ရဲဌာနချုပ်

April 29, 2022

ရဲစခန်းများတွင် မိသားစုဝင်များ မနေထိုင်ရန် စစ်ကောင်စီလက်အောက်ခံ ရဲဌာနချုပ် ညွှန်ကြား

နိုင်ငံတဝန်းမှာ စစ်ကောင်စီရဲ့ ရဲစခန်းတွေ မကြာခဏ တိုက်ခိုက်ခံနေရတာကြောင့် ရဲစခန်း လိုင်းခန်းတွေမှာ ဇနီးနဲ့ မိသားစုဝင်တွေ နေထိုင်ခြင်းမပြုကြဖို့ မြန်မာနိုင်ငံရဲတပ်ဖွဲ့ ဌာနချုပ်က ညွှန်ကြားထားတယ်လို့ ရဲအရာရှိတယောက်က ဒီဗွီဘီကို ပြောပါတယ်။

ရဲစခန်းတွေကို PDF တွေက မကြာခဏ စီးနင်းတိုက်ခိုက်နေပြီး ရဲတပ်ဖွဲ့ဝင်တွေ ကျဆုံးဒဏ်ရာရတာတွေ ရှိသလို လက်နက်ခဲယမ်းတွေ ဆုံးရှုံးပြီး စခန်းစွန့်ခွာရတာတွေ ရှိနေလို့ ဌာနချုပ်ကနေ ရဲတပ်ဖွဲ့ဝင်တွေရဲ့ ဇနီးတွေနဲ့ မိသားစုဝင်တွေကို ရဲစခန်းဝင်းထဲမှာ မနေထိုင်ကြဖို့ ညွှန်ကြားချက် ထုတ်ပြန်ထားတာလို့ ဆိုပါတယ်။

ရဲအရာရှိက "ဘယ်ရက်က ညွှန်ကြားတယ် ဆိုတာကိုတော့ ကျနော်လည်း ရက်အတိအကျ မမှတ်မိတော့ဘူး။ လက်ရှိ နယ်မြေရဲစခန်းတွေမှာတော့ ဇနီးနဲ့ မိသားစုဝင်တွေ တယောက်မှ မရှိတော့ဘူး။ မိဘဆွေမျိုးတွေရှိတဲ့ နေရာတွေကို ပြန်သွားကြပြ်” လို့ ပြောပါတယ်။

ဆက်လက်ပြီး သူက "ကျနော်လည်း အလုပ်ထွက်ချင်ပေမဲ့ ပြောပြလို့မရနိုင်တဲ့ အကြောင်းရာတွေကြောင့် ဆက်လက်တာဝန်ထမ်းဆောင်နေရတာ။ ကိုယ့်စခန်းကို ဘယ်နေ့ လာတိုက်ခိုက်ခံရမလဲ ဆိုတဲ့စိတ်နဲ့ တာဝန်ထမ်းဆောင်နေရတာ" လို့ ဆိုပါတယ်။

မြန်မှာနိုင်ငံအနှံ့မှာရှိတဲ့ ရဲကင်း ရဲစခန်းတွေကို PDF တွေက မကြာခဏ ဝင်ရောက်တိုက်ခိုက် သိမ်းပိုက်လို့ လက်နက်ခဲယမ်းတွေ သိမ်းဆည်းရမိတာတွေ ရှိသလို စစ်သုံ့ပန်းတွေ အများအပြား ဖမ်းဆီးနိုင်ခဲ့တယ်လို့ သိရပါတယ်။

NUG အစိုးရနဲ့ PDF/CDF ပြည်သူ့ကာကွယ်ရေးတပ်တွေကတော့ စစ်ကောင်စီ တပ်သားတွေနဲ့ ရဲတပ်ဖွဲ့ဝင်တွေ လက်နက်ခဲယမ်း အပြည့်အစုံနဲ့ ပြည်သူ့ရင်ခွင်ခိုလှုံပြီး CDM ပြုလုပ်လာရင် ထိုက်သင့်တဲ့ ဆုကြေးငွေ ဂုဏ်ပြုချီးမြှင့်ကာ လွတ်မြောက်နယ်မြေနဲ့ ပြည်ပနိုင်ငံတွေကို ပို့ဆောင်ပေးမယ်လို့ အကြိမ်ကြိမ် ထုတ်ပြန်ထားပါတယ်။

