ရွှေကျင်

October 23, 2021

ရွှေကျင်မြို့က တောင်သူများကို နေကြာစိုက်ရန် စစ်ကောင်စီ ဖိအား​ပေး

ပဲခူးတိုင်း ရွှေကျင်မြို့နယ်က တောင်သူတွေကို စစ်ကောင်စီက နေကြာတွေ စိုက်​ကြဖို့ ဖိအား​ပေး နေတယ်လို့ ဒေသခံတောင်သူတွေက ပြောပါတယ်။

ရွှေကျင်မြို့​ တောင်ဘက်​ခြမ်းက​ ကျေးရွာ​တွေအ​ပြင် ​သောင်လယ်ကျေးရွာနဲ့ အနောက်ဘက် ကျေးရွာတွေက ​ဆောင်းသီးနှံစိုက်တောင်သူတွေကို နေကြာအစားထိုးစိုက်ဖို့ ဖိအား​ပေးနေ တာဖြစ်ပါတယ်။

ဒီနှစ် နေကြာစိုက်ဖို့  နေကြာမျိုးစေ့ကို မြို့နယ်ရုံးမှာ ​တောင်သူ​တွေကို လာရောက်ထုတ်ယူ ခိုင်းနေတယ်လို့ တောင်သူတစ်ဦးက ပြောပါတယ်။

နေကြာမျိုးစေ့ကို ထုတ်ဖို့ မြို့နယ်ရုံးကို ခေါ်ထားတာကြောင့် တချို့တောင်သူတွေက မယူချင်​ပေမဲ့ ကြောက်လန့်တာကြောင့် ​သွားယူ​နေ​ကြရ​ပြီး မယူဘဲ တင်းခံနေကြတဲ့ ​တောင်သူတွေလည်းရှိတယ်လို့ ဆိုပါတယ်။

တောင်သူတစ်ဦးက “အနောက်ဘက်ရွာက တောင်သူ တော်တော်များများ သွားမယူကြဘူး။ ကိုယ့်ယာထဲ ကိုယ်စိုက်ချင်ရာ စိုက်မှာပေါ့။ ကိုယ့်မြေကိုယ့်ရေနဲ့ ကိုက်ညီတာ စိုက်မှ ရမှာ​လေ။  ဒါကို နေကြာစိုက်ကို စိုက်ရမယ်ဆိုပြီ အတင်းစိုက်ခိုင်း​နေတာကတော့ ​တောင်သူ​တွေအ​ပေါ် အနိုင်ကျင့်နေတာပဲ” လို့ ပြောပါတယ်။

​ရွှေကျင်မြို့ဟာ စစ်တောင်းမြစ်ဝှမ်းဒေသဖြစ်တာကြောင့် ​ ​မြေပဲ၊ သခွါး၊ ဖရဲနဲ့ ဆောင်းသီးနှံ​တွေကို သာ အဓိကထား စိုက်ပျိုးကြတာ​ဖြစ်​ပြီ နေကြာစိုက်ပျိုးတဲ့ အလေ့အထနည်းပါး​တဲ့ ​ဒေသ တစ်ခုလည်း​ဖြစ်ပါတယ်။

ရွှေကျင်မြို့မှာ မတ်ပဲစိုက်ဧက နှစ်သောင်း​ကျော်၊ ပဲဖြူလေး နှစ်သောင်းကျော်၊ အခြားပဲ၊ သခွါးနဲ့ ဖရဲ စိုက်ဧကပေါင်း တစ်သောင်း စုစုပေါင်း စိုက်ဧက ငါး​သောင်း​ကျော်ရှိတယ်လို့ သိရပါတယ်။

3 months Ago

October 10, 2021

ရွှေကျင်မြို့နယ်က ကျေးရွာများ၌ စစ်ကောင်စီက ပြည်သူ့စစ်အင်အား အဓမ္မစု​ဆောင်း

ပဲခူးတိုင် ရွှေကျင်မြို့နယ်က ကျေးရွာတွေမှာ စစ်ကောင်စီလက်အောက်ခံတပ်​တွေက ​ပြည်သူ့ စစ်အင်အားကို အဓမ္မလိုက်လံစုဆောင်းတောင်းယူနေတယ်လို့ ဒေသခံတွေက ပြောပါတယ်။

