ရွာငံ

July 1, 2022

ရွာငံအခြေစိုက် YPDF ဖျက်သိမ်းကြောင်း ကြေညာ

ရှမ်းပြည်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ ရွာငံအခြေစိုက် Ywangan People's Defense Force ဖျက်သိမ်းကြောင်း ဇွန် ၃၀ ရက်က သူတို့ရဲ့ ဖေ့စ်ဘွတ်ခ်စာမျက်နှာမှာ ထုတ်ပြန်ကြေညာပါတယ်။

“ယနေ့ ဇွန်လ ၃၀ ရက်နေ့မှစ၍ ရွာငံပြည်သူ့ကာကွယ်ရေးတပ်ဖွဲ့ (YPDF) တရားဝင်ဖျက်သိမ်းလိုက်ပြီဖြစ်ကြောင်း ကြေညာအပ်သည်။ အခက်အခဲ အမျိုးမျိုးကြောင့် မိမိတို့ YPDF များအနေဖြင့် ဆက်လက်ရပ်တည်နိုင်ခြင်း မရှိတော့သည့်အတွက်ကြောင့် အခုလို ဖျက်သိမ်းလိုက်ရခြင်းဖြစ်သည်။ စိတ်မကောင်းကြီးစွာဖြင့်........... YPDF” လို့ ထုတ်ပြန်ထားပါတယ်။

အဖွဲ့ဆက်လက်ရပ်တည်ဖို့ နေစရာ၊ စားစရာ စတဲ့ အခက်အခဲတွေကြောင့် ဖျက်သိမ်းခဲ့ရတာလို့ YPDF တာဝန်ခံတဦးက ပြောပါတယ်။

“အဓိက အခက်အခဲကတော့ အဖွဲ့ဆက်လက်ရပ်တည်ဖို့ နေစရာ၊ စားစရာ အစစအရာရာပေါ့၊ ခက်ခဲတာပါပဲ။ နေစရာ စားစရာ မရှိမှတော့ ကျန်တဲ့ကိစ္စ ဘယ်လိုမှ ဆက်လှုပ်ရှားလို့ မရတော့ဘူး။ ကိစ္စက အဲ့မှာတင်ပျက်ပြီ။”

ပြီးခဲ့တဲ့ ဇွန် ၉ ရက်က အခက်အခဲအမျိုးမျိုးကြောင့် လုပ်ငန်းစဉ်တွေကို ဆက်လက် လုပ်ဆောင်နိုင်ခြင်း မရှိတော့တဲ့အတွက် YPDF အနေနဲ့ ရွာငံဒေသကို စွန့်ခွာပြီဖြစ်ကြောင်းနဲ့ စုဖွဲ့မှုအသစ်နဲ့ ပြန်လာမှာဖြစ်ကြောင်း ကြေညာပြီး ၃ ပတ်ခန့်အကြာမှာ တရားဝင်ဖျက်သိမ်းကြောင်း ကြေညာခဲ့တာပါ။

YPDF အဖွဲ့ကို ဖျက်သိမ်းလိုက်ပေမဲ့ တပ်ဖွဲ့ဝင်တွေအနေနဲ့ တော်လှန်ရေးမှာ ပုံစံအမျိုးမျိုးနဲ့ ဆက်လက်ပါဝင်နေမှာလို့ YPDF တပ်ဖွဲ့ဝင်တဦးက ပြောပါတယ်။

YPDF ဟာ စတင်ဖွဲ့စည်းခဲ့တဲ့ ၂၀၂၁ ဒီဇင်ဘာ ၁၅ ရက်ကစလို့ ၆ လတာကာလအတွင်း ဒေသတွင်း မဟာမိတ်အဖွဲ့အစည်းတွေနဲ့ ပူးပေါင်းပြီး တိုက်ခိုက်မှုပေါင်း ၂၀ ကျော် လုပ်ဆောင်ခဲ့ကြောင်း YPDF ရဲ့ တာဝန်ခံဆီက သိရပါတယ်။

