ရွေးကောက်ပွဲဥပဒေ

November 21, 2020

ဧရာဝတီတိုင်းတွင် မဲရုံမှူးအပါအဝင် ၇ ဦးကို ရွေးကောက်ပွဲဥပဒေဖြင့် အရေးယူ

ဧရာဝတီတိုင်းဒေသကြီးအတွင်း ၂၀၂၀ ရွေးကောက်ပွဲမှာ ကိုယ်စားမဲပေးခဲ့တာနဲ့ပတ်သက်ပြီး မဲရုံမှူးအပါအဝင် ၇ ဦးကို ရွေးကောက်ပွဲဥပဒေတွေနဲ့ အရေးယူထားတယ်လို့ နိုဝင်ဘာလ ၂၀ ရက်နေ့မှာ ကော်မရှင်ကထုတ်ပြန်ခဲ့ပါတယ်။ ရွေးကောက်ပွဲဥပဒေအပါဝင် ရာဇသတ်ကြီးဥပဒေနဲ့ အရေးယူခံထားရသူတွေဟာ ကိုယ်စား မဲပေးခဲ့သူ ၅ ဦးနဲ့ မဲ ၂ ကြိမ်ပေးခဲ့သူ၊ မဲပေးခန်းနဲ့ ပစ္စည်းတွေကို ဖျက်ဆီးခဲ့သူတို့ပါဝင်တယ်လို့ သိရပါတယ်။ ကိုယ်စားမဲပေးလို့ အရေးယူခံထားရတဲ့သူတွေကတော့ သာပေါင်းမြို့နယ်၊ လေးမျက်နှာမြို့နယ်၊ မြောင်းမြမြို့နယ်၊ ကန်ကြီးထောင့်မြို့နယ်တို့ကဖြစ်ပြီး မဲ ၂ ကြိမ်ပေးတာနဲ့ မဲပေးခန်းနဲ့ ပစ္စည်းတွေ ဖျက်ဆီးတာကြောင့် အရေးယူထားတာက လေးမျက်နှာမြို့နယ်က ဖြစ်တယ်လို့ ထုတ်ပြန်ချက်တွေအရ သိရပါတယ်။ ကိုယ်စားမဲပေးတာနဲ့ မဲ ၂ ကြိမ်ပေးတာခွင့်ပြုပေးလို့ အရေးယူခံထားရသူတွေက သာပေါင်း မြို့နယ်၊ ကင်းတပ်ကျေးရွာအုပ်စုကော်မရှင် အဖွဲ့ခွဲအတွင်းရေးမှူးနဲ့ မြောင်းမြမြို့နယ်၊ ရန်မနိုင်ကျေးရွာ မဲရုံ ၂ မဲရုံမှူးတို့ဖြစ်တယ်လို့ သိရပါတယ်။ ကိုယ်စားမဲပေးတာ၊ မဲပေးဖို့အတွက်ခွင့်ပြုတာ မဲပေးခန်းနဲ့ ပစ္စည်းတွေကို ဖျက်ဆီးတာနဲ့ပတ်သက်ပြီး ပြစ်မှုကျူးလွန်ခဲ့သူတွေကို သက်ဆိုင်ရာနယ် မြေရဲစခန်းတွေမှာ ရာဇသတ်ကြီးပုဒ်မ ၄၂၀/၄၆၈၊ သက်ဆိုင်ရာလွှတ်တော်ရွေးကောက်ပွဲဥပဒေပုဒ်မ ၅၈/၅၉ တို့နဲ့ အမှုဖွင့် အရေးယူထားတယ်လို့ ကော်မရှင်ကထုတ်ပြန်ပါတယ်။ မင်းထက်မုန်း (ပုသိမ်)
1 year Ago

