ရေစကြို

July 14, 2022

ရေစကြိုတွင် စစ်တပ်ကားတစီး မိုင်းဆွဲတိုက်ခိုက်ခံရပြီး ၃ ဦးသေဆုံး

မကွေးတိုင်း၊ ရေစကြိုမြို့နယ်မှာ ဇူလိုင် ၁၃ ရက် မွန်းလွဲပိုင်းက စစ်ကောင်စီကားတစီး မိုင်းဆွဲတိုက်ခိုက်ခံရပြီး ၃ ယောက် သေဆုံးကာ ၄ ယောက် အပြင်းအထန် ဒဏ်ရာရရှိခဲ့တယ်လို့ ရေစကြို-PDF က ပြောပါတယ်။

“ရေစကြိုမြို့နယ် ဇီးကုန်းနဲ့ ဆင်ချောင်းရွာကြားက ညောင်ပင်ဇရပ်မှာ ဇူလိုင် ၁၃ ရက် မွန်းလွဲ ၂ နာရီခွဲလောက်မှာ စစ်(...)၊ ရဲ(...)နဲ့ ပျူ(...)တွေ လိုက်ပါလာတဲ့ ပေါင်မုန့်ကားတစီးကို ဒေသကာကွယ်ရေး ပူးပေါင်းတပ်ဖွဲ့တွေက မိုင်းတလုံးခွဲလိုက်ပြီး လယ်ကြီးတံတားနားအရောက်မှာ နောက်ထပ် မိုင်း ၂ လုံးခွဲပြီး တိုက်ခိုက်ခဲ့တာ” လို့ ရေစကြို-PDF တပ်ရင်း-၁ တပ်ရင်းမှူး ဗိုလ်မှိုင်းတေဇက ဒီဗွီဘီကို ပြောပါတယ်။

အဲဒီတိုက်ခိုက်မှုကြောင့် စစ်ကောင်စီတပ်သား ၁ ယောက် အခင်းဖြစ်နေရာမှာသေဆုံးကာ အပြင်းထန် ဒဏ်ရာရသွားတဲ့ထဲက ၂ ယောက် ထပ်မံသေဆုံးခဲ့ကြောင်း၊ အဲဒီ သေဆုံးသူတွေကို ဆင်ချောင်းကျေးရွာမှာပဲ မြေမြှုပ်သင်္ဂြိုဟ်လိုက်ကြောင်း အတွင်းသတင်းရရှိတာလို့ ဆိုပါတယ်။

အဲဒီမိုင်းခွဲတိုက်ခိုက်ခံရတဲ့နေရာကို ဟင်္သာကျေးရွာဘက်က ကား ၂ စီးနဲ့ စစ်ကူတက်လာပြီး လက်နက်ကြီး လက်နက်ငယ်တွေနဲ့ ရမ်းသမ်းပစ်ခတ်ကြပေမဲ့ PDF ရဲဘော်တွေ အထိအခိုက် အကျအဆုံးမရှိဘဲ ဆုတ်ခွာနိုင်ခဲ့ကြတယ်လို့ ဆိုပါတယ်။

အဲဒီတိုက်ခိုက်မှုကို ‘မဟာမိတ် ပူးပေါင်းစစ်ဆင်လေး(၆)’ လို့ အမည်ပေးထားပြီး ရေစကြို-PDF၊ N-YSO ပြောက်ကျားတပ်၊ KNT ပြောက်ကျားတပ်၊ MRGF(မြိုင်) နဲ့ သံမဏိသိန်းငှက် PDF(မြိုင်) တို့ ပူးပေါင်းတိုက်ခိုက်ခဲ့ကြတာလို့ ပြောပါတယ်။

ရေစကြိုမြို့နယ်မှာ ဇူလိုင် ၈ ရက် မနက်ပိုင်းကလည်း စစ်ကောင်စီစစ်ကြောင်းနဲ့ ဒေသကာကွယ်ရေးတပ်ဖွဲ့တွေ တိုက်ပွဲဖြစ်ပွားပြီး စစ်ကောင်စီဘက်က ၅ ယောက်သေဆုံးကာ အများအပြား ဒဏ်ရာရရှိခဲ့တယ်လို့ သိရပါတယ်။

အခု မိုင်းခွဲတိုက်ခိုက်ခံရတဲ့ ဖြစ်စဥ်နဲ့ ပတ်သက်လို့ စစ်ကောင်စီဘက်က သေဆုံး၊ ဒဏ်ရာရရှိတဲ့ အခြေအနေကို သတင်းထုတ်ပြန်ထားတာ မတွေ့ရသေးပါဘူး။

4 weeks Ago

July 13, 2022

ရေစကြိုတွင် PDF ရဲဘော်တဦးနှင့်စိတ်ကျန်းမာရေးမကောင်းသူတဦး မီးရှို့အသတ်ခံရ

မကွေးတိုင်း၊ ရေစကြိုမြို့နယ်၊ သဲတောရွာမှာ ဇူလိုင် ၉ ရက်က မီးရှို့ခံထားရသူနှစ်ယောက်ရဲ့ ရုပ်အလောင်းကို တွေ့ခဲ့ပြီး အသတ်ခံထားရသူတွေက PDF ရဲဘော်တယောက်နဲ့ စိတ်ကျန်းမာရေးမကောင်းတဲ့ ရွာသားတယောက် ဖြစ်တယ်လို့ Yesagyo Revolution Group တာဝန်ရှိသူတယောက်က ပြောပါတယ်။

သဲတောရွာထဲမှာ စစ်ကောင်စီတပ်ဖွဲ့ဝင်တွေ ဝင်ရောက်တပ်စွဲနေတာကို မသိတဲ့ ရပ်ရွာကာကွယ်ရေး PDF ရဲဘော်တ‌ယောက် ဆိုင်ကယ်နဲ့ ဖြတ်သန်းသွားလာချိန်မှာ ပစ်ခတ်ခံခဲ့ရတယ်လို့ ဆိုပါတယ်။

PDF ရဲဘော် ပစ်ခတ်ခံရပြီး ဆိုင်ကယ်လဲသွားချိန်မှာ အသင့်ပါလာတဲ့ လက်ပစ်မိုင်း ၃ လုံးကို အသေခံဖောက်ခွဲခဲ့တာကြောင့် စစ်ကောင်စီတပ်ဖွဲ့ဝင် ၁၈ ယောက်လောက် ထိမှန်သွားတယ်လို့ ပြောပါတယ်။

Yesagyo Revolution Group မှ တာဝန်ရှိသူတယောက်က “အလောင်းကိုတွေ့ရတာတော့ သုံးရက်လောက်ရှိပြီ။ ရဲဘော်လေး ထွက်သွားတာကိုသိတယ်။ သတင်းစီးဆင်းမှု နောက်ကျတော့ အချိန်မီ မတားလိုက်နိုင်တာဗျ။ ဆိုင်ကယ်တစီးနဲ့ မီးရှို့ထားတာကို တွေ့ရတာပါ။ ပြာနဲ့အရိုးပဲ ကျန်တော့တာ” လို့ ပြောပါတယ်။

သဲတောရွာဘုန်းကြီးကျောင်း မြောက်ဘက်က သဲချောင်းထဲမှာ စိတ်ကျန်းမာရေးချို့တဲ့နေတဲ့ ပြည်သူတယောက်နဲ့ PDF ရဲဘော်တယောက် မီးရှို့သတ်ဖြတ်ခံရတာကို ရပ်ရွာကာကွယ်ရေး ခေါင်းဆောင်တွေက တွေ့ရှိခဲ့တာလို့ ဆိုပါတယ်။

ရေစ​ကြိုမြို့နယ်နဲ့ မြိုင်မြို့နယ် နယ်နိမိတ်ကြားကို စစ်ကောင်စီတပ်တွေက ဇူလိုင် ၈ ရက်မှာ စစ်ကြောင်းထိုး ပြန်လာပြီးနောက် ညနေ ၆ နာရီဝန်းကျင်က သဲတောရွာဘုန်း​ကြီးကျောင်းထဲမှာ ယာယီတပ်စွဲခဲ့တယ်လို့ ပြောပါတယ်။

မကွေးတိုင်း၊ ရေစကြို၊ ပခုက္ကူနဲ့ မြိုင်နယ်တွေကို စစ်ကြောင်းထိုးလာတဲ့ စစ်ကောင်စီတပ်နဲ့ ဒေသကာကွယ်ရေးတပ်ဖွဲ့တွေ ဇူလိုင် ၈ ရက် မနက်ပိုင်းမှာ တိုက်ပွဲဖြစ်ပွားခဲ့ပြီး စစ်ကောင်စီတပ်က ၅ ယောက် သေဆုံးခဲ့တယ်လို့ Urban Underground Revolution Force ရေစ​ကြိုက ထုတ်ပြန်ထားပါတယ်။

1 month Ago
More News
Up