ရုပ်ရှင်ဇာတ်ဝင်တေး

October 10, 2020

ကျော်ဟိန်း သီချင်းကို ချစ်ကောင်း သီဆိုဟန်ဖြင့် ရှုစားနားဆင်ကြရမည့် ကျော်ကြားရုပ်ရှင်ဇာတ်ဝင်တေး (ရုပ်သံ)

“ဘယ်ကိုလဲ… မေးခွန်းများရဲ့ အဖြေဟာ တိကျ… ငါဟာ ယောကျ်ား…  လူသားတဦးပါ… သွားရမယ့်လမ်းရဲ့ရှေ့က ရည်မှန်းချက်… ငါသွားမယ်… မတားနဲ့… မတား နဲ့… ငါ့ခရီးလမ်းကို ပိတ်ကာရပ်မထားနဲ့… ငါဒီလမ်းအဆုံးအထိ… ဘယ်လိုတားတား မမှုဘူး… လာမတားနဲ့… မတားနဲ့… မတားနဲ့… မတားနဲ့… ငါ့နှလုံးသားက ဒီဆုံးဖြတ်ချက်တို့ မစွန့်လွှတ်… ကျော်ဖြတ်ဖို့ သတ္တိအပြည့်အဝနဲ့… ရင်ဆိုင်ဖို့အတွက် အကုန်လုံး အဆင်သင့်… အောင်မြင်ရမယ်” ဒါကတော့ ကွယ်လွန်သွားခဲ့ပြီဖြစ်တဲ့ နာမည်ကျော် သရုပ်ဆောင်မင်းသားကြီး ကျော်ဟိန်းရဲ့ သီဆိုအောင်မြင်ခဲ့တဲ့ သီချင်းတပုဒ်ဖြစ်တဲ့ “သွားမယ်မတားနဲ့” သီချင်းဖြစ်ပြီး မြန်မာ့ရုပ်ရှင်ရာပြည့်ဖျော်ဖြေပွဲမှာ ဝါရင့်အဆိုတော် ချစ်ကောင်းက ပြန်လည်သီဆို ဖျော်ဖြေခဲ့တာ ဖြစ်ပါတယ်။ ဒီသီချင်းကိုတော့ တေးရေး မောင်သစ်မင်းက ရေးစပ်ပေးထားခဲ့တာဖြစ်ပြီး “လွမ်းနေမယ် မမ” ရုပ်ရှင်ကားထဲမှာ ဇာတ်ဝင်တေးတပုဒ်အနေနဲ့ ပါဝင်ခဲ့တာ ဖြစ်ပါတယ်။ မြနန္ဒာ ရုပ်ရှင်ထုတ်လုပ်ရေးက ၁၉၈၆-၁၉၈၇ ခုနှစ်မှာ ရိုက်ကူးခဲ့တဲ့ “လွမ်းနေ မယ်မမ” ရုပ်ရှင်ကိုတော့ ဒါရိုက်တာဦးတင်ယုက တာဝန်ယူရိုက်ကူးခဲ့ပြီး နာမည်ကြီး သရုပ်‌ဆောင် မင်းသားမင်းသမီးတွေ ဖြစ်ကြတဲ့ ကျော်ဟိန်း၊ ချိုပြုံး၊ ဆွေဇင်ထိုက်၊ ဇော်ကြီး၊ ဦးမြင့်နိုင်တို့က ပါဝင်ထားခဲ့ကြပါတယ်။ “ကိုယ်တိုင်ရေးပုံတူ”၊ “ဘဝရဲ့လင်္ကာ”၊ “အလှည့်”၊ “အိပ်မက်ကုန်သည်”၊ “တစ် ယောက်တည်းလား” စတဲ့ တေးအယ်လ်ဘမ်တွေအပြင် အတွဲသီချင်းခွေတွေ၊ ရှိုးပွဲပေါင်းများစွာမှာ ပါဝင်သီဆိုခဲ့တဲ့ ချစ်ကောင်းရဲ့ သီချင်းကတော့ အခုအချိန်ထိတိုင်အောင် ရေပန်းစားနေဆဲ သီချင်းတွေ ဖြစ်ပါတယ်။ ခုတခါ “သွားမယ်မတားနဲ့” သီချင်းနဲ့ သူ့ရဲ့ သီဆိုဖျော်ဖြေဟန်ဟာလည်း ဆန်းသစ် လတ်ဆတ်နေဆဲ ဖြစ်တာကို ပရိသတ်တွေက တကျော့ပြန် ရှုစားနားဆင်ကြရမှာ ဖြစ်ပါတယ်။ အခုနှစ်မှာ ကျရောက်တဲ့ မြန်မာ့ရုပ်ရှင်ရာပြည့်အထိမ်းအမှတ်အနေနဲ့ ရုပ်ရှင်တေး သီချင်းအပုဒ် ၁၀၀ ကို မြန်မာ့ရုပ်မြင်သံကြားကနေ အပတ်စဉ် ထုတ်လွှင့်ပြသပေးနေပြီး ဒီအစီအစဉ်ကိုတော့ အပတ်စဉ် သောကြာနေ့ ၈ နာရီသတင်းအစီအစဉ်အပြီးမှာ ထုတ်လွှင့်နေတာ ဖြစ်ပါတယ်။ ခုတပတ်ရဲ့ ဖျော်ဖြေပွဲအမှတ်စဉ် ၁၀ မှာတော့ ဝါရင့်နာမည်ကြီး အဆိုတော်တွေဖြစ်ကြတဲ့ ဂျေမောင်မောင်၊ ချစ်ကောင်း၊ မေခလာ၊ အိုင်ရင်းဇင်မာမြင့်တို့နဲ့အတူ တခြားအနုပညာရှင်တွေ ဖြစ်ကြတဲ့ နေအောင်၊ ဖြိုးကြီး၊ ပိုပိုဟေသာ၊ M ဇော်ရိန်၊ ပိုးမီ၊ မိုးထက်မြင့်၊ မေ၊ ဝင်းပပသိန်းတန်တို့က ဖျော်ဖြေသွားခဲကြပါတယ်။
1 year Ago

မြန်မာအိုင်ဒေါစတား ပိုးမီ သီဆိုသည့် ရုပ်ရှင်ဇာတ်ဝင်တေး - “တို့ကပိုလှတယ်”(ရုပ်သံ)

မနေ့ညက နောက်ဆုံးသီတင်းပတ်အဖြစ် ကျင်းပခဲ့တဲ့ မြန်မာ့ရုပ်ရှင်ရာပြည့် ဖျော်ဖြေပွဲမှာတော့ မြန်မာအိုင်ဒေါစတား တေးသံရှင် ပိုးမီကလည်း ပါဝင်ဖျော်ဖြေသွားခဲ့ပါတယ်။ သူ သီဆိုဖျော်ဖြေခဲ့တဲ့ သီချင်းကတော့ “တို့ကပိုလှတယ်” သီချင်းဖြစ်ပြီး တေးရေး စန္ဒရားလှထွဋ်က ရေးစပ်ပေးထားခဲ့ပြီး တေးသံရှင် နွဲ့ယဉ်ဝင်းက မူရင်းသီဆိုထားခဲ့ကာ “ကျနော်နဲ့ကိုဘကျော်” ရုပ်ရှင်ကားထဲမှာ ဇာတ်ဝင်တေးတပုဒ်အဖြစ် အသုံးပြုခဲ့တာ ဖြစ်ပါတယ်။ “ကျနော်နဲ့ ကိုဘကျော်” ရုပ်ရှင်ကိုတော့ ၁၉၇၅ ခုနှစ်က မန်းရုပ်ရှင်ထုတ်လုပ်ရေးက ရိုက်ကူးခဲ့တာ ဖြစ်ပါတယ်။ ဒါရိုက်တာ ပန်းချီစိုးမိုးက