ရေဝင်

September 1, 2021

မတ္တရာ စကျင်ကျေးရွာအရှေ့ပိုင်း ရေဝင်၊ အိမ်ခြေ ၁၉ အိမ် ရေဘေးလွတ်ရာ ပြောင်းရွှေ့

မန္တလေးတိုင်းဒေသကြီး ပြင်ဦးလွင်ခရိုင် မတ္တရာမြို့နယ် စကျင်ကျေးရွာ အရှေ့ပိုင်းမှာ သြဂုတ် ၃၁ ရက် ည ၉ နာရီ ၂၀ မိနစ်က ရေဝင်ရောက်ခဲ့တယ်လို့ မြို့နယ်မီးသတ်ဦးစီးဌာနက သိရပါတယ်။

မိုးသည်းထန်စွာရွာသွန်းမှုကြောင့် စကျင်ကျေးရွာရဲ့ တောင်ဘက်ရှိ ဧက ၆၀၀ ခန့်ရှိ စကျင်အင်း(ခ) စံပြငါး‌မွေးမြူရေးကန်အတွင်း မိုး‌‌ရေနဲ့ ဆည်တော်ကြီးဆည်က ဆည်ရေ ဝင်ရောက်လျှံကျပြီး စကျင်ကျေးရွာအရှေ့ပိုင်းကို ရေများဝင်ရောက်ခဲ့တာလို့ မြို့နယ်မီးသတ်ဦးစီးဌာနက ထုတ်ပြန်ထားပါတယ်။

စကျင်ကျေးရွာအနီးရှိ ပုဂ္ဂလိကမွေးမြူရေး ငါးကန်က သဲအိတ်တွေ ကာထားတာကြောင့် ရေတံခါးဖွင့်မရဘဲ ရေကြီးရေလျှံ ဖြစ်ပေါ်ခဲ့တာဖြစ်ပြီး ငါးကန်က ဒီနေ့ထိ တာဝန်ယူမှု တာဝန်ခံမှု မရှိသေးဘူးလို့ ဒေသခံတွေက ပြောပါတယ်။

ရေဝင်ရောက်ခဲ့တဲ့ နေရာတွေကို မတ္တရာမြို့နယ်မီးသတ်စခန်းက သန္ဓေ/ အရန်မီးသတ်တပ်ဖွဲ့ဝင်တွေ၊ သက်ဆိုင်ရာအဖွဲ့အစည်းတွေ ပူးပေါင်းပြီး ကယ်ဆယ်ရေးလုပ်ငန်းတွေ သွားရောက် ကူညီဆောင်ရွက်ခဲ့ပါတယ် ။

ရေဝင်ရောက်ခဲ့တဲ့ အိမ်ခြေ ၁၉အိမ်ရှိခဲ့ရာ ယင်းအိမ်များမှာ လူဦးရေ ၉၀ဦးအား ရေဘေးလွတ်ရာ ပုပ္ပါရုံဘုန်းတော်ကြီးကျောင်းသို့ စက်တင်ဘာ ၁ရက် နံနက် ၅နာရီ ၄၅မိနစ်က ယာယီနေရာချထားပေးနိုင်ခဲ့တယ်လို့ သိရပါတယ်

5 months Ago

August 23, 2020

ရေးမြို့ မြသီတာဈေးနှင့် နေအိမ်အချို့ ရေဝင်ရောက်လာ၍ စတင်ရွှေ့ပြောင်းနေ (ဓာတ်ပုံ)

မွန်ပြည်နယ်၊ ရေးမြို့နယ်မှာ မြစ်ရေ မြင့်တက်လာတာကြောင့် ရေကြီးရေလျှံဖြစ်နေပြီး မြသီတာဈေးနဲ့ လူနေအိမ်အချို့ကို ရေဝင်ရောက်လာလို့ စတင်ရွှေ့ပြောင်းနေတယ်လို့ သိရပါတယ်။ သြဂုတ် ၂၃ ရက်နေ့ မွန်းလွဲပိုင်းက စတင်ပြီး မြစ်ရေမြင့်တက်မှုနဲ့ ရေးချောင်းဖျား တောင်ကျချောင်းရေကြောင့် ရေးမြို့နယ် မြို့ပေါ်ရပ်ကွက်တချို့က လူနေအိမ်တွေနဲ့ ဈေးအတွင်း ရေဝင်ရောက်လာတာလို့ ဆိုပါတယ်။ ရေးမြို့ပေါ် ရန်မျိုးအောင်၊  ရန်ကြီးအောင်၊  အောင်သုခ၊  အောင်မေတ္တာ၊  အောင်မင်္ဂလာ၊ သီရိနန္ဒာ စတဲ့ အနိမ့်ပိုင်းရပ်ကွက်တွေ လူနေအိမ်တွေထဲ ရေဝင်နေတာလို့ ဆိုပါတယ်။ အနိမ့်ပိုင်းက အိမ်ထောင်စုအချို့ဟာ နီးစပ်ရာ နေအိမ်တွေမှာ သွားရောက်ခိုလှုံနေကြတယ်လို့ ဒေသခံတွေက ပြောပါတယ်။ အခုလက်ရှိမှာ ရေးမြို့ မြစ်ရေဟာ စိုးရိမ်ရေမှတ်ကို မရောက်သေးပေမယ့် ပြီးခဲ့တဲ့နှစ်ကလို မြစ်ရေကြီးပြီး ဆုံးရှုံးမှုများပြားမှာကို ဒေသခံတွေ စိုးရိမ်နေကြတယ်လို့ သိရပါတယ်။ ကလော့၊ ဟံဂံ ကျေးရွာအပြင် ကျောင်းရွာကျေးရွာနဲ့ ရေးချောင်းဖျားဒေသ ကျေးရွာချင်းဆက်လမ်းတွေလည်း လမ်းရေကျော်ပြီး သွားလာရေးမှာ ခက်ခဲနေတယ်လို့ ဒေသခံတွေ ပြောပါတယ်။ လက်ရှိမှာတော့ ရွှေ့ပြောင်းရတဲ့ အိမ်ထောင်စုစာရင်းကို တာဝန်ရှိသူတွေက ကောက်ယူနေဆဲပဲလို့ သိရပါတယ်။ ရေးမြို့နယ်မှာ မိုးရေချိန် ၉.၁၇ လက်မ ရွာသွန်းသွားခဲ့တယ်လို့ မိုးဇလက ထုတ်ပြန်ထားပါတယ်။ နေမျိုးထွဋ်
1 year Ago
Up