ရသေ့တောင်

October 4, 2020

မင်းပြား၊ ရသေ့တောင်တို့တွင် တပ်မတော်နှင့်အေအေ တိုက်ပွဲအပြင်းအထန် ဖြစ်ပွား

မင်းပြားမြို့နယ်နဲ့ ရသေ့တောင်မြို့နယ်တို့မှာ တပ်မတော်နဲ့ ရက္ခိုင့်တပ်တော်အေအေတို့ အောက်တိုဘာ ၃ ရက်နေ့က တိုက်ပွဲတွေ ပြင်းပြင်းထန်ထန်ဖြစ်ပွားပြီး တပ်မတော်ဘက်က ရဟတ်ယာဉ်တွေနဲ့ တိုက်ခိုက်တာတွေ ပြုလုပ်ခဲ့တယ်လို့ ဒေသခံလွှတ်တော်ကိုယ်စားလှယ်တွေက DVB ကို ပြောပါတယ်။  အောက်တိုဘာ ၃ ရက်နေ့ ညနေပိုင်းက မင်းပြားမြို့နယ် မေလွမ်းကျေးရွာအနီးမှာ တပ်မတော်နဲ့ ရက္ခိုင့်တပ်တော်အေအေတို့ တိုက်ပွဲဖြစ်ပြီးနောက်ပိုင်းမှာ တပ်မတော်က အဲဒီနေရာတဝိုက် တောင်တန်းတွေကို ရဟတ်ယာဉ်နှစ်စီးနဲ့ လာရောက် တိုက်ခိုက်ခဲ့တယ်လို့ မင်းပြားမြို့နယ် ပြည်နယ်လွှတ်တော်ကိုယ်စားလှယ် ဦးလှသိန်းအောင်က ပြောပါတယ်။ “မနေ့က ၅ နာရီကျော်လောက်က ဖြစ်တယ်။ တိုက်ပွဲဖြစ်ပွားခဲ့နေရာတွေကို တပ်မတော်က ရဟတ်ယာဉ်တွေ လာရောက်တိုက်ခဲ့တယ်။ ၁၅ မိနစ်လောက် ကြာတယ်။ တိုက်ခိုက်ခဲ့တယ်။ မေလွမ်းကျေးရွာအနားတဝိုက်ကို ပစ်ခတ်တာ၊ အရပ်သားတွေ ထိခိုက်ဒဏ်ရာရတဲ့ အခြေအနေကိုတော့ မသိဘူး။ အဲဒီဘက်တွေက ဖုန်းလိုင်းတွေ သိပ်မကောင်းဘူး။”  ဒါ့အပြင် အောက်တိုဘာ ၃ ရက်နေ့ မနက်ပိုင်းမှာ ရသေ့တောင်မြို့နယ် ကျောက်တန်းတိုက်နယ် ထီးစွဲနဲ့ အောင်သာစည်နားတဝိုက်မှာ တပ်မတော်နဲ့ ရက္ခိုင့်တပ်တော်အေအေတို့ တိုက်ပွဲပြင်းပြင်းထန်ထန် ဖြစ်ပွားခဲ့ပြီးနောက် အဲဒီနေ့ နေ့လယ်ပိုင်း ၁ နာရီဝန်းကျင်လောက်မှာ တပ်မတော်က ရဟတ်ယာဉ်နှစ်စီး လာရောက်ဗုံးကြဲတိုက်ခဲ့တယ်လို့ ရသေ့တောင်မြို့နယ် အမျိုးသားလွှတ်တော်ကိုယ်စားလှယ် ဦးခင်မောင်လတ်က ပြောပါတယ်။ “တိုက်ပွဲကတော့ မနေ့ ၉ နာရီခွဲလောက် စတယ်။ အရင်ဖြစ်ပွားခဲ့တဲ့ နေရာတွေမှာ ဖြစ်တယ်။ ဒါပေမဲ့ ဒီတစ်ခါဖြစ်တာက တော်တော်ကို ပြင်းပြင်းထန်ထန်ဖြစ်တယ်။ ဗုံးကွဲတယ်။ လက်နက်ကြီးတွေနဲ့ ပစ်တယ်။ အပြန်အလှန်ပစ်ခတ်မှုတွေက တော်တော်ကိုဖြစ်တယ်။ ပြီးတော့ နေ့လယ်ပိုင်းမှာ ရဟတ်ယာဉ်နဲ့ ဗုံးကြဲတယ်။  ရဟတ်ယာဉ်နှစ်စီးနဲ့ ပစ်တယ်။” ရသေ့တောင်မြို့နယ်မှာတော့ တိုက်ပွဲဖြစ်ပွားခဲ့တဲ့နေရာတွေကို လေယာဉ်နဲ့ နာရီဝက်ကြာ ပစ်ခတ်မှုလုပ်ခဲ့သလို နှစ်ဘက် တိုက်ပွဲဖြစ်ပွားမှုကလည်း မနက်ကနေ့ နေ့လယ်ပိုင်းထိ ပစ်ခတ်မှုတွေ ရှိခဲ့တယ်လို့ ကျောက်တန်းတိုက်နယ် ဒေသခံအုပ်ချုပ်ရေးမှူးတွေကလည်း DVB ကို ပြောပါတယ်။  တိုက်ပွဲဖြစ်ပွားခဲ့တဲ့ နေရာတွေကို ရသေ့တောင်မြို့ထက် တပ်မတော်တပ်စခန်းတွေနဲ့  ထီးစွဲ ရေစိုးချောင်းဗျူးဟာကုန်းကနေ တပ်မတော်က လက်နက်ကြီးတွေနဲ့ ပစ်ကူပေးခဲ့တယ်လို့ ဦးခင်မောင်လတ်က ပြောပါတယ်။  ရခိုင်ပြည်နယ်မှာ စစ်ဘေးရှောင် ဒုက္ခသည် ၂၂၀၀၀၀ ကျော်ရှိလာနေပြီလို့ ရခိုင်တိုင်းရင်းသားမျိုးနွယ်စုများအစည်းအရုံး (REC) က ဒီရက်ပိုင်းမှာ ထုတ်ပြန်ပါတယ်။
12 months Ago

