ရသေ့တောင်

October 1, 2022

ရသေ့တောင်မြို့နယ်​၌ အေအေက စနိုက်ပါဖြင့်ပစ်ခတ်သဖြင့် စစ်ကောင်စီတပ်သား ၄ ဦးသေ

ရခိုင်ပြည်နယ်၊ ရသေ့တောင်မြို့နယ်မှာ  စက်တင်ဘာ ၃၀ ရက်၊ နေ့လယ် ၃ နာရီကျော်လောက်က ဆောက်ခပ်ကျေးရွာမှာ တပ်စွဲထားတဲ့စစ်စခန်းမှ ရေခပ်ထွက်လာကြတဲ့ စစ်ကောင်စီတပ်သား ၅ ယောက်ကို  ကင်းပုန်းဝပ်နေတဲ့ အေအေတပ်ဖွဲ့ဝင်တွေက စနိုက်ပါနဲ့ ပစ်ခတ်တာကြောင့် စစ်သား ၄ ယောက်သေဆုံးပြီး ၁ ယောက် ဒဏ်ရာရခဲ့တယ်လို့ အေအေနဲ့နီးစပ်တဲ့ သတင်းရင်းမြစ်က သိရပါတယ်။

ရက္ခိုင့်တပ်တော်(အေအေ)နဲ့ နီးစပ်သူတဦးက" သူတို့ ၅ ဦးက ဘုန်းကြီးကျောင်းနားက ရေကန်ကို ရေခပ်ဖို့ ထွက်လာကြတာ။ ကင်းပုန်းဝပ်နေတဲ့ အေအေတပ်ဖွဲက စနိုက်ပါနဲ့ ပစ်လို့ ၄ ယောက် ပွဲချင်းပြီး သေတယ်။ ၁ ယောက် ဒဏ်ရာနဲ့ ထွက်ပြေးသွားတယ်”လို့ ပြောပါတယ်။

ဒီလိုပစ်ခတ်မှုကြောင့် ဆောက်ခပ်ကျေးရွာစစ်စခန်းကနေ  လက်နက်ငယ်တွေနဲ့ ပြန်ပစ်တဲ့အတွက် မိနှစ် ၂၀ လောက် အပြန်အလှန် ပစ်ခတ်မှုဖြစ်ပွားခဲ့ပါတယ်။

ဒါ့အပြင် ရသေ့တောင်မြို့အခြေစိုက် တပ်ရင်း ၅၃၆ နဲ့ ၅၃၇ တို့ကလည်း ဆောက်ခပ်ရွာပတ်ဝန်းကျင်ကို ၁ နာရီလောက်ကြာအောင် လက်နက်ကြီးနဲ့ ပစ်ခတ်ခဲ့တယ်လို့ ရသေ့တောင်ဒေသခံတွေက ပြောပါတယ်။

ဆောက်ခပ်ကျေးရွာဟာ အိမ်ခြေ ၇၀ ကျော်ရှိပြီး ၂၀၁၉-၂၀၂၀ တိုက်ပွဲတွေကြောင့် ရွာသူ/ရွာသားတွ နေရပ်စွန့်ခွာ ထွက်ပြေးခဲ့ကြရပြီး ရသေ့တောင်မြို့ပေါ်ရှိ စစ်ရှောင်းစခန်းတွေနဲ့ စေတီပြင်ကျေးရွာ စစ်ဘေးရှောင်စခန်းတွေမှာ နေထိုင်နေကြတာပါ။

ရသေ့တောင်မြို့နယ်ထဲက စစ်ကောင်စီစခန်းအားလုံးနီးပါး ရက္ခိုင်တပ်တော်က ရိက္ခာ၊ လက်နက် လမ်းကြောင်းတွေ ဖြတ်တောက်ထားတဲ့အတွက် ပိတ်မိနေတဲ့အနေအထားမှာရှိနေတယ်လို့ ရသေ့တောင်မြို့နယ် စစ်ရေးလေ့လာသူ တဦးက ပြောပါတယ်။

