ရွေးကောက်ပွဲကော်မရှင်

September 14, 2021

စစ်ကောင်စီရွေးကောက်ပွဲကော်မရှင်က အန်အယ်လ်ဒီထံပေးပို့သည့်စာ ဒေါ်အောင်ဆန်းစုကြည် လက်မခံ

အမျိုးသားဒီမိုကရေစီအဖွဲ့ချုပ် (အန်အယ်လ်ဒီ)ပါတီရဲ့  ပိုင်ဆိုင်မှုကို စစ်ဆေးဖို့အတွက်  ရန်ကုန်မြို့ ဗဟန်းမြို့နယ်၊ ရွှေဂုံတိုင်ရှိ ပါတီရုံးချုပ်ကို  စစ်ကောင်စီရွေးကောက်ပွဲကော်မရှင်က စာနှစ်စောင် ပေးပိုခဲ့ပါတယ်။  

အဆိုပါ စာနှစ်စောင်ကို ရှေ့နေအဖွဲ့က စက်တင်ဘာ ၁၄ ရက် ဒီနေ့ ရုံးချိန်းမှာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ထံ   ပေးအပ်ခဲ့ပေမယ့် မယူခဲ့ဘူးလို့ ရှေ့နေဦးခင်မောင်ဇော်က ပြောပါတယ်။

ရှေ့နေဦးခင်မောင်ဇော်က "ဒေါ်အောင်ဆန်းစုကြည်က စာအိတ်မှာပါတဲ့ လိပ်စာကိုကြည့်ပြီး သူ့ကို ပေးတာမဟုတ်ဘူးတဲ့။ ဗဟိုအလုပ်အမှုဆောင်အဖွဲ့ကိုပေးတာတဲ့။ စစ်ဆေးဖို့အတွက်ဖိတ်တဲ့ကိစ္စ။ သူက ဗဟိုအလုပ်အမှုဆောင်တဖွဲ့လုံးက ဆုံးဖြတ်ရမယ့်ကိစ္စဖြစ်တယ်။ သူတစ်ယောက်တည်း ဆုံးဖြတ်ခွင့်မရှိဘူး။ ဒါကြောင့် ဒီကိစ္စကိုလက်မခံဘူးဆိုပြီးတော့ ပြန်ပေးလိုက်ပါတယ်ဗျ။ ရွေးကောက်ပွဲကော်မရှင်က ပေးတဲ့စာနှစ်စောင်ပါ" လို့ ပြောပါတယ်။

စစ်ကောင်စီရွေးကောက်ပွဲကော်မရှင်က နိုင်ငံရေးပါတီတွေရဲ့ပိုင်ဆိုင်မှုတွေနဲ့ ဝင်ငွေရတဲ့ လမ်းကြောင်းတွေကို စစ်ဆေးမယ်လို့ ဩဂုတ်လ ၁၃ ရက်က ကြေညာချက်ထုတ်ပြန်ခဲ့တာပါ။

၂၀၂၀ ရွေးကောက်ပွဲမှာ မဲစာရင်းတွေမှားတယ်လို့ စစ်ကောင်စီက စွပ်စွဲပြီး နိုင်ငံတော် အာဏာကို တရားမဝင် သိမ်းယူခဲ့ပြီးနောက် ရွေးကောက်ပွဲကော်မရှင်အသစ်ကိုလည်း  ဖွဲ့စည်းခဲ့ပါတယ်။ 

စစ်ကောင်စီခန့်  ရွေးကောက်ပွဲကော်မရှင် ဥက္ကဋ္ဌ ဦးသိန်းစိုးကလည်း  အမျိုးသားဒီမိုကရေစီအဖွဲ့ချုပ်ကို ဖျက်သိမ်းပြီး ရွေးကောက်ပွဲ မသမာမှုလုပ်ခဲ့တဲ့ ပုဂ္ဂိုလ်တွေကို နိုင်ငံတော်သစ္စာဖောက်အနေနဲ့ အရေးယူဖို့ စဉ်းစား ဆောင်ရွက်သွားမယ်လို့  မေလ ၂၁ရက်နေ့မှာ ပြောဆိုထားပါတယ်။ 

တရုတ်နိုင်ငံကတော့ အန်အယ်လ်ဒီ ပါတီကို ဖျက်သိမ်းမယ့် စစ်ကောင်စီရဲ့လုပ်ဆောင်ချက်တွေကို လက်မခံဘူးလို့ မြန်မာနိုင်ငံဆိုင်ရာ တရုတ်ကိုယ်စားလှယ်က   ဩဂုတ်လအတွင်းမှာ ပြောဆိုခဲ့ပါတယ်။