November 8, 2020

ပြည်သူ့ပါတီကိုယ်စားလှယ်လောင်း ၃ ယောက်ကို အမှုဖွင့်ထားဟု ကော်မရှင်ပြော

ဧရာဝတီတိုင်းထဲမှာ ပြည်သူ့ပါတီက ကိုယ်စားလှယ်လောင်း ၃ ယောက်ကို ရွေးကောက်ပွဲဥပဒေနဲ့ အမှုဖွင့်ထားတယ်လို့ ပြည်ထောင်စုရွေးကောက်ပွဲကော်မရှင်က ထုတ်ပြန်ပါတယ်။ အမှုဖွင့်ခံထားရသူတွေက ကျုံပျော်မြို့နယ်ကနေ ဝင်ရောက်ယှဉ်ပြိုင်မယ့် ပြည်သူ့ပါတီက ပြည်သူ့လွှတ်တော် ကိုယ်စားလှယ်လောင်း ဦးအောင်ကျော်လွင်၊ တိုင်းလွှတ်တော်မဲဆန္ဒနယ်အမှတ် ၁ က ကိုယ်စားလှယ်လောင်း ဦးသန်းငွေနဲ့ တိုင်းလွှတ်တော်မဲဆန္ဒနယ်အမှတ်-၂ က ကိုယ်စားလှယ်လောင်း ဦးမြသောင်းတို့ပဲ ဖြစ်ပါတယ်။ သူတို့ဟာ ဆန္ဒမဲပေးတာကို ပျက်ပြားအောင်၊ ရွေးကောက်ပွဲပျက်ပြားအောင်ရည်ရွယ်ပြီး သူတို့ ရွေးကောက်တင်မြှောက်ခံရရေး မြို့နယ်ရွေးကောက်ပွဲကော်မရှင်အဖွဲ့ခွဲနဲ့ ကျေးရွာအုပ်စု ကော်မရှင်အဖွဲ့ခွဲတို့ကို မမှန်မကန်စွပ်စွဲတာတွေ တွေ့ရှိခဲ့ရတာကြောင့် အခုလို အမှုဖွင့်အရေးယူတာလို့ ထုတ်ပြန်ချက်က ဆိုပါတယ်။ ဒါ့အပြင် ရွေးကောက်ပွဲကော်မရှင်က ဧရာဝတီတိုင်း မအူပင်မြို့နယ် အမှတ် ၈ ရပ်ကွက်နေ မဲဆန္ဒရှင် မပုံပုံကို အမှတ် ၇ ရပ်ကွက်၊ မဲရုံ ၂ မှာ တကြိမ်၊ အမှတ် ၈ ရပ်ကွက် မဲရုံ ၁ မှာ တကြိမ်၊ စုစုပေါင်း ၂ ကြိမ်မဲပေးခဲ့တာကို စစ်ဆေးတွေ့ရှိခဲ့ရတာကြောင့် အရေးယူခဲ့ပြီး  မွန်ပြည်နယ် ရေးမြို့နယ်မှာလည်း ပြည်ခိုင်ဖြိုးပါတီက မဲရုံအကူကိုယ်စားလှယ် ဒေါ်နုနုဝင်းဆီကနေ UEC တံဆိပ်မပါတဲ့ တံဆိပ်တုံးတခု၊ တံဆိပ်မပါတာတခုကို တွေ့ခဲ့ရတာကြောင့် အရေးယူထားတယ်လို့ ဆိုပါတယ်။ သူတို့ကိုတော့ သက်ဆိုင်ရာရဲစခန်းတွေမှာ ရာဇသတ်ကြီး ပုဒ်မ ၄၂၀/၄၆‌၈ တို့အပြင် လွှတ်တော်ရွေးကောက်ပွဲဥပဒေပုဒ်မ ၅၈၊ ၅၉ တို့နဲ့ပါ အမှုဖွင့်ထားတယ်လို့ ကော်မရှင်ထုတ်ပြန်ချက်မှာ ဖော်ပြပါတယ်။ ရာဇသတ်ကြီး ပုဒ်မ ၄၂၀ နဲ့ ၄၆၈ တို့ဟာ ပြစ်မှုထင်ရှားရင် ထောင်ဒဏ် ၇ နှစ်အထိ ချမှတ်နိုင်ပြီး လွှတ်တော်ရွေးကောက်ပွဲ ဥပဒေပုဒ်မ ၅၈၊ ၅၉ တို့ကတော့ ကျူးလွန်ကြောင်း စီရင်ခံရရင် ထောင်ဒဏ်အများဆုံး ၁ နှစ်၊ ငွေဒဏ်အများဆုံး ၁ သိန်း၊ ဒါမှမဟုတ် ဒဏ် ၂ ရပ်လုံး ကျခံရမှာ ဖြစ်ပါတယ်။
1 year Ago
Up