"ရသေ့တောင်နယ်ထဲမှာ ချထားတဲ့ စစ်ကောင်စီ တပ်စခန်းတွေအားလုံး အေအေဘက်က ပိတ်ထားတာတွေ့ရတယ်။ ရေစိုးချောင်းဗျူဟာတောင် ပိတ်မိနေတာ။‌ ရေစိုးချောင်းဗျူဟာကို လက်နက်နဲ့ ရိက္ခာလာပို့တဲ့ ဇက် ၅ စီး လောက် လှည့်ပြန်သွားရတယ်။ သူတို့ ဆင်းမယူဝံကြဘူး။"

ကျောက်ပန္ဒူကျေးရွာနားက "မြိုယု" ကျေးရွာနေ မြိုလူမျိုးတွေကို  တောင်ကျော်ပြီး စစ်တပ်က ရိက္ခာပို့ ခိုင်းတဲ့အတွက် ကျောက်ပန္ဒူ တောင်ကျော်လမ်းကို အေအေဘက်က ပိတ်ထားလိုက်ပါတယ်။

Photo=AA

2 months Ago

September 19, 2022

ပလက်၀၌ အေအေတပ်ကို စစ်ကောင်စီက လေကြောင်းဖြင့် ၁၁ ကြိမ်တိုက်ခိုက်၊ ရသေ့တောင် ကုန်းနှင့်ရေလမ်း အကန့်သတ်မရှိပိတ်

ချင်းပြည်နယ် ပလက်၀မြို့နယ် အေအေတပ်ဖွဲ့ဝင်တွေရှိတဲ့ နေရာတွေကို စစ်ကောင်စီက တိုက် လေယာဉ်  ၃ စီး၊ ရဟတ်ယာဉ် ၂ စီးနဲ့ ၁၁ ကြိမ်တိုင်တိုင် တိုက်ခိုက်ခဲ့တယ်လို့ ရက္ခိုင့်တပ်တော် (အေအေ) သတင်းနှင့်ပြန်ကြားရေးက စက်တင်ဘာ ၁၈ ရက်က သတင်းထုတ်ပြန်ပါတယ်။

နှမဒါ​ကျေးရွာတောင်ဘက် ၂ ကီလိုမီတာအကွာအဝေးမှာရှိတဲ့နေရာကို စက်တင်ဘာ ၁၈ ရက် နေ့လယ် ၁ နာရီ ၄၈  မိနစ်ကစပြီး မိနစ် ၃၀ အကြာ ဝေဟင်မှ တိုက်ခိုက်ခဲ့သလို  မီးဝဗျူဟာမှ ​လက်နက်ကြီး ပစ်ကူပေးချိန် အေအေ ဘက်ကလည်း မီးဝဗျူဟာကို လက်နက်ကြီးနဲ့ ပြန်လည် ပစ်ခတ်တိုက်ခိုက်ခဲ့တယ်လို့ ထုတ်ပြန်ချက်မှာ ဖော်ပြပါတယ်။

ဒေသခံ တဦးက "လေကြောင်းတိုက်ခိုက်တာတော့ အေအေဘက်ကလည်း ထိခိုက်ကျဆုံးတာတွေ ရှိမှာပါ။ စစ်ကောင်စီဘက်ကတော့ အကျအဆုံးများနေတယ်လို့ သိရတယ်။ ဒါကြောင့် အခုလို လေကြောင်းမှ ပြင်းထန်စွာ တိုက်လာတာ"လို့ ပြောပါတယ်။

ပလက်ဝနှမဒါ​ကျေးရွာက အေအေတပ်ဖွဲ့ဝင်တွေ ရှိနိုင်တဲ့နေရာကို စစ်ကောင်စီတပ်က လက်နက်ကြီး၊ လေကြောင်းပစ်ကူအပြင် မြေပြင် ထိုးစစ်ဆင် တိုက်ခိုက်ခဲ့ရာမှာ အခုဆို ၇ ကြိမ် မြောက် ရှိပြီဖြစ်ပေမဲ့ ရက္ခိုင့်တပ်တော်တပ်ဖွဲ့ဝင်တွေက ကြံ့ကြံ့ခံတိုက်ပွဲဝင်နေတယ်လို့ ထုတ်ပြန်ချက်မှာ ရေးသားထားပါတယ်။

အခုလို နှမဒါ​ကျေးရွာနားမှာ စစ်ကောင်စီရဲ့ လေကြောင်းတိုက်ခိုက်တာကြောင့်  ဒေသခံတွေေ စိုးရိမ်မှု မြင့်တက်နေကြပါတယ်။