8 hours Ago

April 22, 2022

ရွာငံမြို့နယ်တွင် ဖမ်းဆီးခံ ပြည်သူ ၁ ဦး၏ နေအိမ်ကို စစ်ကောင်စီတပ်မီးရှို့

ရှမ်းပြည်နယ်တောင်ပိုင်း၊ ရွာငံမြို့နယ်၊ ပဲရင်းတောင်ကျေးရွာရှိ ဒေသခံ ဦးနေဝင်းရဲ့ နေအိမ်ကို စစ်ကောင်စီတပ်က ဧပြီ ၂၂ ရက် မနက် ၁ နာရီလောက်က မီးရှို့ဖျက်ဆီးခဲ့တယ်လို့ ဒေသခံတဦးက ပြောပါတယ်။

"စစ်ကောင်စီတပ်တွေက ဦးနေဝင်းရဲ့အိမ်ကို မီးမရှို့ခင် သေနတ်ပစ်ဖောက်သံ ၅ ချက်ခန့် ကြားရပြီး တဝင်း ထဲရှိ အိမ်နှစ်လုံးကို မီးရှို့ဖျက်ဆီးခဲ့တာပါ။ ဦးနေဝင်းဟာ ဒလန်အိမ်အနီး ဗုံးပေါက်ကွဲမှုနဲ့ ဖမ်းဆီးခံရတဲ့ အပြစ်မဲ့ပြည်သူ ၃ ဦးထဲက တဦးပါ။ ဖမ်းဆီးခံထားရတာ ၁ လခွဲနီးပါး ကြာနေပြီ ဖြစ်ပေမဲ့ အခုအချိန်ထိ ဘယ်သူ့သတင်းမှ မကြားရသေးဘူး။"

ပဲရင်းတောင်ရွာမှာ မတရား ဖမ်းဆီးခံရသူ ၁၈ ယောက်ကျော်ရှိပြီး ကိုယ်ဝန်ဆောင် အမျိုးသမီး တယောက်လည်း  ပါဝင်နေတယ်လို့ သိရပါတယ်။

ရွာငံမြို့အတွင်း စစ်ကောင်စီတပ်က မီးရှို့ဖျက်ဆီးမှုကြောင့် နေအိမ် ၁၅ လုံးထက်မနည်း မီးရှို့ဖျက်ဆီးခံထားရပြီး နွားဘန်ကြီးကျွေးရွာအတွင်း စစ်ကောင်စီတပ်ရဲ့ ပစ်ခတ်မှုတွေကြောင့် ဒေသခံ ၃၀၀ ဝန်းကျင် ဘေးလွတ်ရာကို ထွက်ပြေး တိမ်းရှောင်နေကြရလို့ စားနပ်ရိက္ခာ အခက်အခဲ ကြုံတွေ့နေကြရပါတယ်။

2 months Ago

ရွာငံတွင် စစ်ကောင်စီက ဓနုတပ် Danu Army ဖွဲ့စည်းရန် ကြိုးပမ်းနေ

ရှမ်းပြည်နယ်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ၊ ရွာငံမြို့နယ်အတွင်းရှိ ကျေးရွာတွေမှာ စစ်ကောင်စီက ဓနုတပ် (Danu Army) ဖွဲ့ဖို့ ဒေသခံတွေကို လိုက်လံစည်းရုံးနေတယ်လို့ သတင်းထွက်ပေါ်နေပါတယ်။

ရွာငံမြို့အတွင်းက ကျေးရွာတွေကို တရွာကို အနည်းဆုံး ၁၃ ယောက်လောက် ပါဝင်ရမယ်လို့ စစ်ကောင်စီခန့် အုပ်ချုပ်ရေးမှူးတွေကတဆင့် စာပို့ စည်းရုံးနေတာဖြစ်ပြီး ဓနုတပ် (Danu Army) ဖွဲ့ဖို့အတွက် ဓနုတိုင်းရင်းသားလူမျိုးများ ဒီမိုကရေစီပါတီ (DNDP) ထိပ်တန်းခေါင်းဆောင်တချို့၊ ဒေသခံ စီးပွားရေးသမားတချို့တို့ ပါဝင်ပတ်သက်နေပြီး PNO အဖွဲ့က ကူညီပေးနေတယ်လို့ သိရပါတယ်။

