ရာသီတုပ်ကွေး

June 17, 2020

ကိုဗစ်-၁၉ ရောဂါနှင့် ရာသီတုပ်ကွေးရောဂါ ကွာခြားချက် လက္ခဏာများ

လက်ရှိကမ္ဘာ့နိုင်ငံတွေမှာ ပျံ့နှံ့ဖြစ်ပွားနေတဲ့ ကိုဗစ်-၁၉ ရောဂါနဲ့ ဒီရာသီမှာ ဖြစ်တတ်တဲ့ တုပ်ကွေးနဲ့ သာမန်အအေးမိတာတို့ အားလုံးမှာ ချောင်းဆိုးတတ်ပြီး ကွာခြားတဲ့ လက္ခဏာတွေကို ကျန်းမာရေးနဲ့ အားကစားဝန်ကြီးဌာနက  ထုတ်ပြန်ပါတယ်။ သာမန်အအေးမိတာမှာတော့ ဖျားနာတာဟာ တခါတလေမှဖြစ်တတ်ပြီး ကိုဗစ်-၁၉ ရောဂါနဲ့ ရာသီတုပ်ကွေးတို့မှာတော့ အဖြစ်များတယ်လို့ ဆိုပါတယ်။ လည်ချောင်းနာတာကတော့ ကိုဗစ်-၁၉ နဲ့ ရာသီတုပ်ကွေးမှာ တခါတလေဖြစ်တတ်ပြီး သာမန်အအေးမိရင်တော့ အဖြစ်များပါတယ်။ မောတာနဲ့ အနံ့အရသာမရတာကို ကိုဗစ်-၁၉ မှာ တခါတလေတွေ့ရတတ်ပြီး ရာသီတုပ်ကွေးမှာ ဖြစ်ခဲပေမဲ့ သာမန်အအေးမိတာမှာတော့ မောတာလုံးဝ မဖြစ်တတ်ဘဲ အနံ့အရသာမရတာကလည်း ဖြစ်ခဲပါတယ်။ ကိုဗစ်-၁၉ ရဲ့ လက္ခဏာတွေထဲမှာ ကြွက်သားတွေ နာကျင်တာ၊ အားအင်ကုန်ခမ်းတာ၊ နှာချေတာ၊ နှာစေးတာ၊ ဝမ်းလျှောတာ၊ အန်တာ၊ ဗိုက်နာတာတို့ ပါဝင်ပေမဲ့ ဖြစ်ခဲပါတယ်။ ရာသီတုပ်ကွေးဖြစ်ရင် ကြွက်သားတွေ နာကျင်တာနဲ့ အားအင်ကုန်ခမ်းတာတို့ အဖြစ်များပြီး နှာချေတာ၊ နှာစေးတာက တခါတလေဖြစ်တတ်ပါတယ်။ ဝမ်းလျှောတာ၊ အန်တာ၊ ဗိုက်နာတာတို့ကတော့ ကလေးငယ်တွေမှာပဲ တခါတလေဖြစ်တတ်ပါတယ်။ သာမန်အအေးမိရင်တော့ ကြွက်သားတွေ နာကျင်တာနဲ့ နှာချေတာ၊ နှာစေးတာတို့ အဖြစ်များတတ်သလို ဝမ်းလျှောတာ၊ အန်တာ၊ ဗိုက်နာတာတို့ လုံးဝ မဖြစ်ဘဲ နှာချေတာ၊ နှာစေးတာကတော့ တခါတလေ ဖြစ်တတ်ပါတယ်။ မြန်မာနိုင်ငံက ကိုဗစ်-၁၉ ဓာတ်ခွဲအတည်ပြုလူနာတွေမှာ ဖျားတာနဲ့ ချောင်းခြောက်ဆိုးတာကို အများဆုံးတွေ့ရတယ်လို့ ကျန်းမာရေးနဲ့ အားကစားဝန်ကြီးဌာနက ထုတ်ပြန်ထားပါတယ်။ ကိုယ်လက်မအီမသာဖြစ်တာ၊ ကြွက်သားနဲ့ အဆစ်အမြစ်တွေနာကျင်တာကတော့ လူနာတွေရဲ့ ၁၃ ရာခိုင်နှုန်း၊ မောပန်းတာကတော့ ၂၁ ရာခိုင်နှုန်း၊ လည်ချောင်းနာတာဟာ ၁၈ ရာခိုင်နှုန်း၊ မူးဝေအော့အန်တာနဲ့ ဝမ်းလျှောတာက ၁၁ ရာခိုင်နှုန်း၊ နှာခေါင်းပိတ်တာ၊ နှာချေတာနဲ့ နှာစေးတာက ၁၃ ရာခိုင်နှုန်း၊ အနံ့ အရသာ အာရုံခံစားမှု ပျောက်တာကတော့ ၉ ရာခိုင်နှုန်း ဖြစ်တတ်တယ်လို့ ထုတ်ပြန်ထားပါတယ်။
11 months Ago

