ရေကြီးမြေပြိုမှု

August 14, 2021

ဂျပန်တွင် မြေပြိုမှုကြောင့် ၁ ဦး သေဆုံး၊ ၂ ဦး ပျောက်ဆုံး

ဂျပန်နိုင်ငံမှာ သြဂုတ် ၁၄ ရက်က မိုးသည်းထန်စွာရွာသွန်းပြီး  မြေပြိုမှုကြောင့် အမျိုးသမီး ၁ ဦး သေဆုံးပြီး လူ ၂ ဦး ပျောက်ဆုံးနေပါတယ်။

မိုးအဆက်မပြတ်ရွာသွန်းနေခဲ့လို့ မြစ်ရေတွေလည်း ကမ်းပါးတွေပြည့်လျှံတက်ပြီး ဂျပန်အနောက်ပိုင်းရှိ အနည်းဆုံး နေအိမ်နှစ်လုံး ရေထဲမျောပါသွားပါတယ်။

ဂျပန်နိုင်ငံအနောက်ပိုင်း၊ အထူးသဖြင့် တောင်ဘက်စွန်းက အဓိကကျွန်းဖြစ်တဲ့ ကျူရှူးကျွန်းမှာ ဩဂုတ် ၁၃ ရက် နေ့လယ်ပိုင်းအထိ သုံးရက်တာကာလမှာ ဧရိယာတခုတည်းမှာပဲ မိုးရွာသွန်းမှုက  ၃၇ ဒသမ ၆ လက်မနဲ့ မိုးရေချိန် စံချိန်တင်မြင့်တက်ခဲ့ပါတယ်။ 

ကျူရှူးကျွန်းရဲ့ တချို့နေရာအစိတ်အပိုင်းတွေမှာ လမ်းတွေကို ခါးလောက်မြင့်တဲ့ရေတွေ ဖုံးလွှမ်းခဲ့ပြီး မြေပြိုမှုတွေကြောင့်လည်း လမ်းမတွေ ပိတ်ဆို့ခဲ့ပါတယ်။

ဂျပန်အစိုးရဟာ လူဦးရေ ၁ ဒသမ ၅ သန်းကျော်အတွက် လွှမ်းခြုံသိရှိနိုင်ဖို့  အမြင့်ဆုံး သတိပေးချက်အဆင့် ၅ ကို ကျယ်ကျယ်ပြန့်ပြန့် ထုတ်ပြန်ခဲ့ပြီး နောက်ရက်အနည်းငယ်အတွင်း မိုးထပ်များနိုင်သေးတယ်လို့ ဂျပန်မိုးလေဝသအေဂျင်စီ (JMA) က သတိပေးထားပါတယ်။ 

မိုးသည်းထန်စွာ ရွာသွန်းမှုဟာ အဓိကအကြီးဆုံးကျွန်း ဟွန်ရှူးကျွန်းရဲ့အလယ်ပိုင်းကို ရွေ့လျားသွားပေမဲ့ သီတင်းတပတ်လောက်ကတော့ ခုအခြေအနေအတိုင်း ဆက်ရှိနေလိမ့်ဦးမယ်လို့ JMA က သတိပေးထားပါတယ်။

1 year Ago

August 12, 2021

မိုးကုတ်မြို့တွင် ရေကြီးမြေပြိုမှုကြောင့် ၃ ဦး သေဆုံး

မန္တလေးတိုင်း မိုးကုတ်မြို့မှာ သြဂုတ် ၁၂ ရက်က မိုးသည်းထန်စွာရွာသွန်းပြီး ရေကြီး မြေပြိုမှုကြောင့် လူ ၃ ယောက် သေဆုံးခဲ့တယ်လို့  မြို့နယ်ကြက်ခြေနီအသင်းက ပြောပါတယ်။

မိုးရွာသွန်းပြီး အုတ်တံတိုင်းပြိုကြတာကြောင့် မိုးကုတ်မြို့အနောက်ပိုင်း အင်းဂေါင်းရပ်ကွက် နေအိမ်တခုက လူသုံးယောက်သေဆုံးသွားတယ်လို့ မြို့နယ်ကြက်ခြေနီအသင်း တာဝန်ရှိသူတစ်ဦးက ပြောပါတယ်။

"ဓာတ်ဆီဆိုင်က အုတ်တံတိုင်းကပြိုကျတာ၊ သူတို့အိမ်က အောက်ဘက်ဆိုတော့ အိမ်အပေါ်ကို အုတ်တံတိုင်းကပိပြီး အိမ်ထဲက လူသုံးယောက် သေသွားတယ် အလောင်းထုတ်ခဲ့ပြီ။" 

သေဆုံးသွားသူတွေက အမျိုးသမီးနှစ်ယောက်နဲ့ အသက် ၃ နှစ်အရွယ် ယောကျ်ားလေးတစ်ယောက်ဖြစ်တယ်လို့ သိရပါတယ်။

မိုးကုတ်မြို့အရှေ့ပိုင်း မြို့လယ်ရပ်ကွက်၊ မင်းတံတားရပ်ကွက်၊ စည်ပင်သာယာ ရပ်ကွက်၊ ရွှေဘုံသာရပ်ကွက်တွေမှာလည်း ချောင်းရေတက်တာကြောင့် ရေက လမ်းပေါ်ကို ၃ လက်မကျော် တက်နေတယ်လို့ ဒေသခံတစ်ဦးက ပြောပါတယ်။

"မိုးက နှစ်ရက်ဆက်တိုက်ရွာနေတာ ချောင်းရေကတက်လာတော့ ရေကကြီးပြီ၊ အများကြီး ကြီးတာတော့ မဟုတ်ဘူး။ ရေတက်လာတာ လမ်းမပေါ်တွေရောက်နေပြီ လမ်းတချို့လည်း မြေပြို တယ်။"

​မိုးကုတ်မြို့မှာ ရေကြီးမြေပြိုမှုဖြစ်တာ ၂၀၂၁ ခုနှစ်မှာ ပထမဆုံးဖြစ်ပြီး အရင်နှစ်တွေကလည်း မိုးဆက်တိုက်ရွာတာနဲ့ ရေကြီးတာတွေ ရှိတယ်လို့ သိရပါတယ်။

1 year Ago
More News
Up