7 months Ago

October 19, 2020

အာဖဂန်နစ္စတန် ရဲဌာနချုပ်ရှေ့ ကားဗုံးကွဲ၊ ၁၂ ဦး သေဆုံးပြီး ၁၀၀ ကျော် ဒဏ်ရာရ

အာဖဂန်နစ္စတန်နိုင်ငံ ဂိုရ်စီရင်စုက ရဲဌာနချုပ်ကို အောက်တိုဘာ ၁၈ ရက်က ပစ်မှတ်ထား ထောင်ခဲ့တဲ့ ကားဗုံးပေါက်ကွဲတာကြောင့် အရပ်သား ၁၂ ယောက်ထက်မနည်း သေဆုံးပြီး ၁၀၀ ကျော် ဒဏ်ရာရတယ်လို့ ပြည်ထဲရေးဝန်ကြီးဌာနက ပြောပါတယ်။ လတ်တလော သီတင်းပတ်တွေမှာ အာဖဂန်နိုင်ငံအတွင်း တာလီဘန်တွေနဲ့ အစိုးရတပ်တွေကြား တိုက်ပွဲတွေ ပြန်ဖြစ်နေပါတယ်။ ဂိုရ်စီရင်စုရဲ့ မြို့တော် ဖေရို့ဇ်ခိုရ်မှာ တိုက်ခိုက်ခံရတာ ဖြစ်ပြီး ပဋိပက္ခထူပြောတဲ့ အာဖဂန်မှာ တခြားဒေသတွေထက်စာရင် အကြမ်းဖက်မှု သိပ်မမြင်ရတဲ့နေရာလို့ ရိုက်တာသတင်းမှာ ပြောပါတယ်။ အကြမ်းဖက်သမားတွေဟာ ကားဗုံးကို ဂိုရ်စီရင်စုရဲဌာနချုပ်ရှေ့မှာ မနက် ၁၁ နာရီလောက်မှာ ဖောက်ခွဲခဲ့တာလို့ ပြည်ထဲရေးဝန်ကြီးဌာနက ပြောပါတယ်။ ထိခိုက်သေဆုံးသူတွေထဲမှာ လုံခြုံရေးတပ်ဖွဲ့ဝင်တွေလည်း ပါတယ်လို့ ဂိုရ်စီရင်စု ကျန်းမာရေးအရာရှိက ပြောပါတယ်။ အုပ်ချုပ်ရေးမှူးရဲ့ ပြောခွင့်ရသူက “ဘယ်အုပ်စုကမှ သူတို့လက်ချက်လို့ တာဝန်မခံသေးပါဘူး။ ပေါက်ကွဲမှုက အင်မတန် အားပြင်းတယ်လို့  ပြောပါတယ်။ ထိခိုက်သေဆုံးမှုတွေ ရှိတယ်။ လူတွေကို ဆေးရုံတွေဆီ ခေါ်သွားပြီးပြီ။ ပေါက်ကွဲမှုကြောင့် အနားက အဆောက်အအုံတွေ ပျက်စီးတယ်” လို့  ပြောပါတယ်။ တာလီဘန်နဲ့ အာဖဂန်အစိုးရတို့ကြား ငြိမ်းချမ်းရေးဆွေးနွေးပွဲတွေ အရင်လက ပြန်စခဲ့ပေမဲ့ အကြမ်းဖက်မှုတွေ ဆက်လက်ရှိနေဆဲပါ။  ညှိနှိုင်းမှုရဲ့ အခြေခံမူဘောင်ကို ချမှတ်ရေး နှစ်ဘက်စလုံးက ကြိုးစားနေဆဲဖြစ်လို့ ဆွေးနွေးပွဲတွေ ကြာမယ့်သဘော ရှိတယ်လို့ မီဒီယာတွေက သုံးသပ်ထားပါတယ်။
2 years Ago
Up