ရခိုင်

September 29, 2022

ရခိုင်တွင် စစ်တပ်နှင့် အေအေ တိုက်ပွဲဖြစ်ပွား၊ စစ်တပ်က လက်နက်ကြီးဖြင့်ပစ်သဖြင့် ဒေသခံများ ထွက်ပြေးနေရ

ရခိုင်ပြည်နယ်၊ ပုဏ္ဏားကျွန်းနဲ့ ကျောက်တော်မြို့နယ်အစပ်မှာ စစ်ကောင်စီတပ်နဲ့ ရက္ခိုင့်တပ်တော် (အေအေ) တို့ တိုက်ပွဲဖြစ်ပွားခဲ့ပြီး စစ်ကောင်စီဘက်က သေဆုံးဒဏ်ရာရသူ များပြားတယ်လို့ ရက္ခိုင့်တပ်တော်နဲ့ နီးစပ်သူတွေဆီကနေ သိရပါတယ်။

ပုဏ္ဏားကျွန်းနဲ့ ကျောက်တော်မြို့နယ်အစပ်က နနွင်းတောင်မှာ တပ်စွဲထားတဲ့ စစ်ကောင်စီ တပ်ဖွဲ့ဝင်တွေကို ဒီနေ့ စက်တင်ဘာ ၂၉ ရက် မနက်ပိုင်းမှာ ရက္ခိုင့်တပ်တော် (အေအေ) က ရွက်ညိုးတောင်နားမှာ တိုက်ခိုက်ခဲ့လို့ တိုက်ပွဲအပြင်းအထန် ဖြစ်ပွားနေပြီး စစ်ကောင်စီဘက်က သေဆုံးဒဏ်ရာရသူ များပြားတယ်လို့ အေအေနဲ့ နီးစပ်သူတယောက်က ဒီဗွီဘီကို ပြောပါတယ်။

“အဒဲနနွင်းတောင်ဘက်ကနေ စစ်(...)အင်အား ၁၇ ယောက် ရိက္ခာဆင်းယူတဲ့အချိန်မှာ ရက္ခိုင့်တပ်တော် (အေအေ) က ကြားဖြတ်တိုက်ခိုက်ခဲ့တာဖြစ်ပြီး ၁၇ ယောက်လုံးကို အရှင်ဖမ်းမိကာ လက်နက်ခဲယမ်းတွေနဲ့ ရိက္ခာတွေ သိမ်းဆည်းနိုင်ခဲ့တယ်။”

တိုက်ပွဲဖြစ်တဲ့နေရာကို ကျောက်တော်အခြေစိုက် ခမရ ၅၃၉ တပ်ရင်းကနေ လက်နက်ကြီးတွေနဲ့ ပစ်ကူပေးနေတယ်လို့ ဆိုပါတယ်။

ဒါ့အပြင် အဲဒီ နနွင်းတောင်တပ်စခန်းကုန်းကို ရက္ခိုင့်တပ်တော် (အေအေ) က သိမ်းပိုက်လိုက်ပြီလို့ သတင်းတွေ ကြားရပေမဲ့လည်း အတိအကျ အတည်မပြုနိုင်သေးပါဘူး။

နှစ်ဖက်တိုက်ပွဲအတွင်း ထိခိုက်သေဆုံးတဲ့ အခြေအနေကိုတော့ စစ်ကောင်စီဘက်က သတင်းမထုတ်ပြန်သေးသလို ရက္ခိုင့်တပ်တော်ဘက်ကလည်း သတင်းထုတ်ပြန်တာ မတွေ့ရသေးပါဘူး။

နှစ်ဖက်တိုက်ပွဲတွေကြောင့် ဗုဒ္ဓေါကျေးရွာ၊ ကွမ်းအုံစုကျေးရွာ၊ ရွက်ညိုးတောင်ကျေးရွာက ဒေသခံပြည်သူတွေဟာ ဘေးလွတ်ရာနေရာတွေကို ထွက်ပြေးတိမ်းရှောင်နေကြရတယ်လို့ သိရပါတယ်။

