ရေကြီးမြေပြို

July 29, 2021

အီတလီ ကိုမိုရေကန်အနီး မြို့များတွင် ရေကြီးမြေပြို

အီတလီနိုင်ငံမြောက်ပိုင်းမှာ မိုးတွေ သည်းကြီးမည်းကြီး ဆက်တိုက်ရွာနေလို့ ဇူလိုင် ၂၇ ရက်မှာ ကိုမိုရေကန်ကြီးရဲ့ ပတ်လည်က မြို့တွေမှာ မြေပြိုတာနဲ့ ရေကြီးတာတွေ ဖြစ်ခဲ့ပါတယ်။

ဒီနေရာဟာ အီတလီနိုင်ငံသားတွေ အတွက်သာမက ကမ္ဘာလှည့် ခရီးသည်တွေ အတွက်ပါ လူကြိုက်များတဲ့ အားလပ်ရက် အပန်းဖြေစခန်းလည်း ဖြစ်ပါတယ်။

မြေပြိုလို့ အိမ်ထဲမှာ ပိတ်မိနေတဲ့ သက်ကြီးအမျိုးသမီး တယောက်ကို မီးသတ် တပ်ဖွဲ့ဝင်တွေက ဘေးကင်းရာ ရွှေ့ပြောင်းနေပုံ ဓာတ်ပုံတွေကိုလည်း အီတာလျံ မီးသတ်တပ်ဖွဲ့က ဖြန့်ချိခဲ့ပါတယ်။

 သီတင်းပတ်ကုန်ရက်က အီတလီတောင်ပိုင်းမှာ တောမီးတွေ လောင်ပြီး ပူပြင်းတဲ့ ရာသီဥတုကို ခံစားရအပြီးမှာ ဆိုးရွားတဲ့ ရာသီဥတု ရောက်လာခဲ့တာပါ။

 တောမီးကြောင့် ဆာဒီနီယာကျွန်း ပျက်စီးခဲ့ပြီး ကိုမိုရေကန်နားက ဘလေဗီယိုမြို့မှာလည်း ဇူလိုင် ၂၅ ရက်က မြေပြိုခဲ့ပါတယ်။

2 months Ago

July 26, 2021

အိန္ဒိယအနောက်ပိုင်းတွင် ရေကြီးမြေပြိုပြီး လူ၁၀၀ ကျော်သေဆုံး

အိန္ဒိယနိုင်ငံအနောက်ပိုင်း၊ မဟာရတ်ရှ်တြာပြည်နယ်မှာ ဇူလိုင် ၂၅ ရက်က မုတ်သုံမိုး အခြေအနေ သက်သာသွားပေမဲ့ လူနေရပ်ကွက်တွေမှာ ရေကြီးနေဆဲဖြစ်ပြီး လူအယောက် ၁၀၀ ကျော် သေဆုံးခဲ့ပါတယ်။

ဆန်ဂလီခရိုင်မှာ ရေတွေ၊ သစ်ပင်တွေ မြုပ်နေပြီး ကယ်ဆယ်ရေးအဖွဲ့တွေက ဒေသတွင်း လှေတွေ ဖောင်တွေကို သုံးပြီး သောင်တင်နေတဲ့ ရွာသားတွေကို ကယ်နေရပါတယ်။

ရိုင်ဂတ်ခရိုင်မှာတော့ မုတ်သုန်မိုးကြောင့် နေရာတချို့မှာ မြေပြိုခဲ့လို့ အပျက်အစီးတွေ တန်းစီ ပေါ်ပေါက်ခဲ့ပါတယ်။

ခရိုင်တွင်း ရွာတရွာမှာ မြေပြိုလို့ အလောင်း ၄၃ လောင်းကို ပြန်ဖော်နိုင်ခဲ့ပြီး နောက်ထပ် အလောင်း ၄၀ လောက် အပျက်အစီးတွေ အောက်မှာ ပိတ်မိနေတယ်လို့ အမျိုးသားကပ်ဘေး တုံ့ပြန်ရေးတပ်က အရာရှိတွေက ပြောပါတယ်။

မုတ်သုံမိုးကြောင့် အကြီးစား မြေပြိုတာနဲ့ ရေကြီးတာတွေ ဖြစ်ခဲ့တဲ့အတွက် မဟာရတ်ရှ်တြာပြည်နယ်မှာ ကျန်ခဲ့တဲ့ ၂ရက်အတွင်း လူ ၁၂၅ ယောက်ထက် မနည်း သေဆုံးခဲ့ ပါတယ်။

အိန္ဒိယမြောက်ပိုင်း ဟိမချယ်ပရာဒေ့ရှ်ပြည်နယ်မှာတော့ ဇူလိုင် ၂၅ ရက်က မြေပြိုလို့ ခရီးသွားနေတဲ့ ကားပေါ်ကို ကျောက်တုံးတွေ ပိကျပြီး လူ ၉ ယောက် သေဆုံးတယ်လို့ ANI သတင်းဌာနက ဖော်ပြပါတယ်။

သေဆုံးသူတွေဟာ အိန္ဒိယနိုင်ငံမြို့တော် နယူးဒေလီနဲ့ တခြား အစိတ်အပိုင်းတွေကနေ ပြည်နယ်အတွင်း လာရောက်လည်ပတ်တဲ့ ဧည့်သည်တွေ ဖြစ်ပြီး ဒဏ်ရာရသူ ကတော့ ဒေသခံ ဖြစ်တယ်လို့ ဒေသခံ မီဒီယာတွေက ပြောပါတယ်။

ထိလွယ်ရှလွယ် ကမ်းရိုးတန်းဒေသတွေမှာ ရာသီဥတု ပြောင်းလဲမှုနဲ့ ညံ့ဖျင်းတဲ့ ဆောက်လုပ်ရေးတွေကြောင့် ကပ်ဘေးပိုသင့်နိုင်တယ်လို့ အိန္ဒိယသဘာဝပတ်ဝန်းကျင် ပညာရှင်တွေက သတိပေး ထားပါတယ်။

2 months Ago
More News
Up