ရန်ကုန်တိရစ္ဆာန်ဥယျာဉ်

January 29, 2023

ရန်ကုန်တိရစ္ဆာန်ဥယျာဉ် ၁၁၇ ပြည့်နှစ်ပတ်လည်နေ့တွင် လာရောက်ကြည့်ရှုသူ နည်းပါး

ရန်ကုန်တိရစ္ဆာန်ဥယျာဉ်ရဲ့ ၁၁၇ နှစ်မြောက် နှစ်ပတ်နေ့မှာ  ရန်ကုန်မြို့ခံမိသားစုတွေ တိရစ္ဆာန်ဥယျာဉ်ကိုသွားရောက် လည်ပတ်ကြပေမယ့် အရင်တုန်းကလောက် လူစည်ကားခြင်းမရှိဘူးလို့ သွားရောက်ခဲ့သူတွေထံက သိရပါတယ်။

၂၀၂၀ ပြည့်နှစ်က ကိုဗစ်-၁၉ ရောဂါကြောင့် နှစ်ပတ်လည်အခမ်းအနားပြုလုပ်တာတွေကို ရပ်နားထားခဲ့ပြီးဒီနှစ်မှာ ၁၁၇ နှစ်ပြည့်ခဲ့တဲ့ ရန်ကုန်တိရစ္ဆာန်ဥယျာဉ်ရဲ့နှစ်ပတ်လည်အခမ်းအနားကို ဇန်နဝါရီ ၂၇ ရက် ကနေ ၂၉ ရက်အထိ စစ်ကောင်စီက စီစဉ်ကျင်းပနေတာဖြစ်ပါတယ်။

အဲ့ဒီလိုကျင်းပရာမှာ ထူးထူးခြားခြားအခမ်းအနား ကျင်းပတာမျိုးမရှိခဲ့ဘဲ မုန့်ဈေးတန်းအနည်းငယ်၊ ပြခန်းအနည်းငယ်လောက်ပဲရှိပြီး အများပြည်သူရုံးပိတ်ရက်ဖြစ်တာတောင် လာရောက်လည်ပတ်သူ အနည်းငယ်လောက်ပဲရှိခဲ့တယ်လို့ သွားရောက်ခဲ့သူတဦးက ပြောပါတယ်။

ရုံးပိတ်ရက်မဟုတ်တဲ့ သာမာန်ရက်တွေမှာတောင် လာရောက်လည်ပတ်သူက ၁၀၀၀ ဝန်းကျင်လောက်ရှိပြီး အခုကျင်းပတဲ့နှစ်ပတ်လည်အခမ်းအနားမှာတော့ လာရောက်လည်ပတ်သူက တရက်ကို ၅၀၀၀ လောက်ရှိတယ်လို့ တိရစ္ဆာန်ဥယျာဉ်တာဝန်ရှိသူတွေကတော့ ပြောဆိုထားပါတယ်။

ရန်ကုန်တိရစ္ဆာန်ဥယျာဉ်ဟာ အရှေ့တောင်အာရှမှာ သက်တမ်းအရင့်ဆုံးဥယျာဉ်တခုဖြစ်ပေမဲ့ အရင်နအဖ စစ်အစိုးရလက်ထက်မှာ နေပြည်တော်ကို တည်ဆောက်ပြီးတဲ့နောက် တိရစ္ဆာန်အများစုကိုလည်း နေပြည်တော်ရှိဥယျာဉ်ဆီကို ရွှေ့ပြောင်းခဲ့ပါတယ်။

ဒါ့အပြင် အခုစစ်အာဏာသိမ်းပြီးတဲ့နောက်ပိုင်း ရန်ကုန်တိရစ္ဆာန်ဥယျာဉ်မှာရှိတဲ့ တိရစ္ဆာန်တွေကို ထိန်းသိမ်းစောင့်ရှောက်တာတွေမရှိတဲ့အတွက်  တိရစ္ဆာန်တချို့ အနာရောဂါဖြစ်ပွားနေပါတယ်။

