ရွိုင်ယန်ဂစ်

June 22, 2022

ဝေးလ်နည်းပြရာထူးမှ ရွိုင်ယန်ဂစ် တရားဝင်နုတ်ထွက်

အတူနေချစ်သူကို ကိုယ်ထိလက်ရောက် ကျူးလွန်တယ်ဆိုတဲ့ စွပ်စွဲချက်နဲ့ အမှုရင်ဆိုင်နေရတဲ့ နည်းပြ ရွိုင်ယန်ဂစ်ဟာ ဝေးလ်အသင်းနည်းပြရာထူးကနေ တရားဝင်နုတ်ထွက်သွားပါတယ်။

မန်ယူ ဂန္ထဝင်ကစားသမား ရွိုင်ယန်ဂစ်ဟာ တရားရုံးရဲ့ စွပ်စွဲချက်ကို ငြင်းဆန်ထားပါတယ်။ အမှုမပြီးပြတ်သေးတာကြောင့် ဝေးလ်အသင်းရဲ့ ကမ္ဘာ့ဖလားပြိုင်ပွဲအတွက် ပြင်ဆင်မှုတွေမှာ သက်ရောက်မှုရှိမှာကို စိုးရိမ်ပြီး ရာထူးကနေ အပြီးသတ်နုတ်ထွက်ဖို့ ဆုံးဖြတ်ခဲ့တာပါ။

အမှုဆက်လက်ရင်ဆိုင်နေရဆဲဖြစ်ပေမဲ့ အပြစ်မရှိဘူးဆိုတာကို ယုံကြည်ကြောင်း၊ နည်းပြတာဝန်တွေ ဆက်ယူနိုင်ဖို့အတွက် အမှုအမြန်ဆုံးပြီးပြတ်ဖို့ ဆန္ဒရှိခဲ့ပေမဲ့ ကြန့်ကြာနေခဲ့တာဖြစ်ကြောင်း ဂစ်က သူ့ရဲ့ထုတ်ပြန်ချက်မှာ ပြောထားပါတယ်။

ဝေးလ်အသင်းဟာလည်း ကမ္ဘာ့ဖလားအတွက် ပြင်ဆင်မှုတွေ လုပ်ဆောင်ရတော့မှာဖြစ်လို့ သူ့ရဲ့အမှုကိစ္စက အကျိုးသက်ရောက်မှု ဖြစ်စေမှာကို စိုးရိမ်တာကြောင့် အသင်းနဲ့လမ်းခွဲဖို့ ဆုံးဖြတ်ခဲ့တာဖြစ်ကြောင်း၊ ဝေးလ်နည်းပြရာထူး ခန့်အပ်ခံရတာကို အမြဲတမ်း ဂုဏ်ယူနေမှာဖြစ်ကြောင်း ဂစ်က ထုတ်ပြန်ချက်မှာ ပြောထားပါတယ်။

ဝေးလ်အသင်းဟာ နည်းပြချုပ်ဂစ် မရှိပေမဲ့လည်း ယာယီနည်းပြ ရောဘတ်ပေ့ချ်ရဲ့ ဦးဆောင်မှုနဲ့အတူ ယူကရိန်းကို အနိုင်ယူပြီး ကမ္ဘာ့ဖလားခြေစစ် ပွဲအောင်မြင်ခဲ့တာ ဖြစ်ပါတယ်။