October 19, 2019

ရာသီတုပ်ကွေး H1N1 ဖြစ်ပွားနှုန်းနှင့် သေဆုံးနှုန်း လျော့ကျ

မြန်မာနိုင်ငံတဝန်း ရာသီတုပ်ကွေး H1N1 ဖြစ်ပွားတဲ့ လူနာတွေထဲက တလအတွင်းမှာ လူတယောက်ပဲ ထပ်သေဆုံးခဲ့ပြီး ဖြစ်ပွားသူ အယောက် ၃၀ ဝန်းကျင်ပဲ ထပ်တိုးခဲ့တာကြောင့် ဖြစ်ပွားနှုန်းရော သေဆုံးနှုန်းပါ သိသိသာသာလျော့ကျသွားခဲ့တယ်လို့ သိရပါတယ်။ စက်တင်ဘာ ၂၀ ရက်က ဓာတ်ခွဲအတည်ပြုလူနာ ၇၄၀ ယောက်ရှိပြီး အောက်တိုဘာ ၁၈ ရက်မှာတော့ ၇၇၈ ယောက်၊ စက်တင်ဘာ ၂၀ ရက်က သေဆုံးသူ စုစုပေါင်း ၁၁၅ ယောက် ရှိပြီး အောက်တိုဘာ ၁၈ ရက်အထိက ၁၁၆ ယောက်ရှိတယ်လို့ ပြည်သူ့ကျန်းမာရေးဦးစီးဌာနက ထုတ်ပြန်ထားပါတယ်။ ဒီကာလမှာ သံသယလူနာပေါင်း ၁၆၅ ယောက်ကို ဓာတ်ခွဲစစ်ဆေးခဲ့တာ ဖြစ်ပါတယ်။ နောက်ထပ်သေဆုံးခဲ့သူဟာ မန္တလေးတိုင်းက ဖြစ်လို့ မန္တလေးတိုင်းမှာ စုစုပေါင်း သေဆုံးသူ ၅ ယောက် ရှိပါတယ်။ အခုအချိန်ထိ ရှမ်းပြည်နယ်အရှေ့ပိုင်းမှာ ဓာတ်ခွဲအတည်ပြုလူနာ မတွေ့ရဘဲ တနိုင်ငံလုံးမှာ ကူးစက်ခံ လူနာတွေ ရှိပါတယ်။ ပြီးတော့ ကယား၊ ကရင်၊ ချင်း၊ ရှမ်းမြောက်နဲ့ အရှေ့ပိုင်းတို့မှာတော့ သေဆုံးလူနာ မရှိပါဘူး။ ရန်ကုန်တိုင်းမှာ ၆၈ ယောက် သေဆုံးခဲ့လို့ အများဆုံးဖြစ်ပြီး ဧရာဝတီတိုင်းမှာ ၁၄ ယောက်၊ ပဲခူးတိုင်းမှာ ၁၁ ယောက်နဲ့ အများဆုံး သေဆုံးခဲ့ပါတယ်။ ဖြစ်ပွားနှုန်းရော သေဆုံးနှုန်းပါ သိသိသာသာ လျော့သွားပြီဖြစ်ပေမယ့် အခုအချိန်အထိတော့ H1N1 ကူးစက်ခံ ဖြစ်ပွားသူတွေ ရှိနေသေးတာ ဖြစ်ပါတယ်။ ရာသီတုပ်ကွေး H1N1 ဟာ သက်ကြီးရွယ်အို၊ ၅ နှစ်အောက် ကလေးတွေနဲ့ နာတာရှည်ရောဂါရှိသူတွေမှာ ရောဂါပိုးကူးစက်ရင် ပိုမိုပြင်းထန်နိုင်လို့ ဂရုပြုသင့်ပါတယ်။ ရာသီတုပ်ကွေးရောဂါ လက္ခဏာတွေကတော့ ဖျားတာ၊ ချောင်းဆိုးတာ၊ လည်ချောင်းနာ၊ နှာရည်ယိုတာနဲ့ ကိုယ်လက်နာကျင်ကိုက်ခဲပြီး ခေါင်းကိုက်တာ၊ ချမ်းတုန်ဖျားတာနဲ့ ကိုယ်လက် မအီမသာတွေ ဖြစ်လေ့ရှိပါတယ်။ ပြီးတော့ အော့အန်တာ၊ ဝမ်းလျှောတာတွေလည်း ဖြစ်တတ်ပြီး ရောဂါဝင်ရောက်ချိန်ကနေ ရောဂါလက္ခဏာ ပြမယ့်အချိန်က ၁ ရက်ကနေ ၅ ရက်အတွင်း ဖြစ်ပါတယ်။ တုပ်ကွေးရောဂါ မဖြစ်စေဖိုနဲ့ ကူးစက်တာကို ကာကွယ်ဖို့ လက်ဆေးတာ၊ နှာချေ၊ ချောင်းဆိုးရင် ပါးစပ်နဲ့ နှာခေါင်းကို အုပ်ပြီးဆိုးတာ၊ လူထူထပ်တဲ့နေရာ အတတ်နိုင်ဆုံး ရှောင်ကြဉ်ဖို့နဲ့ ဖျားနာပြီး အသက်ရှူကျပ်ရင် ချက်ချင်း ဆေးရုံ၊ ဆေးခန်းပြသဖို့ ကျန်းမာရေးနဲ့ အားကစားဝန်ကြီးဌာနက အကြံပြုထုတ်ပြန်ထားပါတယ်။
2 years Ago
Up