ရခိုင်စစ်ဘေးဒုက္ခသည်

August 17, 2022

ရခိုင်စစ်ဘေးဒုက္ခသည် ၅၀၀ ကျော် အကူအညီ လိုအပ်နေ

ရခိုင်ပြည်နယ်၊ မောင်တော-အငူမော်ကားလမ်းရှိ ရသေ့တောင်မြို့နယ်၊ ချိန်ခါလီကျေးရွာအနီးမှာ သြဂုတ် ၁၃ ရက်က ဖြစ်ပွားခဲ့တဲ့ တိုက်ပွဲတွေကြောင့် နေရပ်စွန့်ခွာ ထွက်ပြေးလာကြတဲ့ စစ်ဘေးဒုက္ခသည် ၅၀၀ ကျော် အရေးပေါ် အကူအညီတွေ လိုအပ်နေ​တယ်လို့ စေတီပြင် ပရဟိတအသင်း တာဝန်ရှိသူတယောက်က ပြောပါတယ်။

“မနေ့ ကျနော်တို့ရထားတဲ့ စာရင်းအရဆိုရင် စစ်ဘေးရှောင် လူဦးရေ ၃၀၀ ကျော်ရှိတယ်။ ဒီနေ့ ကယ်ဆယ်ရေး သွားပေးတဲ့ အချိန်မှာတော့ နောက်ထပ်ရောက်လာကြတဲ့ စစ်ဘေးရှောင်တွေ ၁၀၀ ကျော်လောက် ထပ်ရောက်နေကြတာ တွေ့ရတယ်။ တောထဲမှာလည်း ကျန်နေတဲ့ ၁၀၀ ကျော် ရှိတယ်လို့ သိရတယ်။ ဒါဆို လူဦးရေ ၅၀၀ ကျော်သွားမယ်။ စာရင်းတွေတော့ အတိအကျ မပြုစုရသေးဘူး။ ရေရှည်မှာ အခက်အခဲတွေ၊ စားနပ်ရိက္ခာတွေ အခက်အခဲများစွာ ကြုံတွေ့လာနိုင်တယ်။ ဒါတွေအတွက် ရခိုင်လူမှုအဖွဲ့အစည်းတွေအနေနဲ့ စားနပ်ရိက္ခာတွေ ထောက်ပံ့ပေးကြဖို့ အားလုံးကို ကျနော်တို့ တောင်းဆိုလိုပါတယ်။”

ချိန်ခါလီကျေးရွာအနီးမှာ သြဂုတ် ၁၃ ရက်က တိုက်ပွဲတွေ ပြင်းထန်စွာ​ဖြစ်ပွားခဲ့ပြီး စစ်ကူလာတဲ့ စစ်ကောင်စီကားပါ မိုင်းဆွဲ တိုက်ခိုက်ခံခဲ့ရတာကြောင့် စစ်တပ်က ကားလမ်းတွေကို ပိတ်ဆို့ကာ စစ်အင်အား ဖြည့်တင်းပြီး စစ်ဆင်ရေးပြုလုပ်နေပါတယ်။

အဆိုပါစစ်ဆင်ရေးကြောင့် ချိန်ခါလီ၊ ဒုံးပိုက်၊ ကိုးတန်ကောက်၊ အောင်ဗလ၊ ကုန်တန်း စတဲ့​ကျေးရွာတွေက ဒေသခံတွေ မေယုတောင်ကို ကျော်ဖြတ်ပြီး မယူကမ်း အရှေ့ဘက်ကျေးရွာတွေကို ထွက်ပြေးနေကြရတာပါ။

စေတီပြင်ပရဟိတအဖွဲ့အနေနဲ့ လက်ရှိမှာ အလှူရှင်တွေ လှူဒါန်းတဲ့ စားနပ်ရိက္ခာတချို့ကို လှူဒါန်းပေးနေပြီး စစ်ဘေးရှောင်တွေ များလာနေတဲ့အတွက် ရေရှည်မှာ အခက်အခဲတွေ ကြုံတွေ့လာနိုင်တယ်လို့ ဆိုပါတယ်။

“ကျနော်တို့ လက်ရှိ အလှူရှင်တွေ လှူဒါန်းထားတဲ့ အခင်းဖျာတွေ၊ အဝတ်အထည်တွေ၊ စားနပ်ရိက္ခာတွေကို လှူဒါန်းပေးနေတယ်။ ရေရှည်မှာ ဒုက္ခသည်တွေအတွက် အခက်အခဲများစွာ ကြုံလာနိုင်တယ်။”