ရခိုင်ပြည်နယ်၊ ရသေ့တောင်မြို့ပေါ်အခြေစိုက် ၅၃၆ တပ်ရင်းကနေ စက်တင်ဘာ ၂၈ ရက်ညက ပစ်ခတ်လိုက်တဲ့ လက်နက်ကြီးကျည် ၄ လုံး ကျေးရွာအနီး ကျရောက်ပေါက်​ကွဲတာကြောင့် သဇင်မြိုင်ကျေးရွာမှ ရွာသူရွာသား ၃၀၀ ကျော် ထွက်ပြေးနေကြရတယ်လို့ ဒေသခံရွာသားတွေက ပြောပါတယ်။

ထွက်ပြေးလာတဲ့ သဇင်မြိုင်ကျေးရွာသားတယောက်က “လူတွေအိပ်နေတဲ့အချိန် ညဉ့် ၁၀ နာရီကျော်လောက်မှာ ကျတာ။ စေတီတောင်နဲ့ ကျနော်တို့ရွာနဲ့ ၁ မိုင်ကျော်ဝေးတယ်။ စေတီတောင်စခန်းကို ၂၇ ရက်နေ့က တညလုံးပစ်နေတာ။ မနေ့ကတော့ ကျေးရွာတွေအနီး ပစ်လာတာ။ လက်နက်ကြီးကျည် ၄ လုံး ရွာအနီးမှာ ကျပေါက်တော့ ကြောက်လန့်ပြီး ရွာလုံးကျွတ် ထွက်​ပြေးလာခဲ့ရတာ” လို့ ပြောပါတယ်။

စက်တင်ဘာ ၂၇ ရက် ညနေပိုင်းက စေတီပြင်ကျေးရွာဝင်ဝရှိ စေတီတောင်မှာ တပ်စွဲထားတဲ့ နယ်ခြားစောင့်စခန်းကို ရက္ခိုင့်တပ်တော် (အေအေ) က တိုက်ခိုက်သိမ်းပိုက်ပြီးနောက် စက်တင်ဘာ ၂၇ ရက် တညလုံး ရသေ့တောင်အခြေစိုက် ၅၃၆ တပ်ရင်းမှ လက်နက်ကြီးပစ်ကူ ပေးခဲ့တာပါ။

စက်တင်ဘာ ၂၈ ရက် ညဉ့်အချိန်မှာတော့ အဲဒီတပ်ရင်းကပစ်လိုက်တဲ့ လက်နက်ကြီး ၄ လုံး စေတီတောင်စခန်းနဲ့ တမိုင်ကျော်ကွာဝေးတဲ့ သဇင်မြိုင်ကျေးရွာအနီး ကျရောက် ပေါက်ကွဲခဲ့တာကြောင့် ကျေးရွာသူရွာသား ၃၀၀ ကျော် ကြောက်လန့်ပြီး ညတွင်းချင်း နီးစပ်ရာ ကျေးရွာတွေကို ထွက်ပြေးသွားခဲ့ကြရတာလည်း ဖြစ်ပါတယ်။

အေအေ သိမ်းပိုက်ခဲ့တဲ့ စေတီတောင်စခန်းကို စစ်ကောင်စီတပ်က လက်နက်ကြီး ပစ်ကူတွေအပြင် အေအေတပ်ဖွဲ့တွေရှိနိုင်တဲ့ ကျေးရွာတွေအနီးကိုပါ လက်နက်ကြီး အဆက်မပြတ် ပစ်ခတ်တာတွေ ပြုလုပ်နေကြောင်း ဒေသတွေက ပြောပါတယ်။

အဆိုပါ သဇင်မြိုင်ကျေးရွာဟာ အရင် နအဖစစ်အစိုးရ လက်ထက်ကတည်းက တည်ဆောက်ခဲ့တဲ့ နတလကျေးရွာတရွာဖြစ်ပြီး အိမ်ခြေ ၇၀ ခန့်ရှိကာ လူဦးရေ ၃၀၀ ခန့် နေထိုင်နေကြတာပါ။

၂၀၂၀ ခုနှစ်ကလည်း သဇင်မြိုင်ကျေးရွာအနီးရှိ နယ်ခြားစောင့်စခန်းကို ရက္ခိုင်တပ်တော် (အေအေ) က တိုက်ခိုက်သိမ်းပိုက်ခဲ့ပြီး အခုဆိုရင် စခန်းပျက်ကြီးတခု ဖြစ်နေပါတယ်။