ရိုက်ကူးပုံဖော်ခဲ့တဲ့ ဒီရုပ်ရှင်ကားထဲမှာတော့ နာမည် ကျော် သရုပ်ဆောင်မင်းသားမင်းသမီးတွေ ဖြစ်ကြတဲ့ ကောလိပ်ဂျင်နေဝင်း၊ ကျော်ဆွေ၊ တင်တင်ညို၊ ဇော်ဝမ်း၊ စံရှားတင်တို့က ပါဝင်သရုပ်ဆောင်ထားကြပြီး ၁၉၇၅ ခုနှစ်အတွက် မြန်မာ့ရုပ်ရှင်ဓာတ်ပုံထူးချွန်ဆုရရှိခဲ့တဲ့ ဇာတ်ကား ဖြစ်ပါတယ်။ ခုတခါမှာတော့ ဒီရုပ်ရှင်ကားထဲက ဇာတ်ဝင်တေးကို မျိုးဆက်သစ်အဆိုတော် ပိုးမီရဲ့ သီဆိုမှုနဲ့အတူ ပရိသတ်တွေက တကျော့ပြန်ခံစားနားဆင်ကြရမှာ ဖြစ်ပါတယ်။ အသက် ၃၁ နှစ်အရွယ် ရှိနေပြီဖြစ်တဲ့ ပိုးမီဟာ မြန်မာအိုင်ဒေါသီချင်းဆိုပြိုင်ပွဲ Season 2 မှာ ဝင်ရောက်ယှဉ်ပြိုင်ခဲ့ပြီး Winner ဆုရရှိခဲ့တဲ့ သားငယ်၊ ဘီလီလမင်းအေးတို့နဲ့အတူ Top 3 အဆင့်ထိ ရောက်ရှိခဲ့သူ ဖြစ်ပါတယ်။ ပြိုင်ပွဲပြီးဆုံးသွားခဲ့ချိန်မှာလည်း ပိုးမီကို အားပေးတဲ့ ပရိသတ်တွေ ရှိနေခဲ့ကြပြီး သူ့ရဲ့ ကိုယ်ပိုင်သီချင်းတပုဒ်ဖြစ်တဲ့ “အလိုက်တသိ” သီချင်းနဲ့ လူသိများလာခဲ့ပါတယ်။ အဲဒီနောက်မှာတော့ ပိုးမီက “နောက်ထပ်… တစ်ယောက်မရှိ” အမည်တဲ့ တကိုယ်တော် တေးအယ်လ်ဘမ်တချပ် ထွက်ရှိထားခဲ့တာ ဖြစ်ပါတယ်။ သိပ်မကြာသေးခင်ကတော့ ပိုးမီရဲ့ ကိုယ်တိုင်ရေး ကိုယ်တိုင်ဆို သီချင်းသစ်တပုဒ် ဖြစ်တဲ့ “ဒါပေမယ့်… ချစ်တယ်” လို့ အမည်ပေးထားတဲ့ သီချင်းသစ်တပုဒ် ထွက်ရှိထားပါတယ်။ အခုနှစ်မှာ ကျရောက်တဲ့ မြန်မာ့ရုပ်ရှင်ရာပြည့်အထိမ်းအမှတ်အနေနဲ့ ရုပ်ရှင်တေး သီချင်းအပုဒ် ၁၀၀ ကို မြန်မာ့ရုပ်မြင်သံကြားကနေ အပတ်စဉ် ထုတ်လွှင့်ပြသပေးနေပြီး ဒီအစီအစဉ်ကိုတော့ အပတ်စဉ် သောကြာနေ့ ၈ နာရီသတင်းအစီအစဉ်အပြီးမှာ ထုတ်လွှင့်နေတာ ဖြစ်ပါတယ်။ ခုတပတ်ရဲ့ ဖျော်ဖြေပွဲအမှတ်စဉ် ၁၀ မှာတော့ ဝါရင့်နာမည်ကြီး အဆိုတော်တွေဖြစ်ကြတဲ့ ဂျေမောင်မောင်၊ ချစ်ကောင်း၊ မေခလာ၊ အိုင်ရင်းဇင်မာမြင့်တို့နဲ့အတူ တခြားအနုပညာရှင်တွေ ဖြစ်ကြတဲ့ နေအောင်၊ ဖြိုးကြီး၊ ပိုပိုဟေသာ၊ Mဇော်ရိန်၊ ပိုးမီ၊ မိုးထက်မြင့်၊ မေ၊ ဝင်းပပသိန်းတန်တို့က ဖျော်ဖြေသွားခဲ့ကြပါတယ်။