လက်ရှိ စစ်ဘေးရှောင်ဒုက္ခသည် ၅၀၀ ကျော်ဟာ သံ​ချောင်၊ သရက်​ချောင်း​၊ ​အောင်ဆိပ် စတဲ့ကျေးရွာတွေက ဘုန်းကြီးကျောင်းတွေမှာ ခိုလှုံနေကြရပြီး နေရာမလုံလောက်တာ၊ စားနပ်ရိက္ခာ မလုံလောက်တာကြောင့် စေတီပြင်ကျေးရွာကို ကားတွေနဲ့ ထွက်သွားနေကြကြောင်း ဒေသခံတွေဆီက သိရပါတယ်။

4 months Ago

January 11, 2021

ရခိုင်စစ်ဘေးဒုက္ခသည်များ စားဝတ်နေရေး အခက်အခဲရှိနေ (ဓာတ်ပုံ) 

ရခိုင်ပြည်နယ်က စစ်ဘေးရှောင်စခန်းတွေမှာ ကိုဗစ်ကာလ နိုင်ငံတကာအဖွဲ့အစည်းတွေရဲ့ ထောက်ပံ့မှုတွေ မရသလို အစိုးရရဲ့ထောက်ပံ့မှု အနည်းငယ်သာ ရတဲ့အတွက် စစ်ဘေးရှောင်တွေ နေထိုင်စားသောက်ရေးတွေမှာ အခက်အခဲရှိနေတယ်လို့ ဒေသခံလူမှုကူညီရေးအဖွဲ့က ပြောပါတယ်။  ကမ်းထောင်းကြီးမြို့ စစ်ဘေးရှောင်စခန်းက ဒုက္ခသည်တွေကို ကူညီပေးနေတဲ့  ရက္ခဒါနဖောင်ဒေးရှင်းမှ  ဘဏ္ဍာရေးမှူး ဦးမောင်အေးသာက “စားနပ်ရိက္ခာ အဆင်မပြေဘူး။ သူတို့လူနေမှုစနစ်ကိုလည်း အဆင်ပြေအောင်မထားနိုင်ဘူး။ ပထမရှေ့ပိုင်းမှာဆိုရင် ICRC တို့၊ IOM၊ WFP၊ IRC တို့ ထောက်ပံ့တယ်၊ ဒါပေမဲ့ အခုကိုဗစ်ကာလမှာ လုံးဝထောက်ပံ့မှု မရှိဘူး။ အစိုးရအဖွဲ့အစည်းတွေပေးတာလည်း ကျနော်တို့မှာ လစဉ်တိုင်းမရဘူး။ ” ရခိုင်ပြည်နယ်မှာ လက်ရှိတိုက်ပွဲတွေ ငြိမ်သက်နေပေမဲ့ စစ်ဘေးရှောင်တွေမှာ မိမိနေရပ်ကို မပြန်ရဲသလို စစ်ဘေးရှောင်ဦးရေဟာလည်း  ထပ်တိုးလာနေတာကြောင့် စားသောက် နေထိုင်ရေး တွေမှာ အဆင်မပြေမှုတွေနဲ့ ရင်ဆိုင်နေရလို့ အလှူခံပြီးကူညီပေးနေရတယ်လို့လည်း  ပြောပါတယ်။ လက်ရှိ ကမ်းထောင်းကြီးမြို့က စစ်ဘေးရှောင်စခန်းမှာ  အိမ်ထောင်စု ၄၀၀ ကျော်ရှိလာကာ နေထိုင်ရေးမှာလည်း အခက်အခဲတွေရှိနေပြီး ဆောင်းရာသီဖြစ်တာကြောင့် အနွေးထည်နဲ့စောင်တွေပါ လိုအပ် နေတာကြောင့် အစိုးရအနေနဲ့ရော နိုင်ငံတကာအဖွဲ့ အစည်းတွေပါ အမြန်ဆုံးလာရောက် ကူညီပေးဖို့ စစ်ဘေးရှောင်စခန်း တာဝန်ရှိသူတွေက တိုက်တွန်းပါတယ်။ ရခိုင်ပြည်နယ်ထဲမှာ တပ်မတော်နဲ့ အေအေတို့အကြားဖြစ်ပွားတဲ့ တိုက်ပွဲတွေကြောင့် စစ်ဘေးဒုက္ခသည် သိန်းနဲ့ချီရှိနေတာဖြစ်ပြီး နိုဝင်ဘာ ၈ ရက်နေ့ကကျင်းပခဲ့တဲ့ ၂၀၂၀  ရွေးကောက်ပွဲ အပြီးမှာတိုက်ပွဲတွေရပ်ဆိုင်းနေလို့ ဒုက္ခသည်တချို့ နေရပ်ပြန်သွားခဲ့ကြတာလည်း ရှိပါတယ်။ 
2 years Ago
Up