ရေဦးမြို့နယ်

January 20, 2022

ရေဦးမြို့နယ်တွင် စစ်ကောင်စီခြေလျင်တပ် မိုင်းဆွဲခံရ

စစ်ကိုင်းတိုင်း၊ ရေဦးမြို့နယ်၊ ချမ်းသာကျေးရွာအုပ်စု၊ ထန်းပင်ကုန်းရွာအနီးမှာ စစ်ကောင်စီတပ်ကို တော်လှန်ရေး တပ်ပေါင်းစုံက ဇန်နဝါရီ ၂၀ ရက် မွန်းတည့် ၁၂ နာရီလောက်က မိုင်းဆွဲတိုက်ခိုက်ခဲ့တယ်လို့ ဒေသခံရွာသားတွေဆီက သိရပါတယ်။

စစ်ကောင်စီတပ်ဟာ မနက်ခင်းပိုင်းကနေ ရေဦးမြို့ပေါ်ကနေ ခြေလျင်စစ်ကြောင်းထိုးလာခဲ့ပြီး ချမ်းသာကျေးရွာအုပ်စုအတွင်းမှာ အခုလိုမိုင်းဆွဲခံရတာပါ။

ပြည်သူကာကွယ်ရေးအဖွဲ့ဝင် ကိုဂျိုးဇက်က “မိုင်းအဆွဲခံရတာက ချမ်သာကျေးရွာအုပ်စု၊ ချမ်းသာဘူတာအနီမှာ အဆွဲခံရတာဖြစ်တယ်။ အသေအပျောက်ကတော့ အတိကျမ ပြောနိုင်ဘူ။ အထိခိုက်အကျအဆုံးတော့ ရှိနိုင်လောက်တယ်။ ကျနော်တို့ဘက်ကတော့ အကျဆုံးမရှိဘူး” လို့ ပြောပါတယ်။

စစ်ကောင်စီတပ်တွေဟာ ဇန်နဝါရီ ၁၁ ရက်က ချမ်းသာကျေးရွာကို ဝင်ရောက်ပြီး ရွာသား နှစ်ဦး ကို ပစ်သတ်ခဲ့ကာ ရွာသား ၆ ဦးကိုလည်း ဖမ်းဆီးခဲ့တယ်လို့ သိရပါတယ်။

ချမ်းသာကျေးရွာကို စစ်ကောင်စီဝင်ရောက်တာဟာ လက်ရှိအကြိမ်နဲ့ဆို ၄ ကြိမ်မြှောက်ရှိခဲ့ပြီး ပထမအကြိမ်နဲ့ ဒုတိယအကြိမ်က ကျေးရွာအတွင်းက ပစ္စည်းတွေနဲ့အိမ်တွေ ဖျက်ဆီးခံခဲရသလို တတိယအကြိမ်မှာတော့ ဒေသခံရွာသားတွေပါ အသတ်ခံခဲ့ရတာလည်း ဖြစ်ပါတယ်။

မိုင်းဆွဲခံရတဲ့ စစ်ကောင်စီတပ်တွေဟာ လက်ရှိအချိန်မှာ ချမ်းသာကျေးရွာအတွင်း ရောက်ရှိနေပါတယ်။ 

ချမ်းသာကျေးရွာဟာ အိမ်ခြေ ၅၀၀ ကျော်လောက်ရှိပြီး ဒေသခံရွာသားတွေဟာ မိရိုဖလာတောင်သူလုပ်ငန်းကို ရိုးသားစွာလုပ်ကိုင်စားသောက်နေသူတွေ ဖြစ်ပါတယ်။

အခုလို စစ်‌ကောင်စီနဲ့ ပြည်သူကာကွယ်ရေးတပ်‌တို့ တိုက်ပွဲဖြစ်ပွားနေတာကြောင့်  ဒေသခံရွာသား ထောင်နဲ့ချီ စစ်ဘေးရှောင်နေရတယ်လို့ သိရပါတယ်။