ဒေသခံတဦးက "ဒီရိုက်ခတ်မှုက ဒေသတွင်း ပဋိပက္ခ ကြီးထွားလာနိုင်တယ်ဗျ။ ရွာတွေမှာကလည်း သတင်းစီးဆင်းမှု အားနည်းတာကြောင့် ဓနုတပ် (Danu Army) ဆိုတာ ကိုယ့်လူမျိုးစုတပ်လို့ပဲ ထင်နေကြတာ။ ဓနုတပ် (Danu Army) ဆိုတာကို သေချာမသိ နားမလည်ဘဲ ဝင်ရောက်လိုသူ များပြားနေတယ်” လို့ ပြောပါတယ်။

နိုင်ငံရေးလေ့လာသူတဦးက "ဒေသခံလူမျိုးအချင်းချင်း ပြန်တိုက်ခိုက်ခိုင်းတဲ့ ဗျူဟာကို စစ်ကောင်စီက ပေါ်ပေါ်တင်တင် သုံးစွဲလာပြီဖြစ်တယ်။ ကျနော်တို့ စိုးရိမ်တာက ဓနုတပ် (Danu Army) ဆိုပြီး ဓနုပြည်သူတွေက မျှော်လင့်နေကြပေမဲ့ အခုဖွဲ့မယ့်တပ်က ဓနုလူမျိုးကို ကိုယ်စားမပြုဘဲ အကြမ်းဖက်စစ်ကောင်စီ လက်အောက်ခံတပ် (ပြည်သူ့စစ်) ဖြစ်တယ် ဆိုတာကို ဒေသခံပြည်သူတွေ မသိနားမလည်လိုက်မှာကို စိုးရိမ်မိတယ်။ ဒီဗျူဟာသာ အောင်မြင်သွားမယ်ဆိုရင် ဓနုဒေသခံ လူမျိုးအချင်းချင်း ပြန်လည်တိုက်ခိုက်ကြရမှာဖြစ်ပြီး စစ်ကောင်စီက အလွယ်တကူ အုပ်ချုပ်သွားမှာဖြစ်တယ်။ ဓနုတပ်ဖွဲ့ (Danu Army) ဆိုပြီး တဖက်လှည့်နဲ့ နာမည်တပ် လိုက်လံစုဆောင်းနေပေမဲ့ ဒါဟာ စစ်ကောင်စီလက်ကိုင်တုတ် ပြည်သူ့စစ်သာ ဖြစ်လာမှာဖြစ်ပြီး ဒေသခံအချင်းချင်း ပြန်တိုက်ခိုင်းပြီး ဓနုဒေသကို ရှုပ်ထွေးအောင် ပြုလုပ်နေခြင်းသာဖြစ်တယ် ဆိုတာကို ဒေသခံပြည်သူတွေ သေချာနားလည်သဘောပေါက်ဖို့ လိုအပ်တယ်လို့" ပြောပါတယ်။

ဓနုတိုင်းရင်းသားလူမျိုးများ ဒီမိုကရေစီပါတီ (DNDP) ဥက္ကဋ္ဌဟောင်း ဦးခင်မောင်ချိုကတော့ “Danu army ဖွဲ့စည်းတယ် ဆိုတာတော့ ဖြစ်ချင်ဖြစ်မှာပေါ့။ ကျနော်တို့ကတော့ မိမိကြောင့် မည်သူတဦးတယောက်ကိုမှ ဒုက္ခမရောက်စေချင်ပါဘူး” လို့ ဒီဗွီဘီကို ပြောပြီး သူ့အနေနဲ့ ဒီကိစ္စမှာ ပါဝင်ပတ်သက်ခြင်း မရှိဘူးလို့ ငြင်းဆိုထားပါတယ်။

ပြီးခဲ့တဲ့လတွေကတည်းက ဓနုဒေသမှာ စစ်ကောင်စီခန့် ဥက္ကဋ္ဌ ဦးဆောင်ပြီး ပျူစောထီးဖွဲ့ဖို့ လိုက်လံစည်းရုံးခဲ့ပေမဲ့ အခုအခါမှာ ပျူစောထီးဖွဲ့ဖို့ရယ်လို့ ပေါ်တင် မစည်းရုံးဘဲ ကာကွယ်ရေးတပ်ဖွဲ့ ဓနုတပ်အဖြစ် ခေါင်းစဉ်ပြောင်းပြီး စည်းရုံးလာတာ ဖြစ်တယ်လို့ ဒေသခံတွေက ပြောပါတယ်။

2 months Ago
More News
Up