ရခိုင်ပြည်နယ်လွှတ်တော်

March 25, 2020

တိုက်ပွဲကြောင့်ဒဏ်ရာရအရပ်သားများအား ICRC ကိုကူညီခွင့်ပြုရန်  ရခိုင်လွှတ်တော်အဆိုတင် 

တိုက်ပွဲကြောင့်ဒဏ်ရာရ အရပ်သားတွေကို အပြည်ပြည်ဆိုင်ရာကြက်ခြေနီကော်မတီ (ICRC) နဲ့ လူမှုကယ်ဆယ်ရေးအဖွဲ့တွေက ကျန်းမာရေးစောင့်ရှောက်မှုလုပ်ငန်းတွေ အတားအဆီးမရှိ လုပ်ဆောင်ခွင့်ပေးဖို့ ပြည်နယ်အစိုးရကို တိုက်တွန်းတဲ့အဆိုတရပ် ရခိုင်ပြည်နယ်လွှတ်တော်မှာ တင်သွင်းလိုက်ပါတယ်။  လက်နက်ကိုင်ပဋိပက္ခတွေကြောင့်တိုက်ပွဲနဲ့ ပါဝင်ပတ်သက်ခြင်းမရှိတဲ့ ဒဏ်ရာရအရပ်သား ပြည်သူတွေအတွက် လူသားချင်းစာနာမှုဆိုင်ရာ ကျန်းမာရေးစောင့်ရှောက်မှုလုပ်ငန်းတွေကို အတားအဆီးမရှိ လွတ်လပ်စွာသွားလာလုပ်ဆောင်ခွင့်ပြုဖို့အဆိုတရပ်တင်သွင်းခဲ့တာပါ။ ဒီအဆိုကို မြောက်ဦးမြို့နယ် မဲဆန္ဒနယ်အမှတ် ၁ ပြည်နယ်လွှတ်တော်ကိုယ်စားလှယ် ဦးထွန်းသာစိန်ကမတ် ၂၄ ရက်နေ့ ရခိုင်ပြည်နယ်လွှတ်တော်အစည်းအဝေးမှာတင်သွင်းလိုက်တာပါ။ အဆိုရှင်က အပြည်ပြည်ဆိုင်ရာ ကြက်ခြေနီကော်မတီ (ICRC) ဟာ ဘက်လိုက်မှုကင်းပြီး ခွဲခြားမှုမရှိဘဲလွတ်လပ်တဲ့ လူသားချင်းစာနာထောက်ထားမှုဆိုင်ရာ အဖွဲ့အစည်း တခုဖြစ်ပြီး နိုင်ငံတကာအသိုင်းအဝိုင်းက လုပ်ငန်းတာဝန်ပေးအပ်ထားတဲ့ အဖွဲ့အစည်းတခု ဖြစ်တယ်လို့ဆိုပါတယ်။ ဦးထွန်းသာစိန်တင်သွင်းတဲ့ အဲ့ဒီဆိုကို ဘူးသီးတောင်မဲဆန္ဒနယ် လွှတ်တော်ကိုယ်စားလှယ် ဦးထွန်းအောင်သိန်းထောက်က ထောက်ခံဆွေးနွေးခဲ့ပါတယ်။  ဦးထွန်းသာစိန်တင်သွင်းတဲ့ အဲ့ဒီအဆိုကို လွှတ်တော်ရဲ့သဘောထားကို ရယူရာမှာ သဘောမတူသူ မရှိတဲ့အတွက် အဆိုကို ဆက်လက်ဆွေးနွေးဖို့ လွှတ်တော်ဥက္ကဋ္ဌက ကြေညာပါတယ်။ ရခိုင်ပြည်နယ်နဲ့ ချင်းပြည်နယ်မှာ တပ်မတော်နဲ့ ရက္ခိုင့်တပ်တော်အေအေ တိုက်ပွဲကာလအတွင်း အရပ်သား ၂၃၀ ကျော်သေဆုံးခဲ့မှုကိုမိသားစုတွေနဲ့ ထပ်တူဝမ်းနည်းကြောင်း အဆိုကိုလည်း မတ်လ ၂၄ ရက်က လွှတ်တော်မှာတင်သွင်းခဲ့ပြီး လွှတ်တော်သဘေားထားကိုရယူကာ လွှတ်တော်မှာ မှတ်တမ်းတင်ကြောင်း လွှတ်တော်ဥက္ကဋ္ဌက ကြေညာခဲ့ပါတယ်။  လက်ရှိမှာတော့ ရခိုင်ပြည်နယ်လွှတ်တော်ကို COVID 19 ကြောင့် ခေတ္တရပ်နားထားပြီး ပြန်လည်ကျင်းပမယ့်ရက်ကို ကြေညာမှာဖြစ်ပါတယ်။ 
2 years Ago

