ရဲတပ်ဖွဲ့

October 16, 2022

ကလေးမြို့တွင် ချိပ်ပိတ်ခံရသည့် Cover King ဖုန်းဆိုင်မှပစ္စည်းများကို ရဲတပ်ဖွဲ့က ကားဖြင့် သယ်ယူ

စစ်ကိုင်းတိုင်း ကလေးမြို့၊ ဘုရင့်‌နောင်လမ်းမပေါ်က Cover King ဖုန်းကာဗာနဲ့ အပိုပစ္စည်းအရောင်းဆိုင်က ပစ္စည်းတွေကို ရဲတပ်ဖွဲ့က အောက်တိုဘာ ၁၆ ရက်မှာ ကားနဲ့သယ်သွားခဲ့တယ်လို့ ဒေသခံမျက်မြင်တွေက ပြောပါတယ်။

အဲဒီဆိုင်ကို ဇန်နဝါရီ ၃၁ ရက်က ချိတ်ပိတ်ကာ နိုင်ငံပိုင်အဖြစ်သိမ်းဆည်းပြီး ၉ လအကြာမှာ ဆိုင်ထဲက ပစ္စည်းတင် စင်တွေနဲ့ ပစ္စည်းတွေကို ရဲယူနီဖောင်းဝတ်တွေက လာရောက် သယ်ဆောင်သွားတယ်လို့  မျက်မြင်ဒေသခံတဦးက ပြောပါတယ်။

မနက် ၁၁ နာရီကတည်းက ဆိုင်ရှိ ပစ္စည်းတွေကို ပီနံအိတ်နဲ့ ထုပ်ပိုးကာ ရဲကား ၂ စီးနဲ့ သယ်ဆောင်နေကြတာ မြင်တွေ့ခဲ့ရတယ်လို့ သူက ဆက်ပြောပါတယ်။

အသံတိတ်သပိတ်မတိုင်မီ ဖေစ်ဘွတ်ခ်လူမှုကွန်ရက်မှာ "၁-၂-၂၀၂၂ ဆိုင်တရက်ပိတ်ပါမည်။ ဆောင်းကုန်နွေဦးမို့ အလွမ်းသင့်သည့် အခါလည်းဖြစ်တော့ နားကြရတာပေါ့" လို့  ရေးတင်ပြီးနောက် ဆိုင်ကို ချိပ်ပိတ်ခဲ့တာပါ။

ကလေးမြို့မှာ စစ်ကောင်စီက ဒေသခံတွေကို စစ်ဆေး ဖမ်းဆီးနေပြီး ဒေသခံတွေရဲ့ နေအိမ်တွေကို လည်း ချိတ်ပိတ်သိပ်ဆည်း နေပါတယ်။

2 months Ago

October 13, 2022

ချင်းမိုင်ရှိ ရဲတပ်ဖွဲ့ဝင် ၃,၅၀၀ ကျော်ကို မူးယစ်ဆေးသုံးစွဲမှု ရှိ၊ မရှိ စစ်ဆေးမည်

ထိုင်းနိုင်ငံမြောက်ပိုင်း၊ ချင်းမိုင်ခရိုင်ရှိ ရဲစခန်းပေါင်း ၃၈ ခုက ရဲအရာရှိအရာခံ ဝန်ထမ်းပေါင်း ၃,၅၀၀ ကျော်ကို မူးယစ်ဆေးဝါးသုံးစွဲမှု ရှိ၊ မရှိ ရှာဖွေစစ်ဆေးသွားမယ်လို့ ခရိုင်ရဲမှူးကြီးက အောက်တိုဘာ ၁၂ ရက်နေ့ အစည်းအဝေးမှာ ပြောပါတယ်။

နောင်ဘိုလမ်းဖူးခရိုင် မူကြိုကျောင်းပစ်ခတ်မှု ဖြစ်ပွားပြီးနောက် ပြည်သူတွေကြားထဲ ဝင်ရောက်တာဝန်ထမ်းဆောင်နေတဲ့ ရဲတပ်ဖွဲ့ဝင်တွေအပေါ် လုပ်သားပြည်သူတွေ ယုံကြည်စိတ်ချစေဖို့ရော၊ အစိုးရက မူးယစ်ဆေးဝါးစစ်ဆင်ရေးနဲ့ လက်နက်ကိုင်ဆောင်သူတွေကို ပြန်လည်စစ်ဆေးဖို့ ညွှန်ကြားချက်အရပါ ထိုင်းရဲတပ်ဖွဲ့ရဲ့ မူးယစ်ကင်းစင်သော အဖြူရောင်ရဲတပ်ဖွဲ့ စီမံချက်အရ ရဲတပ်ဖွဲ့ဝင်တိုင်း မူးယစ်ဆေးနဲ့ ပတ်သက်ခြင်း ရှိ၊ မရှိ စစ်ဆေးမှာဖြစ်တယ်လို့ ချင်းမိုင်ခရိုင်ရဲတပ်ဖွဲ့ ရဲမှူးချုပ် ထဝပ်ချိုင်း ဖုန်းဝိဝပ်ထနချိုင်းက မနေ့က ပြုလုပ်တဲ့ လပတ်အစည်းအဝေးမှာ ပြောပါတယ်။

ချင်းမိုင်ခရိုင်တွင်းရှိ ရဲစခန်းပေါင်း ၃၈ ခုက စခန်းမှူးအပါအဝင် အရာရှိ အရာခံ တပ်ဖွဲ့ဝင်တွေ အားလုံး စုစုပေါင်း ၃,၅၀၀ ကျော် တပတ်အတွင်း အပြီးစစ်ဆေးရမှာဖြစ်ကြောင်း၊ စစ်ဆေးလို့ မူးယစ်ဆေး သုံးစွဲထားတာတွေ့ရင် ဆေးဖြတ်စခန်းကို ပို့ဆောင်ပြီး ဝန်ထမ်းကျင့်ဝတ်ဥပဒေနဲ့ အရေးယူခံရမယ်လို့ ဆိုပါတယ်။

မူးယစ်ဆေးဝါး ရောင်းဝယ်တာ၊ ရောင်းဝယ်သူတွေနဲ့ ပတ်သက်တာတွေ ရှိရင်လည်း ပြတ်ပြတ်သားသား အရေးယူ အပြစ်ပေးခံရမယ်လို့ ရဲမှူးချုပ်က ပြောပါတယ်။

မနေ့ကလည်း အစည်းအဝေးခန်းထဲမဝင်ခင် ရဲတပ်ဖွဲ့ဝင်အားလုံး အရင်ဆုံး ဆီးစစ်ရကြောင်း၊ ခရမ်းရောင်ပေါ်တဲ့သူ မရှိတာကြောင့် အစည်းအဝေးတက်သူအားလုံး မူးယစ်ဆေး ကင်းစင်တယ်လို့ cm 108 ထိုင်းသတင်းမှာ ဖော်ပြသွားပါတယ်။

Ref- CM108 ၊ Photo- Khaosod

2 months Ago
More News
Up