ရတနာပုံတက္ကသိုလ်

August 23, 2022

ရတနာပုံတက္ကသိုလ် CDM ဝန်ထမ်းများနှင့် ဆရာ/ဆရာမများ ဖမ်းဆီးခံရ

မန္တလေးတိုင်း၊ အမရပူရမြို့နယ်မှာရှိတဲ့ ရတနာပုံတက္ကသိုလ်ကျောင်းက CDM ဝန်ထမ်းတွေနဲ့ ဆရာ/ဆရာမတွေကို စစ်ကောင်စီတပ်က  လိုက်လံဖမ်းဆီးနေတယ်လို့ CDM ဆရာမ တဦးက ပြောပါတယ်။

သြဂုတ် ၂၀ ရက်က ရတနာပုံတက္ကသိုလ်က CDM ဆရာ/ဆရာမတွေနဲ့ ရုံးဝန်ထမ်းတွေရဲ့ နေရပ် လိပ်စာတွေကို ကျောင်းကတဆင့် တောင်းယူကာ နေအိမ်တွေမှာဘဲ ဖမ်းဆီးခဲ့တာလို့ အဲဒီဆရာမက ပြောပါတယ်။

CDM တက္ကသိုလ်ဆရာမတဦးက "လောလောဆယ် သိရတာက CDM ဝန်ထမ်း ၇ ဦးလောက် ဖမ်းခံထားရတယ်။ အမရပူရမြို့နယ်မှာ နေတဲ့သူတွေ"လို့  ပြောပါတယ်။

ဖမ်းဆီးခံရသူ  ၇ ယောက်ဟာ ရတနာပုံတက္ကသိုလ်က စာမေးပွဲနဲ့ ဘွဲ့နှင်းသဘင်အပိုင်းမှာ တာဝန်ယူတဲ့ ကွန်ပျူတာ ဆရာဦးမင်းသိန်းအပါအဝင် ဆရာမ ၂ ယောက်နဲ့ ရုံးဝန်ထမ်း ၄ ယောက်လို့ သိရပြီး အိုးဘိုထောင်ဘက်ကို ခေါ်သွားတယ်လို့ ကြားရပေမဲ့ နောက်ဆက်တွဲ အခြေအနေကိုတော့ မသိရသေးဘူးလို့ အဆိုပါဆရာမက ပြောပါတယ်။ 

အခုလို ဖမ်းဆီးမှုတွေကြောင့် CDM ဆရာ/ဆရာမတွေနဲ့ တခြား ဝန်ထမ်းတွေ နေအိမ်မှာ မနေကြ ဘဲ ရှောင်တိမ်းနေကြရပါတယ်။

စစ်အာဏာသိမ်းပြီးနောက်ပိုင်း အခြေခံပညာကျောင်းတွေအပါအဝင် တက္ကသိုလ်ကျောင်းတွေက ဆရာ/ဆရာမ တော်တော်များများ စစ်အာဏာသိမ်းတဲ့အပေါ် မကျေနပ်လို့ CDM ပြုလုပ်ခဲ့တာကြောင့် ပညာရေးကဏ္ဍမှာ အောင်မြင်မှု မရှိသလို ကျောင်းသား၊ကျောင်းသူ အများစုကလည်း ကျောင်းမတက်ကြပဲ ဆန္ဒပြသပိတ်မှောက်နေတာပါ။

လက်တလော စစ်တပ်က တက္ကသိုလ်ကျောင်းတွေ ပြန်လည်အသက်သွင်းဖို့ ထပ်မံ ကြိုးစားလာတာဖြစ်ပြီး  လိုအပ်နေတဲ့ သင်ကြားရေးပိုင်း ပြန်ဖြည့်ဖို့ ရည်ရွယ်ပြီး CDM ဆရာ/ဆရာမ တွေကို ဖမ်းဆီးနေတာဖြစ်ပါတယ်။

4 months Ago

April 2, 2022

တက္ကသိုလ်ဝင်မေးပွဲဖြေဆိုသူများကို သစ္စာဖောက်လောက်ကောင်များဟု ရတနာပုံတက္ကသိုလ် ယာယီကောင်စီထုတ်ပြန်

စစ်ကောင်စီအကြမ်းဖက်အဖွဲ့က စီစဉ်ကျင်းပတဲ့ တက္ကသိုလ်ဝင်စာမေးပွဲကို ဝင်ရောက်ဖြေဆိုနေသူတွေကို သစ္စာဖောက်လောက်ကောင်တွေအဖြစ် သတ်မှတ်လိုက်ပြီး တက္ကသိုလ်ဝင်ခွင့် လက်ခံသွားမှာ မဟုတ်ဘူးလို့ ရတနာပုံတက္ကသိုလ် ယာယီတက္ကသိုလ်ကောင်စီက ဧပြီ ၂ ရက်မှာ ကြေညာချက် ထုတ်ပြန်ထားပါတယ်။

