ရေအခက်အခဲ

August 29, 2021

မန္တလေးမြို့ပေါ်တွင် မီတာရေမလာသဖြင့် ဒေသခံများ ရေအခက်အခဲကြုံ

မန္တလေးမြို့ပေါ် ရပ်ကွက်တွေမှာ  မီတာရေမလာလို့ ဒေသခံတွေ ရေအခက်အခဲဖြစ်ပေါ်နေတယ်လို့ မြို့ခံတွေရဲ့  ပြောပြချက်အရ သိရပါတယ်။

ဩဂုတ်၂၇ ရက်  ည ၁၁ နာရီက ကမ်းနားလမ်းရေပေးရေး 33kv ဓာတ်အားလိုင်းမှာ (line fault) ဖြစ်ပြီး ဓာတ်အားပြတ်တောက်ခဲ့ရာ ရေပေးဝေနေတဲ့ ရေတွန်းစက်တွေ ခေတ္တရပ်ဆိုင်းခဲ့ရတယ်လို့ မန္တလေးမြို့တော်စည်ပင်သာယာရေးကော်မတီက ထုတ်ပြန်ထားပါတယ်။ 

ဒါကြောင့် ချမ်းအေးသာစံ၊ အောင်မြေသာစံနဲ့ မဟာအောင်မြေမြို့နယ်အတွင်းရှိ ရပ်ကွက်အများစုမှာ သြဂုတ် ၂၇ ရက် ညပိုင်းမှ သြဂုတ် ၂၉ရက် ညနေပိုင်းထိ ရေပြတ်လပ်မှု ဖြစ်ပေါ်ခဲ့တာပါ။ 

မြို့ခံတစ်ဦးက “ရေတွန်းစက်ရုံက မီးမလာတော့ ရေမပေးဘူး ပြောတာပဲ၊ ရပ်ကွက်အတော်တော်များများ ရေမလာတော့ အခက်တွေ့နေကြတယ်၊ ရေပြတ်တာတွေ ဖြစ်နေတယ်၊ အများစုက ရေလှောင်ကန်မရှိသူတွေဆိုတော့ ဒုက္ခတော်တော်ရောက်နေကြတယ်” လို့ ပြောပါတယ် 

မန္တလေးမြို့ပေါ် ရပ်ကွက်အများစုဟာ မီတာရေကို အဓိက မှီခိုနေတာကြောင့် ရေလှောင်ကန်မရှိသူ များပြားတဲ့အတွက် ရေအခက်အခဲဖြစ်ပေါ်နေတာပါ။  

သောက်သုံးရေနဲ့ သုံးရေအခက်အခဲရှိသူတွေအနေနဲ့ အကူအညီ တောင်းခံနိုင်တယ်လို့ မန္တလေးမြို့ပေါ် အရန်မီးသတ်တပ်ဖွဲ့နဲ့ ပရဟိတအသင်းတချို့က ထုတ်ပြန်ထားပါတယ်။ 

သြဂုတ် ၂၉ရက် ညနေပိုင်းမှာ မန္တလေးမြို့ပေါ် ရပ်ကွက်တွေမှာ ရေပြန်လာနေပြီဖြစ်တယ်လို့ သိရပါတယ်။  

