ရန်ကုန်တိုင်းအစိုးရအဖွဲ့

February 20, 2021

ရန်ကုန်တိုင်းအစိုးရအဖွဲ့ ဝန်ကြီး ၂ ဦး ထိန်းသိမ်းခံရမှု ရဲတပ်ဖွဲ့က အမှုမဖွင့်ပေး

ရန်ကုန်တိုင်းအစိုးရအဖွဲ့ လူမှုရေးဝန်ကြီး ဦးနိုင်ငံလင်းနဲ့ အလုပ်သမားဝန်ကြီး ဒေါ်မိုးမိုးစုကြည်တို့ ထိန်းသိမ်းခံရမှုနဲ့ပတ်သက်လို့ မိသားစုဝင်တွေ သွားရောက်တိုင်ကြားပေမဲ့ ရဲစခန်းက အမှုမဖွင့်ပေးခဲ့ဘူးလို့ သိရပါတယ်။ 

လူမှုရေးဝန်ကြီး ဦးနိုင်ငံလင်းနဲ့ အလုပ်သမားဝန်ကြီး ဒေါ်မိုးမိုးစုကြည်တို့ဟာ စစ်အာဏာ သိမ်းတဲ့ ဖေဖော်ဝါရီ ၁ ရက်ကတည်းက ထိန်းသိမ်းခံခဲ့ရတာပါ။ 

ဖေဖော်ဝါရီ ၁၉ ရက်အထိ သူတို့ကို မိသားစုဝင်တွေက ဆက်သွယ်လို့ မရခဲ့တဲ့အတွက် ပြစ်မှုဆိုင်ရာကျင့်ထုံးဥပဒေ ပုဒ်မ ၁၅၄၊ ရဲလက်စွဲ အပိုဒ် ၁၄၁၄ တို့နဲ့အညီ မိသားစုဝင်တွေက ကမာရွတ်ရဲစခန်းမှာ သွားရောက် သတင်းပေးအမှုဖွင့် တိုင်ကြားခဲ့ပေမဲ့ ရဲစခန်းက အမှုမဖွင့်ပေးခဲ့ ဘူးလို့ ဦးနိုင်ငံလင်းတို့ဘက်က လိုက်ပါဆောင်ရွက်ပေးတဲ့ ရှေ့နေ ဦးအောင်ကောင်းမြတ်က ပြောပါတယ်။

တစုံတဦး အဖမ်းခံရတာဖြစ်စေ၊ ပျောက်ဆုံးနေတာဖြစ်စေ မိသားစုဝင်တွေနဲ့ ရှေ့နေတွေက သတင်းပေးတိုင်ကြားရင် ရဲစခန်းက အမှုဖွင့် လက်ခံဆောင်ရွက်ပေးရမှာပါ။ တကယ်လို့ အမှုမဖွင့်ပေးဘူးဆိုရင်လည်း တရားဝင် ရုံးစာထုတ်ပြီး အကြောင်းပြန်ရမှာ ဖြစ်ပါတယ်။

တရားဝင်ရုံးစာထုတ်ပြီး ရဲစခန်းက ပြန်ကြားမှ ရှေ့နေတွေက ဥပဒေနဲ့အညီ စာချွန်တော်တက်နိုင်မယ်လို့ ဆိုပါတယ်။

ကမာရွတ်ရဲစခန်းက အမှုမဖွင့်ပေးတဲ့အပြင် အချိန် ၂ နာရီကျော်ကြာ ရဲစခန်းရှေ့ စောင့်ခဲ့နေခဲ့ပေမဲ့ ရဲစခန်းထဲကိုတောင် တရားလိုတွေ ဝင်ခွင့်မရခဲ့ပါဘူး။ 

ဝန်ကြီး ဦးနိုင်ငံလင်းနဲ့ ဝန်ကြီး ဒေါ်မိုးမိုးစုကြည်တို့ရဲ့ မိသားစုဝင်တွေကတော့ ကျန်းမာရေး ကောင်းမွန်ကြောင်း သတင်းလောက်တောင် မသိရတဲ့အတွက် စိုးရိမ်ပြီး သတင်းပေး တိုင်ကြား တာလို့ ဆိုပါတယ်။ 

ဇေယျာချမ်းအေး

2 months Ago

May 30, 2020

ဗိုလ်တထောင်စေတီကိစ္စ ရန်ကုန်တိုင်းအစိုးရအဖွဲ့ကို ဖြေရှင်းချက်တောင်းထားဟု ဦးဇော်ဌေးပြော

