ရန်ကုန်ဒုမြို့တော်ဝန်

A d v e r t i s e m e n t With Us

September 27, 2020

အပေါင်ဆိုင်များပိတ်ရန် တရားဝင်မညွှန်ကြားထားကြောင်း ရန်ကုန်ဒုမြို့တော်ဝန်ပြော

ရန်ကုန်မြို့မှာ အပေါင်ဆိုင်တွေပိတ်ဖို့ ကျန်းမာရေးဝန်ကြီးဌာနကရော ရန်ကုန်စည်ပင်ကရော တရားဝင်ညွှန်ကြား စာထုတ်ပြန်ထားတာ မရှိသေးဘူးလို့ ရန်ကုန်ဒုတိယမြို့တော်ဝန် ဦးစိုးလွင်က ပြောပါတယ်။ ရန်ကုန်မြို့မှာ ကိုဗစ်-၁၉ ကူးစက်မှုမြင့်တက်လာပြီးနောက်ပိုင်း အပေါင်ဆိုင်တွေပိတ်လို့ အခြေခံပြည်သူတွေအတွက် အခက်အခဲရှိလာနေပါတယ်။ အလုပ်တွေ ရပ်နားတဲ့အတွက် ရှိတဲ့ပစ္စည်းကိုထုတ်ပေါင်ပြီး စားဝတ်နေရေးဖြေရှင်းဖို့ အပေါင်ဆိုင်တွေက အရေးကြီးတယ်လို့ ဒုမြို့တော်ဝန်က ပြောပါတယ်။ “ဆိုင်တွေပိတ်တာက သူတို့သဘောနဲ့ သူတို့ပိတ်တဲ့ဆိုင်တွေရှိတယ်။ တချို့မြို့နယ်တွေကလည်း မြို့နယ်ကိုဗစ်ကော်မတီက ပိတ်ခိုင်းတာတွေလည်း ရှိတယ်လို့ သတင်းကြားတယ်။ အပေါင်ဆိုင်တွေကို ပိတ်ခိုင်းတာလည်း ညွှန်ကြားချက်က မထွက်သေးဘူး။ လူတွေလည်း အလုပ်တွေမရှိကြတဲ့အခါ ရှိတဲ့တန်ဆာလေးထုတ်ပြီး ခဏ အပေါင်ဆိုင်မှာ ထားကြရတဲ့သဘောရှိမယ်။ ဒီကိစ္စတွေလည်း ကျနော်တို့ ပိတ်ဖို့ မညွှန်ကြားသေးဘူး။ ကျနော်တို့က ပိတ်ဖို့မပြောသေးပါဘူး။”  အခြေခံပြည်သူတွေကြားထဲမှာတော့ စားဝတ်နေရေးအတွက် ပိုက်ဆံလှည့်ဖို့ ခက်ခဲတာတွေရှိသလို ပစ္စည်းပေါင်ပြီး အချိန်တိုအတွင်းပြန်မရွေးနိုင်ပါက အပေါင်ဆုံးမယ့် အခြေအနေလည်း ဖြစ်နေပါတယ်။ လှိုင်သာယာအနောက်ပိုင်းမြို့နယ် အုပ်ချုပ်ရေးမှူး ဦးနေမင်းထွန်းက “အပေါင်ဆိုင်တွေပိတ်လို့ အခက်အခဲဖြစ်တယ်ဆိုတာမျိုးတော့ ကျနော်တို့ဆီ သတင်းမတက်လာသေးဘူး။ အခုတော့ ကျန်းမာရေးဝန်ကြီးဌာနရဲ့ ညွှန်ကြားချက်တွေနဲ့အညီ ခွင့်ပြုတဲ့ဆိုင်တွေပဲ ဖွင့်ခိုင်းတာပေါ့လေ။ ဆိုင်တွေကိစ္စက စည်ပင်သာယာက လုပ်တာဗျ။ သူတို့ကိုမေး ကြည့်မှရမှာ” လို့ပြောပါတယ်။ အပေါင်ဆိုင်တွေဘက်ကတော့ ကိုဗစ်ကာလမှာ ဆိုင်စည်းကမ်းတွေအတိုင်း အတိအကျလုပ်တာမျိုး မဟုတ်ဘဲ အခြေခံပြည်သူတွေအတွက် ဖြေလျှော့တာတွေ လုပ်ပေးသင့်တယ်လို့ ရန်ကုန်ဒုမြို့တော်ဝန် ဦးစိုးလွင်က ပြောပါတယ်။ “တချို့ကလည်း ရောဂါဖြစ်လို့ပိတ်တာရှိတယ်။ တချို့ကလည်း ကြောက်ပြီးပိတ်တာရှိတယ်။ ဖွင့်ပါဆိုပြီး ကျနော်တို့ကလည်း သွားပြီးညွှန်ကြားလို့မရဘူးလေ။ ခက်တော့ခက်နေတယ်။ နည်းနည်းတော့ရှုပ်နေတယ်။ အပေါင်ဆိုင်တွေက တစ်ဖက်တစ်လမ်းကနေ ပြည်သူတွေအတွက် ငဲ့ညှာဖို့ တော့ကောင်းတာပေါ့။ လေးလပြည့်လို့မှ လာမရွေးနိုင်ရင် ဆုံးပြီ ဒါမျိုးတော့မလုပ်သင့်ဘူးလေ။ ဒါက သူတို့အပေါ်မှာ မူတည်တာ။ ကျနော်တို့က ဥပဒေနဲ့သွားညွှန်ကြားလို့တော့မရဘူး။ အခက်အခဲတွေကတော့ အမျိုးမျိုးပါပဲ။” ရန်ကုန်တိုင်းမှာ ကိုဗစ်-၁၉ ရောဂါကူးစက်မှုမြင့်တက်လာပြီးနောက် စားသောက်ကုန်နဲ့ ဆေးဝါး အရောင်းဆိုင်တွေကိုပဲ တရားဝင်ဖွင့်လှစ်ခွင့်ပြုထားတာပါ။ စက်တင်ဘာ ဒုတိယအပတ်လောက်က စပြီး ရန်ကုန်မြို့တွင်းက ဆိုင်အတော်များများကတော့ ကျန်းမာရေးအရ ပိတ်သိမ်းကုန်ကြပါတယ်။
4 months Ago

