ရွှေကူမြို့

June 9, 2021

ရွှေကူမြို့တွင် ညမထွက်ရအချိန်ပြင်ဆင်သတ်မှတ်၊ မိုးမလင်းဈေးသည်များ အခက်ကြုံ

ကချင်ပြည်နယ်‌၊ ရွှေကူမြို့မှာ ဇွန် ၈ ရက်နေ့စတင်ပြီး စစ်ကောင်စီက ညမထွက်ရအမိန့်ကို ည ၉ နာရီမှ မနက် ၄ နာရီအထိ ပြင်ဆင်ထုတ်ပြန်လိုက်တဲ့အ‌ပေါ် ရွှေကူမြို့နယ်အတွင်း ကျေးရွာတွေကနေ မြို့ပေါ်မှာ ဈေးလာရောင်းတဲ့  မိုးမလင်းဈေးသည်တွေက စိုးရိမ်နေကြပါတယ်။ 

ရွှေကူမြို့နယ်အတွင်း ကျေးရွာတချို့က မိုးမလင်း ဈေး‌သည်တွေဟာ ည ၁၂ နာရီ လောက်ကနေစပြီး ဈေးရောင်းချဖို့ ပြင်ဆင်သွားလာကြရတာကြောင့် အခု ပြင်ဆင်ထုတ်ပြန်လိုက်တဲ့ အမိန့်ကြေညာချက်က မိုးမလင်းဈေးသည်တွေအတွက် အခက်အခဲ ကြီးမားနေတာ ဖြစ်ပါတယ်။

မိုးမလင်းဈေးသည်တစ်ယောက်က “အရင်က ကိုဗစ်ကာလ ထုတ်ပြန်ချက်တွေတုန်းကလည်း ရောဂါအခြေအနေအရ လူစုလူဝေးနဲ့ အပြင်ထွက်တဲ့ အချိန်တွေကို အမိန့်စာထုတ်ပြီး ကန့်သတ်တာတွေ ရှိတယ်။ အဲဒီအခြေအနေနဲ့ အခုအ‌ခြေအနေက လုံးဝကွဲပြားတယ်လေ။ အခုချိန်မှာ ဥပဒေက သူတို့ ပြောရာပဲဖြစ်နေတော့ အန်တီတို့မှာလည်း အရင်ကတည်းက ဒီအလုပ်နဲ့ပဲ အသက်မွေးလာတာလေ။ အခုအခြေအနေမှာ ကိုယ်က ရိုးရိုးသားသား ဈေးရောင်းဖို့ လာရင်တောင် သူတို့ကို ဆန့်ကျင်တယ်လို့ ယူဆပြီးပစ်သတ်ခွင့်ရှိနေတာလေ” လို့ ပြောပါတယ်။

ရွေကူမြို့မှာ အရင်က  ည ၈ မှ မနက် ၄ အထိ ညမထွက်ဖို့  စစ်ကောင်စီက အမိန့်ထုတ်ပြန်ထားရာက အခု ဇွန်လ ၈ ရက်မှာတော့ ည ၉ ကနေ မနက် ၄ အထိ ညမထွက်ဖို့ ပြောင်းလဲမှတ်လိုက်တာပါ။

ခုလို ပြောင်းလဲလိုက်တာနဲ့ပတ်သက်ပြီး ဒေသခံတစ်ဦးက “အခု ထုတ်ပြန်လိုက်တဲ့ ညမထွက်ရအမိန့်က သာမန်ကြည့်မယ်ဆိုရင်တော့ ဖြေလျှော့ပေးသလိုလို မြင်ရတယ်ဗျ။ အာဏာသိမ်းပြီးမကြာခင် ည ၈၊ မနက် ၄ ထုတ်ပြန်ထားတုန်းက အကြမ်းဖက်စစ်ကောင်စီရဲ့ ကိုင်တွယ်ပုံထက် အခုနောက်ပိုင်းက ပိုပြီးပြင်းထန်လာတာတွေ ရှိတယ်ခင်ဗျ။ ည ၈ နာရီကျော်သည်ဖြစ်စေ၊ မကျော်သည်ဖြစ်စေ သူတို့ ဖမ်းချင်ပစ်ချင်ရင် အချိန်မရွေး ပစ်ခတ်ဖမ်းဆီးတာတွေရှိနေတဲ့အပေါ် အခုလို ပြင်ဆင် သတ်မှတ်လိုက်တဲ့အခါ မိုးမလင်းဈေးသည်တွေအတွက် ပိုပြီးဘောင်ကျဉ်းသွားတဲ့ အနေအထားမျိုး ဖြစ်သွားတယ်ဗျ။ မိုးမလင်းဈေးသည်တွေက မနက် ၁ နာရီလောက်ဆို သွားလာနေကြပြီး စစ်ကောင်စီဘက်ကလည်း ဖောက်ခွဲမှုတွေ ခဏခဏဖြစ်နေတဲ့အတွက် ညပိုင်းအချိန်ကို‌ လျှော့လိုက်ပြီး မနက်ပိုင်း‌တွေမှာ ပိုပြီးတင်းကျပ်မယ့်အ‌‌နေအထား ဖြစ်‌နေတာပါ” လို့ ပြောပါတယ်

