ရဲဘော်ဖိုးသံချောင်း

December 8, 2015

ဖက်ဒရယ်နဲ့ပတ်သက်လို့ ပြည်သူဆုံးဖြတ်ချက်အတိုင်းလုပ်မယ် - ရဲဘော်ဖိုးသံချောင်း

မြန်မာနိုင်ငံ လွတ်လပ်ရေးလှုပ်ရှားမှုသမိုင်းမှာ ထင်ရှားခဲ့ပြီး အစိုးရအဆက်ဆက်ကို လက်နက်ကိုင်တော်လှန်ခဲ့တဲ့ ဗမာပြည်ကွန်မြူနစ်ပါတီဟာ ၁၉၉၀ ပြည့်နှစ်ပိုင်း ကာလတလျှောက်ကစလို့ မြေအောက်ပါတီအဖြစ် လှုပ်ရှားနေပါတယ်။ ရွေးကောက်ပွဲလွန် နိုင်ငံရေးအခင်းအကျင်းမှာ တရားဝင် နိုင်ငံရေးပါတီအဖြစ် မြေပေါ်နိုင်ငံရေး လုပ်တော့မှာလား၊ ပြည်တွင်းငြိမ်းချမ်းရေးဆိုင်ရာ သဘေထားတွေနဲ့ ပတ်သက်လို့ ဗမာပြည်ကွန်မြူနစ်ပါတီ ပြောခွင့်ရသူ ရဲဘော် ဖိုးသံချောင်းကို ဆက်သွယ်မေးမြန်းပါတယ်။ ဗမာပြည်ကွန်မြူနစ်ပါတီက တရားဝင်နိုင်ငံရေးပါတီအဖြစ် မြေပေါ်မှာရပ်တည်ဖို့ အလားအလာနဲ့ ဘယ်တော့မှတ်ပုံတင်မလဲ။ “ကျနော်တို့ ပထမဆုံး ပြောသင့်တာက ဗမာပြည်ကွန်မြူနစ်ပါတီကို အစိုးရက တရားမ၀င် မတရားအသင်းပါတီအဖြစ် ကြေညာထားပါတယ်။ အဲဒီဥပဒေ တည်ရှိနေသေးသရွေ့ ကျနော်တို့ မြေပေါ်တက်လို့ မရသေးပါဘူး။ တက်ရင်ဖမ်းမှာပါ။ နောက်ပြီးကျတော့ ကျနော်တို့က ကဲ ဥပဒေဖျက်ပါတယ်လို့ လုပ်လိုက်ရော၊ လုပ်လိုက်လို့ တက်သွားပြီးတဲ့နောက် ပါတီတွေ၊ ဘာတွေ ထောင်ပြီးတဲ့နောက်ကျမှ အာဏာသိမ်းတယ်ဟ ဆိုပြီးတော့ အကုန်လုံး သိမ်းကြုံးဖမ်းလိုက်ရင် မျိုးဆက်ပါ ပြုတ်သွားမှာ။ ကျနော်တို့ အဲဒါတွေ ဘာတွေလည်း စဉ်းစားရပါတယ်။ အဲဒီတော့ ကျနော်တို့ ဒီကိစ္စနဲ့ ပတ်သက်ပြီးတော့ မလောပါဘူး။ အခြေအနေတွေ စောင့်ကြည့်ချင်ပါတယ်။" နိုဝင်ဘာ ၈ ရက်နေ့ ရွေးကောက်ပွဲမှာ အန်အယ်လ်ဒီရခဲ့ခြင်းက  မတရားအသင်း ကြေညာထားတာတွေ ဖျက်သိမ်းရေးတို့၊ အထွေထွေ လွတ်ငြိမ်းချမ်းသာခွင့်တွေနဲ့ ပတ်သက်လို့  ဘယ်လို မျှော်မှန်းတွက်ချက်ပါသလဲ။ “ကျနော်တို့ကတော့ ဘယ်သူ့အပေါ်မှ ပုံပြီး မျှော်မှန်းထားတယ်တော့ မရှိပါဘူး။ ဒါပေမယ့် တကယ် တော်တည့်ဖြောင့်မတ်တဲ့ အစိုးရတရပ် ဆိုလို့ရှိရင် ဒီဟာကို ပထမဆုံး ဖြေရှင်းရမှာပေါ့။ ဒီမိုကရေစီကို တကယ်စစ်စစ်မြတ်နိုးတဲ့ အစိုးရတခု ဆိုလို့ရှိရင် ဒီဥပဒေကို ဖျက်သိမ်းရမှာ။ အဲဒီလိုပဲ ယူဆပါတယ်။" အနိုင်ရပါတီ အန်အယ်လ်ဒီကရော၊ တိုင်းရင်းသားလက်နက်ကိုင်တွေကရော ဒီမိုကရက်တစ် ဖက်ဒရယ်ပြည်ထောင်စုကို ထူထောင်မယ်လို့ မျှော်မှန်းကြောင်း ထုတ်ပြန်ကြပါတယ်။ ကွန်မြူနစ်ပါတီရဲ့ သဘောထားကို ပြောပြပါ။ “ကျနော်တို့သဘောထားက ဖက်ဒရယ်နဲ့ ပတ်သက်လို့ရှိရင် တတိုင်းပြည်လုံး တသဘောထားအရပဲ ကျနော်တို့ လက်ခံလုပ်မှာ ဖြစ်ပါတယ်။ တတိုင်းပြည်လုံး သဘောထားကို အရင်ကောက်ယူတာ၊ နားလည်ယူတာ၊ အဲဒါ လုပ်ကြရမယ်လို့ ထင်ပါတယ်။ တိုင်းပြည်က ဆုံးဖြတ်တဲ့အတိုင်း၊ ပြည်သူလူထုက ဆုံးဖြတ်တဲ့အတိုင်း ကျနော်တို့ လုပ်မှာဖြစ်ပါတယ်။” တရားဝင် မြေပေါ်တက်လို့ မရသေးပေမယ့် ကွန်မြူနစ်ပါတီဝင်တွေရဲ့ အင်အားစုစည်းမှုက ဗမာပြည်ထဲမှာရော၊ နေရာအနှံ့က အားကောင်းတုန်းပဲလား၊ ပြင်ဆင်ထားတာရှိလား။ “အဲဒီဟာကတော့ ကျနော်တို့ပါတီက မြေအောက်ပါတီ ဖြစ်နေတယ်။ အဲဒါကြောင့်မို့ အဲဒါကတော့ ကျနော်တို့ ပြောခွင့်မရှိပါဘူး။ ဒါပေမယ့် ကျနော်တို့ ပါတီတည်တန့်ရေးနဲ့ ပါတီလုပ်ငန်းပဲ ဆက်လက်အကောင်အထည်ဖော်ရေး အတွက်ကတော့ ကျနော်တို့ သက်ဆိုင်ရာ ပုဂ္ဂိုလ်များ ကိုယ့်သက်ဆိုင်ရာ အခန်းကနေပြီးတော့ အရင်လိုပဲ အားကြိုးမာန်တက် ကြိုးစားလျက်ရှိကြောင်းပါ။” မြန်မာနိုင်ငံမှာ အနိုင်ရပါတီခေါင်းဆောင်က သမ္မတ၊ ကာချုပ်၊ ဦးရွှေမန်း၊ ဦးသန်းရွှေတို့နဲ့ တွေ့ဆုံမှုတွေအပေါ်မှာ အန်ကယ်တို့ ဘယ်လိုအကဲခတ်လဲ။ “ကျနော်တို့ စောင့်ကြည့်ချင်ပါသေးတယ်။ ကျနော်တို့အမြင်ကတော့ နည်းနည်း ထူးဆန်းနေတယ်လို့ မြင်ပါတယ်။ အဲဒီလောက်ပဲ ပြောပါရစေ။” ပြည်တွင်းငြိမ်းချမ်းရေးလုပ်ငန်းစဉ်ကို အနိုင်ရပါတီက ဦးဆောင်မယ်၊ နိုင်ငံရေး ဆွေးနွေးပွဲတွေမှာလည်း အလွှာပေါင်းစုံ ပါဝင်ရမယ့် အခြေအနေမျိုးတွေ ဆိုတော့လေ၊ ဗမာပြည်ကွန်မြူနစ်ပါတီကလည်း တချိန်တုန်းက ပါတီကြီးဆိုတော့ အားလုံးပါဝင်ရေးဆိုတဲ့ ငြိမ်းချမ်းရေး လုပ်ငန်းစဉ်မှာ အန်ကယ်တို့ရဲ့ဆန္ဒက ဘယ်လိုရှိပါသလဲခင်ဗျာ။ “ပြည်တွင်းငြိမ်းချမ်းရေး တောင်းဆိုချက်က ကျနော်တို့ ၁၉၅၀ ခုနှစ်များ  အစောပိုင်းကတည်းက ကျနော်တို့ပါတီက တင်ခဲ့တဲ့ တောင်းဆိုချက်ပါ။ အဲဒီတောင်းဆိုချက် လုပ်ဆောင်မှု မှန်သမျှကို ကျနော်တို့ တတ်နိုင်တဲ့အခန်းက ပါဖို့ရအောင် ကြိုးစားပါတယ်။ ပါနိုင်လို့ရရင်လည်း ပါမှာဖြစ်ပါတယ်။ အဲဒါ ကျနော်တို့ရဲ့ အခြေခံမူဖြစ်ပါတယ်။"
6 years Ago

November 26, 2015

“ငါတို့နှစ်ယောက် ပြန်တွေ့ကြဦးမယ်လေ၊ ငါစောင့်နေမယ်” လို့ အမေက စကားပါးတယ် - ရဲဘော်ဖိုးသံချောင်း

နိုဝင်ဘာ ၂၉ ရက်နေ့မှာ ကျရောက်တဲ့ နိုင်ငံကျော် သတင်းစာဆရာ၊ စာရေးဆရာမကြီး လူထုဒေါ်အမာရဲ့ မွေးနေ့ နှစ် ၁၀၀ ပြည့် ရာပြည့်ပွဲတော်ကို မန္တလေးမြို့ ချမ်းအေးသာဇံမြို့နယ် ဓမ္မသာလခန်းမမှာ နိုဝင်ဘာ ၂၆ ရက်နေ့ကနေ လေးရက်ကြာကျင်းပမှာ ဖြစ်ပါတယ်။ ဒီရာပြည့်ပွဲတော်မှာ လူထုဒေါ်အမာနဲ့ သက်ဆိုင်တဲ့ ဓာတ်ပုံ၊ စာအုပ်နဲ့ လက်ရေးမူပြပွဲနဲ့ အထိမ်းအမှတ်ပစ္စည်း ဈေးရောင်းပွဲတော်တွေ ထည့်သွင်းထားပါတယ်။ ဒီပွဲတော်ကို နိုင်ငံရေးယုံကြည်ချက်ကြောင့် နှစ်ပေါင်းသုံးဆယ်ကျော် ပြည်ပနိုင်ငံမှာ ရောက်ရှိနေတဲ့ သားကြီးဖြစ်သူ ဗမာပြည်ကွန်မြူနစ်ပါတီ ပြောခွင့်ရသူ ရဲဘော်ဖိုးသံချောင်း တက်ရောက်ခွင့်ရမှာ မဟုတ်ပါဘူး။ လူထုဒေါ်အမာဟာ ၂၀၀၈ ခုနှစ် ဧပြီလ ၉ ရက်နေ့မှာ ကွယ်လွန်ခဲ့ပါတယ်။ ရဲဘော်ဖိုးသံချောင်းကို ဒီဗွီဘီက ဆက်သွယ်မေးမြန်းခဲ့ပါတယ်။ အမေ လူထုဒေါ်အမာရဲ့ ရာပြည့်ပွဲတော်ကို မန္တလေးမှာ ခမ်းခမ်းနားနား ကျင်းပကြဖို့ ပြင်ဆင်နေပါတယ်။ အမေရဲ့ နှစ်တရာပြည့်မှာ အဝေးရောက်နေတဲ့ သားတယောက်အနေနဲ့ ရင်ထဲမှာ ဘာဖြစ်ချင်ပါသလဲ။ "ဟုတ်ကဲ့ခင်ဗျ။ ကျနော် မှန်တာပြောရရင်တော့ အမေ့ကိုဂုဏ်ပြုတဲ့ အခမ်းအနားကို ကျနော် သားတယောက်အနေနဲ့ တကယ်ပဲ တက်ချင်ပါတယ်။ သူများနည်းတူပဲ ကျနော်လည်း အဲဒီမှာရှိချင်တယ်။ သူများတွေ အမေ့အကြောင်း ပြောကြတာတွေကို နားထောင်ချင်ပါတယ်။ နားနဲ့ဆတ်ဆတ် ကြားရတာဟာ သတင်းစာထဲဖတ်ရတာ၊ ရေဒီယိုထဲကတဆင့် တိုတိုတောင်းတောင်း နားထောင်ရတာထက် အများကြီး ပိုကောင်းတယ်လို့ ထင်တယ်။ နောက်ပြီးကျတော့ တက်ရောက်လာတဲ့လူတွေရဲ့ မျက်နှာတွေကို ကြည့်ရင်းနဲ့လည်း ခံစားမှုတွေ တဖွားဖွားဖြစ်ပေါ်မယ်လို့ ကျနော့်ကိုယ်ကျနော် ယုံကြည်ပါတယ်။ ဒါပေမယ့် အခြေအနေအရ ကျနော် မတက်နိုင်ပါဘူး။ အဲဒီတော့ ကျနော်နားလည်မိတာကတော့ ဒီကနေ့ ဗမာပြည်က လူတွေဟာ၊ ဗမာပြည်သားတွေဟာ အမေ့ကို ဂုဏ်ပြုကြတယ်။ အမေရဲ့ အမေလုပ်ခဲ့တဲ့ လုပ်ငန်းတွေကို သူတို့ ဆက်ပြီးတော့ လုပ်မယ်ဆိုတဲ့ တာဝန်ယူမှုစိတ်တွေ ရှိနေသေးတယ်လို့ ကျနော်ယုံကြည်လို့ ၀မ်းမြောက်ရပါတယ်ခင်ဗျ။ တကယ်ကျတော့ အမေလျှောက်သွားတဲ့လမ်းဟာ မဆုံးသေးပါဘူး။ အဘက်ဘက်မှာပါ၊ နိုင်ငံရေးတခုတည်း ပြောတာမဟုတ်ပါဘူး၊ စာပေရေးရာမှာရော၊ တခြားဘက်တွေမှာပါ ယဉ်ကျေးမှုရေးရာတွေမှာရော။ အမေလုပ်သွားတဲ့ဟာတွေ၊ စခဲ့တဲ့ဟာတွေ မပြီးသေးတာတွေ အများကြီးပဲ။ အဲဒီဟာကို ကျနော်တို့တိုင်းပြည်က၊ နယ်ပယ်အသီးသီးကလူတွေ အားလုံးကြိုးစားပြီး ဆက်လုပ်ကြရဦးမှာ ရှိပါတယ်။ အဲဒီအတွက် ဒီမှာလာ စုဝေးကြတာကို ကျနော် ၀မ်းမြောက်ဝမ်းသာနဲ့ ပါဝင်ချင်ပါတယ်။ ဒါပေမယ့် မပါနိုင်တဲ့အခါမှာ အားလုံးကို ဒီကနေပြီးတော့ ကျေးဇူးတင်တဲ့အကြောင်း ပြောချင်ပါတယ်ခင်ဗျ။" အန်ကယ့်ဖေဖေနဲ့မေမေဟာ နိုင်ငံကျော် သတင်းစာဆရာ၊ စာရေးဆရာတွေ ဖြစ်ကြတယ်။ ဒီလိုမျိုးမိဘတွေရဲ့ ရင်ခွင်ကနေ အန်ကယ် အဝေးကို ရောက်သွားတာကလေ ဗမာပြည်နိုင်ငံရေးနဲ့ ပတ်သက်ပြီးတော့ ဘယ်လောက်ထိအောင် ရိုက်ခတ်မှုတွေကြောင့် ဖြစ်ခဲ့ရတာလဲ။ ပြန်တွေ့ခွင့် မရတော့ဘူးနော်။ "ဟုတ်ပါတယ်။ ကျနော် ပြည်ပကို၊ ပြည်ပကို ရောက်သွားတဲ့အကြောင်းက၊ အဓိကအကြောင်းက ဗမာပြည်မှာ စစ်အာဏာရှင်စနစ်ကြောင့် ဖြစ်ပါတယ်။ အခုလည်း ကျနော် ပြန်ဝင်လို့ မရသေးပါဘူး။ ဘာကြောင့်လဲဆိုတော့ ဗမာပြည်မှာ စစ်အာဏာရှင်စနစ်ဟာ သဏ္ဌာန်တခုနဲ့ တည်ရှိနေသေးတဲ့အတွက်ပဲ ဖြစ်ပါတယ်။ အဲဒီတော့ ဒီစစ်အာဏာရှင်စနစ်ကို အပြီးအပိုင် ဗမာပြည်ကနေပြီးတော့ ချေဖျက်ပစ်နိုင်မှ၊ ဖျောက်ဖျက်ပစ်နိုင်မှ ကျနော်တို့လိုလူတွေ၊ ကျနော်တယောက်တည်း မဟုတ်ပါဘူး၊ တခြားလည်း အများကြီး ရှိပါသေးတယ်။ ကိုယ့်တိုင်းပြည်ကို တခြားနိုင်ငံသားများနည်းတူ တိုင်းပြည်တာဝန်ထမ်း၊ ပြည်သူလူထုကို အကျိုးပြုနိုင်လိမ့်မယ်လို့ ထင်ပါတယ်ခင်ဗျ။" အန်ကယ် ဖေဖေ၊ မေမေကိုခွဲခွာပြီး တနယ်ရပ်ခြားကို ထွက်သွားတာ ဘယ်အရွယ်လောက်ကလဲ။ သူတို့နဲ့ပတ်သက်လို့ အန်ကယ့်ဘ၀မှာ ဘယ်လိုမှတ်သားထားတာတွေအနက် သတိအရဆုံး အချက်တချက်လောက် ပြောပြပါလား။ "ကျနော် ထောင်ကလွတ်လာတာ၊ ကိုကိုးကျွန်းက ပြန်လာ၊ ကိုကိုးကျွန်းက ပြန်လာပြီး အင်းစိန်ထောင်ကနေ လွတ်လာတာဟာ ၁၉၇၂ ခုနှစ်လယ်မှာ။ နောက်ပြီး ထောင်ကလွတ်တဲ့ဟာကျတော့ ၁၉၇၆ ခုနှစ်။ အဲလိုလွတ်လာတဲ့အခါမှာ ကျနော် အိမ်မှာ ၄ နှစ်ပဲ နေရပါတယ်။ ကျနော့်အိမ်မှာ လာဖမ်းတဲ့အခါမှာ ကျနော်ထွက်ပြေးလာပါတယ်။ အဲဒီတော့ ကျနော်ထွက်ပြေးတဲ့အခါမှာ ကျနော့်ကို ထွက်ပြေးအောင် ကူညီပေးခဲ့တာ၊ နောက်ဖေးတံခါး ဖွင့်ပေးခဲ့တာ ကျနော့်အမေပါ။ ကျနော်တို့နှစ်ယောက် တီးတိုးပြီးတော့ သူက ဖွင့်ပေးပြီးတဲ့အခါ ကျနော့်ကို မေးထိုးပြလိုက်တာနဲ့ ကျနော် အဲဒီက ထွက်ပြေးတာပါ။ အဖေက အဲဒီအချိန်က ကျနော့်ကို ကြည့်နေပါတယ်။ အဖေကလည်း ဖမ်းသွားတော့မယ်ဆိုပြီးတော့ သားကို မျက်စိအောက်က အပျောက်မခံ ကြည့်နေတဲ့သဘောမျိုးပါ၊ အမေကလည်း ကြည့်နေပါတယ်။ အဲဒီကြားထဲက ကျနော် သူတို့ကို နှုတ်မဆက်နိုင်၊ မကန်တော့နိုင်ဘဲ ထွက်ခဲ့ရတာ ဖြစ်တဲ့အတွက် ကျနော် အခုထိ စိတ်မကောင်းကြီးခြင်း