ရိုက်နှက်မှု

July 2, 2021

စစ်သားများ ရိုက်နှက်မှုကြောင့် သေဆုံးခဲ့သည့် NLD ရပ်ကျေးအဖွဲ့ဝင်အပါအဝင် ကျဆုံးပြည်သူ ၈၈၅ ဦးရှိလာ

မြန်မာနိုင်ငံမှာ မတရားအာဏာသိမ်းကာလ ၅ လအကြာ အကြမ်းဖက်စစ်အုပ်စုရဲ့ ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူ ၈၈၅ ယောက်ထိ ရှိလာခဲ့ပြီလို့ နိုင်ငံ ရေးအကျဉ်းသားများ ကူညီစောင့်ရှောက်ရေးအသင်း(အေအေပီပီ)က ထုတ်ပြန်ပါတယ်။

ဒီစာရင်းဟာ ပြီးခဲ့တဲ့ ဖေဖော်ဝါရီ ၁ ရက်မှ ဇူလိုင် ၁ ရက်အထိ အေအေပီပီက ကောက်ယူမှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင် တယ်လို့ ဖော်ပြထားပါတယ်။

နွေဦးတော်လှန်ရေးကာလအတွင်း ပြည်သူ ၆၄၆၂ ယောက် ဖမ်းဆီးခံခဲ့ရကာ ၅၁၉၅ ယောက်ကတော့ လက်ရှိချုပ်နှောင်ခံထားရဆဲဖြစ်ပြီး အဲဒီထဲက ၂၃၃ ယောက်ကတော့ ထောင်ဒဏ်ချမှတ်ခံထားရပါတယ်။

အမှုဖွင့်ခံထားရပြီး ဖမ်းဝရမ်းထုတ်ခံထားရတဲ့အတွက် တိမ်းရှောင်နေသူ အရေအ တွက်ကတော့ ၁၉၆၅ ယောက်ရှိနေပြီး သူတို့ထဲက အယောက် ၄၀ ကတော့ မျက်ကွယ် သေဒဏ်ချမှတ်ခံထားရကာ ၁၄ ယောက်ကတော့ အလုပ်ကြမ်းနဲ့ ထောင်ဒဏ် ၃ နှစ်စီ၊ ၃၉ ယောက်ကတော့ အလုပ်ကြမ်းနဲ့ ထောင်ဒဏ်နှစ် ၂၀ စီ၊ ၂၅ ယောက်ကတော့ အလုပ်ကြမ်း နဲ့ ထောင်ဒဏ် ၇ နှစ်စီ၊ ၁ ယောက်ကတော့ အလုပ်ကြမ်းနဲ့ ထောင်ဒဏ် ၁၀ နှစ်စီ အသီးသီး မျက်ကွယ်ထောင်ဒဏ် ချမှတ်ခံထားရလို့ တိမ်းရှောင်နေသူတွေ ဖြစ်တယ်လို့ ဆိုပါတယ်။

ပြီးခဲ့တဲ့ ဇွန် ၂၉ ရက်နေ့မှာ ဖမ်းဆီးခံခဲ့ရတဲ့ မန္တလေးတိုင်းဒေသကြီး၊ ဝမ်းတွင်း မြို့နယ်၊ တဲစုကျေးရွာ NLD ရပ်ကျေးအဖွဲ့ဝင် ကိုစိုးစံဟာ နောက်တနေ့မှာပဲ ကျဆုံးသွား တယ်လို့ သိရှိရပါတယ်။ သူဟာ ကိုဗစ်-၁၉ အသက်ရှူလမ်းကြောင်းဆိုင်ရာရောဂါနဲ့  ကွယ်လွန်ခဲ့တယ်လို့ ပြောပေမယ့် ပင်းတလဲဆေးရုံမှာ တပ်စွဲထားတဲ့ စစ်သားတွေ ရိုက်နှက်တာကြောင့် သေဆုံးသွားခဲ့တာလို့ အေအေပီပီက ဆိုပါတယ်။

ဇူလိုင် ၁ ရက်နေ့ မနက်ပိုင်းမှာတော့ ပဲခူးတိုင်းဒေသကြီး၊ ပြည်မြို့က အာဏာဖီဆန်ရေး လှုပ်ရှားမှု(CDM) မှာပါဝင်တဲ့ လက်ထောက်ခွဲစိတ်ဆရာဝန် ဒေါက်တာဝတ်ရည် အောင်ကို အကြမ်းဖက် စစ်အုပ်စုက ဖမ်းဆီးသွားခဲ့တယ်လို့ သိရှိရပါတယ်။

ပဲခူးတိုင်းဒေသကြီး၊ နတ်တလင်းမြို့မှာလည်း သုခကာရီပရဟိတအဖွဲ့ဝင်နဲ့ မြို့ နယ်ကြက်ခြေနီတပ်ဖွဲ့ဝင်တယောက်ဖြစ်တဲ့ ကိုထိုက်(ခ)ကိုကျော်လင်းထိုက်ဟာ လူနာပို့ ပြီးအပြန် ဇွန် ၂၉ ရက်ညအချိန်မှာ ဖမ်းဆီးခံခဲ့ရတယ်လို့ သိရပါတယ်။

ဒါ့အပြင် မန္တလေးတိုင်းဒေသကြီး၊ တောင်သာမြို့နယ်မှာ တိမ်းရှောင်နေတဲ့ မြို့နယ် NLD သတင်းနဲ့ ပြန်ကြားရေးကော်မတီအဖွဲ့ဝင် ဦးမောင်စိန်ကိုလည်း ဇွန် ၂၉ ရက်နေ့ ညအချိန်က ဖမ်းဆီးသွားခဲ့တယ်လို့ ဆိုပါတယ်။

