်း ရွှေဝယ်ရောင်းလုပ်ကိုင်သူတွေက ပြောပါတယ်။

ရန်ကုန်ရွှေစျေးကွက်မှာ အကယ်ဒမီရွှေ တကျပ်သားစျေးက စက်တင်ဘာ ၂၈ ရက်က ကျပ် ၂၂ သိန်း ၂ သောင်း အထိ စံချိန်တင်ရှိခဲ့ပြီး ကမ္ဘာ့ရွှေစျေးကတော့ တအောင်စကို အမေရိကန်ဒေါ်လာ ၁၇၄၀ ဒေါ်လာသာ ရှိခဲ့ပါတယ်။

ရက်သတ္တပတ်အကြာ ဒီကနေ့ အောက်တိုဘာ ၅ ရက် မွန်းလွဲ ၁နာရီခွဲမှာ အကယ်ဒမီရွှေ တကျပ်သားစျေးက  ကျပ် ၁၈ သိန်းခွဲသာ ရှိတာကြောင့် ရွှေစျေးက ရက်သတ္တပတ်အတွင်းမှာ ၄ သိန်းခန့် ပြန်ကျသွားပါတယ်။ ကမ္ဘာ့ရွှေစျေးကတော့ တအောင်စကို အမေရိကန်ဒေါ်လာ ၁၇၅၇ ဒေါ်လာရှိပါတယ်။

ပြည်တွင်းအကယ်ဒမီရွှေစျေး အခုလိုကျဆင်းလာတဲ့အပေါ် ရွှေစျေးကွက်လေ့လာသုံးသပ်သူတဦးက “လူတွေက အကြောင်းအမျိုးမျိုးကြောင့် သူတို့မှာ ရှိတဲ့ငွေတွေကို ရွှေနဲ့ ဖလှယ်ပြီး ဝယ်ကြတယ်ပေါ့။ အဲ့လိုဝယ်ယူတဲ့နေရာမှာ ရွှေစျေးက ကိုယ်မှန်း ထားတဲ့ပမာဏလောက် နည်းနည်းလေးရောက်သွားပြီဆိုရင် ထက်မဝယ်နိုင်တော့ဘူး။ အဲ့လိုမဝယ်နိုင်တဲ့ အတိုင်းအတာ ကြောင့်လဲ ရွှေစျေးက ကျတယ်။ ဒုတိယအချက်ကတော့ ရွှေစျေးက နည်းနည်း အေးတယ်လို့ ထင်တာနဲ့ သူသူ၊ကိုယ်ကိုယ် ဝယ်ချင်စိတ်က သိပ်မရှိတော့ဘူး။ အဲ့အတွက်ကြောင့် ရွှေမဝယ်လို့လည်း ရွှေစျေးက ကျတယ်။ တတိယအချက်ကတော့ ပြီးခဲ့တဲ့ရက်မှာ ဗဟိုဘဏ် ကြေညာချက်အရ ပို့ကုန်ရငွေတွေကို ရက်ပေါင်း ၃၀ အတွင်းပြန်ရောင်းဖို့ ထုတ်ပြန်လိုက်တဲ့ အပေါ် ဒေါ်လာစျေးကငြိမ်သွားတယ်။ ဒေါ်လာစျေးငြိမ်သွားတဲ့အတွက်ကြောင့်လည်း ရွှေစျေးက ကျသွားတယ်။ နောက်ဆုံးအချက်ကတော့ ရန်ကုန်တိုင်းရွှေအသင်းက နေ့စဉ် ရွှေပိသာချိန် ၂၀ ထုတ်ရောင်းပေးမယ်လို့ တရားဝင်ကြေညာပြီးတဲ့နောက် ရွှေစျေးက အေးသွားတယ်။ ဆိုတော့ ဒီအချက်တွေကြောင့် ပြည်တွင်းရွှေစျေးက ကျသွားတာပါ” လို့ပြောပါတယ်။

ရန်ကုန်ရွှေစျေးကွက်မှာ ရွှေစျေးနှုန်းကျဆင်းလာတာကြောင့် ရောင်းလိုအား၊ဝယ်လိုအား အခြေအနေနဲ့ပတ်သတ်ပြီး ရွှေလုပ်ငန်းရှင်တဦးက “စျေးကွက်ရဲ့သဘောကတော့ အခုလို စျေးကျလာပြီဆိုရင် ဒါက ဝယ်လိုအားနည်းပြီး ရောင်းလိုအားက များလာလို့ပါ။ ဒါက ထုံးစံပဲလေ။ တကယ်လို့ ဝယ်လိုအားများနေတယ် ဆိုရင်တော့ စျေးက မာတာပေါ့နော်။ အခုက စျေးက ကျနေတာလေ။ ကျနေတာဖြစ်တာကြောင့် ရောင်းလိုအားကများပြီး ဝယ်လိုအားကနည်းသွားတယ်။ ဒါကြောင့်အခု ဆိုရင် အရင်ဝယ်ထားတဲ့ သူတွေကလဲ ဒီအချိန် စျေးအေးမယ်ဆိုပြီးတော့ စျေးကွက်ထဲမှာ ပြန်ထုတ်ရောင်းလာကြတယ်။ အမှန်တကယ်တော့ ရွှေစျေး ၁၈ သိန်းဝန်းကျင်ဆိုတာက ဖြစ်သင့်ဖြစ်ထိုက်တဲ့ စျေးတန်းပါ” လို့ ဆိုပါတယ်။

ပြည်တွင်းနိုင်ငံခြားငွေကြေးစျေးကွက်မှာ အမေရိကန် ၁ ဒေါ်လာတန်ဖိုးက နိုင်ငံခြားငွေရောင်းဝယ်ခွင့်လုပ်ငန်းလိုင်စင်ရရှိထားတဲ့ ငွေလဲကောင်တာတွေမှာ ဒီကနေ့ အောက်တိုဘာ ၅ ရက် ဝယ်စျေးက မြန်မာငွေ ၁၉၃၀ ကျပ်နဲ့ ရောင်းစျေးက ၂၀၈၀ ကျပ်ရှိပါတယ်။

4 months Ago
More News
Up