March 24, 2020

COVID- 19 ကြောင့် ရခိုင်ပြည်နယ်လွှတ်တော် ရက်အကန့်အသတ်မရှိရပ်နား

ကိုရိုနာဗိုင်းရပ်စ် COVID- 19 ကြောင့် ရခိုင်ပြည်နယ်လွှတ်တော်ကို မတ်လ ၂၄ ရက် ပြန်စတင်ကျင်းပတဲ့နေမှာပဲ  ယာယီရပ်နားလိုက်တယ်လို့ ရခိုင်ပြည်နယ်လွှတ်တော်ဥက္ကဋ္ဌက ဒီကနေ့ လွှတ်တော်အပြီးမှာ ကြေညာလိုက်ပါတယ်။ ဒုတိယအကြိမ်မြောက် ရခိုင်ပြည်နယ် လွှတ်တော်(၁၃) ကြိမ်မြောက်အစည်းအဝေး ပထမနေ့ကို ဒီကနေ့ အစည်းအဝေးကျင်းပပြီးချိန်မှာ ကိုရိုနာဗိုင်းရပ်စ်ရောဂါကြောင့် ယာယီရပ်နားထားမယ်လို့ လွှတ်တော်ဥက္ကဋ္ဌ ဦးစံကျော်လှက ကြေညာလိုက်တာဖြစ်ပါတယ်။ “ကျနော်တို့ မြန်မာနိုင်ငံမှာလည်း ပိုးတွေ့တဲ့လူနာ နှစ်ယောက်တွေ့တယ်ဆိုတာ အားလုံး အသိပဲ ဖြစ်ပါတယ်။ ဒီရောဂါဟာ လူသားအားလုံးအတွက် ကြောက်စရာကောင်းတဲ့ ရောဂါတခုဖြစ်ပါတယ်။ ဆင်းရဲတဲ့ ကျနော်တို့မြန်မာနိုင်ငံအတွက်ပိုပြီး ကြောက်စရာကောင်း ပါတယ်။ အဆင်းရဲဆုံးနဲ့ တိုက်ပွဲတွေဖြစ်ပွားနေတဲ့ကျနော်တို့ ရခိုင်ပြည်နယ်မြောက်ပိုင်းနဲ့ ချင်းပြည်နယ်ပလက်ဝမြို့နယ်တွေမှာဆိုရင် အင်တာနက်လည်းဖြတ်တောက်ခံထားရတဲ့အတွက် ပိုမိုဆိုးဝါးတဲ့ဒေသလည်းဖြစ်ပါတယ်။ အထူးသဖြင့်ဒုက္ခသည်စခန်းတွေကို ရောက်ရှိနေကြတဲ့ ကျနော်တို့ရဲ့ ပြည်သူ ၁၅၀၀၀၀ ကျော်အတွက် အထူးရင်လေးမိပါတယ်။ ဘာပဲဖြစ်ဖြစ်၊ ကျနော်တို့အားလုံးသတိထားရပါမယ်။ အစိုးရနဲ့ လွှတ်တော်လည်းပူးပေါင်းကြဖို့လိုပါတယ်။” ရခိုင်ပြည်နယ်လွှတ်တော်ဥက္ကဋ္ဌ ဦးစံကျော်လှက လွှတ်တော်ပြန်လည် ခေါ်ယူ ကျင်းပမယ့် ရက်၊ အချိန်ကို လွှတ်တော်ကိုယ်စားလှယ်တွေထံ ပြန်အကြောင်းကြားမယ်လို့ပြောဆိုခဲ့ပါတယ်။ ရခိုင်ပြည်နယ် ၁၇ မြို့နယ်တွေမှာ COVID- 19 ကုသရေးအတွက်ကို စဉ်းစဉ်ထားရှိပြီး လိုအပ်တဲ့ပစ္စည်းတွေဖြစ်တဲ့ ကာကွယ်ရေးဝတ်စုံတွေကို ဆောင်ရွက်ထားရှိထားသလို ပြည်သူလူထုတွေကိုလည်း အသိပညာပေးတာတွေ၊ လက်ကမ်းစာစောင်ဖြန့် ဝေတာတွေ လုပ်ဆောင်နေတာတွေရှိတယ်လို့ ရခိုင်ပြည်နယ်အစိုးရအဖွဲ့လူမှုရေးဝန်ကြီးဒေါက်တာချမ်းသာက လွှတ်တော်အပြီးမှာ မီဒီယာတွေကိုပြောပါတယ်။ ရခိုင်ပြည်နယ်အတွင်းမှာတော့ COVID- 19 ရောဂါဖြစ်ပွားသူမတွေ့ရှိသေးပေမယ့် သံသယလူနာ ၇ ဦးကို စစ်ဆေးခဲ့ကာ ပိုးတွေရှိတာ မရှိသေးဘူးလို့ ဒေါက်တာချမ်းသာက ပြောပါတယ်။  မြန်မာနိုင်ငံမှာတော့ မတ်လ ၂၃ ရက် ညပိုင်းမှာ ပထမဆုံး ကိုရိုနာဗိုင်းရပ်စ် COVID-19 အတည်ပြုလူနာ ၂ ဦးကို စတင်တွေ့ရှိခဲ့ပါတယ်။
2 years Ago
Up