6 months Ago

November 4, 2020

မန်ချက်စတာယူနိုက်တက် ဂန္ထဝင်ကစားသမား ရွိုင်ယန်ဂစ် ဖမ်းဆီးခံရ

မန်ချက်စတာယူနိုက်တက်ရဲ့ ဂန္ထဝင်ကစားသမားလည်းဖြစ်၊ လက်ရှိ ဝေလလက်ရွေးစင်အသင်းနည်းပြလည်းဖြစ်တဲ့ ရွိုင်ယန်ဂစ်ဟာ နာကျင်စေမှု၊ ကိုယ်ထိလက်ရောက် ကျူးလွန်မှု စတာတွေအတွက် သံသယရှိမှုနဲ့ ဖမ်းဆီးခံခဲ့ရပြီး ဂရိတ်မန်ချက်စတာမှာရှိတဲ့ ပန်ဒလီတန်ရဲစခန်းကို ခေါ်ခံရပါတယ်။ စွပ်စွဲခံထားရသလို တိုက်ခိုက်ခဲ့တာမရှိဘူးလို့ ရဲတပ်ဖွဲ့ရဲ့ ဖမ်းဆီးခံခဲ့ရပြီးနောက်မှာ နည်းပြ ရွိုင်ယန်ဂစ်က ငြင်းဆိုလိုက်ပါတယ်။ တနင်္ဂနွေနေ့ညပိုင်း ဆဲလ်ဖို့ဒ်မှာရှိတဲ့ ဝေါ့စလေအရပ်က နေအိမ်တစ်အိမ်မှာ ဆူပူမှုနဲ့ ပတ်သက်ပြီး သတင်းပေးမှု ရရှိခဲ့ပြီးနောက် ရဲတပ်ဖွဲ့က ဖမ်းဆီးခဲ့ပြီး သူ့ကို တနင်္လာနေ့မှာ အာမခံနဲ့ ပြန်လွှတ်ပေးခဲ့တယ်လို့ ရဲတပ်ဖွဲ့က အတည်ပြုပါတယ်။  “ဆူပှုမှုအကြောင်း သတင်းပေးတာကို တနင်္ဂနွေနေ့ ည ၁၀ နာရီ ၅ မိနစ်မှာ ရရှိခဲ့ပါတယ်။ အသက် ၃၀ ကျာ်အမျိုးသမီးတစ်ဦးမှာ ဆေးကုသမှုမလိုအပ်တဲ့ အသေးစားဒဏ်ရာတွေ ရရှိခဲ့ပြီး အသက် ၄၆ နှစ်အရွယ် အမျိုးသားတစ်ဦးကို သံယသရှိမှုနဲ့ ဖမ်းဆီးခဲ့ပါတယ်” လို့ ဂရိတ်မန်ချက်စတာ ရဲတပ်ဖွဲ့ရဲ့ ပြောခွင့်ရပုဂ္ဂိုလ်တစ်ဦးက ထုတ်ပြန်ပါတယ်။ ဂစ်ရဲ့ ကိုယ်စားလှယ်အဖွဲ့ကတော့ ကစားသမားဟောင်းဘက်က သူ့အပေါ် စွပ်စွဲထားချက်တွေ အားလုံးကို ငြင်းဆန်ထားတယ်လို့ ပြောပြီး ရဲတပ်ဖွဲ့က လုပ်ဆောင်နေတဲ့ စစ်ဆေးမှုတွေမှာလည်း အပြည့်အဝ ပူးပေါင်းဆောင်ရွက်သွားမှာ ဖြစ်တယ်လို့ ပြောပါတယ်။ ဝေလအသင်းနည်းပြဂစ်ဟာ UEFA Nations League ပွဲစဉ်အဖြစ် အိုင်ယာလန်၊ ဖင်လန်တို့နဲ့ ကစားမယ့် ဝေလအသင်း လူစာရင်းကို အခုသီတင်းပတ်အစောပိုင်းမှာ ထုတ်ပြန်ဖို့ စီစဉ်ထားတာပါ။  အခုအခြေအနေကြောင့် အင်္ဂါနေ့မှာထုတ်ပြန်မယ့် လူစာရင်းကို ရွှေ့ဆိုင်းလိုက်ပြီလို့ ဝေလဘောလုံးအဖွဲ့ချုပ်က ပြောပါတယ်။ ဝေလအသင်းဟာ အခုလအတွင်း UEFA Nations League ပွဲအပြင် အမေရိကန်အသင်းနဲ့ ကစားဖို့ရှိနေပြီး ဂစ်အနေနဲ့ ဒီ ၃ ပွဲစလုံးကို တာဝန်ယူနိုင်တော့မှာ မဟုတ်ဘူးလို့လည်း အဖွဲ့ချုပ်က အတည်ပြုပါတယ်။
2 years Ago
More News
Up