ရေတာရှည်

December 29, 2022

ရေတာရှည်တိုက်ပွဲတွင် စစ်ကောင်စီ အရာရှိ ၁ ဦး အပါအဝင် ၆ ဦး သေဆုံး

ပဲခူးတိုင်း၊ တောင်ငူခရိုင်၊ ရေတာရှည်မြို့နယ်၊ နားဂျပ်ပင်ကျေးရွာ၊ ဂူတောင်တောရကျောင်းအနီးမှာ ဒီဇင်ဘာ ၂၇ ရက် မနက် ၁၁ နာရီလောက်က စစ်ကောင်စီစစ်ကြောင်းနဲ့ တောင်ငူခရိုင် PDF တို့ တိုက်ပွဲဖြစ်ပွားခဲ့ရာ စစ်ကောင်စီတပ်က အရာရှိ ၁ ဦး အပါအဝင် ၆ ဦး သေဆုံးပြီး ၁၂ ဦး ဒဏ်ရာရခဲ့တယ်လို့ ပဲခူး PDF က သတင်းထုတ်ပြန်ထားပါတယ်။

နားဂျပ်ရွာစာသင်ကျောင်းမှာ တပ်စွဲထားတဲ့ စစ်ကောင်စီတပ်ဖွဲ့ဝင် အင်အား ၃၂ ယောက်ပါ စစ်ကြောင်းဟာ ခရိုင်ချင်းဆက်လမ်းအတိုင်း ဂူတောင်တောရကျောင်းကို စစ်ကြောင်းထိုး ဝင်ရောက်လာရာ ရေတာရှည်မြို့နယ်အခြေစိုက် တောင်ငူခရိုင် PDF တပ်ရင်း-၃၅၀၁၊ တပ်ခွဲ-၄ တော်လှန်ရေး‌တပ်ဖွဲ့ဝင်တွေနဲ့ တိုက်ပွဲဖြစ်ပွားခဲ့တာပါ။

ဒေသခံပြည်သူတဦးက “တိုက်ပွဲဖြစ်သံတော့ကြားတယ်။ ကြာတော့ကြာတယ်။ စစ်တပ်က သေတာရှင်တာတော့ ရှိတယ်ကြားတယ်။ သွားမကြည့်ရဲလို့ သေချာတော့မသိဘူး။ ဒီဘက်မှာက စစ်တပ်ဝင်လာရင် ဘယ်မှာတိုက်ပွဲဖြစ်မလဲလို့ စိုးရိမ်နေရတယ်။ ကြောက်နေရတယ်။ တွေ့ရာလူကို မတရားစွပ်စွဲပြီး ဖမ်းဆီးသတ်ဖြတ်မှာ ကြောက်ရတယ်” လို့ ပြောပါတယ်။

အဆိုပါတိုက်ပွဲဟာ ၄၅ မိနစ်နီးပါး ကြာမြင့်ခဲ့ပြီး စစ်ကောင်စီတပ်ဘက်က သေဆုံးသူနဲ့ ဒဏ်ရာပြင်းထန်သူတွေ ရှိခဲ့ပေမဲ့ တော်လှန်ရေးတပ်ဖွဲ့ဝင်တွေဘက်က  အထိအခိုက်မရှိ အောင်မြင်စွာ ဆုတ်ခွာနိုင်ခဲ့ပါတယ်။

ဒီဇင်ဘာ ၂၅ ရက် မနက်ပိုင်းကလည်း တောင်ငူမြို့နယ်၊ ဆိတ်မြောင်ကျေးရွာ အနောက်ဘက်မှာ စစ်ကောင်စီတပ်နဲ့ တောင်ငူခရိုင် PDF တပ်ရင်း-၃၅၀၁၊ တပ်ခွဲ-၁ တို့ ထိတွေ့တိုက်ပွဲဖြစ်ပွားခဲ့ရာ စစ်ကောင်စီတပ်ဖွဲ့ဝင် ၃ ဦး သေဆုံးပြီး ထိခိုက်ဒဏ်ရသူတွေရှိကာ တော်လှန်ရေးတပ်ဖွဲ့ဘက်ကတော့ အထိအခိုက်မရှိဘူးလို့ ဆိုပါတယ်။

အဆိုပါတိုက်ပွဲတွေအတွင်း အထိနာခဲ့တဲ့ စစ်ကောင်စီတပ်က အဲဒီနေ့ ညနေပိုင်းလောက်မှာ အင်အားပြန်လည်ဖြည့်တင်းပြီး ဆိတ်မြောင်ကျေးရွာအတွင်း ဝင်ရောက်ကာ ပြည်သူပိုင်နေအိမ် ၁၂ လုံးကို မီးရှို့ဖျက်ဆီးခဲ့ပါတယ်။