1 year Ago

ဖြိုးကြီး သီဆိုထားသည့် “အချစ်ချောင်းလေးခြားမှာစိုးတယ်” ရုပ်ရှင်ဇာတ်ဝင်တေး(ရုပ်သံ)

“ငလီသောင်ယံမှာကွယ် ခရုလေးများတခုစီကောက်သလို… တွယ်တာကြင်နာတာတွေ သူရွေးလို့ပြောတယ်အချစ်ရယ်… ကိုကိုမောင်မောင်ခေါ်တယ်… စကားပြောကောင်း သူလေးရယ်… မှုန်နံ့သာတွေကိုသူခြယ်… မိန်းမချောလေးရယ်ချစ်တယ်” ဒါကို ကြားလိုက်တာနဲ့ ပရိသတ်တွေက နာမည်ကြီး ထင်ရှားခဲ့တဲ့ တချိန်က ရုပ်ရှင် ဇာတ်ဝင်တေးတပုဒ်ဖြစ်တဲ့ “အချစ်ချောင်းလေးခြားမှာစိုးတယ်”ကို ပြန်လည်ပြီးတော့ အမှတ်ရမိကြမယ် ထင်ပါတယ်။ ဒီသီချင်းကိုတော့ အောက်တိုဘာ ၉ ရက်နေ့က ပြုလုပ်ခဲ့တဲ့ မြန်မာ့ရုပ်ရှင်ရာပြည့် ဖျော်ဖြေပွဲမှာ အဆိုတော် ဖြိုးကြီးက သီဆိုဖျော်ဖြေသွားခဲ့တာ ဖြစ်ပါတယ်။ ဒီသီချင်းကတော့ ၁၉၇၆ ခုနှစ်က ပြည့်စုံရုပ်ရှင်ထုတ်လုပ်ရေးက ရိုက်ကူးခဲ့တဲ့ “ဖြေ နိုင်ပေါင်” ရုပ်ရှင်ကားထဲက ဇာတ်ဝင်တေးတပုဒ်ဖြစ်ပြီး တေးရေး ဟင်္သာတ မြင့်ငွေက ရေးဖွဲ့ပေးထားခဲ့ကာ မူရင်းအဆိုရှင် မိုးမင်းဝင်းက သီဆိုထားတာပါ။ “ဖြေနိုင်ပေါင်” ရုပ်ရှင်ကိုတော့ ဒါရိုက်တာ ပြည့်စုံက ရိုက်ကူးခဲ့တာဖြစ်ပြီး သရုပ် ဆောင်မင်းသားမင်းသမီးတွေ ဖြစ်ကြတဲ့ ညွန့်ဝင်း၊ ဝါဝါဝင်းရွှေ၊ သန်းထွဋ်၊ ကျော်နိုင်တို့က ပါဝင်သရုပ်ဆောင်ထားကြပါတယ်။ “မိုးနဲ့မြေဆုံးထိတိုင် တူယှဉ်ကာလည်မယ်ကွယ်… တွဲလက်မဖြုတ်တမ်း ချစ်မယ် … မြတ်ဘုရားရှေ့မှာတိုင်တည်… ဝေးသွားမှာစိုးကြောက်တယ်... အတူနေချင်ပါပြီကွယ် … သီးခြားကမ္ဘာလေးထဲမှာ နေမယ်ကွယ်ရာသက်လုံး” ခုတခါမှာတော့ ဒီသီချင်းကို တေးရေး ဟင်္သာတမြင့်ငွေရဲ့ ရင်သွေးမျိုးဆက်အဆိုတော် ဖြိုးကြီးရဲ့ ခံစားသီဆိုဟန်နဲ့ တမူထူးခြားတဲ့ သီချင်းတပုဒ်အနေနဲ့ မြူးမြူးကြွကြွ ခံစားနားဆင်ကြရမှာ ဖြစ်ပါတယ်။ “ကိန္နရီမောင်နှံလိုကွယ် အချစ်ချောင်းလေးခြားမှာစိုးတယ်… လိမ်တာညာတာ မပါတယ်... နှလုံးသားသက်သေပြုမယ်... ပင်လယ်ရေပြင်ကိုကွယ်... မေခိုင်းရင် ဖြတ်ကာ ကူးမယ်... မေခလာမကယ်ရင်နေကွယ်... ချစ်သည်းအတွက်အသက်ကိုစွန့်မယ်… အပြုံး ပန်းတရာပန်းပွင့်တယ်... ငွေစန္ဒာသာသလိုနှယ်… အလှပတွေပေါင်းစုရာ... တကမ္ဘာလုံး အလှနဲ့ပြိုင်မယ်... ရွှန်းလဲ့မျက်လုံးလေးရယ်... မြင်သူတကာရင်ကိုကွယ်... သူ့အလှမှာပဲ ငြိတွယ် မေဘရဏီပြိုင်ရင်ရှုံး” အခုနှစ်မှာ ကျရောက်တဲ့ မြန်မာ့ရုပ်ရှင်ရာပြည့်အထိမ်းအမှတ်အနေနဲ့ ရုပ်ရှင်တေး သီချင်းအပုဒ် ၁၀၀ ကို မြန်မာ့ရုပ်မြင်သံကြားကနေ အပတ်စဉ် ထုတ်လွှင့်ပြသပေးနေပြီး ဒီအစီအစဉ်ကိုတော့ အပတ်စဉ် သောကြာနေ့ ၈ နာရီသတင်းအစီအစဉ်အပြီးမှာ ထုတ်လွှင့်နေတာ ဖြစ်ပါတယ်။ ခုတပတ်ရဲ့ ဖျော်ဖြေပွဲအမှတ်စဉ် ၁၀ မှာတော့ ဝါရင့်နာမည်ကြီး အဆိုတော်တွေဖြစ်ကြတဲ့ ဂျေမောင်မောင်၊ ချစ်ကောင်း၊ မေခလာ၊ အိုင်ရင်းဇင်မာမြင့်တို့နဲ့အတူ တခြားအနုပညာရှင်တွေ ဖြစ်ကြတဲ့ နေအောင်၊ ဖြိုးကြီး၊ ပိုပိုဟေသာ၊ M ဇော်ရိန်၊ ပိုးမီ၊ မိုးထက်မြင့်၊ မေ၊ ဝင်းပပသိန်းတန်တို့က ဖျော်ဖြေသွားခဲ့ကြပါတယ်။
1 year Ago

October 3, 2020

အဆိုတော်ကြီး တင်တင်မြ သီဆိုသည့် “တကျော့နှစ်ကျော့တေးကိုသီ”ရုပ်ရှင်ဇာတ်ဝင်တေး(ရုပ်သံ)