1 week Ago

October 22, 2021

ဆင်မကြီးမိုမို အသက် ၆၈ နှစ်ပြည့်မွေးနေ့ ရန်ကုန်တိရစ္ဆာန်ဥယျာဉ်တွင် ကျင်းပ

ကလေးတို့အချစ်တော် ဆင်မကြီးမိုမိုဟာ အခုနှစ်မှာတော့ အသက် ၆၈ နှစ်ပြည့်ခဲ့ပြီဖြစ်ပြီး သူ့ရဲ့မွေးနေ့ကို နှစ်စဉ်ကျင်းပမြဲ ထုံးစံအတိုင်း ရန်ကုန်တိရစ္ဆာန်ဥယျာဉ်မှာ ကျင်းပနေပါတယ်။

အခုနှစ်မှာတော့ ကိုဗစ်-၁၉ ကပ်ဘေးကြောင့် တိရစ္ဆာန်ဥယျာဉ်ကို ကာလရှည်ကြာ ပိတ် ထားရတဲ့အပြင် စစ်အာဏာသိမ်းမှုတွေကြားက ကျင်းပရတဲ့ မွေးနေ့ ဖြစ်လာခဲ့တာပါ။

လွိုင်ကော်ဒေသတောနက်ကြီးထဲ ဆင်မိသားစုနဲ့ ကွဲကွာနေတဲ့ အသက် ၇ နှစ်အရွယ် ဆင်မလေးတစ်ကောင်ကို သစ်ခုတ်သမား ဦးခွန်ဆန္ဒမှ တွေ့ရှိခဲ့ပြီး ဖမ်းယူခဲ့ပါတယ်။ သူ့ကို အစပိုင်းတုန်းက သစ်ထုတ်လုပ်ရေးလုပ်ငန်းတွေမှာ လုပ်ဆောင်ဖို့ သင်ကြားပေးခဲ့ပေမယ့် ပိုင်ရှင်ဖြစ်သူက ၁၉၆၁ ခုနှစ် ဇွန် ၆ ရက်မှာတော့ ရန်ကုန်တိရစ္ဆာန်ဥယျာဉ်ကို ပို့ ဆောင်လှူဒါန်းခဲ့ပြီးနောက်ပိုင်းမှာတော့ ဆင်မလေးနာမည်ကို မိုမိုလို့ လူသိများလာခဲ့ပါတယ်။

နောက်ပိုင်းမှာတော့ ဆင်မလေးမိုမိုဟာ ရန်ကုန်တိရစ္ဆာန်ဥယျာဉ်အတွင်း ကပြဖျော်ဖြေပွဲတွေ အများကြီးကို အပတ်စဉ် တင်ဆက်ခဲ့သလို မြင်းခင်းသဘင်ပွဲတော်၊ လှေသဘင် ပွဲတော်၊ တရုတ်ပြည်က စွယ်တော်ပင့်ဆောင်တာ စတဲ့ အခမ်းအနားတွေမှာလည်း ပါဝင်ခဲ့ ပါတယ်။

ဆင်မကြီး မိုမိုဟာ တိရစ္ဆာန်ရုံက ဆင်တွေထဲမှာ အသက်အကြီးဆုံးဖြစ်ပြီး လက်ရှိအချိန်မှာ ဖျော်ဖြေမှုတွေကနေ အနားယူထားပါတယ်။

လတ်တလောမှာတော့ ဆင်မကြီးမိုမိုရဲ့ မွေးနေ့သီတင်းပတ် အနေနဲ့ အောက်တိုဘာ ၂၀ ရက်နေ့ကနေ ၂၄ ရက်နေ့အထိ ရန်ကုန်တိရစ္ဆာန်ဥယျာဉ်အတွင်းမှာ ပြုလုပ်သွားမှာဖြစ်ပြီး ဝင်ကြေး လူကြီးတယောက်ကို ကျပ် ၂၀၀၀၊ ကလေးတယောက်ကို ကျပ် ၁၀၀၀ စီ သတ်မှတ် ထားပါတယ်။

1 year Ago
More News
Up