မနေ့က အသစ်ထုတ်ပြန်လိုက်တဲ့အမိန့်စာမှာ “အများပြည်သူ တည်ငြိမ်အေးချမ်းစေရန်”လို့ စစ်ကောင်စီက အကြောင်းပြထားပေမဲ့ ဒေသခံ ကျေးလက်ပြည်သူတွေအတွက်တော့ အခု ထုတ်ပြန်လိုက်တဲ့ အမိန့်စာကြောင့် စိုးရိမ်မှုတွေ ပိုမိုမြင့်တက်လာနေပါတယ်။

ဒါ့အပြင် ရွှေကူမြို့နယ်အတွင်း လူ ၅ ဦးထက်ပိုမစုဖို့၊ စုဝေးဟောပြော  စီတန်းလှည့်လည် ဆန္ဒပြတာတွေမလုပ်ဖို့ လည်း စစ်ကောင်စီအကြမ်းဖက်အဖွဲ့က  တားမြစ်ပိတ်ပင်ထားပါတယ်။ 

6 months Ago

အကြမ်းဖက်စစ်ကောင်စီကို ဝင်ငွေရှာပေးနေသည့် ရွှေကူမြို့ လောင်းကစားဝိုင်း နေရာပြောင်းရွှေ့

ကချင်ပြည်နယ်၊ ရွှေကူမြို့နယ်မှာ အကြမ်းဖက်စစ်ကောင်စီအတွက် အဓိကငွေဝင်လမ်းကြောင်း တခုဖြစ်တဲ့ လောင်းကစားဝိုင်းတွေကို ရွှေကူမြို့နယ် ငါးဘက်ဝကျေးရွာအနီး တောစပ်မှာ ပြောင်းရွှေ့ ဖွင့်လှစ်နေတယ်လို့ ဒေသခံတစ်ဦးက ပြောပါတယ်။

“ဖွင့်တာကတော့ မနက်ကနေ ညနေအထိ တနေကုန် ဖွင့်တယ်။ အခုနောက်ပိုင်း ညရော ဖွင့်ကြတယ်ဗျ။ နေရာကတော့ ကျနော်တို့ဒေသအခေါ်  ဘိုးထွန်းအုပ်ကုန်းထိပ်မှာ ဖွင့်ထားတာဗျ။ တခါတလေ ဧရာဝတီမြစ်ကြောင်းကပဲဖြစ်ဖြစ် ကုန်းလမ်းကပဲဖြစ်ဖြစ် စစ်ကြောင်းထိုးတယ် ဘာညာဆိုပြီး အသံထွက်တဲ့နေ့ဆို ခဏနားလိုက်တယ်။ ပြီးရင် ပြန်ဖွင့်တယ်ဗျ။” လို့ ပြောပါတယ်။

အဆိုပါလောင်းကစားဝိုင်းကို ရဲနဲ့ စစ်သားတွေလည်းလာရောက်လေ့ရှိတယ်လို့ ဒေသခံက ပြောပါတယ်။

အရင်ကလောင်းကစားဝိုင်းတွေကို ရွှေကူ အောက်လေးလမ်းဆုံအနီးနဲ့ မန္တလေး‌-ဗန်းမော် ဗျူဟာလမ်းမကြီးဘေးမှာဖွင့်လှစ်ခဲ့တာဖြစ်ပြီး  ပေါက်ကွဲမှုတချို့ ဖြစ်ပွားပြီးနောက် အခုလို နေရာပြောင်းရွှေ့ ဖွင့်လှစ်နေတာဖြစ်ပါတယ်။