ကျေးရွာအုပ်စု တအုပ်စုကို ပြည်သူ့စစ်အင်အား ၃၀ လိုက်လံစု​ဆောင်း​နေပြီ ပြည်သူ့စစ်အင်အား မပေးနိုင်ပါက လူငှားထည့်ဖို့ ငွေးကြေး​ပေးရမယ်ဆိုပြီး ခြိမ်းခြောက်တာတွေ လုပ်နေတယ်လို့ ဆိုပါတယ်။

စစ်ကောင်စီတပ်ဟာ ကွင်းဆိပ်ကျေးရွာ၊ ဒုံဇရစ်ကျေးရွာ၊ အနောက်ဘက်ကျေးရွာ၊ တံခွန်တိုင် ကျေးရွာနဲ့ ဝင်းခနိမ်ကျေးရွာ အပါအဝင် ကျေးရွာအုပ်စုတော်တော်များများမှာ လိုက်လံ စုဆောင်းနေတာပါ။

တိုင်းရင်းသားလက်နက်ကိုင်အဖွဲ့တွေနဲ့ နီးကပ်တဲ့ ရွာတွေမှာ တိတ်တဆိတ်စုဆောင်းတာတွေ လုပ်နေ​ပေမဲ့ ​မြို့နဲ့နီးကပ်တဲ့ ရွာ​တွေ၊ စစ်​ကောင်စီရဲ့တပ်ရင်းနဲ့ နီးကပ်တဲ့ရွာတွေမှာဆိုရင် အဓမ္မစုဆောင်း တောင်းခံတာ၊ ခြိမ်းခြောက်​ငွေ ​တောင်းတာတွေ လုပ်နေတယ်လို့ ဒေသခံတစ်ဦးက ပြောပါတယ်။

သုံးကြိမ်တိုင်တိုင် ရွာကို ရောက်လာပြီး ခြိမ်း​ခြောက်ကာ ပြည်သူ့စစ်အင်အား မပေးနိုင်ပါက လူငှားထည့်ပေးဖို့ လူတစ်ဦးကို ငှားခ ၁ သိန်းခွဲတောင်းခံတယ်လို့ ဆိုပါတယ်။

ဒေသခံတဦးက “တချို့ လူငယ်တွေ၊ လူလတ်ပိုင်းတွေက ရွာတွေမှာ မနေရဲလို့ တိမ်းရှောင်တာတွေ ရှိနေကြတယ်။ သူတို့ ပြည်သူ့စစ်အင်အားတောင်းလို့ ရှောင်တော့လည်း ဘယ်သွားနေလဲ၊ PDF ထဲ ဝင်သွားတာလား၊ ပြန်ခေါ်ပေးဆိုပြီး လုပ်ပြန်တယ်။ ရွာမှာ လူငယ်လူရွယ်မရှိတာနဲ့ PDF ထဲ ဝင်တယ်လို့ သူတို့က ထင်တယ်။ သူတို့ကြောင့် ရှောင်နေရတာကို မတွေးဘူး။”

စစ်ကောင်စီဘက်က အပစ်အခတ်ရပ်ဖို့  ၅ လ ကြေညာထားပေမဲ့ ရွှေကျင်မြို့နယ်နဲ့ ထိစက်နေတဲ့ တိုင်းရင်းသားလက်နက်ကိုင်အဖွဲ့တွေရှိတဲ့ ဒေသတွေမှာ စစ်ကောင်စီက တပ်အင်အားတိုးချဲ့တာ စစ်ဘက်သုံးလေယာဉ်တွေနဲ့ နေ့စဉ် ကင်းထောက်နေတာကြောင့် ဒေသခံပြည်သူတွေ ကြောက်ရွံ့ထိတ်လန့်နေကြတယ်လို့ သိရပါတယ်။

3 months Ago
More News
Up