မွန်ပြည်နယ်၊ ရေးမြို့နယ်၊ ကနင်ကမော့ကျေးရွာနဲ့  အောင်သာယာကျေးရွာအကြားမှာ နို၀င်ဘာ ၂၄ ရက် ဒီ ညနေ ၃ နာရီ မိနစ် ၄၀ လောက်က  Black Lighting PDF တပ်နဲ့ စစ်ကောင်စီတပ်တို့  ပစ်ခတ်မှု ဖြစ်ပွားခဲ့တယ်လို့ ဒေသခံ သတင်းရင်းမြစ်တွေက ပြောပါတယ်။

အဆိုပါပစ်ခတ်မှုမှာ စစ်ကောင်စီတပ်သား ၆ ယောက် သေဆုံးပြီး ၄ ယောက် ပြင်းထန်စွာ ဒဏ်ရာရရှိပြီးနောက် နယ်မြေခံ ၁၀၆ တပ်ရင်းက  ကနင်ကမော့ ကျေးရွာဘက်သို့ လက်နက်ကြီးနဲ့ ပစ်ခတ်နေတယ်လို့ ဒေသခံတွေက ပြောပါတယ်။

တိုက်ပွဲဖြစ်ပွားချိန်မှာ ရန်ကုန် -မော်လမြိုင်-ရေး -ထားဝယ် လမ်းရှိ ခရီးသွားကားတွေ လမ်းမှာ ပိတ်ဆို့ရပ်တန့်နေရတယ်လို့ ဒေသခံ တယောက်က ပြောပါတယ်။ 

ရေး-သံဖြူဇရပ်ကားလမ်းမှာ ပစ်ခတ်မှုတွေရဲ့  အခြေနေကို ရေး PDF နဲ့ စစ်ကောင်စီဘက်က သတင်းထုတ်ပြန်တာ မရှိသေးပါဘူး။ 

မွန်ပြည်နယ် ရေးမြို့က ရေးတံတားကြီးထိပ်မှာရှိတဲ့ စစ်ကောင်စီရဲ့ စစ်ဆေးရေးဂိတ်ကို တိုက်ခိုက်ခဲ့တယ်လို့  ရေး PDF ပြောက်ကျားအထူးအဖွဲ့က ပြောပါတယ်။

ရန်ကုန် - ရေး - ထားဝယ် - မြိတ်ကား လမ်းမကြီးပေါ်က ရေးတံတားကြီးထိပ်မှာ စစ်ကောင်စီရဲ့ ကင်းစခန်းက ကတုတ်ကျင်းနဲ့ မတရားစစ်ဆေးငွေတောင်းခံနေတဲ့ ဂိတ်ကို  နိုဝင်ဘာ ၆ ရက် ည ၆ နာရီလောက်က ဝင်ရောက်စီးနင်းပစ်ခတ်ခဲ့တာကြောင့် စစ်ကောင်စီရဲ့ တပ်သား ၂ ဦး သေဆုံးခဲ့တယ်လို့ ဆိုပါတယ်။

အဲဒီ စစ်ဆေးရေးဂိတ်ဟာ  မွန်ပြည်သစ်ပါတီ နဲ့ KNU ထိန်းချုပ်နယ်မြေဘက်ကို ဆက်သွယ် သွားလာတဲ့လမ်းနဲ့ ဒေသခံတွေ ဥယျာဉ်ခြံ သွားလာလုပ်ကိုင်နေကြတဲ့ လမ်းနေရာလည်း ဖြစ်တာပါ။

ဒါ့အပြင် အဲဒီလမ်းထိပ်စစ်ဆေးရေးဂိတ်မှာ စစ်ကောင်စီက တပ်စွဲထားပြီး လုံခြုံရေး တင်းကျပ်ထားတဲ့ နေရာတစ်နေရာလည်းဖြစ်သလို  ဒေသခံတွေမှာ စစ်ကောင်စီရဲ့ စစ်ဆေး မေးမြန်းတာတွေ အမြဲခံရနေတာကြောင့် ရေး PDF က စတင် တိုက်ခိုက်ခဲ့တာလို့ဆိုပါတယ်။