ပြည်သူပိုင်နေအိမ်တွေကို မီးရှို့ဖျက်ဆီးခဲ့တဲ့အတွက် အိုးမဲ့အိမ်မဲ့ဖြစ်ခဲ့ရသလို စစ်ကောင်စီတပ်တွေ စစ်ကြောင်းထိုး လှုပ်ရှားနေတဲ့အတွက် ထွက်ပြေးတိမ်းရှောင်နေရတဲ့ စစ်ရှောင်ပြည်သူ ၂၅၆ ဦး ရှိတယ်လို့ ပဲခူး PDF က ထုတ်ပြန်ထားပါတယ်။

ရေတာရှည်တိုက်ပွဲအတွင်း စစ်ကောင်စီဘက်က ထိခိုက်ကျဆုံးမှုအခြေအနေကို ဒီဗွီဘီက သီးခြားအတည်မပြုနိုင်သေးပါဘူး။

1 month Ago

October 26, 2021

ရေတာရှည် ရပ်ကွက်နှင့်ကျေးရွာအုပ်ချုပ်ရေးမှူး ၄၀ ခန့် နုတ်ထွက်

ပဲခူးတိုင်း ရေတာရှည်မြို့နယ်မှာရှိတဲ့ အုပ်ချုပ်ရေးမှူးတွေအားလုံး ရာထူးကနေ နုတ်ထွက်ဖို့  ရေတာရှည်ပြည်သူ့ကာကွယ်ရေးအဖွဲ့ (YPDF) က ထုတ်ပြန်ကြေညာခဲ့ပြီးနောက် ရပ်ကွက်နဲ့ကျေးရွာအုပ်ချုပ်ရေးမှူး ၄၀ ဦးနီးပါး ရာထူးကနေ နုတ်ထွက်ခဲ့တယ်လို့ သိရပါတယ်။

ပြည်သူတွေကို မတရားဖမ်းဆီးနှိပ်စက်တာ၊ သတင်းပေးဒလန်ပြုလုပ်တာနဲ့ စစ်အုပ်စုနဲ့ ပူးပေါင်းကာ အကြမ်းဖက်လုပ်ငန်းဆောင်ရွက်နေတဲ့ ကျေးရွာ အုပ်ချုပ်ရေးမှူးတွေ အောက်တိုဘာ ၃၁ ရက် နောက်ဆုံးထား နုတ်ထွက်ကြဖို့ ရေတာရှည် PDF က အောက်တိုဘာ ၁၅ ရက်နေ့ ထုတ်ပြန်ပြီးနောက် အခုလို နုတ်ထွက်ခဲ့ကြတာလည်း ဖြစ်ပါတယ်။

ဒီဗွီဘီက ရရှိထားတဲ့ ကျေးရွာအုပ်ချုပ်ရေးမှူးတွေရဲ့ နုတ်ထွက်စာတွေထဲမှာတော့ အများစုက ကျန်းမာရေးအကြောင်းပြပြီး နုတ်ထွက်ခွင့်ပြုဖို့ ရေးသားထားတာ တွေ့ရပါတယ်။

တစ်ချို့နုတ်ထွက်ထားတဲ့ အုပ်ချုပ်ရေးမှူးတစ်ချို့လည်းရှိပြီး သူတို့နဲ့အဆက်အသွယ်မရသေးသလို စစ်ကောင်စီက နုတ်ထွက်ထားတဲ့ အုပ်ချုပ်ရေးမှူးနေရာတွေမှာ အသစ်ပြန်ခန့်နေတာတွေလည်း ရှိတယ်လို့ ဒေသခံတစ်ယောက်က ပြောဆိုပါတယ်။

ပြီးခဲ့တဲ့လက ရေတာရှည်မြို့နယ်အတွင်းက အုပ်ချုပ်ရေးမှူးတစ်ချို့ရဲ့အိမ်တွေ ဌာနဆိုင်ရာရုံးတွေမှာ ဗုံးပေါက်ကွဲမှုတွေရှိခဲ့သလို စစ်ကောင်စီကို သတင်းပေးတဲ့အတွက် အသတ်ခံခဲ့ရတဲ့သူတွေလည်း ရှိပါတယ်။

နိုင်ငံတဝန်းမှာ ရပ်ကွက်နဲ့ ကျေးရွာအုပ်ချုပ်ရေးမှူးတွေ၊ သတင်းပေးဒလန်တွေ သုတ်သင်ရှင်းလင်းခံနေရပြီးနောက် အုပ်ချုပ်ရေးမှူး အများအပြား နုတ်ထွက်နေကြတာလည်း ဖြစ်ပါတယ်။

1 year Ago
More News
Up