မွန်ပြည်နယ်၊ ရေးမြို့နယ် နှင်းစုံရွာအနီးနားက ဂက်စ်ပိုက်လိုင်းတခုကို ဇန်နဝါရီ ၁၆ ရက်နေ့ မွန်းလွဲပိုင်း ၁ နာရီကျော်အချိန်က မိုင်း ၂ လုံးခွဲလိုက်တယ်လို့ ရေး PDF မြောက်ပိုင်းအဖွဲ့က ပြောပါတယ်။
ဂက်စ်ပိုက်လိုင်း မိုင်းခွဲခံရတဲ့အတွက် ပျက်စီးမှုရဲ့ အခြေအနေကိုတော့ မသိရှိရသေးဘဲ အဓိက စစ်ကောင်စီရဲ့ ဝင်ငွေစီးဆင်းမှုတွေ ရပ်တန့်သွားအောင် အခုလို အဝေးကနေ ခလုတ်နှိပ်ပြီး မိုင်းခွဲဖျက်ဆီးခဲ့တာလို့ ရေး PDF မြောက်ပိုင်းအဖွဲ့က ပြောပါတယ်။
ဂက်စ်ပိုက်လိုင်း မိုင်းခွဲခံရပြီးတဲ့နောက် စစ်ကောင်စီတပ်ဘက်က အနီးအနား ပတ်ဝန်းကျင်တွေကို ရဟတ်ယာဉ်နဲ့ ပျံဝဲနေပြီး စစ်ဆင်ရေးတွေ လှုပ်ရှားလာနိုင်တာကြောင့် ဒေသခံတွေ စိုးရိမ်နေကြပါတယ်။
ရေး PDF မှ စစ်ကောင်စီရဲ့ ၀င်ငွေစီးဆင်းမှုတွေ မလည်ပတ်နိုင်အောင် ဆက်သွယ်ရေး Mytel တာဝါတိုင်တွေ ၅ ခု၊ မြေအောက်ဆက်သွယ်ရေးလိုင်းတွေနဲ့ အခု ကံပေါက်ကနေ မွန်ပြည်နယ်ဘက်ကို ဆက်သွယ်ထားတဲ့ ဂက်စ်ပိုက်လိုင်းကို ထပ်မံဖျက်ဆီးခဲ့ပါတယ်။
မွန်ပြည်နယ် ရေးမြို့နယ်ထွက် ကွမ်းဈေးနှုန်း စစ်တပ်က အာဏာသိမ်းပြီးတဲ့နောက် စံချိန်တင်ဈေး ကျပ် ၁၀၀၀၀ ထိမြင့်တက်ခဲ့ပြီးနောက် လက်ရှိမှာ ကျပ် ၅၀၀၀ ကျော်သာရှိတော့ပြီး ထက်ဝက်ကျဆင်းသွားတယ်လို့ ခြံရှင်တွေက ပြောပါတယ်။
“ကွမ်းသီးအခြောက် ၁ ပိဿာကို ၅၀၀၀ ကျပ်လောက် ပြန်ကျသွားတယ်။ ရာသီဥတုဒဏ်ကြောင့် ကွမ်းသီး အထွက်နှုန်းလည်း ကျဆင်းသွားတယ်။ ရရှိတဲ့ ကွမ်းသီးဒီစျေးနဲ့ဆို အလုပ်သမား၊ ခြံစရိတ်နဲ့ဆို သိပ်ပြီးငွေမကျန်ဘဲ အခုက နယ်မြေကလည်း အရင်လိုမအေးချမ်းတော့ ခြံမှာ မနေရဲပြန်တော့ ငွေက ရသင့်သလောက်မရကြဘူး” လို့ ခြံသမားတဦးက ပြာပါတယ်။
ပြည်တွင်းမှာ နိုင်ငံရေး မငြိမ်မသက်တာကြောင့် ဝယ်လိုအားလည်း သိပ်ပြီး မကောင်းသလို ငွေကြေးလည်ပတ်တဲ့ ဘဏ်စနစ်လည်း အရင်လိုမကောင်းတော့ အရောင်းအ၀ယ်ပါ အေးပြီး ဈေးပြန်ကျဆင်းလာတာလို့ ဒေသခံ ကွမ်းသီးကုန်သည်တဦးက ပြောပါတယ်။
စစ်တပ်အာဏာသိမ်းပြီးတဲ့နောက် မြန်မာငွေတန်ဖိုးကျဆင်းသွားလာတာနဲ့အမျှ ပြည်တွင်းကွမ်းသီးဈေး စံချိန်တင်ဈေးတွေ ရရှိခဲ့ပေမဲ့ ဈေးထက်ဝက်ပြန်ကျသွားတာလို့ ဆိုပါတယ်။
ရေးမြို့နယ်က ထွက်ရှိတဲ့ ကွမ်းသီးတွေကို ပြည်တွင်းအပြင် အိန္ဒိယနဲ့ ဘင်္ဂလားဒေ့ရှ်ဘက် အဓိက တင်ပို့နေပြီး ကွမ်းသီးစိုက်ပျိုးဧက သောင်းနဲ့ချီရှိသလို နှစ်စဉ် ကွမ်းသီးထွက်ရှိမှု တန်ချိန် ၁ သိန်းဝန်းကျင်အထိ ရှိတယ်လို့ ဆိုပါတယ်။