5 days Ago

January 12, 2022

ရေဦးမြို့နယ်တွင် ပရဟိတလုပ်နေသူ ၁ ဦးကို စစ်ကောင်စီက ဖမ်းဆီး

စစ်ကိုင်းတိုင်း၊ ရေဦးမြို့နယ်အတွင်း ပရဟိတလုပ်ကိုင်နေတဲ့‌ ရေဦးအောင်ဆန်းရပ်ကွက်မှာ နေထိုင်သူ ဦးကျော်ဝင်းကို ဇန်နဝါရီ ၁၁ ရက် ညနေ ၃ နာရီလောက်မှာ စစ်ကောင်စီက ဖမ်းဆီးသွားတယ်လို့ ဒေသခံတွေဆီက သိရပါတယ်။

ဦးကျော်ဝင်းဟာ  ရေဦးမြို့ပေါ်မှာ အောင်ဆုမွန် အထက်တန်းကျူရှင်သင်ကြားနေသူတစ်ဦး ဖြစ်တယ်လို့ သိရပါတယ်။

“ဒီလူက နိုင်ငံရေးတွေကတော့ စိတ်မဝင်စားဘူးရယ်။ ပရဟိတလုပ်ငန်းဆိုရင် အနီ၊ အစိမ်းမခွဲဘူး၊ အကုန်တွဲလုပ်တာဗျ။ စစ်ကောင်စီက အခုလို သက်သက်မဲ့ကြီး လာဖမ်းသွားတာကို ကျနော်တို့ ဒေသခံတွေက အံ့ဩနေကြတာ။ ဒီလူက ကိုယ်ဗစ်ပထမလှိုင်း၊ ဒုတိယလှိုင်းတွေမှာဆိုရင် အောက်စီဂျင်လူနာတွေရဖို့ရာ တက်တက်ကြွကြွလုပ်ခဲ့တဲ့သူပါဗျာ။ ကိုဗစ်ဖြစ်လို့ ဒေသခံတွေ အစားအသောက်တွေ အခက်အခဲတွေ ဖြစ်တုန်းကလည်း သူပဲ မျှဝေခြင်းအစီစဉ်ဆိုပြီး ခက်ခဲနေသူတွေကို အကုန်လုပ်ကိုင်ပေးခဲ့တဲ့ သူတစ်ယောက်ပါ” လို့ ရေဦးမြို့ခံတစ်ဦးက အတည်ပြုပြောဆိုပါတယ်။

စစ်ကောင်စီက ဦးကျော်ဝင်းကို ၂၀၂၀ အထွေထွေရွေးကောက်ပွဲမှာ တိုင်းဒေသကြီးလွှတ်တော်ကိုယ်စာလှယ်အမှတ် ၂ မဲဆန္ဒနယ်မြေ ဦးမြင့်ထွေးရဲ့ မဲရုံမှူး လုပ်ခဲ့တာကြောင့် အခုလိုဖမ်းဆီးတာလို့ ရေဦးမြို့နယ်ရဲစခန်းနဲ့ နီးစပ်သူတစ်ဦးက ပြောဆိုပါတယ်။

ဦးကျော်ဝင်းဟာ လက်ရှိအချိန်အထိ ရေဦးမြို့နယ်တခုလုံးက ကိုဗစ်လူနာတွေအတွက် အခမဲ့အောက်စီဂျင်ရရှိဖို့ရာ အောက်စီဂျင်စက်ရုံတည်ဆောက်နိုင်ရေးအတွက်  ဘဏ္ဍာရေးမှူးအဖြစ် တာဝန်ထမ်းဆောင်နေဆဲလို့ ရေဦးမြို့နယ် ပရဟိတလုပ်ကိုင်နေသူတွေဆီက သိရပါတယ်။

2 weeks Ago
More News
Up