May 22, 2020

ကျူးကျော်နေအိမ်များကြောင့် ရေကြီးရေလျှံမဖြစ်ရေးလုပ်ရန် ခက်ခဲနေဟု ရန်ကုန်ဒုမြို့တော်ဝန် ပြော

ရန်ကုန်မြို့တွင်း ၆ မြို့နယ်ကလွဲပြီး ကျန်မြို့နယ်တွေက ရေမြောင်းတွေမှာ ကျူးကျော်နေအိမ်တွေ ဆောက်ထားတာ ရှိနေတာကြောင့် ရေကြီးရေလျှံမှုမဖြစ်အောင်လုပ်ဖို့ ခက်ခဲနေတယ်လို့ ရန်ကုန်မြို့တော် ဒုတိယမြို့တော်ဝန်က ပြောပါတယ်။ ရန်ကုန်မြို့မှာ နှစ်စဉ်ရေကြီးရေလျှံမှုမဖြစ်ဖို့ ရေမြောင်တွေပြုပြင်တာ၊ နောက်ဖေးလမ်းကြားတွေ ရှင်လင်းတာ၊ ရေနှုတ်မြောင်းတွေ ရှင်းလင်းတာ လုပ်ဆောင်နေပေမယ့် ရေကြီးရေလျှံမှုက ဆက်လက်ဖြစ်ပေါ်နေတာပါ။ ရန်ကုန်မြို့တော်စည်ပင်သာယာရေးကော်မတီအနေနဲ့ ရေကြီးရေလျှံမှုမဖြစ်အောင် လုပ်ဆောင်နေပေမယ့် ရန်ကုန်မြို့တွင်း ၆ မြို့နယ်ကလွဲလို့ ရေမြောင်းနေရာတွေမှာ နေအိမ်တွေ ကျူးကျော်တည်ဆောက်ထားတာကြောင့် အောင်မြင်ဖို့မလွယ်ဘူးလို့ ရန်ကုန်မြို့တော်စည်ပင်သာယာရေးကော်မတီက  ပြောပါတယ်။   ရန်ကုန်စည်ပင်အနေနဲ့ ရေကြီးရေလျှံမှုမဖြစ်ဖို့ မိုးမကျခင်ကတည်းက ရှိတဲ့ယန္တရားတွေနဲ့ ပျက်စီးနေတဲ့ ရေမြောင်းတွေ ပြန်လည်ပြုပြင်ပေးနေပြီး ခေတ်အဆက်ဆက် ရေမြောင်းဘေးတွေမှာ နေအိမ်ဆောက်ထားတာကြောင့် လုပ်ရတာ အခက်အခဲဖြစ်နေတယ်လို့ ဒုမြို့တော်ဝန်ဦးစိုးလွင်က ပြောပါတယ်။ ရန်ကုန်မြို့မှာ ရေစီးရေလာကောင်းမွန်ဖို့အတွက် လမ်းမကြီးတွေကို ဖြတ်ဖောက်ပြီး အုပ်စီရေမြောင်းတွေဖောက်ဖို့၊ အဓိကကျတဲ့ ရေမြောင်းတွေတူးဖို့နဲ့ အုပ်စီရေမြောင်းတွေလုပ်ဖို့ အစီအစဉ်တွေ ရှိတယ်လို့ ဆိုပါတယ်။ တောင်ဒဂုံမြို့နယ်မှာတော့ ရေမြောင်းဖောက်မှု စနစ်တကျမလုပ်ခဲ့တာကြောင့် နှစ်စဉ်မြေသားမြောင်းတွေ ပြန်လည်တူးဖော်နေရတဲ့အပေါ်  အုပ်စီရေမြောင်းတွေ လုပ်ပေးဖို့လိုတယ်လို့ တောင်ဒဂုံမြို့နယ် တိုင်းဒေသကြီးလွှတ်တော်ကိုယ်စားလှယ်  ဦးသိန်းနိုင်က ပြောပါတယ်။ ရန်ကုန်မြို့မှာ ရေစီးရေလာမဖြစ်အောင်လုပ်ဖို့ ကျူးကျော်နေအိမ်တွေအပြင်  စက်ယန္တရားလည်း အဓိကလိုအပ်နေပြီး အစိုးရက ဘတ်ဂျက်ချပေးမှ အဆင်ပြေမယ်လို့လည်း ဒုမြို့တော်ဝန် ဦးစိုးလွင်က ပြောပါတယ်။ ရန်ကုန်မြို့မှာ ရေစီးရေလာကောင်းဖို့၊ ရေမြောင်းပြုပြင်ဖို့အတွက် အရင်နှစ်ကချထားပေးတဲ့ ဘတ်ဂျက်နဲ့ဆောင်ရွက်နေတာဖြစ်သလို အခုနှစ်အတွက် လျာထားဘတ်ဂျက်ကိုတော့ ဇွန်လထဲ ကျင်းပမယ့် ရန်ကုန်တိုင်းလွှတ်တော်မှာ အတည်ပြုဖို့ ရှိတယ်လို့ လွှတ်တော်ကိုယ်စားလှယ်တွေက ပြောပါတယ်။
8 months Ago
Up