စက်တင်ဘာ ၉ ရက်နေ့ကကျင်းပခဲ့တဲ့ တရုတ်ကွန်မြူနစ်ပါတီနဲ့ အရှေ့တောင်အာရှ၊ တောင်အာရှနိုင်ငံတွေရဲ့ နိုင်ငံရေးပါတီတွေ တွေ့ဆုံဆွေးနွေးပွဲကို မြန်မာ‌နိုင်ငံကိုယ်စားပြုပြီး အမျိုးသားဒီမိုကရေစီအဖွဲ့ချုပ်နဲ့ ကြံ့ခိုင်ရေးပါတီအပါအဝင် ပါတီလေးခုကို ဖိတ်ကြား တက်ရောက်စေခဲ့ပါတယ်။

နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ဟာ  စက်တင်ဘာ ၁၃  ရက်နေ့မှာ  ရုံးချိန်းကို ကားနဲ့အလာ ကားမူးပြီး ကျန်းမာရေးမကောင်းတာကြောင့် ရုံးချိန်းကို မတက်နိုင်ဘဲ  ခွင့်တိုင်ခဲ့ရပြီး ဒီကနေ့မှာတော့ ကျန်မာရေးပြန်သက်သာလို့  ဇမ္ဗူသီရိအထူးတရားရုံး၊ ရုံးချိန်းကို လာရောက်ခဲ့တယ်လို့ ရှေ့နေဦးခင်မောင်ဇော်က ပြောပါတယ်။

3 months Ago

July 26, 2021

၂၀၂၀ ရွေးကောက်ပွဲရလဒ်ကို ပယ်ဖျက်ကြောင်း စစ်ကောင်စီအကြမ်းဖက်အဖွဲ့ ကြေညာ

၂၀၂၀ ရွေးကောက်ပွဲရလဒ်တွေကို ပယ်ဖျက်ကြောင်း အာဏာသိမ်း စစ်ကောင်စီလက်အောက်ခံ  ပြည်ထောင်စုရွေးကောက်ပွဲကော်မရှင်က ဇူလိုင် ၂၆ ရက်မှာ  ကြေညာလိုက်ပါတယ်။

၂၀၂၀ နိုဝင်ဘာ ၈ ရက်နေ့က ကျင်းပခဲ့တဲ့ ရွေးကောက်ပွဲဟာ ဖွဲ့စည်းပုံအခြေခံဥပဒေ၊ ပြည်ထောင်စုရွေးကောက်ပွဲဥပဒေ၊ သက်ဆိုင်ရာ လွှတ်တော် ရွေးကောက်ပွဲ ဥပဒေ နည်းဥပဒေတွေနဲ့ ညီညွတ်မှုမရှိတဲ့ အပြင် လွတ်လပ်၍ တရားမျှတမှုမရှိတဲ့ ရွေးကောက်ပွဲဖြစ်ကြောင်းစစ်ဆေးတွေ့ရှိရလို့ ခုလို ပယ်ဖျက်လိုက်တာလို့ စစ်ကောင်စီရွေးကောက်ပွဲ ကော်မရှင်ထုတ်ပြန်ချက်မှာ ဖော်ပြပါတယ်။

မြို့နယ်အလိုက် မဲစာရင်းတွေ စစ်ဆေးတွေ့ရှိချက်အရ မဲမသမာမှု ဖြစ်ပွားခဲ့တဲ့ မှားယွင်းခဲ့တဲ့ တနိုင်ငံလုံး မဲဆန္ဒရှင်အရေအတွက် စုစုပေါင်းဟာ ၁၁,၃၀၅,၃၉၀ ဦးရှိတာတွေ့ရှိရကြောင်း၊ ဆန္ဒမဲ လက်မှတ်တွေကို မြေပြင်မှာ ဖွင့်ဖောက်စစ်ဆေးရာမှာ မဲရုံတိုင်းမှာ ဆန္ဒမဲလက်မှတ်တွေ လျော့နည်း ပျောက်ဆုံးတာ၊ တရားမဝင်အပိုရှိနေတာကိုတွေ့ရှိရကြောင်း စစ်ဆေးတွေ့ရှိတယ်လို့ ဆိုပါတယ်။

စစ်ကောင်စီကော်မရှင်ရဲ့ ထုတ်ပြန်ချက်ပါ မဲစာရင်းအချက်အလက် စာရင်းဇယားတွေဟာ ဘယ်လောက်အထိ မှန်ကန်မှု ရှိတယ် ၊ မဲစာရင်းတွေ ကွင်းဆင်း စစ်ဆေးရာမှာ ပွင့်လင်းမြင်သာမှု ဘယ်လောက်ရှိတယ်၊ ဒီစာရင်းတွေကို  ဘယ်သူတွေကယုံကြည်တယ်ဆိုတာ မေးခွန်းထုတ်စရာဖြစ်ပါတယ်။  