ဗိုလ်တထောင်စေတီမှာ လူစုလူဝေးနဲ့ ဘာသာရေးပွဲပြုလုပ်တယ်ဆိုတဲ့ ပြောဆိုနေကြတဲ့ ကိစ္စနဲ့ ပတ်သက်ပြီး ရန်ကုန်တိုင်းဒေသကြီး အစိုးရအဖွဲ့ကို  ဖြေရှင်းချက် တောင်းခံထားတယ်လို့ သမ္မတရုံး ပြောရေးဆိုခွင့်ရှိသူ  ဦးဇော်ဌေးက ပြောပါတယ်။ ရန်ကုန်တိုင်း၊ ဗိုလ်တထောင်ဆိပ်ကမ်းမှာ မေ ၂၄ ရက်က ရှင်ဥပဂုတ္တဖောင်တော်ရေချပူဇော်မင်္ဂလာနဲ့ မြနန်းနွယ်ကျောင်းဆောင် ရွှေ့ပြောင်းတဲ့ လုပ်ဆောင်ချက်တွေဟာ လူစုလူဝေးနဲ့ဆောင်ရွက်တယ်ဆိုပြီး လူတွေက ဝေဖန်ပြောဆိုနေကြတာပါ။  ဒါနဲ့ပတ်သက်ပြီး ဒီနေ့ သတင်းထောက်တွေနဲ့ ပြုလုပ်တဲ့ အွန်လိုင်းသတင်းစာရှင်းလင်းပွဲမှာ  ဦးဇော်ဌေးက အခုလို ပြောဆိုသွားတာပါ။ “ဗိုလ်တထောင်ဆိပ်ကမ်းမှာ ရှင်ဥပဂုတ္တဖောင်တော်ရေချပူဇော်မင်္ဂလာနဲ့ ဗိုလ်တထောင်ဘုရား ဘက်စုံမွမ်းမံဖို့၊ မြနန်းနွယ်ကျောင်းဆောင် ပြုပြင်မွမ်းမံရာမှာ လူစုလူဝေး ဖြစ်ခဲ့တယ်ဆိုတဲ့ အခြေအနေတွေ မီဒီယာမှာ ဖော်ပြလာတယ်။ ဒီကိစ္စနဲ့ပတ်သက်ပြီး ရန်ကုန်တိုင်းဒေသကြီး အစိုးရကနေ ဆောလျင်စွာ ဖြေရှင်းတင်ပြဖို့ ကျနော်တို့ အကြောင်းကြားထားတယ်။ ရန်ကုန်တိုင်းဒေသကြီးအစိုးရအနေနဲ့ ဒီကိစ္စနဲ့ပတ်သက်လို့ ဖြေရှင်းတင်ပြဖို့ ရှိပါတယ်။ ဖြေရှင်းတင်ပြချက်အပေါ်မူတည်ပြီး လူကြီးတွေက စီမံဆောင်ရွက်မှာ ဖြစ်ပါတယ်။" ဒါနဲ့ပက်သက်ပြီး လူ ၂ ဦးကလည်း တရားစွဲဖို့ ဆောင်ရွက်ခဲ့တာတွေလည်း ရှိပါတယ်။  အဲဒီလို ဝေဖန်မှုတွေအပေါ် ဝန်ကြီးချုပ် ဦးဖြိုးမင်းသိန်းက ဗိုလ်တထောင်စေတီမှာ ဆောင်ရွက်ခဲ့တာတွေဟာ ဆောင်လုပ်ရေးလုပ်ငန်းခွင် ပြန်လည်လည်ပတ်ဖို့ ဆောင်ရွက်တာဖြစ်ပြီး ပွဲလမ်းသဘင် မဟုတ်ဘူးလို့ မေ ၂၆ ရက် က ဒီဗွီဘီကို ဖြေကြားခဲ့ပါတယ်။  နိုင်ငံပိုင်သတင်းစာမှာတော့ ရှင်ဥပဂုတ္တမထေမြတ် ဖောင်တော် ရေချပူဇော်ပွဲကို ဝန်ကြီးချုပ်နဲ့ ဝန်ကြီးတွေ တက်ရောက်တယ်လို့ ရေးသားဖော်ပြပါတယ်။
11 months Ago
Up