ရခိုင် အကြမ်းဖက်တိုက်ခိုက်မှု

August 26, 2017

ရခိုင် အကြမ်းဖက်တိုက်ခိုက်မှုအပေါ် ပြင်းထန်စွာ ရှုတ်ချကြောင်း အတိုင်ပင်ခံရုံး ထုတ်ပြန်

ရခိုင်ပြည်နယ်မှာ လုံခြုံရေးတပ်ဖွဲ့တွေအပေါ် အကြမ်းဖက်သမားတွေရဲ့ ကြမ်းတမ်းရက်စက်တဲ့ တိုက်ခိုက်မှုလုပ်ရပ်တွေကို ပြင်းထန်စွာ ရှုတ်ချကြောင်း နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က မနေ့ညက ကြေညာချက် ထုတ်ပြန်လိုက်ပါတယ်။ ရခိုင်ပြည်နယ်ဆိုင်ရာ အကြံပေးကော်မရှင်ရဲ့  အပြီးသတ် အစီရင်ခံစာ ထုတ်ပြန်မှုနဲ့ အချိန်ကိုက်ပြီး တိုက်ခိုက်မှုတွေ ဖြစ်လာနိုင်ဖွယ်ရာရှိတာကို အရင်ကတည်းက ကြိုတင်မှန်းဆထားတဲ့အတွက် သက်ဆိုင်ရာ ပြည်ထောင်စုဝန်ကြီးတွေအား ညွှန်ကြားချက်တွေ ပေးထားခဲ့ပါကြောင်း ဖော်ပြထားပါတယ်။ အသက်ပေးလှူသွားတဲ့ ရဲတပ်ဖွဲ့ဝင်တွေ၊ လုံခြုံရေးတပ်ဖွဲ့ဝင်တွေနဲ့ သူတို့ မိသားစုဝင်တွေ၊ မိတ်ဆွေတွေ၊ လုပ်ဖော်ကိုင်ဖက်တွေနဲ့ တသားတည်း ရပ်တည်လျက်ရှိကြောင်း ရေးသားထားပါတယ်။ ဒါ့အပြင် ရခိုင်ပြည်နယ်က အကြမ်းဖက်တိုက်ခိုက်နေမှုကိစ္စရပ်တွေအပေါ် နိုင်ငံတော်အကြီးအကဲတွေကိုယ်တိုင် ကြီးကြပ်ဆောင်ရွက်နေတယ်လို့လည်း နိုင်ငံတော်အတိုင်ပင်ခံရုံးက သတင်းထုတ်ပြန်ထားပါတယ်။ ရခိုင်ပြည်နယ်ထဲမှာ သြဂုတ် ၂၅ ရက်နေ့ မနက် အစောပိုင်းကစပြီး အကြမ်းဖက်သမားတွေရဲ့ တိုက်ခိုက်မှုကြောင့် လုံခြုံရေးတပ်ဖွဲ့ဝင် ၁၁ ဦး၊ လူဝင်မှုကြီးကြပ်ရေးဌာန အရာထမ်း ၁ ဦး အသက်ဆုံးရှုံးခဲ့ရပါတယ်။ အကြမ်းဖက်မှုမှာ ပါဝင်တဲ့ အကြမ်းဖက်သမား ၇၇ ဦးကို အသေဖမ်းဆီးရမိခဲ့ပြီး ၂ ဦးကို အရှင်ဖမ်းမိခဲ့ပါတယ်။
4 years Ago

ရခိုင် အကြမ်းဖက်တိုက်ခိုက်မှုအား ကုလသမဂ္ဂ အပြင်းအထန် ရှုတ်ချ

ဘူးသီးတောင်၊ မောင်တော၊ ရသေ့တောင် ဒေသတွေက လုံခြုံရေးရဲကင်းစခန်းတွေနဲ့ စစ်တပ်အခြေစိုက်စခန်းတခုကို သြဂုတ် ၂၅ ရက် မနက်အစောပိုင်းက အကြမ်းဖက် လက်နက်ကိုင်တွေရဲ့ ပူးပေါင်းတိုက်ခိုက်မှုအပေါ် ကုလသမဂ္ဂက ပြင်းပြင်းထန်ထန်ရှုတ်ချလိုက်ပြီး ဒီအကြမ်းဖက်မှုကို ဘက်ပေါင်းစုံကနေ ထိန်းသိမ်းပေးဖို့ တောင်းဆိုလိုက်ပါတယ်။ အကြမ်းဖက်မှုကနေ ရှောင်ကြဉ်ထိန်းပေးဖို့၊ အရပ်သားပြည်သူတွေကို ကာကွယ်စောင့်ရှောက်ပေးဖို့နဲ့ တရားဥပဒေ စိုးမိုးရေးကို အဖက်ဖက်ကနေ ထိန်းသိမ်းဖို့ အားလုံးကို တိုက်တွန်းကြောင်း  မြန်မာနိုင်ငံဆိုင်ရာ ကုလသမဂ္ဂ ဌာနေညှိနှိုင်းရေးမှူး ရီနာတာ လော့က် ဒက်ဆယ်လီယန်က ကြေညာချက်ထဲမှာ ပြောပါတယ်။ ရခိုင်ပြည်နယ်က လုံခြုံရေးအခြေအနေနဲ့ပတ်သက်ပြီး အလွန်အမင်း စိုးရိမ်ပူပန်တယ်လို့လည်း ပြောထားပါတယ်။ ရခိုင်ပြည်နယ်ဆိုင်ရာ အကြံပေးကော်မရှင်အဖွဲ့ဥက္ကဋ္ဌ ကိုဖီအာနန်ကလည်း ရခိုင်ပြည်နယ်မှာ လတ်တလောဖြစ်ပွားခဲ့တဲ့ တိုက်ခိုက်မှုတွေအပေါ် အထူးစိုးရိမ်မိပြီး ပြင်းထန်စွာ ရှုတ်ချပြီး လုံခြုံရေး အဖွဲ့ဝင်တွေ အသက်ဆုံးရှုံးခဲ့ကြောင်း ကြားသိရတဲ့အတွက် ဝမ်းနည်းကြောင်း ထုတ်ပြန်ထားပါတယ်။
4 years Ago
Up