နှမဒါရွာနေသူ တဦးက "လေကြောင်းတိုက်ခိုက်မှုက တော်တော်လေး ပြင်းထန်ပါတယ်။ မြေကြီးတွေ တုန်ခါပြီး အိမ်တွေတောင် ငလျင်လှုပ်သလို ဖြစ်သွားတာ။ နောက်ထပ်ဒီလို တိုက်ခိုက်မှုမျိုး လုပ်လာမှာကို စိုးရိမ်နေကြတယ်" လို့ ပြောပါတယ်။

ပလက်ဝနဲ့ ဆက်စပ်မြို့နယ်ဖြစ်တဲ့  ရခိုင်ပြည်နယ် ရသေ့တောင်မြို့နယ်မှာတော့ စက်တင်ဘာ ၁၈ ကစပြီး ကုန်လမ်းနဲ့ရေလမ်း အဝင်အထွက်အားလုံး စစ်ကောင်စီက ပိတ်လိုက်ပြီလို့ ဒေသခံတွေက ပြောပါတယ်။

ရသေ့တောင်ဒေသခံတဦးက "ဒီနေ့ ညနေ ၃ နာရီမှာ ရသေ့တောင်မြို့ပေါ်က ရပ်ကွက် အုပ်ချုပ်ရေးမှူးတွေကို မြို့နယ်အုပ်ချုပ်ရေးမှူးက အစည်းအဝေးခေါ်ပြီးပြောတာ။  ရေလမ်း၊ ကုန်းလမ်း အဝင်အထွက်တွေကို အကန့်အသတ်မရှိ ပိတ်လိုက်တယ်လို့ ပြောလိုက်တာပါ" လို့ ပြောပါတယ်။

စစ်ကောင်စီဗျူဟာမှူးရဲ့ အမိန့်အရ ​ရေယာဉ်တွေနဲ့ လှေတွေ အဝင်အထွက်မလုပ်ကြဖို့၊ စက်တပ်ရေယာဉ်တွေ လုံးဝ ဝင်ခွင့် မပြုဖို့၊ မလိုက်နာပါက  သေနတ်နဲ့ ပစ်မယ်ဆိုပြီး ရသေ့တောင်မြို့နယ်ကျေးရွာတွေကိုလည်း မြိုနယ်စည်ပင်သာယာအဖွဲ့က ဖုန်းဆက် အကြောင်းကြားလာ တယ်လို့ ဒေသခံစက်လှေပိုင်ရှင်တဦးက ပြောပါတယ်။

ဒါ့အပြင် ရသေ့တောင်မြို့ မေယုမြစ်ထဲမှာလည်း စစ်ကောင်စီ ရေယာဉ် နှစ်စီး ကျောက်ချကာ ရေကြောင်းအသွားအလာတွေကို စစ်ဆေးနေသလို ပုဏ္ဏကျွန်းရသေ့တောင် ကားလမ်းလည်း ပိတ်ထားတယ်လို့ ဒေသခံတွေက ပြောပါတယ်။

မောင်တော-အငူမော် ကားလမ်းအား သြဂုတ် ၁၄ ရက်၊ ဘူးသီးတောင်-စစ်တွေ ရေလမ်းအား စက်တင်ဘာ ၁၅ ရက်နဲ့ စက်တင်ဘာ ၁၈ ရက်မှာတော့ ရသေ့တောင်မြို့နယ်ရှိ ကုန်းလမ်း၊ ရေလမ်း တွေကို စစ်ကောင်စီက ရက်အကန့်သတ်မရှိ ပိတ်ထားပြီးဖြစ်ပါတယ်။

စက်တင်ဘာ ၁၆ ရက်က ပလက်ဝနဲ့ဆက်စပ်မြိုနယ် မောင်တောမြောက်ပိုင်းမှာလည်း စစ်ကောင်စီ တပ်က လေကြောင်းတိုက်ခိုက်တာတွေကြောင့် ကြိမ်ချောင်းရွာဘုန်ကြီးကျောင်းကို ထွက်ပြေးလာ တဲ့ မီးတိုက်ရွာက စစ်ရှောင် ၅၀ ကျော်ဟာလည်း မောင်နှမရွာကြား စက်တင်ဘာ ၁၇ ရက် တိုက်ပွဲကြောင့် မြို့ပေါ်ကို မသွားနိုင်ဘဲ အဲဒီဘုန်းကြီးကျောင်းမှာ ထပ်ပြီ ပိတ်မိနေတယ်လို့ ကြိမ်ချောင်းရွာဆရာတော်က မိန့်ပါတယ်။

