ရိုက်နှက်ဖမ်းဆီးခံရ

September 12, 2022

တောင်ဥက္ကလာပတွင် YBS 6 ကား ရိုက်နှက်ဖျက်ဆီးခံရ၊ ၃ ဦး ဒဏ်ရာရ

တောင်ဥက္ကလာပမြို့နယ် ၄ ရပ်ကွက် ပါရမီ-ညောင်ပင်မှတ်တိုင်မှာ ဒီကနေ့ ညနေပိုင်းက YBS 6 ခရီးသည်တင်ယာဥ်ကို အမည်မသိလူအုပ်စုက ဝိုင်းရိုက်ဖျက်ဆီးခဲ့ရာ ယာဥ်ပေါ်ပါလာသူ ၃ ဦး ထိခိုက်ဒဏ်ရာရရှိခဲ့တယ်လို့ မြို့ခံတွေက ပြောပါတယ်။

ဒီကနေ့ ညနေသုံးနာရီခွဲက ပါရမီ-ညောင်ပင်မှတ်တိုင်မှာ YBS 6 ကားကို အသင့်စောင့်နေတဲ့ အမည်မသိ လူအုပ်စုက ဝိုင်းရိုက်ဖျက်ဆီးခဲ့ရာ ယာဥ်ပေါ်ပါသူ ၃ ဦး ဒဏ်ရာရရှိခဲ့တယ်လို့ ရပ်ကွက်နေသူတဦးက ဒီဗွီဘီကို ပြောပါတယ်။

“ကားနဲ့ ပြဿနာတက်လာတာ နေမယ်။ အဲဒီလူတွေကို မမြင်ဖူးဘူး။ မှတ်တိုင်ကနေ စောင့်ပြီး တုတ်တွေနဲ့ ကားမှန်တွေကို ရိုက်တာ ဒဏ်ရာရတဲ့သူတွေရှိတယ်။ ပရဟိတအဖွဲ့က ကူညီပေးနေတာ တွေ့တယ်။” 

လူအုပ်စုနဲ့ ဝိုင်းဝန်းရိုက်နှက်မှုကြောင့် ဒဏ်ရာရရှိသူတွေကို အရေးပေါ်ကုသမှုတွေ ပြုလုပ်ပေးခဲ့တယ်လို့ ရွှေမေတ္တာ လူမှုကူညီရေးအသင်း တာဝန်ရှိသူက ဒီဗွီဘီကို ပြောပါတယ်။

“ကျမတို့ ကားသွားရင်းနဲ့ ရိုက်နှက်နေတာတွေ့လို့ စောင့်ကြည့်နေတာ။ ခရီးသည်တွေ ပိတ်နေတယ်။ အဲဒီအချိန်မှာ သားအမိနှစ်ယောက် ကားပေါ်က ခုန်ချတာ။ ကလေးအမေက မှန်ကွဲစတွေနဲ့ထိပြီး ခြေထောက်ထိသွားတယ်။ ကလေးကတော့ ဒဏ်ရာနည်းနည်းပဲရတယ်။”

ကားကို ရိုက်နှက်ဖျက်ဆီးနေချိန် ကားအတွင်းကို မှန်ကွဲစတွေ လွင့်စဉ်ကာ ကားပေါ်လာပါသူ အမျိုးသား ၂ ဦးလည်း မှန်ကွဲစတွေ ထိခိုက်မိတယ်လို့ ဆိုပါတယ်။

“ဆေးရုံတော့ မတင်ရဘူး။ အသင်းက အရေးပေါ်ကုသမှုတွေ လုပ်ပေးလိုက်လို့ အိမ်ကို ပြန်သွားပါပြီ။ ဒဏ်ရာတွေတော့ ရတာပေါ့။” 

YBS 6 ခရီးတင်ယာဥ်ဟာ တောင်ဒဂုံ ၈၉ လမ်းဆုံမှ လှိုင်သာယာ ဒဂုံဧရာအဝေးပြေးဝင်းကို ပြေးဆွဲပေးနေတဲ့ ခရီးသည်တင်ယာဥ် ဖြစ်ပါတယ်။ 

3 months Ago

August 26, 2021

ကလေးမြို့ သပိတ်စစ်ကြောင်း ဖြိုခွင်းခံရ၊ ၁၀ ဦးခန့် ရိုက်နှက်ဖမ်းဆီးခံရ

စစ်ကိုင်းတိုင်း ကလေးမြို့ ဗိုလ်ချုပ်လမ်းမကြီးပေါ်မှာ ဒီနေ့မနက်က စစ်အာဏာရှင်ဆန့်ကျင်ရေး ချီတက်ဆန္ဒပြနေတဲ့ သပိတ်စစ်ကြောင်း ဖြိုခွင်းခံရပြီး ၁၀ ယောက်လောက် ရိုက်နှက်ဖမ်းဆီးခံရတယ်လို့ သိရပါတယ်။

စစ်ကြောင်းချီတက်နေတဲ့အချိန်မှာ အာဏာသိမ်းစစ်ကောင်စီရဲ့ အကြမ်းဖက်လက်နက်ကိုင်တွေ အိမ်စီးကားတွေနဲ့ရောက်လာပြီး သေနတ်ပစ်ဖောက် ဖြိုခွင်းခဲ့တာလို့ ဆန္ဒပြရာမှာ ပါဝင်သူတဦးက ပြောပါတယ်။

“အခုမနက် ကျနော်တို့ ဆန္ဒပြနေချိန်စ စစ်ကောင်စီတပ်တွေရောက်လာပြီး သပိတ်စစ်ကြောင်းဖြိုခွင်းခံရတယ်၊ ဖမ်းဆီးခံရတာတွေလည်း ရှိတယ်။” လို့ စစ်ကြောင်းမှာ ပါဝင်သူတစ်ဦးက ပြောပါတယ်။

သပိတ်စစ်ကြောင်း ဖြိုခွင်းခံရပြီး စစ်ကြောင်းမှာပါဝင်သူ ၁၀ ယောက်လောက်ကို ရိုက်နှက်ဖမ်းဆီးတဲ့အပြင် ဆိုင်ကယ် ၃ စီးကိုလည်း စစ်ကောင်စီတပ်သားတွေ ယူသွားတယ်လို့ သိရပါတယ်။

ကလေးမြို့မှာ စစ်အာဏာရှင်ဆန့်ကျင်ရေးအတွက် နေ့စဉ် ချီတက်ဆန္ဒပြနေပြီး ဒီကနေ့ ဩဂုတ်လ ၂၆ ရက်နေ့မှာ ရက်ပေါင်း ၂၀၀ ပြည့်တာဖြစ်ပါတယ်။

1 year Ago
More News
Up