ရတနာပုံတက္ကသိုလ်

March 6, 2021

ရတနာပုံတက္ကသိုလ် ပါမောက္ခချုပ် အိမ်ကို ရဲနှင့် စစ်တပ် ဝင်စီး

မန္တလေးမြို့ ရတနာပုံတက္ကသိုလ်ဝင်းအတွင်းက ပါမောက္ခချုပ် ဒေါက်တာအောင်အောင်မင်းရဲ့ နေအိမ်ကို မတ်လ ၆ ရက်နေ့ မနက် ၁၁ နာရီလောက်မှာ ရဲနဲ့ စစ်တပ်က ဝင်ရောက်စီးနင်းခဲ့တယ်လို့ သိရပါတယ်။

ပါမောက္ခချုပ်ကတော့ တိမ်းရှောင်နေတာဖြစ်ပြီး နေအိမ်ကို သော့ဖျက်ကာ ပစ္စည်းတွေကို ကားခုနစ်စီးနဲ့ တိုက်ယူသွားသလို ဖုန်း၊ လက်ပ်တော့ကွန်ပျူတာနဲ့ ပိုက်ဆံတချို့လည်း ယူသွားတယ်လို့ သိရပါတယ်။

ပါမောက္ခချုပ် ဒေါက်တာအောင်အောင်မင်းကို အာဏာသိမ်းစစ်ကောင်စီက ဖမ်းဝရမ်းထုတ်ထားတယ်လို့လည်း သိရပါတယ်။ 

ဒီကနေ့ မနက်ပိုင်းမှာ စစ်ကားတွေ ရောက်လာခဲ့ပြီး အခုလို လုပ်ဆောင်ခဲ့တာကြောင့် ပါမောက္ခချုပ်ရဲ့ မိသားစုနဲ့ တက္ကသိုလ်ဝန်ထမ်း ဆရာ ဆရာမတွေလည်း ပုန်းရှောင်နေခဲ့ရတယ်လို့ သိရပါတယ်။

ဓာတ်ပုံ- ပညာရေးဝန်ထမ်းတစ်ဦး

2 months Ago

January 19, 2021

ရတနာပုံတက္ကသိုလ် ကျောင်းသားများသမဂ္ဂ ဒု-ဥက္ကဋ္ဌကို ထောင်ဒဏ် ၁ နှစ် ချမှတ်

ရတနာပုံတက္ကသိုလ် ကျောင်းသားများသမဂ္ဂရဲ့ ဒု-ဥက္ကဋ္ဌ ကိုဘုန်းမြင့်ကျော်ကို အမရပူရတရားရုံးက နိုင်ငံတော်အကြည်ညိုပျက်စေမှု ပုဒ်မ ၅၀၅ က၊ ခ နဲ့ ဇန်နဝါရီ ၁၈ ရက်နေ့က ထောင်ဒဏ် ၁ နှစ် ချမှတ်လိုက်ပါတယ်။ ပြီးခဲ့တဲ့နှစ် စက်တင်ဘာလအတွင်းက မန္တ​လေးမြို့ပေါ်မှာ ပြည်တွင်းစစ်ရပ်စဲရေးနဲ့ ငြိမ်းချမ်းရေးရရှိရေးအတွက် စတစ်ကာကမ်ပိန်းမှာ ပါဝင်ခဲ့တာကြောင့် တရားစွဲခံထားရတာပါ။ ကိုဘုန်းမြင့်ကျော်ဟာ အောာင်မြေသာစံမြို့မယ် တရားရုံးမှာလည်း ဒီကိစ္စနဲ့ပတ်သက်လို့ အမှုနှစ်ခု စွဲတင်ခံထားရပြီး ဇန်နဝါရီ ၂၆ ရက်နေ့မှာ ရုံးချိန်းထပ်မံခေါ်ဆိုခံထားရပါတယ်။  အခုလက်ရှိချိန်အထိ ရတနာပုံတက္ကသိုလ်က ဗကသ ကျောင်းသားတွေဖြစ်တဲ့  ကိုကျော်သီဟရဲကျော်ကို ထောင်ဒဏ် ၇ နှစ်နဲ့ ၂ လ၊ ကိုရဲရင့်အောင်ကို ထောင်ဒဏ် ၂ နှစ်နဲ့ ၂ လ၊ ကိုဘချစ်ကို ထောင်ဒဏ် ၁ နှစ်နဲ့ ၁ လ အသီးသီးချမှတ်ထားတာ ဖြစ်ပါတယ်။ သမဂ္ဂအဖွဲ့ဝင်တွေ ဖမ်းဆီးထောင်ချခံနေရတဲ့အပေါ် ရတနာပုံတက္ကသိုလ်ကျောင်းသားများသမဂ္ဂ ဥက္ကဋ္ဌ မအိမွန်ခင်က “လွတ်လပ်ရေးရပြီးကတည်း  ပြည်တွင်းစစ်ရပ်စဲရေးက တပါတည်းပါလာခဲ့တာမို့ ရတနာပုံသမဂ္ဂရဲ့ မူငါးချက်နဲ့အညီ ပြည်တွင်းငြိမ်းချမ်းရေးအတွက် ဆက်လက်တောင်းဆိုသွားမယ်”လို့ ပြောပါတယ်။ တနိုင်ငံလုံး အတိုင်းအတာအနေနဲ့ ဗကသကျောင်းသားတွေကို ပုဒ်မအမျိုးမျိုးနဲ့ ဝရမ်းထုတ် ဖမ်းဆီးထောင်ချ အရေးယူနေတာ စုစုပေါင်း အယောက် ၃၀ ကျော်သွားပြီလို့ သိရပါတယ်။ သတင်း- နွေလှိုင်း(YU)၊ ဓာတ်ပုံ - ဗကသ
3 months Ago
More News
Up