အေအေပီပီ အနေနဲ့ လက်ရှိအခြေအနေတွေကို နေ့စဉ် စောင့်ကြည့်မှတ်တမ်းတင် နေတာဖြစ်ပြီး စစ်အာဏာသိမ်းမှုနဲ့ပတ်သက်ပြီး ဖမ်းဆီး၊ တရားစွဲဆို၊ ပြစ်ဒဏ် ချမှတ်ခံ ထားရသူတွေစာရင်းကို နေ့စဉ် ထုတ်ပြန်သွားမယ်လို့ ဆိုပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ် ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေ စတဲ့ နယ်ပယ် အသီးသီးက ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာကို သိရှိပါက အေအေပီပီ အီးမေးလ်၊ ဖေ့စ်ဘွတ်ခ်နဲ့ တွစ်တာတို့ကတဆင့် ဆက်သွယ်အသိပေးအကြောင်းကြားဖို့လည်း အသိပေးထားပါတယ်။

1 year Ago

February 20, 2021

မသန်စွမ်းလူငယ်အား ရိုက်နှက်ခဲ့သည့် ရဲတပ်ဖွဲ့တာဝန်ရှိသူများကို အရေးယူပေးရန် တောင်းဆို

မန္တလေးမြို့ တံခွန်တိုင်အဝိုင်းမှာ ဖေဖော်ဝါရီ ၁၅ ရက်နေ့က စစ်အာဏာသိမ်းတာကို ကန့်ကွက်ဆန္ဒထုတ်ဖော်ခဲ့တဲ့ ဖြစ်စဉ်အတွင်း မသန်စွမ်းလူငယ်အား အကြမ်းဖက် ရိုက်နှက်ခဲ့တဲ့ ရဲတပ်ဖွဲ့တာဝန်ရှိသူတွေကို အရေးယူပေးဖို့ မြန်မာနိုင်ငံ မသန်စွမ်းအသင်းချုပ်နဲ့ မသန်စွမ်းအသင်းတွေ အပါအဝင် အရပ်ဘက်အဖွဲ့အစည်းတွေက တောင်းဆိုလိုက်ပါတယ်။

မသန်စွမ်း မောင်ဟန်သက်ဇော်ဟာ ဆန္ဒထုတ်ဖော်တဲ့အနားမှာ ရှိနေစဉ် ရဲတပ်ဖွဲ့က ရိုက်နှက်မှုကြောင့် ဦးခေါင်းကိုထိပြီး လဲကြသွားတဲ့ ဗွီဒီယိုမှတ်တမ်းဟာ လူမူကွန်ရက်မှာ ပျံ့နှံ့ခဲ့တာပါ။

မောင်ဟန်သက်ဇော်ဟာ ကိုယ်အင်္ဂါမသန်စွမ်းသလို ဉာဏ်ရည်မသန်စွမ်းသူလည်းဖြစ်ပြီး မိဘတွေမရှိတဲ့အတွက် ဦးလေးဖြစ်သူနဲ့ နေထိုင်နေသူပါ။

ရဲတပ်ဖွဲ့က ရိုက်နှက်နေစဉ် မပြေးနိုင်တဲ့အတွက် ၁၀ ချက်ထက်မနည်း အရိုက်ခံခဲ့ရတာပါ။

ဒါအပြင် ကိုယ်အင်္ဂါမသန်စွမ်းဖြစ်တဲ့ ဧရာဝတီတိုင်းဒေသကြီး အိမ်မဲမြု့နယ်မဲဆန္ဒနယ် တိုင်းဒေသကြီး လွှတ်တော်ကိုယ်စားလှယ်ကိုလည်း ပြန်လွှတ်ပေးဖို့ တောင်းဆိုခဲ့ကြပါတယ်။

မသန်စွမ်းတွေကို အကြမ်းဖက်ရိုက်နှက်တာဟာ ကုလသမဂ္ဂ မသန်စွမ်းသူများ အခွင့်အရေးဆိုင်ရာ သဘောတူစာချုပ်နဲ့ မြန်မာနိုင်ငံမသန်စွမ်းသူများအခွင့်အရေးဥပဒေကို ချိုးဖောက်ရာရောက်တယ်လို့ မသန်စွမ်းအဖွဲ့အစည်းတွေက ပြောပါတယ်။

ဒီလို အကြမ်းဖက်မှုတွေနဲ့ပတ်သက်ပြီး အရပ်ဘက်အဖွဲ့အစည်းတွေ၊ မသန်စွမ်းအဖွဲ့တွေက လူပုဂ္ဂိုလ် ၂၇၀ ကျော် ဒီနေ့ လက်မှတ်ရေးထိုးပြီး ကန့်ကွက်ရှုတ်ချထားပါတယ်။

စစ်အာဏာသိမ်းမှုကို ဆန္ဒထုတ်ဖော်ခဲ့တာကြောင့် မြန်မာနိုင်ငံမြို့အများအပြား အကြမ်းဖြိုခွင်းတာတွေ ရှိခဲ့ပြီး သေဆုံးသူ ဒဏ်ရာရရှိသူတွေနဲ့ အဖမ်းခံရသူ အများအပြားရှိနေတဲ့အထိမှာ မသန်စွမ်းသူတွေလည်း ပါဝင်နေပါတယ်။

2 years Ago
More News
Up