ရပ်ကွက်

December 18, 2022

မြိတ်မြို့တွင် အမှိုက်ကားပုံမှန်မလာသဖြင့် ရပ်ကွက်ထဲ အမှိုက်များစုပုံနေ

တနင်္သာရီတိုင်း၊ မြိတ်မြို့ ကမ်းနားလမ်းအပါအဝင် လူနေရပ်ကွက်တွေထဲမှာ စည်ပင်အမှိုက်သိမ်းယာဉ်တွေ ပုံမှန်မလာတာကြောင့် အမှိုက်တွေ စုပုံပြီး အနံ့အသက်တွေ ဆိုးရွားနေတယ်လို့ ဒေသခံတွေထံက သိရပါတယ်။

စည်ပင်ကလစဉ်ကြေး တလကို ကျပ် ၂၀၀၀ မှ ၅၀၀၀ အထိ ပုံမှန်လာကောက်လေ့ရှိပေမယ့် အမှိုက်သိမ်းယာဉ်တွေက ပုံမှန်မလာတာကြောင့် အခုလို အမှိုက်တွေ စုပုံလာတာလို့ စျေးနားနေဒေသခံတဦးက ပြောပါတယ်။

“အမှိုက်သိမ်းယာဉ်တွေပုံမှန်မလာတာကြောင့် ကျနော်တို့လည်း အမှိုက်တွေစုပြီး စျေးနားမှာ သွားပစ်ရတယ်။ အဲဒီလိုလာပစ်တာ စျေးစည်ပင်တွေကို ပိုက်ဆံ ၃၀၀၀ ပေးရတယ်။” 

အရင် အန်အယ်လ်ဒီအစိုးရလက်ထက်တုန်းက အမှိုက်သိမ်းယာဉ်တွေ ပုံမှန်လာလေ့ရှိပြီး မြိတ်ကမ်းနားလမ်းမှာ အမှိုက်လာပစ်သူတွေကို ကျပ်သိန်းချီပြီး ဒဏ်ငွေရိုက်တယ်လို့ ဆိုပါတယ်။ 

လက်ရှိ အာဏာသိမ်း စစ်ကောင်စီလက်ထက်မှာတော့ မြိတ်ကမ်းနားလမ်းတလျှောက် နေရာတချို့မှာ အမှိုက်တွေပြန်တွေ့လာရတာလို့ မြို့ခံတွေက ပြောပါတယ်။

“အမှိုက်သိမ်းယာဉ်တွေက အရင်ကဆိုပုံမှန်လာတယ်။ အခုတော့ ၁ လမှာ နှစ်ကြိမ်လောက်ပဲ့လာတော့ အမှိုက်တွေစုပြီး အဆင်ပြေတဲ့နေရာမှာ လိုက်ပစ်နေရတယ်”လို့ မြို့ခံတဦးက ပြောပါတယ်။

စစ်ကောင်စီလက်အောက်ခံ မြို့နယ်စည်ပင်သာယာရေးအဖွဲ့က ရပ်ကွက်အတွင်း အမှိုက်သိမ်းယာဉ်ပုံမှန်မလာတာနဲ့ ပတ်သက်ပြီး တာဝန်ယူဖြေရှင်းပေးတာလည်း မရှိဘူးလို့ သိရပါတယ်။

1 month Ago

December 5, 2022

လှိုင်သာယာ ရပ်ကွက် ၂ ခုတွင် ဗုံးပေါက်ကွဲပြီး လူ ၆ ဦးဒဏ်ရာရ

ရန်ကုန်တိုင်း၊ လှိုင်သာယာမြို့နယ် ၂၀ ရပ်ကွက်နဲ့ ၇ ရပ်ကွက်တို့မှာ ဒီဇင်ဘာ ၄ ရက် ညပိုင်းက ဗုံးပေါက်ကွဲပြီး အမျိုးသမီးနှစ်ယောက်နဲ့ အမျိုးသားလေးယောက် ထိခိုက်ဒဏ်ရာရခဲ့တယ်လို့ မြို့ခံတွေဆီက သိရပါတယ်။
လှိုင်သာယာအနောက်ပိုင်းမြို့နယ် ၂၀ ရပ်ကွက် ဗိုလ်တေဇလမ်း ဘောလုံးကွင်းရှေ့မှာ မနေ့ည ၇ နာရီခွဲက ပျော်ပွဲရွှင်ပွဲကျင်းပနေချိန် ဗုံးပေါက်ခဲ့လို့ အမျိုးသားလေးယောက် ထိခိုက်ဒဏ်ရာရခဲ့တာ ဖြစ်ပါတယ်။
ရပ်ကွက်နေသူတစ်ဦးက "ဒီအချိန်ကြီးမှာ မလုပ်သင့်တာကို အုပ်ချုပ်ရေးက ဦးစီးပြီးလုပ်တာ။ ဗုံးထပေါက်တယ်။ တော်သေးတယ်မသေတာ။ ထိတာ အုပ်ချုပ်ရေးပိုင်းကလား ပွဲလာတဲ့သူတွေလား မသိဘူး။ အမျိုးသားလေးဦး ထိတယ်"လို့ ပြောပါတယ်။
ဗုံးပေါက်ကွဲပြီးနောက် ထိခိုက်ဒဏ်ရာရတဲ့ အမျိုးသားလေးယောက်ကို လူနာတင်ယာဥ်နဲ့ လှိုင်သာယာဆေးရုံကို ပို့ဆောင်ထားတယ်လို့ အုပ်ချုပ်ရေးနဲ့ နီးစပ်သူတစ်ဦးက ပြောပါတယ်။
အလားတူ လှိုင်သာအရှေ့ပိုင်းမြို့နယ်၊ ၇ ရပ်ကွက်၊ ညောင်တုန်းလမ်းပေါ်ရှိ ဝင်းကမ္ဘာဆေးဆိုင်ရှေ့မှာလည်း မနေ့ည ၇ နာရီလောက်က ဗုံးပေါက်ကွဲပြီး အမျိုးသမီးနှစ်ယောက် ဒဏ်ရာရရှိခဲ့ပါသေးတယ်။
"ဗုံးက နှစ်ကြိမ်ပေါက်တာ ၂၀ ရပ်ကွက်မှာ လေးဦး ဒဏ်ရာရတယ်။ ၇ ရပ်ကွက်မှာက နှစ်ဦး ဒဏ်ရာရတယ် မစိုးရိမ်ရဘူး"လို့ ဒေသခံက ပြောပါတယ်။
ထိခိုက်ဒဏ်ရာရရှိသူခြောက်ယောက်စလုံးကို လှိုင်သာယာဆေးရုံမှာ ပို့ဆောင်ကုသထားပြီး စစ်ကောင်စီတပ်တွေကတော့ အဆိုပါ ရပ်ကွက်နှစ်ခုလုံးကို မနေ့ညက စစ်ဆေးခဲ့ပါတယ်။
ရန်ကုန်တိုင်းက မြို့နယ်တချို့မှာ ဒီဇင်ဘာ ၁ ရက်မှ ၄ ရက်နေ့အတွင်း ဗုံးပေါက်ကွဲမှု ၇ ကြိမ်ဖြစ်ခဲ့ပြီး ဒဏ်ရာရရှိသူ ခြောက်ယောက်ရှိပါတယ်။

2 months Ago
More News
Up