နွေဦးတော်လှန်ရေးမှာ ကျဆုံးခဲ့ကြသူတွေ၊ အကျဉ်းကျနေသူတွေ၊ CDM ဝန်ထမ်းတွေနဲ့ မြေပေါ်မြေအောက် တော်လှန်နေကြသူတွေကို ငဲ့ကွက်ပြီး အကြမ်းဖက်စစ်ကောင်စီက ဖွင့်လှစ်တဲ့ ကျောင်းသင်တန်းတွေ၊ စာမေးပွဲတွေကို သပိတ်မှောက်ကြဖို့ တော်လှန်ရေးအင်အားစုတွေက နှိုးဆော်ထားခဲ့ပြီးဖြစ်ကာ အမျိုးသားညီညွတ်ရေးအစိုးရ (NUG) နဲ့ ချိတ် ဆက်ထားကြတဲ့ ယာယီတက္ကသိုလ်ကောင်စီတွေ၊ ပညာရေးဘုတ်အဖွဲ့တွေကတောင် အတန်းတင်ပညာရေးကို လက်မခံကြောင်း ပြတ်ပြတ်သားသား ရပ်တည်ခဲ့ကြတယ်လို့ ဆိုပါတယ်။

လက်ရှိမှာတော့ တနိုင်ငံလုံးရဲ့ တော်လှန်ရေးဖြစ်ရပ်တွေကို မျက်ကွယ်ပြုပြီး မိမိအကျိုးစီးပွားအတွက် အကြမ်းဖက်စစ်ကောင်စီက ဖွင့်လှစ်တဲ့ အတန်းတွေ တက်ရောက်တာ၊ စစ်ကောင်စီလက်အောက်ခံ တက္ကသိုလ်ဝင်စာမေးပွဲကို ဝင်ရောက်ဖြေဆိုတာတွေကို တွေ့ရှိနေရတာကြောင့် အဲဒီလို တော်လှန်ရေးကို မျက်ကွယ်ပြုပြီး စစ်အုပ်စုထောက်တိုင်တွေအဖြစ် ပါဝင်ကြတဲ့ ဘယ်သူ့ကိုမဆို ရတနာပုံတက္ကသိုလ်က ရှုံ့ချတယ်လို့ ဆိုပါတယ်။

ဒါ့အပြင် ပြီးခဲ့တဲ့ ရက်ကလည်း ဇိုမီးဖက်ဒရယ်အစည်းအရုံးက စစ်ကောင်စီအကြမ်းဖက်အဖွဲ့က စီစဉ်ကျင်းပတဲ့ တက္ကသိုလ်ဝင်စာမေးပွဲကို ဝင်ရောက်ဖြေဆိုသူတွေအနေနဲ့ ရှေ့လာမယ့်အခွင့်အရေးတွေ  ဆုံးရှုံးမှုမရှိစေဖို့ စာမေးပွဲဖြေဆိုတာတွေကို ချက်ချင်း ရပ်နားဖို့  သတိပေးထားတာ တွေ့ရပါတယ်။

ဒီစာမေးပွဲဖြေဆိုခြင်းဟာ ပညာရေးကို ဦးတည်ဆောင်ရွက်တာမဟုတ်ဘဲ စစ်အာဏာရှင်က သူတို့အာဏာတည်ရှိကြောင်း လိမ်လည်ပြသဖို့အတွက်သာ ဖြစ်တာမို့ အမျိုးသားညီညွတ်ရေးအစိုးရ (NUG) က ကြေညာထားတဲ့အတိုင်း ဒီစာမေးပွဲဖြေဆိုမှုကို အသိအမှတ်ပြုမှာမဟုတ်ဘူးလို့ ဆိုပါတယ်။

လက်ရှိ ကျင်းပနေတဲ့ ၁၀ တန်းစာမေးပွဲကာလဟာ မတ် ၃၁ ရက်ကနေ လာမယ့်ဧပြီ ၉ ရက်နေ့အထိဖြစ်ပြီး အခုနှစ် စာမေးပွဲကို လာရောက်ဖြေဆိုတဲ့ ကျောင်းသား ကျောင်းသူ အရေအတွက်ကတော့ အရင်နှစ်တွေနဲ့ယှဉ်ရင် သုံးပုံတပုံလောက်ပဲ ရှိတယ်လို့ သိရပါတယ်။

မြန်မာနိုင်ငံတဝန်း ၃၂ မြို့နယ်ရှိ စာစစ်ဌာန ၁,၂၅၆ ဌာနမှာ တက္ကသိုလ်ဝင်တန်း ကျောင်းတွင်း ဖြေဆိုသူ ၂၀၀,၇၆၈ ယောက်၊ အလွတ်ဖြေ ၁၁၁,၅၃၁ စုစုပေါင်း ၃၁၂,၂၉၉ ယောက် ဖြေဆိုဖို့ စာရင်းသွင်းပေမဲ့ ပြီးခဲ့တဲ့ ၂ ရက်က လာရောက်ဖြေဆိုသူ ၂၈၀,၀၀၀ ကျော်သာရှိပါတယ် ။

8 months Ago
More News
Up