မီးတိုက်ကျေးရွာသား တဦးက "ရွာနား လက်နက်ကြီးတွေ ကျလာတယ်။ လေယာဥ်နဲ့ ဗုံးကြဲလာ‌‌တော့ ရွာက ကလေးသူငယ်တွေ၊ သက်ကြီးရွယ်အိုတွေ နဲ့ အမျိုးသမီးတွေ ၅၀ လောက် ကား ၂ စီး နဲ့ မောင်တောကို ထွက်ပြေးလာတာ။ ဖားဝပ်ချောင်းရွာအရောက် မောင်နှမကျေးရွာမှာ တိုက်ပွဲ ဖြစ်နေကြတာကြောင်း မသွားဝံကြဘဲ့ ကြိမ်ချောင်းကျေးရွာဘုန်းတော်ကြီးကျောင်းမှာ ပိတ်မိနေတယ်”လို့ ပြောပါတယ်။

တကျော့ပြန် တိုက်ပွဲတွေ ပြင်းထန်လာတဲ့ ရခိုင်ပြည်နယ်မှာ  အဆုံးအဖြတ်ပေးမယ့် အဆုံးသတ် တိုက်ပွဲအချိန် ရောက်ပြီး အေအေ ဒုစစ်ဦးစီးချုပ် ဗိုလ်မှူးချုပ် ဒေါက်တာ ညိုထွန်းအောင်က စက်တင်ဘာ ၁၆ ရက်က သူရဲ့ လူမှုကွန်ရက်မှာ ပြောကြားလိုက်ပြီးနောက် စစ်ကြောင်းထိုးဖို့ ရောက်လာတဲ့ တပ်မ ၇၇ ကို မောင်နှမကျေးရွာမှာ အေအေ က စက်တင်ဘာ ၁၇ ရက်နေ့ ကြားဖြတ်တိုက်ခိုက်ခဲ့ပါသေးတယ်။ 

ရခိုင်မှာ စစ်ကောင်စီတပ်နဲ့ ရခိုင့်တပ်တော်(အေအေ)တို့ ပြီးခဲ့တဲ့လကစလို့ တကျော့ပြန်တိုက်ပွဲ တွေ ဖြစ်ပွားနေပြီး အေအေက မောင်တောမြို့နယ်မှာရှိတဲ့ တပ်စခန်းတချို့ကို တိုက်ခိုက်သိမ်းပိုက်ထားသလို စစ်ကောင်စီက လက်နက်ကြီးတွေ၊ လေယာဉ်တွေနဲ့ ပစ်ခတ်နေတာကြောင့် အရပ်သားပြည်သူတွေ ထိခိုက်သေဆုံးတာလည်း ရှိလာနေပါတယ်။

ရခိုင်ပြည်နယ်အတွင်း အရင်ကတည်းက နေရပ်စွန့်ခွာပြီး အိမ်မပြန်နိုင်သေးတဲ့ စစ်ဘေးရှောင် ၈၀,၀၀၀ လောက်ရှိပြီး အခုလို တကျော့ပြန်တိုက်ပွဲတွေ ဖြစ်ပွားလာတာကြောင့် နောက်ထပ် လူဦးရေ ၆,၀၀၀ လောက် စစ်ဘေးရှောင်စခန်းတွေမှာ လာရောက်ခိုလှုံနေကြရပါတယ်။

ချင်းပြည်နယ် ပလက်ဝမြို့နယ်ဟာ ရခိုင်ပြည်နယ်က ရသေ့တောင်၊ ဘူးသီးတောင်၊ ကျောက်တောနဲ့ မောင်တောမြို့နယ်တို့နဲ့ဆက်စပ်နေပြီး ရခိုင့်တပ်တော်(အေအေ) လှုပ်ရှားရာနယ်မြေတွေဖြစ်တယ်လို့ ဒေသခံတွေက ပြောပါတယ်။

3 months Ago
More News
Up