အဆိုပါလောင်းကစားဝိုင်းတွေကို လူငယ်တွေ မသွားကြဖို့နဲ့ သွားသူတွေရဲ့ အသက်အန္တရာ ယ်ကို အာမမခံဘူးလို့  ရွှေကူမြို့နယ် ပြည်သူ့ကာကွယ်ရေးတပ်ဖွဲ့ (SPDF) က ထုတ်ပြန်ကြေညာထားပါတယ်။

6 months Ago

June 8, 2021

ရွှေကူမြို့က ဖမ်းဆီးခံလူငယ်များကို ၃ လပြည့်သည်အထိ စီရင်ချက်မချသေး

ကချင်ပြည်နယ်၊ ရွှေကူမြို့မှာ အကြမ်းဖက်စစ်အာဏာရှင်ကို တော်လှန်ရင်း မတ်လ ၈ ရက်နေ့ကတည်းက  ဖမ်းဆီးခံရတဲ့ လူငယ်တွေကို ၃ လပြည့်တဲ့ ယနေ့ ဇွန်လ ၈ ရက်နေ့အထိ စီရင်ချက်မချသေးဘူးလို့သိရပါတယ်။

လက်ရှိ ဗန်းမော်အကျဉ်းထောင်မှာ ဖမ်းဆီးခံထားရတဲ့ အဆိုပါလူငယ်တွေကို ရာဇသတ်ကြီး ပုဒ်မ ၅၀၅ (ခ)၊ ပုဒ်မ ၂၅ (က) စတဲ့ပုဒ်မတွေနဲ့ အကြမ်းဖက် စစ်အုပ်စုက တရားစွဲထားတာဖြစ်ပြီး  လူငယ်တချို့ကို  ပုဒ်မတွေ ထပ်တိုးလာနိုင်တယ်လို့ ဖမ်းဆီးခံလူငယ်တွေရဲ့ မိသားစုဝင်တွေက ပြောပါတယ်။

“သူတို့ကို မတ်လ ၈ ရက်နေ့က ဖမ်းတာ ဒီနေ့ဆို ၃ လတင်းတင်းပြည့်ပြီ။ ဗန်းမော် အကျဉ်းထောင်မှာ အဆင်ပြေတယ်လို့တော့ တဆင့်စကားတွေကနေ ကြားရတာပဲ။ တွေ့ခွင့်ကတော့ ကိုဗစ်ခေါင်းစဉ်အောက်ကနေ ငြင်းပယ်ခံရတာပေါ့။ ပထမတပ်ထားတဲ့ပုဒ်မတွေအပြင် နောက်ထပ် ပုဒ်မတွေ ထပ်တိုးခံရနိုင်တယ်လို့ ကြားတယ်။ ဥပမာ ပုဒ်မ ၂၅ နဲ့ဖမ်းဆီးထားတဲ့သူတွေကို ပုဒ်မ ၅၀၅(က) တပ်လာနိုင်တယ်ပေါ့နော်။ ဘာပြောချင်လဲ ဆိုရင်တော့ ဒီအရေးတော်ပုံကို အောင်မြင်အောင်ဆက်ပြီး တိုက်ပွဲဝင်သွားကြရအောင်ပေါ့နော်။ အခု ဖမ်းဆီးခံထားရတဲ့ နိုင်ငံ့ ခေါင်းဆောင်‌ကြီးတွေအပါအဝင်ပေါ့နော်။ အားလုံးကို သူတို့က အငြိုးကြီးကြီးနဲ့ နှိပ်ကွပ်နေတာလေ။ အဲဒီတော့ ဒီတိုက်ပွဲကနိုင်မှကိုဖြစ်မှာ” လို့ ပြောပါတယ်။

ရွှေကူမြို့နယ်မှာ အကြမ်းဖက်စစ်ကောင်စီ အာဏာသိမ်းပြီးနောက် အန်အယ်လ်ဒီ ပါတီဝင်တွေ အပါအဝင် ဖမ်းဆီးထိန်းသိမ်းခံရသူ ၈ ဦးအထိရှိနေတာဖြစ်ပါတယ်။

6 months Ago
More News
Up