2 months Ago

December 24, 2020

ဖရူဆိုမြို့နယ်တွင် ရေခမ်းခြောက်မှုကြောင့် ရေအခက်အခဲ ကြုံတွေ့နေရ

ကယားပြည်နယ်မှာ ဖရူဆိုမြို့နယ်မှာ နိုဝင်ဘာလကတည်းက ရေအရင်းအမြစ်တွေ ခမ်းခြောက်နေတဲ့အတွက် ဒေသခံတွေ ရေအခက်အခဲနဲ့ ကြုံတွေ့နေကြရတယ်လို့ မြို့နယ် ပြည်နယ်လွှတ်တော်ကိုယ်စားလှယ် ဦးသဲရယ်က ပြောပါတယ်။  “ဖရူဆိုမြို့နယ်မှာ ဒီနှစ်ကတော့ ရေရှားပါးတာ ခါတိုင်းနှစ်ထက်ပိုဆိုးတာပေါ့နော်။ ခါတိုင်းနှစ်ဆိုရင် မတ်လကနေစတယ်။ အရင်နှစ်ဆိုလို့ရှိရင် ဇန်နဝါရီလကနေ စတာတာပေါ့။ ဒီနှစ်ကတော့ နိုဝင်ဘာကတည်းကိုက ရေအရင်းအမြစ်ခန်းခြောက်တာတွေ ဖြစ်လာတာပေါ့နော်။ ဆိုတော့ နှစ်ထက်တနှစ် ရေပြဿနာတွေက ကြီးလာတဲ့ပေါ်မှာ အစိုးရအနေနဲ့ ပြင်ဆင်မှုဘာတွေရှိလဲ ဆိုတဲ့ဟာမျိုး ကျနော်ကတော့ လွှတ်တော်ထဲမှာ မေးခွန်းမေးမြန်းတာ ရှိတာပေါ့နော်။ အခုဆိုရင် တော်တော်များများကလည်း ရေအခက်အခဲတွေ တော်တော်ကြုံတွေ့နေရပြီရွာတွေက၊ တချို့လည်း အလှူရှင်တွေလာပြီး လှူဒါန်းတာတွေလုပ်တယ်။ အစိုးရဘက်ကနေ သိတဲ့အတိုင်းပေါ့ သတ်မှတ်ကာလ မရောက်သေးဘူးဆိုလို့ရှိရင် ရေလှူဒါန်းတဲ့ကိစ္စတွေက မဆောင်ရွက်နိုင်တဲ့အနေအထားမျိုးရှိနေတာပေါ့။ တချို့ဟာတွေက အစိုးရက ရေလှူဒါန်းမယ့်ရေကိုပဲ စောင့်နေမယ်ဆိုလို့ရှိရင် တော်တော်လေး အခက်အခဲကြုံနေရတဲ့ အနေအထားမျိုးဖြစ်ပါတယ်။ ” ဖရူဆိုမြို့နယ်မှာ မြို့ပေါ်ရပ်ကွက်တချို့အပါအဝင် ကျေးရွာ ၃၀၊ ၄၀ လောက် ရေရှားပါးမှုနဲ့ ကြုံတွေ့နေရပြီး တချို့ကတော့ အလှူရှင်တွေလာရောက်လှူဒါန်းတာတွေရှိသလို တချို့ကတော့ ကိုယ်ထူကိုယ်ထ ရေရှိရာမှာ သွားရောက်ခတ်ယူနေရပါတယ်။ ရေအခက်အခဲကြုံတွေ့နေရတဲ့ ဖရူဆိုမြို့နယ်အတွက် အစိုးရအနေနဲ့ ဘဏ္ဍနှစ်အလိုက် စိစဉ်ဆောင်ရွက်ထားတာကို သိရှိလိုကြောင်း ဒီကနေ့ ကျင်းပပြုလုပ်တဲ့ ကယားပြည်နယ်လွှတ်တော် ၁၉ ကြိမ်မြောက် ပုံမှန်အစည်းအဝေး (ပထမနေ့) မှာ ဦးသဲရယ်က မေးမြန်းခဲ့ပါတယ်။  ဒီမေးမြန်းမှုနဲ့ပတ်သက်ပြီး ပြည်နယ် စီမံကိန်းနှင့် ဘဏ္ဍာရေးဝန်ကြီးဌာနဝန်ကြီး ဦးမော်မော် ဖရူဆိုမြို့နယ်ရေရှားပါးတဲ့ ကျေးရွာတွေကို ပြည်ထောင်စုအစိုးရ ရန်ပုံငွေရော၊ ပြည်နယ်အစိုးရ ရန်ပုံငွေနဲ့ပါ လုပ်ဆောင်ပေးနေကြောင်း ပြောပါတယ်။  “ဖရူဆိုမြို့နယ်မှာရှိတဲ့ကျေးရွာများ၊ ရေရှားပါးကျေးရွာများအပါအဝင် နှစ်စဉ်သောက်သုံးရေ လုံလောက်စွာရရှိဖို့အတွက် ကျေးလက်ဒေသ ဖွံ့ဖြိုးတိုးတက်ရေးဦးစီးဌာနမှ ၂၀၁၂-၁၃ ဘဏ္ဍရေးနှစ်ကနေပြီးတော့ ၂၀၁၉-၂၀ ဘဏ္ဍရေးနှစ်အထိ ပြည်ထောင်စုရော၊ ပြည်နယ်ရန်ပုံငွေကျပ် ၉၉၃.၈၆၁ သန်းဖြင့် ကျေးရွာ ၉၇ ရွာကို ရေရရှိရေးအတွက် ၉၆ ခု ဆောင်ရွက်ခဲ့ပြီးဖြစ်ပါတယ်။ ၂၀၂၀-၂၁ ဘဏ္ဍရေးနှစ်မှာ ရေရှားကျေးရွာများအတွက် ကျေးရွာ ၈ ရွာကို ပြည်ထောင်စု ရန်ပုံငွေ ကျပ် ၁၆၂.၁၈ သန်းနှင့် ကျေးလက်ရေရရှိရေး ပြည်နယ်အစိုးရ မူလရန်ပုံငွေတွေနဲ့ ၁၀၈.၁၁၉ သန်းနှင့် ကျေးရွ ၉ ခုတို့ကို ကျေးလက်ရေရရှိရေး ဆောင်ရွက် ပေးနေပြီမိုလို့ အခုလာမယ့် ၂၁-၂၂  ဘဏ္ဍရေးနှစ်မှာလည်း ပြည်ထောင်စုရော ပြည်နယ်ရော အစိုးရရန်ပုံငွေအသီးသီးနဲ့ ရေရှားပါးတဲ့ကျေးရွာတွေကို ကျေးလက်ရေရရှိရေး လုပ်ငန်းရာထားဆောင်ရွက်ပေးသွားမှာဖြစ်ပါတယ်‌။”  ဖရူဆိုမြို့နယ်မှာ ကျေးရွာအုပ်စု ၁၄ အုပ်စု၊ ကျေးရွာ ၁၁၄ ရွာ၊ အိမ်ခြေ ၅၂၃၆၊ လူဦးရေ ၁၇၄၉၅ ဦးရှိပြီး ရေလွှမ်းခြုံမှုကတော့ ၇၀ ရာခိုင်နှုန်းလောက်ရှိကြောင်းလည်း ဦးမော်မော်က ပြောပါတယ်။  ဒါ့အပြင်  ကယားပြည်နယ်မှာ ရေကောင်းရေသန့်ရရှိမှု စစ်တမ်းအရ လူ ၁၀ ဦးမှာ ၆ ဦးသာ ရေကောင်းရေသန့်ရရှိပြီး ၄ ဦးမှာ ရေအခက်အခဲဖြစ်နေတာ လေ့လာတွေ့ရှိရတယ်လို့ စစ်တန်းတွေနဲ့တူ ရှင်းပြခဲ့ပါတယ်။ 
10 months Ago
More News
Up