“မောင်လေးရေ… ထပါတော့ ရောင်နီလာလှပေါ့… ညီမလေးရေ… ထပါတော့ ရောင်နီလာလှပေါ့… တကျော့နှစ်ကျော့တေးကိုသီ… ငှက်ကျားနှုတ်ပလီ” ဒါကို ကြားလိုက်တာနဲ့ တချိန်က နာမည်ကြီးခဲ့တဲ့ ဝါရင့်အဆိုတော်ကြီး တင်တင်မြရဲ့ သီချင်းတပုဒ်မှန်း ပရိသတ်တွေက သိကြပြီး ဖြစ်မှာပါ။ ဒီသီချင်းကိုတော့ တေးရေး ဂီတလုလင်မောင်ကိုကိုက ရေးစပ်ပေးထားခဲ့တာဖြစ်ပြီး ခုတခါမှာတော့ ဒီသီချင်းကို မြန်မာရုပ်ရှင်ရာပြည့်ဖျော်ဖြေပွဲစင်မြင့်ထက်မှာ တင်တင်မြရဲ့ ကိုယ်တိုင်သီဆိုဟန်နဲ့ တကျော့ပြန်ရှုစားနားဆင်ခဲ့ကြရတာပါ။ “တကျော့နှစ်ကျော့တေးကိုသီ” ရုပ်ရှင်ကိုတော့ စန္ဒာရုပ်ရှင်ထုတ်လုပ်ရေးက ၁၉၇၁ ခုနှစ်မှာ ထုတ်လုပ်ခဲ့ပြီး ထွန်းညွန့်ဦး အမည်နဲ့ မင်းသားကြီး ဝင်းဦးက ဒါရိုက်တာအနေနဲ့ ရိုက်ကူးထားခဲ့တာ ဖြစ်ပါတယ်။  “တကျော့နှစ်ကျော့တေးကိုသီ” ရုပ်ရှင်ကားထဲမှာတော့ ဝင်းဦးနဲ့အတူ တင်တင်မြ၊ ချိုပြုံး၊ ခင်လေးဆွေ၊ ဒေါ်ခင်ရီ၊ ဒေါ်မေနွဲ့တို့က ပါဝင်သရုပ်ဆောင်ခဲ့ပြီး ချိုပြုံးရယ်လို့ ပရိသတ်တွေ အထူးနှစ်ခြိုက်လက်ခံအားပေးခဲ့ကြတဲ့ ရုပ်ရှင်ကားတကား ဖြစ်ခဲ့ပါတယ်။ ရုပ်ရှင်ထဲကားအနေနဲ့လည်း အောင်မြင်ခဲ့သလို ဒီကားထဲမှာ ဇာတ်ဝင်တေးတွေကလည်း အခုအချိန်ထိတိုင်အောင် ပရိသတ်တွေကြား ရေပန်းစားနေဆဲ သီချင်းတွေ ဖြစ်နေဆဲ ဖြစ်ပါတယ်။ အသက် ၈၅ နှစ်အရွယ် ရှိနေပြီဖြစ်တဲ့ အဆိုတော်ကြီး တင်တင်မြဟာ ရေဒီယို၊ ဓာတ်ပြား၊ ရုပ်ရှင်ပဏာမတေး၊ ဇာတ်ဝင်တေး၊ တေးသရုပ်ဖော် ဇာတ်လမ်း သီချင်းတွေနဲ့ စီးရီးခွေ အများအပြား သီဆိုခဲ့ပြီး လက်ရှိအချိန်ထိတိုင်အောင် အနုပညာလှုပ်ရှားမှုတွေ လုပ်ဆောင်နေဆဲ ဖြစ်ပါတယ်။ တင်တင်မြရဲ့ ထင်ရှားတဲ့ မဟာဂီတ သီချင်းတွေထဲမှာတော့ ပန်းမြိုင်လယ် အပါအဝင် ထူးမခြားနား၊ ပန်းဟေဝန်၊ လျှပ်ပန်းခွေနွဲ့၊ မြမြမောင်းမောင်း စတဲ့ ဓာတ်ပြား သီချင်းတွေအထိ သီဆိုခဲ့ပြီး ကာလပေါ်သီချင်းတွေထဲမှာလည်း ပေဖူးလွှာ၊ စခန်းအောင်မြေ၊ မြပုဏ္ဏမာ၊ သည်းဖိုးရွှေလီမြစ်နဒီ၊ ယောဆရာ၊ မင်္ဂလာမောင်မယ်၊ ချစ်တာပဓာန၊ ပင်တိုင်စံ၊ တောင်တန်းပြာနဲ့ကျောပိုးအိတ်၊ တိမ်လွှာမို့မို့လွင်၊ ပုဂံမြို့ဟောင်းတစ်နေရာ၊ မဟာဗုဒ္ဓဝင် သီချင်းတွေကလည်း လူသိများ ထင်ရှားတဲ့ သီချင်းတွေ ဖြစ်ပါတယ်။ ခုတခါမှာလည်း သူ့ရဲ့ ထူးခြားတဲ့ သီဆိုဟန်နဲ့အတူ “တကျော့နှစ်ကျော့တေးကို သီ” ရုပ်ရှင်ဇာတ်ဝင်တေးသီဆိုဟန်ကို ပြန်လည်ခံစားနားဆင်ကြရမှာ ဖြစ်ပါတယ်။ “မောင်လေးရေ… ထပါတော့ ရောင်နီလာလှပေါ့… ညီမလေးရေ… ထပါတော့ ရောင်နီလာလှပေါ့… တကျော့နှစ်ကျော့တေးကိုသီ… ငှက်ကျားနှုတ်ပလီ… တီတာခွန်း သွဲ့ လဲ့လဲ့သံစဉ်ညီ… မုန်းလျှင်အပြစ် ချစ်လျှင်အကျိုး… မြတ်နိုးတော့သဒ္ဒါ … အိပ်မက်သံ သရာမှ နိုးထစေချင်သည်… ဖြိုးဖြရွှေရင် ဘဝင်စိမ့်စိမ့် သိမ့်သိမ့်ညီ… ကျမတို့ငယ်ငယ် မိရယ်ဖရယ် ဘဝရယ်စုံစုံညီ… ချစ်သဒ္ဒါလောင်း သြော် မေတ္တာအပေါင်း… ချစ်ကြောင်း ကုန်စင်သည်… ချစ်ကြောင်းကုန်စင်သည်… တစ်မိတစ်ဝမ်း ချမ်းမြလျှမ်းပ… ဘယ်သူ့မှ မမျှေ၀ ရလေလိုလေဖြစ်ခဲ့မိပါသည်” အခုနှစ်မှာ ကျရောက်တဲ့ မြန်မာ့ရုပ်ရှင်ရာပြည့်အထိမ်းအမှတ်အနေနဲ့ ရုပ်ရှင်တေး သီချင်းအပုဒ် ၁၀၀ ကို မြန်မာ့ရုပ်မြင်သံကြားကနေ အပတ်စဉ် ထုတ်လွှင့်ပြသပေးနေပြီး ဒီအစီအစဉ်ကိုတော့ အပတ်စဉ် သောကြာနေ့ ၈ နာရီသတင်းအစီအစဉ်အပြီးမှာ ထုတ်လွှင့်နေတာ ဖြစ်ပါတယ်။ ခုတပတ်ရဲ့ ဖျော်ဖြေပွဲအမှတ်စဉ် ၉ မှာတော့ ဝါရင့်အဆိုတော်ကြီးတွေဖြစ်ကြတဲ့ တင်တင်မြ၊ တက္ကသိုလ်လဲ့လဲ့တို့နဲ့အတူ သန်းမြတ်စိုး၊ ကေတုဝင်းထွဋ်၊ ရွှေရည်သိန်းတန်၊ ဖိုးသောကြာ၊ ရွှေယမင်းဦး၊ သဲနုဝါတို့နဲ့ တခြား မြန်မာသံ အဆိုတော်တွေက စန္ဒရားဇေယျာမင်း မြန်မာမှုတေးဂီတအဖွဲ့နဲ့ ဖျော်ဖြေသွားခဲ့ကြပါတယ်။
1 year Ago
More News
Up