August 2, 2020

ရသေ့တောင်တွင် လက်နက်ကြီးပေါက်ကွဲမှုကြောင့် ကလေး ၂ ဦးသေဆုံး၊ ၄ ဦးဒဏ်ရာရ

ရခိုင်ပြည်နယ်၊ ရသေ့တောင်မြို့နယ်၊ ကပ်ချောင်းကျေးရွာမှာ သြဂုတ် ၁ ရက်နေ့ ညနေ ၄ နာရီကျော်လောက်က လက်နက်ကြီး ပေါက်ကွဲတာကြောင့် ကလေး ၂ ဦး သေဆုံး၊ ၄ ဦး ဒဏ်ရာရှိ‌ခဲ့တယ်လို့ ကျေးရွာအုပ်ချုပ်ရေးမှူး ဦးဦးထွန်းလှိုင်က ဒီဗွီဘီကို ပြောပါတယ်။ “ကလေးတွေက ချောင်းမှာ ရေကစားနေကြတဲ့အခါ လက်နက်ကြီးကျည်ဖူး တစ်လုံး ချောင်းကမ်းစပ်က ကောက်ရကြတယ်လို့ သိရတယ်။ အဲ့ဒါကို သစ်ပင်ခွမှာ ချိတ်ထားတဲ့အခါမှာ ရာသီဥတု ပူပြင်းတဲ့အတွက် ပေါက်ကွဲပြီး ၁ ဦးပွဲချင်းပြီး သေဆုံးတယ်။ ၅ ဦး ဒဏ်ရာရတယ်။ ဆေးရုံကို ယူတဲ့အခါ ၁ ဦးထပ်သေတယ်။” မောင်နေမျိုးလင်း (၁၆ နှစ်) အခင်းဖြစ်နေရာမှာ သေဆုံးခဲ့ပြီး ဒဏ်ရာပြင်းထန်သူ ၃ ဦးအား စစ်တွေဆေးရုံကို ပို့ဆောင်စဉ် လမ်းခုလတ်မှာ မျိုးနိုင်ဦး (၉ နှစ်) သေဆုံးသွားတယ်လို့ ဆိုပါတယ်။  ဒဏ်ရာရရှိသူ  မောင်ဘပြည့်အောင် (၁၄ နှစ်)၊ မောင်နေစိုးလင်း (၁၂  နှစ်) တို့ ၂ ဦးအား ကူတောင်တိုက်နယ်ဆေးရုံနဲ့ မောင်ဖုန်းငြိမ်းလင်း (၁၅ နှစ်) နဲ့ မောင်ဇော်နိုင် (၁၄ နှစ်) တို့ကိုတော့ စစ်တွေဆေးရုံ ပို့ဆောင်ထားတယ်လို့ သိရပါတယ်။ ဇူလိုင် ၈ ရက်ကလည်း ကျေးရွာအနီး နွားကျောင်းနေစဉ် မိုင်းပေါက်ကွဲတာကြောင့် ရသေ့တောင်မြို့နယ် ငတောက်တူချေကျေးရွာနေ အသက် ၆၆ နှစ်အရွယ် ဦးမောင်ကျော်သန်း သေဆုံးသွားခဲ့ပါတယ်။ ဇူလိုင် ၂၆ ရက်ကလည်း အမ်းမြို့နယ် ကဇူးကိုင်းအုပ်စု သဲကမ်းထောင်းရွာအတွင်း လက်နက်ကြီးကျည် ကျရောက်ပေါက်ကွဲခဲ့လို့ ရွာသား ၅ ဦး ကျည်စထိမှန်ဒဏ်ရာရရှိခဲ့ပါတယ်။ မိုင်းနဲ့ လက်နက်ကြီးကြွင်းကျန်တွေ ပေါက်ကွဲမှုကြောင့် ရခိုင်ပြည်နယ်မှာ ဒီနေ့အထိ အရပ်သား သေဆုံးသူ ၂၆ ဦးနဲ့ ဒဏ်ရာရရှိသူ ၅၈ ဦး ရှိတယ်လို့ စစ်ရှောင်များအရေး ဆောင်ရွက်နေတဲ့ ရခိုင်တိုင်းရင်းသားမျိုးနွယ်များအစည်းအရုံး (REC) ရဲ့ အချက်အလက်တွေအရ သိရပါတယ်။ လင်းလက်
1 year Ago
More News
Up