ရဟတ်ယာဉ်

November 22, 2022

ရဟတ်ယာဉ်ဝယ်သည့်ကိစ္စ လုပ်ထုံးလုပ်နည်းနှင့်အညီဆောင်ရွက်ရန်သာ ညွှန်ကြားခဲ့ဟု နိုင်ငံတော် အတိုင်ပင်ခံပုဂ္ဂိုလ် ထွက်ဆို

ရဟတ်ယာဉ်အမှုတွေအတွက် နိုင်ငံတော်သမ္မတဦး၀င်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို နိုဝင်ဘာ ၂၂ ရက်က နေပြည်တော်အချုပ်ရှိ အထူးသီးသန့်တရားရုံးမှာ ဆက်ဆက်ရုံးထုတ်စစ်ဆေးခဲ့တယ်လို့ တရားရုံးနဲ့နီးစပ်တဲ့ အသိုင်းအဝိုင်းကနေ သိရပါတယ်။

ရဟတ်ယာဉ်နဲ့ပတ်သက်တဲ့ အဂတိ ငါးမှုလုံးအတွက် စွဲချက်တင် အမိန့်ချကာ ပြန်ခေါ်သက်သေတွေ စစ်ဆေးပြီးနောက် စွပ်စွဲခံရသူတွေဖြစ်တဲ့ နိုင်ငံခေါင်းဆောင်နှစ်ယောက်တို့ကို စစ်ဆေးနေတာဖြစ်ပါတယ်။

အဆိုပါတရားရုံးနဲ့ နီးစပ်သူက “ဒီနေ့ သမ္မတဦး၀င်းမြင့်ကိုစစ်ဖို့ကျန်တဲ့ တမှုစစ်တယ်။ နောက်အန်တီကိုစစ်တာ တမှုပဲပြီးတယ်။ အန်တီကလည်း အောက်က အဆင့်ဆင့် ဆောင်ရွက်ပြီးတော့မှ ရုံးတွင်းစာတွေနဲ့ လမ်းညွှန်မှုခံယူတဲ့အခါကျတော့ လုပ်ထုံးလုပ်နည်းနဲ့အညီပဲ ဆောင်ရွက်ပါလို့ လမ်းညွှန်တာပဲ ရှိတယ်လို့ ထွက်ဆိုခဲ့တယ်။ တခြားဘာမှ သူတို့က လုပ်ထားတာ မရှိတာ”လို့ ပြောပါတယ်။

၂၀၂၁ ခုနှစ်အတွင်းမှာ သဘာဝဘေးအန္တရာယ်ကာကွယ်ရေးလုပ်ငန်းတွေ ဆောင်ရွက်တာမှာအသုံးပြုဖို့ ရဟတ်ယာဉ်တစ်စီး ဝယ်ယူတာ၊ ငှားရမ်းတာ၊ သက်တမ်းတိုးတာ၊ ပြုပြင်ထိန်းသိမ်းတာတွေနဲ့ပတ်သက်ပြီး စစ်ကောင်စီက နိုင်ငံတော် သမ္မတ ဦး၀င်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ဒေါက်တာ၀င်းမြတ်အေးတို့ကို အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ နဲ့ တရားစွဲဆိုထားတာ ဖြစ်ပါတယ်။

1 week Ago

August 26, 2022

ဗန်းမောက်မြို့နယ်၌ မိုင်းထိသေဆုံးသွားသည့် စစ်ကောင်စီတပ်ဖွဲ့ဝင်များကို ရဟတ်ယာဉ်ဖြင့် သယ်ဆောင်

စစ်ကိုင်းတိုင်း၊ ဗန်းမောက်မြို့နယ်၊ စက်တောရွာအနီးမှာ PDF တပ်ဖွဲ့က စစ်ကောင်စီတပ်ကို မိုင်းခွဲတိုက်ခိုက်ခဲ့ရာ စစ်ကောင်စီတပ်သား ၆ ယောက် သေဆုံးခဲ့လို့ ဩဂုတ် ၂၅ ရက် မွန်းလွဲ ၃ နာရီကျော်က ရဟတ်ယာဉ်နဲ့  အလောင်းတွေ လာရောက်သယ်ဆောင်သွားတယ်လို့ ဒေသခံတွေထံက သိရပါတယ်။

