ရန်ကုန်တိုင်းဝန်ကြီးချုပ်

October 26, 2022

လှိုင်သာယာတွင် စစ်တပ်က ယာဥ်မောင်းတဦးအား ရိုက်နှက်ဖမ်းဆီးပြီး ကားကိုသိမ်းဆည်း

လှိုင်သာယာမြို့နယ် ရန်ကုန်-ညောင်တုန်း လမ်းမပေါ်မှာ အိမ်စီးကားတစီးရဲ့ ယာဥ်မောင်းဖြစ်သူကို စစ်ကောင်စီတပ်က ရိုက်နှက်ဖမ်းဆီးပြီး ကားပါသိမ်းသွားတယ်လို့ မြို့ခံတွေက ပြောပါတယ်။

ရန်ကုန်-ညောင်တုန်း လမ်းဘေးက ဗဟိုလမ်းထဲမှာ ဒီကနေ့ညနေလေးနာရီလောက် ပရိုဘောက်အဖြူရောင်ကားကို စစ်ကောင်စီတပ်နဲ့ရဲတွေက စစ်ဆေးပြီး ရိုက်နှက်ဖမ်းဆီးခဲ့တာလို့ မြို့ခံတဦးက ဒီဗွီဘီကို ပြောပါတယ်။

"စစ်တပ်နဲ့ ရဲတွေက ကားတွေကို အမြဲပိုက်ဆံတောင်းနေကြတာ၊ မရရင် ဆဲတာဆိုတာတွေရှိတယ်။ တခါတလေ ကိုယ်ထိလက်ရောက်ရိုက်တာတွေရှိတယ်။" 

စစ်ကောင်စီတပ်နဲ့ရဲတွေဟာ ယာဥ်မောင်းအမျိုးသားအား လက်ကိုပခုံးပေါ်တင် ထိုင်ခိုင်းထားပြီး ရိုက်နှက်ထိုးကြိတ်ကာ လက်ထိတ်ခတ် ဖမ်းဆီးသွားတာလို့ ကယ်ရီသမားတဦးက ဒီဗွီဘီကို ပြောပါတယ်။

"ကာထဲက ပစွည်းတွေရောသိမ်းသွားတယ်၊ ကားကိုလည်း ယူသွားတယ်၊ ဘယ်ကလာတာလဲတော့ မသိဘူး။" 

စစ်ကောင်စီတပ်နဲ့ရဲတွေဟာ ယာဥ်မောင်းဖြစ်သူအား ဘာကြောင့်ရိုက်နှက်ဖမ်းဆီးသွားတယ်ဆိုတာ ဒီဗွီဘီအနေနဲ့ သီးခြားအတည်ပြုချက်မရသေးပါဘူး။

ဖမ်းဆီးခံရတဲ့ ယာဥ်မောင်းနဲ့ ပရိုဘောက်ကားကို လှိုင်သာယာမြို့မရဲစခန်းထဲမှာ လက်တလော သိမ်းဆည်းထားတယ်လို့ အုပ်ချုပ်ရေးနဲ့နီးစပ်သူတဦးက ဒီဗွီဘီကို ပြောပါတယ်။

ရန်ကုန်တိုင်း မြို့နယ်အချို့က အဝေးပြေးကားလမ်းမကြီးတွေနဲ့ မြို့အဝင်ဂိတ်တွေမှာ စစ်ကောင်စီတပ်နဲ့ ရဲတွေက ယာဥ်မောင်းနဲ့ခရီးသည်တွေဆီက အကြောင်းအမျိုးမျိုးပြ ငွေကြေးတောင်းခံနေတာကြာပြီလို့ ယာဥ်မောင်းတွေက ပြောပါတယ်။

1 month Ago

March 7, 2022

ရန်ကုန်တိုင်း၀န်ကြီးချုပ် လာဘ်ပေးမှုတွင် ပြန်ခေါ်သက်သေများကို အပြန်အလှန် စစ်မေး

နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်အပေါ် စစ်ကောင်စီက စွဲဆိုထားတဲ့ အဂတိလိုက်စားမှုတွေနဲ့ ပတ်သက်ပြီး မတ်လ ၇ ရက်က နေပြည်တော်တရားရုံးမှာ  ရုံးထုတ်ခဲ့တယ်လို့ တရားရုံးနဲ့ နီးစပ်တဲ့အသိုင်းအဝိုင်းကနေ သိရပါတယ်။

ရန်ကုန်တိုင်း၀န်ကြီးချုပ် ဦးဖြိုးမင်းသိန်းက အမေရိကန်ဒေါ်လာ ၆ သိန်း၊ ရွှေ ၇ ပိဿာပေးတာကို နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က သုံးကြိမ် ခွဲလက်ခံတယ်လို့ စွပ်စွဲပြီး တရားစွဲဆိုထားတဲ့ အမှုနဲ့ပတ်သက်ပြီး ပြန်ခေါ်သက်သေတွေကို ဒီနေ့ရုံးချိန်းမှာ အပြန်အလှန် စစ်မေးခဲ့တယ်လို့ တရားရုံးနဲ့နီးစပ်သူတစ်ဦးက ပြောပါတယ်။

ဒီအမှုနဲ့ပတ်သက်ပြီး ပြီးခဲ့တဲ့အပတ်ရုံးချိန်းက တရားလိုသက်သေတွေကို ပြန်ခေါ်သက်သေအနေနဲ့ စစ်ဖို့ စွပ်စွဲခံရသူတွေဘက်က တောင်းဆိုခဲ့တာဖြစ်ပြီး ပြန်ခေါ်သက်သေတွေအဖြစ် ရန်ကုန်တိုင်း ၀န်ကြီးချုပ် ဦးဖြိုးမင်းသိန်းနဲ့ ဇနီး ဒေါ်ခင်မိမိကြွယ်၊ ဦးရဲထက်၊ ဦးမောင်မောင်ကြည်တို့ လေးဦး ဒီနေ့ တရားရုံးကို လာရောက်ခဲ့ပြီး အပြန်အလှန် စစ်မေးခဲ့ကြတယ်လို့ သိရပါတယ်။

ဦးဖြိုးမင်းသိန်းက နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ရွှေနဲ့ ဒေါ်လာတွေ ပေးခဲ့ရတယ်ဆိုတာနဲ့ပတ်သက်ပြီး နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က မဟုတ်တန်းတရားတွေလို့ ပြောဆိုခဲ့ဖူးသလို ပြီးခဲ့တဲ့အပတ်ရုံးချိန်းမှာလည်း ဒီကိစ္စနဲ့ပတ်သက်ပြီး အပြစ်မရှိဘူးလို့ တရားရုံးမှာ ထွက်ဆိုထားပါတယ်။ 

ဒီအမှုမှာ ရွှေနဲ့ဒေါ်လာတွေ လာဘ်ပေးခဲ့တယ်ဆိုတဲ့  ရန်ကုန်တိုင်း၀န်ကြီးချုပ်  ဦးဖြိုးမင်းသိန်းဟာ တရားစွဲမခံရပဲ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကိုသာ စစ်ကောင်စီက တရားစွဲခဲ့တာဖြစ်ပါတယ်။လာဘ်ယူခဲ့တယ်ဆိုတဲ့  ရွှေနဲ့ဒေါ်လာတွေအပါအဝင် သက်သေခံပစ္စည်းဘာတခုမှ မပြနိုင်ဘဲ စစ်ကောင်စီက နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို တရားစွဲထားတာလည်း ဖြစ်ပါတယ်။

9 months Ago
More News
Up