ရာသီဥတု

January 26, 2023

ဂျပန်တွင် နှင်းမုန်တိုင်းကြောင့် လူအချို့သေဆုံး၊ လေယာဉ်ခရီးစဉ်များ ဖျက်သိမ်း

ဂျပန်နိုင်ငံတဝန်းမှာ ဇန်နဝါရီ ၂၅ ရက်က ဆီးနှင်းတွေ ထူထူထပ်ထပ် ဖုံးလွှမ်းခဲ့လို့ ယာဉ်ကြောတွေ ပိတ်ဆို့ခဲ့ပြီး ရာနဲ့ချီတဲ့ လေယာဉ်ခရီးစဉ်တွေကို ဖျက်သိမ်းခဲ့ရပါတယ်။ ရထားသွားလာမှုတွေလည်း အနှောင့်အယှက် ဖြစ်စေတဲ့အပြင် လူတဦးထက်မနည်း သေဆုံးခဲ့ပါတယ်။

ပုံမှန်မဟုတ်ဘဲ အေးမြတဲ့ ရာသီဥတုနဲ့ အလွန်အမင်း လေဖိအားနည်းရပ်ဝန်းတွေကြောင့် ဂျပန်နိုင်ငံတဝန်းမှာ ဇန်နဝါရီ ၂၄ ရက်က နှင်းတွေကျလာပြီး လေပြင်းတွေ တိုက်ခတ်နေပါတယ်။

မုန်တိုင်းကြောင့် လူတဦးသေဆုံးပြီး တခြားသေဆုံးသူနှစ်ဦးကို ဗုဒ္ဓဟူးနေ့ မနက်အထိ မုန်တိုင်းနဲ့ ဆက်စပ်မှုရှိမရှိ စုံစမ်းစစ်ဆေးနေတယ်လို့ အစိုးရက ပြောပါတယ်။

နှင်းတွေနဲ့ လေပြင်းတွေ တိုက်ခတ်မှုကြောင့် အင်္ဂါနေ့မှာ ရထားတွေပြေးဆွဲမှုကို ရပ်ဆိုင်းခဲ့ရပြီး ကျိုတိုမြို့အနောက်ပိုင်းက ရထားဘူတာနှစ်ခုမှာ လူပေါင်း ၃,၀၀၀ လောက် သောင်တင်နေခဲ့တယ်လို့ NHK သတင်းမှာဖော်ပြပါတယ်။

အင်္ဂါနေ့နှောင်းပိုင်းကနေ ဗုဒ္ဓဟူးနေ့အစောပိုင်းအထိ ဘူတာရုံတွေကြားမှာ အနည်းဆုံး ရထား ၁၅ စင်း ပေါ်က လူတချို့ ပိတ်မိနေခဲ့တယ်လို့ NHK က ပြောပါတယ်။ အအေးလွန်ကဲတဲ့ ရာသီဥတုဟာ ဇန်နဝါရီ ၂၆ ရက်အထိ ဆက်လက်တည်ရှိမယ်လို့ ခန့်မှန်းရပါတယ်။

1 week Ago

January 4, 2023

သြစတြေးလျတွင် မိုးသည်းထန်ပြီး စံချိန်တင်ရေကြီး

သြစတြေးလျနိုင်ငံ အနောက်ပိုင်းပြည်နယ်အတွင်း ကင်မ်ဘာလေဒေသမှာ မိုးသည်းသည်းထန်ထန်ရွာခဲ့လို့ ဇန်နဝါရီ ၃ ရက်က စံချိန်တင်ရေလွှမ်းခဲ့ပြီး နေအိမ်တွေနဲ့အတူ တောရိုင်းတိရစ္ဆာန်တွေလည်း ရေဘေးသင့်ခဲ့တဲ့အတွက် ဒေသဆိုင်ရာ အာဏာပိုင်တွေက အဲ့ဒီဒေသမှာ အရေးပေါ်အခြေအနေ ကြေညာခဲ့ပါတယ်။

ကင်မ်ဘာလေဒေသက ဖစ်ဇ်ရွိုင်း ခရော့ဆင်း မြို့ငယ်လေးမှာ နေရာအနှံ့ ရေကြီးရေလျှံခဲ့လို့ လမ်းတွေ၊ စီးပွားရေး လုပ်ငန်းတွေနဲ့အတူ နေအိမ်တွေလည်း ရေထဲမှာနစ်မြုပ်နေပြီး ရေနစ်မြုပ်နေတဲ့ သားပိုက်ကောင်ငယ်လေးတကောင်လည်း ဓာတ်ပုံထဲတွေ့ရပါတယ်။

ဖစ်ဇ်ရွိုင်းမြစ်ဟာ ပြီးခဲ့တဲ့အင်္ဂါနေ့ မနက်ပိုင်းက အမြင့် ၄၉ ဒသမ ၅ ပေအထိ စံချိန်တင်မြင့်တက်လာခဲ့ပြီး ဒါဟာ ၂၀၀၂ ခုနှစ်က စံချိန်တင်မြင့်တက်ခဲ့တဲ့ ၄၅ ဒသမ ၇၆ ပေ အတိုင်းအတာကို ကျော်ဖြတ်ခဲ့တာလို့ ဒေသခံမီဒီယာက ကြေညာပါတယ်။

ပြည်နယ်အစိုးရကတော့ ဒေသတွင်း အရေးပေါ်အခြေအနေ ကြေညာထားသလို ဖြစ်နိုင်ရင် မြို့ခံတွေအနေနဲ့ ဘေးလွတ်ရာကို ချက်ချင်းပြောင်းရွှေ့ဖို့ ဆော်သြထားပါတယ်။ ဇန်နဝါရီ ၄ ရက်အထိ ဆက်ပြီး ရေကြီးနေမယ်လို့ အာဏာပိုင်တွေက မျှော်လင့်ထားပါတယ်။

1 month Ago
More News
Up