စစ်ကောင်စီတပ်သားတွေဟာ စက်တောရွာအနောက်ဘက်ကနေ ဗန်းမောက်မြို့တွင်းဘက်သို့ ဆင်းလာချိန်မှာ  ဗန်းမောက်PDF တပ် က မိုင်း ၈ လုံးခွဲကာ တိုက်ခိုက်ခဲ့တာဖြစ်ပါတယ်။

ဗန်းမောက်ဒေသခံတဦးက “ဒီနေ့ မနက် စက်တောရွာက ပြည်သူ ၁၀ ဦးကို ချောခေါ်သွားပါတယ်။ မနေ့က မိုင်းမိသေဆုံးသူတွေကို  စက်တောရွာကနေ တောလမ်းအတိုင်း ထမ်းသယ်ခိုင်းပြီး ရဟတ်ယာဉ်ကွင်းရောက်တဲ့အထိ ပို့ခိုင်းပါတယ်။ ကြည့်ရတာ အရာရှိတွေဖြစ်မယ်။ တပ်သားအဆင့်သေရင် ဖြစ်သလို မြှုပ်ခဲ့ကြတာ။ နောက်ပြီး ရဟတ်ယာဉ်ပေါ်ကနေ လက်နက်ကျည်ဆန်ထည့်ထားတာတွေလည်း ချသွားတယ်ကြားတယ်။” လို့ပြောပါတယ်။

ဩဂုတ် ၂၄ ရက်က မိုင်းခွဲခံရတဲ့ ဖြစ်စဉ်မှာ ဒဏ်ရာရသူတွေလည်းရှိပြီး စက်တောရွာ ဆေးခန်းမှာ စခန်းချကာ ဆေးကုသွားတယ်လို့ သိရပါတယ်။

စစ်ကိုင်းတိုင်း ကသာခရိုင် ဗန်းမောက်မြို့နယ်မှာ သြဂုတ် ၂၄ ရက် ညနေပိုင်း ၅ နာရီဝန်းကျင်လောက်က အင်အား ၅၀ ကျော်လောက်ရှိတဲ့ စစ်ကောင်စီတပ်ဖွဲ့ကို PDF ပူးပေါင်းအဖွဲ့တွေက မိုင်းဆွဲတိုက်ခိုက်တာဖြစ်ပါတယ်။

စစ်ကောင်စီတပ်ဖွဲ့ မိုင်းဆွဲတိုက်ခိုက်ခံလိုက်ရတဲ့နေရာဟာ ဗန်းမောက်မြို့နဲ့ ၃ မိုင်ခန့်အကွာမှာရှိတဲ့ စက်တောကျေးရွာနဲ့ နားယကာကျေးရွာအကြား တနေရာမှာဖြစ်ပြီး စစ်ကောင်စီတပ်ဖွဲ့တွေ ဗန်းမောက်မြို့ဘက်ကိုအသွားမှာ တိုက်ခိုက်ခံခဲ့ရတာလို့ ဆိုပါတယ်။

အဲဒီလို မိုင်းဆွဲတိုက်ခိုက်တာကို ဗန်းမောက်မြို့နယ် ပြည်သူ့ကာကွယ်ရေးတပ်ဖွဲ့နဲ့ တခြားမဟာမိတ် PDF တပ်ရင်းတပ်ဖွဲ့တွေပူးပေါင်းလုပ်ဆောင်ခဲ့တာဖြစ်ပြီး စစ်ကောင်စီတပ်ဖွဲ့ကို မိုင်းဆွဲတိုက်ခိုက်တာအပြင် လက်နက်ကြီးတချို့နဲ့ပါ ပစ်ခတ်ခဲ့တာလို့ PDF အဖွဲ့နဲ့ နီးစပ်သူတဦးက ပြောပါတယ်။

3 months Ago
More News
Up