ယခင် ပြည်ထောင်စုရွေးကောက်ပွဲကော်မရှင်ဟာ တိုင်းနဲ့ပြည်နယ် ဝန်ကြီးချုပ်တွေက ခန့်အပ်လိုသူတွေနဲ့  ရွေးကောက်ပွဲ ကော်မရှင်အဖွဲ့ခွဲ ဥက္ကဋ္ဌနဲ့ အဖွဲ့ဝင်တွေကို ဖွဲ့စည်းတာဝန်ပေးခဲ့ကြောင်း ၊ မဲစာရင်းပြည့်စုံမှန်ကန်ရေးအတွက် ပံ့ပိုးကူညီအဖွဲ့ကို ဖွဲ့စည်းခဲ့ရာမှာလည်း အဲဒီအဖွဲ့ကြောင့် လူဦးရေစာရင်းတွေထပ်ပြီး မဲဆန္ဒရှင်စာရင်းတွေ ၂ ကြိမ် ၃ ကြိမ် အထက်ပါဝင်ခဲ့ကြောင်း၊ မဲစာရင်းတွေမှာ နိုင်ငံသားစိစစ်ရေးကတ်မရှိသူတွေ အစုလိုက်အပြုံလိုက်ပါနေတာ၊ နိုင်ငံသားစိစစ်ရေးကတ်တစ်ခုတည်းနဲ့ မဲစာရင်း ၂ ကြိမ် ၃ ကြိမ် အထက်ပါဝင်နေတာတွေ့ရတယ်လို့လည်း ဆိုပါတယ်။

ဒါ့အပြင် ရွေးကောက်ပွဲအတွက် အသက် ၆၀ အထက် ကြိုတင်မဲပေးရာမှာ တချို့နေရာတွေမှာ အန်အယ်လ်ဒီပါတီ အောင်နိုင်ရေးအဖွဲ့ဝင်တွေ ပါဝင်ပြီး နေအိမ်တွေကို သွား ရောက်ဆောင်ရွက်ခဲ့တာရှိတယ်လို့လည်း စွပ်စွဲထားပါတယ်။

နိုင်ငံသားစိစစ်ရေးကတ်မရှိသူတွေ မဲပေးခွင့်ပြုခဲ့တာ၊ UEC တံဆိပ်မပါတဲ့ အမှန်ခြစ်တံဆိပ်တုံးရိုက်ထားတဲ့ မဲလက်မှတ်တွေကို ခိုင်လုံမဲအဖြစ် သတ်မှတ်ခဲ့တာ၊ မဲရုံတိုင်းမှာ မဲစာရင်းအရေအတွက်တွေမှားအောင် တမင်ကြိုတင်ဆောင်ရွက်ခဲ့တာ၊ ရွေးကောက်ပွဲ လုပ်ငန်းစဉ် အဆင့်ဆင့်မှာ အန်အယ်လ်ဒီပါတီအနေနဲ့ အုပ်ချုပ်ရေးအာဏာကို အလွဲသုံးစားပြုပြီး ဝင်ရောက် စွက်ဖက်မလျော်ဩဇာသုံးကာ ဆောင်ရွက်ခဲ့တာ၊ တခြားပါတီတွေကို ကိုဗစ်-၁၉ ကန့်သတ်တားမြစ်ချက်တွေကို အလွဲသုံးကန့်သတ် ထိန်းချုပ်ပြီး နိုင်ငံတော်အာဏာကို မတရား ရယူဖို့ ကြိုတင်ကြံစည်ဆောင်ရွက်ခဲ့တယ်လို့လည်း စစ်ကောင်စီရဲ့ ကော်မရှင်က  စွပ်စွဲဖော်ပြထားပါတယ်။ 

ဒါ့အပြင် ယခင် ပြည်ထောင်စုရွေးကောက်ပွဲကော်မရှင်အနေနဲ့လည်း အပ်နှင်းထားတဲ့ လုပ်ပိုင်ခွင့်ကို အလွဲသုံးစားပြုပြီး ဥပဒေ နည်းဥပဒေတွေကို ကျော်လွန် ဆောင်ရွက်ခဲ့တယ်လို့ လည်းဆိုပါတယ်။

၂၀၂၀ ရွေးကောက်ပွဲကို တာဝန်ယူဆောင်ရွက်ခဲ့တဲ့ ပြည်ထောင်စုရွေးကောက်ပွဲ ကော်မရှင် တာဝန်ရှိသူတွေကိုရော ရွေးကောက်ပွဲ အနိုင်ရအန်အယ်လ်ဒီပါတီခေါင်းဆောင်တွေကိုပါ ဖမ်းဆီး ထိန်းသိမ်းထားပြီး  စစ်ကောင်စီခန့် ရွေးကောက်ပွဲကော်မရှင်က ခုလို ထုတ်ပြန်ကြေညာ လိုက်တာဖြစ်ပါတယ်။ 

