ရေတပ်အခြေစိုက်စခန်း

December 9, 2019

အမေရိကန်ရေတပ်စခန်း တိုက်ခိုက်မှု ဆော်ဒီလေတပ်ဒုဗိုလ် လုပ်ခဲ့ဟု FBI ပြော

အမေရိကန်နိုင်ငံ ဖလော်ရီဒါပြည်နယ်က ပန်ဆာကိုလာမြို့မှာရှိတဲ့ ရေတပ်အခြေစိုက်စခန်း တိုက်ခိုက်မှုကို ဆော်ဒီအာရေဗျလေတပ်က ဒုဗိုလ်တယောက်တည်းက လုပ်ခဲ့တာလို့ အမေရိကန်ပြည်ထောင်စုထောက်လှမ်းရေးဗျူရို FBI က ဒီဇင်ဘာ ၈ ရက်မှာ ပြောပါတယ်။ တိုက်ခိုက်သူဟာ ဖလော်ရီဒါပြည်နယ်ကနေ တရားဝင် ဝယ်ထားတဲ့ ဂလော့ခ်မော်ဒယ် ၉ မမ ဟန်းဂန်းကို သုံးပြီး တိုက်ခဲ့တာလို့ FBI ရဲ့ ဂျက်ဆင်ဗယ်လီရုံးအကြီးအကဲနဲ့ ဦးဆောင် စုံစမ်းစစ်ဆေးသူ ရာချယ်ရိုဂျက်စ်က ပြောပါတယ်။ ပစ်ခတ်မှုကြောင့် လူ ၃ ယောက် သေပြီး ၈ ယောက် ဒဏ်ရာရခဲ့တာပါ။  ပစ်ခတ်သူဟာ သင်တန်းအစီအစဉ်အတွက် အမေရိကန်ရေတပ်အခြေစိုက်စခန်းကို ရောက်နေတဲ့ တော်ဝင်ဆော်ဒီလေတပ်ကလို့ အာဏာပိုင်တွေက အတည်ပြုပါတယ်။ ဒါ့အပြင် သူဟာ အသက် ၂၁ နှစ်အရွယ် ဒုဗိုလ် မိုဟမ်မဒ် ဆာအိ အယ်လ်ရှမ်ရာနီ ဖြစ်တယ်လို့လည်း FBI က ဖော်ထုတ်ခဲ့ပါတယ်။ ဒီတိုက်ခိုက်မှုဟာ အကြမ်းဖက်ဝါဒအတွက်လို့ တံဆိပ်ကပ်ဖို့ အသင့်မဖြစ်သေးဘူးလို့ အမေရိကန်ကာကွယ်ရေးဝန်ကြီး မာ့ခ်အဲ့စ်ပါက ပြောပါတယ်။ ဒီဖြစ်ရပ်အတွက် ဆော်ဒီဘုရင်နဲ့ အိမ်ရှေ့စံမင်းသားတို့ ယူကျုံးမရ ဖြစ်ရတယ်လို့ အမေရိကန်သမ္မတ ဒေါ်နယ်ထရမ့်က အိမ်ဖြူတော်မှာ သတင်းထောက်တွေကို ပြောပါတယ်။ သေဆုံးသူတွေရဲ့ မိသားစုတွေနဲ့ ချစ်ခင်ရသူတွေကို စောင့်ရှောက်ရာမှာ ဆော်ဒီဘုရင်လည်း ပါဝင်လိမ့်မယ်လို့ ထရမ့်က ပြောပါတယ်။ ပစ်ခတ်မှုပြီးပြီးချင်း နာရီပိုင်းအတွင်း ဆော်ဒီဘုရင်က “စုံစမ်းစစ်ဆေးမှုကို ဆော်ဒီက ထောက်ခံဖို့ ကတိပြုတယ်။ဒီဖြစ်ရပ်အတွက် စာနာတယ်”လို့ ထရမ့်ကို ဖုန်းနဲ့ပြောခဲ့ပါတယ်။
2 years Ago

December 7, 2019

ဖလော်ရီဒါ ရေတပ်အခြေစိုက်စခန်းတွင် ဆော်ဒီနိုင်ငံသား ပစ်ခတ်မှုကြောင့် ၃ ဦး သေဆုံး

အမေရိကန်နိုင်ငံ ဖလော်ရီဒါပြည်နယ် ပန်ဆာကိုလာ ရေတပ်အခြေစိုက်စခန်းမှာ ဒီဇင်ဘာ ၆  ရက်က သင်တန်းလာတက်နေတဲ့ ဆော်ဒီနိုင်ငံသားတယောက် သေနတ်နဲ့ ပစ်ခတ်တာကြောင့် လူ ၃ ယောက်သေဆုံးပြီး ၈ ယောက် ဒဏ်ရာရခဲ့ပါတယ်။ သေနတ်သမားဟာ ပစ္စတိုသေနတ်နဲ့ စာသင်အဆောက်အအုံအတွင်းက အထပ်နှစ်ထပ်မှာ လိုက်လံပစ်ခဲ့တယ်လို့ သိရပါတယ်။ မိနစ်အနည်းငယ်အကြာမှာတော့ ရဲတပ်ဖွဲ့ဝင်တယောက် သူ့ကို ပစ်သတ်ခဲ့ပါတယ်။  သေနတ်နဲ့ ပစ်သူဟာ ဆော်ဒီလေတပ်က ဒုဗိုလ်အဆင့်ရှိ မိုဟာမက်ဆာအိ အယ်ရှာရန်နီ  ဖြစ်တယ်လို့ အမည်မဖော်လိုသူ အမေရိကန်နိုင်ငံခြားရေးဌာန အရာရှိတဦးက ပြောခဲ့ပါတယ်။   ဖလော်ရီဒါပြည်နယ် အုပ်ချုပ်ရေးမှူး ရွန်ဒက်စ်ဆန်တစ်ကတော့ အမေရိကန်မြေမှာ သင်တန်းလာတက်နေတဲ့ ဆော်ဒီလေတပ်တပ်ဖွဲ့ဝင်တဦးက အခုလို ပစ်ခတ်တဲ့အပေါ်မှာ မေးခွန်းထုတ်စရာတွေ အများကြီးရှိတယ်လို့ သတင်းထောက်တွေကို ပြောခဲ့ပါတယ်။  ဒီဖြစ်ရပ်နဲ့ ပတ်သက်လို့ ဆော်ဒီအိမ်ရှေ့မင်းသား မိုဟာမက်ဆယ်လ်မန်က  သမ္မတ ထရမ့်ထံ ဖုန်းဆက်ပြီး သေနတ်ပစ်မှုမှာ သေဆုံးဒဏ်ရာရသူတွေရဲ့ မိသားစုဝင်တွေကို ဝမ်းနည်းစကားပြောခဲ့တယ်လို့ ရိုက်တာသတင်းမှာ ဖော်ပြထားပါတယ်။
2 years Ago
Up