ဖြစ်ရပါတယ်။" အန်ကယ်အပါအ၀င် မြန်မာ့နိုင်ငံရေးလောကမှာ ကျင်လည်သူတွေဟာ လောကဓံ အထုအထောင်း ခံခဲ့ရတာကတော့ အထူးတလည် ပြောစရာမရှိပါဘူး။ အဲဒီတော့ အန်ကယ် နှစ်ပေါင်းများစွာ မိဘနဲ့ကင်းကွာပြီး၊ နိုင်ငံသားတွေနဲ့ ကင်းကွာပြီး ကိုယ့်ယုံကြည်ချက်ကို ခိုင်ခိုင်မာမာ ဆုပ်ကိုင်ထားနိုင်တာက အမေ့ဆီက ဘာအမွေတွေ ရခဲ့လဲခင်ဗျ။ "ကျနော့်အဖေနဲ့ အမေဟာ သူတို့ယုံကြည်တာကို စွဲစွဲမြဲမြဲလုပ်တယ်။ သူတို့မှာ မူရှိတယ်။ ဘ၀နေထိုင်မှုနဲ့ ပတ်သက်ပြီး၊ ပြောဆိုမှုနဲ့ ပတ်သက်ပြီး အမြဲတမ်း မူရှိတယ်။ ရေးတာဆိုတာ ပြောဖို့မလိုဘူး။ အဲဒီမူပေါ်မှာ ကြံ့ကြံ့ခံရပ်တည်တယ်။ မူကို သူတို့ အလွယ်တကူ အလျှော့မပေးဘူး၊ မစွန့်လွှတ်ဘူး။ ကျနော် အဲဒီဟာကို သူတို့ဆီက အမွေရတာပါ။ အဲလိုပြောလို့ရပါတယ်။ အတိအကျပြောလို့ရပါတယ်။" အန်ကယ့်ဘ၀မှာ အမေနဲ့ပတ်သက်လို့ အမှတ်တရရှိတာလေးကို ပြောပြပါခင်ဗျ။ ဘာတွေများ ပြောစရာရှိမလဲ။ "ကျနော်ကတော့ အမှတ်တရတွေ အများကြီးဗျ၊ ပြောရမှာ ခက်တော့ခက်သားပဲ။ အများကြီးဆိုတဲ့အထဲမှာ ငယ်ငယ်လေးတုန်းကရှိခဲ့တဲ့ အမှတ်တရတွေလည်း မှတ်မိနေသေးတယ်။ ကြီးမှ သူနဲ့ပတ်သက်တဲ့ မမေ့နိုင်တဲ့ ကိစ္စတွေလည်း အများကြီးပါ။ နောက်ဆုံးပြောချင်တာကတော့ သူနဲ့ကျနော်နဲ့ကွဲပြီး အနှစ် ၂၀ ကျော်လောက် ကြာတဲ့အခါမှာ ကျနော့်ဆီကို လူကြုံနဲ့ပါးတဲ့စကားလေး “ငါတို့နှစ်ယောက် ပြန်တွေ့ကြဦးမယ်လေ၊ ငါစောင့်နေမယ်” ဆိုတာမျိုး အမေပြောပါတယ်။ အဲဒီတော့ အဲဒီဟာလေးက အကောင်အထည် မဖော်တဲ့အတွက် အမေ့ကို ကျနော် အများကြီး “သြော် ကိုယ့်ဘက်ကများ ချို့ယွင်းသွားလေသလား” ဆိုပြီးတော့ အမေ့ကို အများကြီး ကျနော် တောင်းပန်ချင်တဲ့ဟာမျိုး ရှိပါတယ်။ ခုထိ အဲဒီခံစားမှုတွေ ကျနော့်စိတ်ထဲမှာ ရှိနေပါတယ်။ အမေ့အပေါ်မှာ တာဝန်များ ပျက်သွားလေသလား၊ အဲဒီလို။ ဒါပေမယ့်လည်း တဘက်မှာတော့ အမေလည်း နားလည်နိုင်မှာပါဆိုပြီး ပြန်ဖြေပါတယ်ခင်ဗျ။"
6 years Ago
Up