၂၀၂၀ ရွေးကောက်ပွဲ ရလဒ် ပယ်ပျက်သွားကြောင်း ပြောဆိုတာဟာ အချုပ်အခြာအာဏာရဲ့ မူလပိုင်ရှင် မဲဆန္ဒရှင်တိုင်းရင်းသားပြည်သူတစ်ရပ်လုံးကို လစ်လျူရှုစော်ကားတာ ဖြစ်သလို နိုင်ငံအနှံ့ တောင်းဆိုနေတဲ့ ပြည်သူဆန္ဒကို ထပ်မံ စော်ကားတာဖြစ်တယ်လို့ အမျိုးသားဒီမိုကရေစီအဖွဲ့ချုပ် အန်အယ်လ်ဒီပါတီက ဖေဖော်ဝါရီ ၂၆ ရက်မှာ ကြေညာချက်ထုတ်ပြန်ထားပါတယ်၊

တရားမဝင် စစ်ကောင်စီဟာ ရွေးကောက်ပွဲကော်မရှင်ဖွဲ့စည်းခန့်အပ်ပိုင်ခွင့် လုံးဝမရှိတဲ့အတွက် ကော်မရှင်သစ်ဟာလည်း တရားဝင်အဖွဲ့အစည်းမဟုတ်လို့ ဒီအဖွဲ့ကို ကိုယ်စားပြု ပြောဆိုတာ မှန်သမျှဟာလည်း တရားမဝင်တဲ့ ပြောဆိုချက်တွေသာဖြစ်တယ်လို့လည်း အန်အယ်လ်ဒီက ပြောပါတ ယ်။

အာဏာသိမ်းစစ်ကောင်စီဟာ အိမ်နီးချင်း အာဆီယံနိုင်ငံတွေအပါအဝင် မည်သည့်ကမ္ဘာ့နိုင်ငံတွေကမျှ တရားဝင်အစိုးရအဖြစ် အသိအမှတ်ပြု လက်ခံမထားတဲ့ အာဏာသိမ်း စစ်အုပ်စုသာဖြစ်တယ် အန်အယ်လ်ဒီအနေနဲ့ နိုဝင်ဘာ ၈ ရက် ရွေးကောက်ပွဲမှာ တခဲနက် ဖော်ထုတ်ခဲ့တဲ့ ပြည်သူ့ဆန္ဒကို အလေးအနက် ပြုပြီး ပြည်သူလူထုအပေါ် သစ္စာစောင့်သိစွာ ဆက်လက်ရပ်တည်သွားမယ်လို့ အန်အယ်လ်ဒီ ပါတီက ထုတ်ပြန်ပါတယ်။

နိုဝင်ဘာလ ၈ ရက်နေ့မှာ ကျင်းပခဲ့တဲ့ ၂၀၂၀ ပါတီစုံ အထွေထွေရွေးကောက်ပွဲမှာ တစ်သီးပုဂ္ဂ ၂၆၀ ဦး အပါအဝင် ပါတီပေါင်း ၈၇ ပါတီမှ ကိုယ်စားလှယ်လောင်း ၅,၆၃၉ ဦးတို့က မဲဆန္ဒနယ်ပေါင်း ၁,၁၁၇ နေရာမှာ ဝင်ရောက်ယှဥ်ပြိုင်ခဲ့ ကြတာပါ။

မဲပေးခွင့်ရှိသူ ၃၇ သန်းကျော်ရှိတဲ့အနက် မဲပေးသူက ၂၇ သန်းကျော် မဲပေးတဲ့ ရာခိုင်နှုန်း ၇၀ ရာခိုင်နှုန်းကျော်ရှိခဲ့ပြီး လွှတ်တော် ၃ ရပ်စလုံးမှာ အမျိုးသားဒီမိုကရေစီအဖွဲ့ချုပ်ပါတီက ရာခိုင်နှုန်း ၈၀ ကျော် အနိုင်ရရှိခဲ့တာဖြစ်ပါတယ်။

၂၀၂၀ ပါတီစုံ အထွေထွေရွေးကောက်ပွဲဟာ လွတ်လပ်မျှတဲ့ ရွေးကောက်ပွဲဖြစ်ကြောင်း ပြည်တွင်း ပြည်ပ  လေ့လောစောင့်ကြည့်အဖွဲ့တွေက ကြေညာထားပြီးဖြစ်သလို ရွေးကောက်ပွဲ  ရလဒ်ကိုလည်း နိုင်ငံတကာက အသိအမှတ်ပြုထားပြီး ဖြစ်ပါတယ်။

4 months Ago
More News
Up