ရေခဲ

December 20, 2020

ချင်းပြည်နယ် ဟားခါးတွင် ရေခဲနေ (ဓာတ်ပုံ)

အပူချိန်ရေခဲမှတ်အောက် ရောက်သွားတဲ့ ချင်းပြည်နယ် ဟားခါးမြို့မှာ ရေတွေခဲနေပြီ ဖြစ်ပါတယ်။ အိမ်တံစက်မြိတ်တွေမှာ တွဲကျနေတဲ့ ရေခဲတွေ ရှိနေပြီး စိုက်ခင်းက သီးနှံတွေမှာလည်း ရေခဲတွေ အပြင်လိုက်ကပ်နေတာကို တွေ့ရပါတယ်။ မိုးလေဝသနဲ့ ဇလဗေဒညွှန်ကြားမှုဦးစီးဌာနက ဒီဇင်ဘာ ၁၉ ရက် ထူးခြားတဲ့ ညအပူချိန်တွေအဖြစ် ဟားခါးမြို့မှာ အနုတ် ၅ ဒီဂရီစင်တီဂရိတ်၊ မင်းတပ်မြို့၊ တီးတိန်မြို့၊ ရမ်ကလောင်းနဲ့ မိုးကုတ်မြို့တို့မှာ ၅ ဒီဂရီစင်တီ ဂရိတ်စီနဲ့ ကျောက်မဲမြို့၊ ပြင်ဦးလွင်မြို့တို့မှာ ၆ ဒီဂရီစင်တီဂရိတ်စီတို့ ဖြစ်ကြတယ်လို့ ဆိုပါတယ်။ ဒီလိုအချိန်တွေ အမြဲအေးပေမယ့် ဒီနှစ်လောက် အအေးမပိုဖူးဘူးလို့ ဟားခါး ဒေသခံတယောက်က ပြောပါတယ်။ ဓာတ်ပုံ - Albert ThangShing Mang, Vanpar Mawi
4 months Ago

January 19, 2020

တရုတ် မြောက်ပိုင်းစွန်းတွင် ညအချိန် ရေခဲနှင့် နှင်းကြည့် ခရီးသွားအစီအစဉ် စတင်ဖွင့်လှစ်

တရုတ်နိုင်ငံ မြောက်ပိုင်းစွန်းက ဟေလုံကျန်းပြည်နယ်မှာ ဒေသတွင်း ညပိုင်း စီးပွားရေးကို မြှင့်တင်ဖို့ ညအချိန် ရေခဲနဲ့ နှင်းကြည့် ခရီးသွားအစီအစဉ်ကို စတင်လိုက်ပါတယ်။ စတုရန်းမီတာ ၆ သိန်း ကျယ်ဝန်းတဲ့ ဟာဘင်း ရေခဲကမ္ဘာ၊ နှင်းကမ္ဘာဥယျာဉ်မှာတော့ ပြည်တွင်း၊ ပြည်ပ ခရီးသွားဧည့်သည်တွေ အကြိုက်တွေ့စေမယ့် ဆွဲဆောင်အားကောင်းတဲ့ ခရီးသွားအစီအစဉ်တွေ အတော်များများကို ထည့်သွင်းထားပါတယ်။  အဲဒီထဲမှာ ပွဲတော်ဆိုင်ရာ အထိမ်းအမှတ်လက္ခဏာတွေဖြစ်တဲ့ တရုတ်ရိုးရာ ရာသီခွင် ၁၂ ခုကို ထုလုပ်ထားတဲ့ ရေခဲပန်းပုတွေ၊ ကံကောင်းခြင်း၊ ပျော်ရွှင်ခြင်း မီးပုံးတွေ၊ ရေခဲပြင်ပေါ်က အကအခုန်တွေ ထည့်သွင်းဖန်တီးထားပါတယ်။  ရေခဲကမ္ဘာ၊ နှင်းကမ္ဘာဥယျာဉ်ဟာ နောက်ခံ နှင်းထုမြင်ကွင်းမှာ မီးလုံးမီးကြိုးတွေ သွယ်တန်းဆင်ယင်ပြီး မီးအလှအမျိုးပေါင်း ၂၀ နဲ့ အလှဆင် ဖန်တီးထားတဲ့ မီးထွန်းပွဲတော်ကို ပထမဆုံးအကြိမ် စီစဉ်ဖန်တီးထားတာပါ။ တရုတ်နိုင်ငံအရှေ့ပိုင်း ရှန်ဟိုင်း မြူနီစီပါယ်ဒေသကနေ လာရောက်လည်ပတ်တဲ့ အိုက်မီက ရေခဲပြင်ပေါ်မှာ သွေးပူလေ့ကျင့်ခန်းအနေနဲ့ အတူကခုန်ရတာ အရမ်းပျော်ပြီး အရမ်းလည်း စိတ်လှုပ်ရှားမိတယ်လို့ ပြောပါတယ်။  မော်ရိုကိုနိုင်ငံက ဆမ်မီကလည်း ဒီထဲက အစီအစဉ်တွေကို လန့်နေမိပြီး အရမ်းအေးမယ်လို့ ထင်ထားခဲ့ပေမယ့် ဒီအစီအစဉ်ထဲ ပါဝင်လှုပ်ရှားပြီးတဲ့အခါမှာတော့ လုံးဝ မချမ်းတော့ဘူးလို့ ဆိုပါတယ်။ “ဒီနှစ် မီးထွန်းပွဲတော်မှာ အများကြီး တိုးတက်အောင် လုပ်ထားပါတယ်။ အရင်နှစ်တွေကထက် ၃၀ ရာခိုင်နှုန်းလောက်ကို တိုးပြီး ထည့်သွင်းတိုးချဲ့ လုပ်ဆောင်ထားတယ်” လို့ ရေခဲကမ္ဘာ၊ နှင်းကမ္ဘာရဲ့ ဒီဇိုင်းနဲ့ ဖွံ့ဖြိုးတိုးတက်မှုဌာနက ဌာနမှူး ယန်ကျီက ပြောပါတယ်။ ဟေလုံကျန်းပြည်နယ်ကို လာရောက်လည်ပတ်တဲ့ နိုင်ငံခြားခရီးသွား အရေအတွက်ကလည်း တိုးသထက် တိုးလာနေပါတယ်။ လတ်တလော ကြိုတင်စာရင်းပေးထားတွေအရ တရုတ်နှစ်သစ်ကူး ကာလအတွင်းမှာပဲ ပြည်နယ်တခုလုံးရဲ့ နိုင်ငံခြားခရီးသွား အရေအတွက်ဟာ ၃၀ ရာခိုင်နှုန်းလောက်ထိ များပြားလာ ဖို့ရှိတယ်လို့ ပြနေပါတယ်။
1 year Ago
Up