ရခိုင်ပြည်နယ်အတွင်းမှာ စစ်ကောင်စီတပ်တွေနဲ့ ရက္ခိုင့်တပ်တော် (အေအေ) တို့ တကျော့ပြန်တိုက်ပွဲတွေ ပြန်ဖြစ်ပြီးနောက်ပိုင်း မြို့အများအပြားမှာ စစ်ကောင်စီက ဧည့်စာရင်း စစ်ဆေးတာတွေ၊ ပရဟိတသမားတွေနဲ့ အပြစ်မဲ့ပြည်သူတွေကို မတရား ဖမ်းဆီးတာတွေ၊ ခရီးသည်တင်ယာဥ်တွေနဲ့ ကုန်တင်ယာဥ်တွေ ကုန်းလမ်း၊ ရေလမ်းတွေ အားလုံးကို ပိတ်ဆို့တာတွေ ဆက်တိုက်ပြုလုပ်နေတယ်လို့ သိရပါတယ်။

4 days Ago

August 31, 2022

ရခိုင်တွင် အေအေနှင့် စစ်ကောင်စီတပ် တိုက်ပွဲပြင်းထန်၊ ဒေသခံ ၅၀၀ ကျော် ထွက်ပြေးနေရ

ရခိုင်ပြည်နယ်၊ မောင်တောမြို့နယ်မြောက်ပိုင်း၊ မြန်မာ-ဘင်္ဂလားနယ်စပ်မှာ အေအေနဲ့ စစ်ကောင်စီတပ်တို့ သြဂုတ် ၃၁ ရက် မနက် ၆ နာရီကစပြီး တိုက်ပွဲ ပြင်းထန်နေကြောင်း မျက်မြင်ဒေသခံတွေက ပြောပါတယ်။

“မနက် ၆ နာရီကတည်းက တိုက်နေကြတာ။ စစ်ကောင်စီက လက်ပံတောင်ကို ထိုးစစ်အလုံးအရင်း ဆင်နေတော့ အေအေဘက်ကလည်း ခမောင်းဆိပ်ဗျူဟာကို ပြန်ထိုးစစ်ဆင်တဲ့သဘော ရှိနေတယ်။ စစ်ကောင်စီ မခုခံနိုင်လို့ လေကြောင်းက လာတိုက်နေတယ်။ အခုထိဖြစ်နေကြတုန်းပါ” လို့ ပြောပါတယ်။

လက်ပံတောင်ကြောတိုက်ပွဲမှာ စစ်ကောင်စီဘက်က သြဂုတ် ၃၁ ရက် မနက် ၁၀ နာရီ ၂၀ မှာ တိုက်လေယဉ်တစီး၊ ၁၀ နာရီ ၄၀ မှာတစီး၊ စုစု‌ပေါင်း ၂ စီးနဲ့ စစ်ကူလာပြီး ဗုံးကြဲတိုက်ပေးခဲ့ကြောင်း ဒေသခံတွေက အတည်ပြု ပြောပါတယ်။

မျက်မြင်ဒေသခံတယောက်က “တိုက်ပွဲက တော်တော်လေးကို ပြင်းပြင်းထန်ထန် ဖြစ်နေကြတာပါ။ အေအေဘက်က ဗျုဟာကုန်းကို အလုံးအရင်းနဲ့ ဝင်တိုက်တာ။ လေကြောင်းပစ်ကူလည်း ထိုးစစ်ဆင်နေကြတုန်းပါ” လို့ ပြောပါတယ်။

သြဂုတ် ၂၆ ရက် ည ၃ နာရီကစပြီး အေအေက အင်အားအလုံးအရင်းနဲ့ ခမောင်းဆိပ် ဗျူဟာကုန်းကို ထိုးစစ်ဆင် တိုက်ခိုက်နေရာ စစ်ကောင်စီဘက်က အယောက် ၄၀ ခန့် ကျဆုံးခဲ့ပြီး အေအေဘက်ကလည်း ၈ ယောက်ထက်မနည်း ကျဆုံးခဲ့ကြောင်း သတင်းတွေ ထွက်ပေါ်နေပေမဲ့ သီခြားအတည်ပြုလို့ မရနိုင်သေးပါဘူး။

စစ်ကောင်စီလေတပ်က တိုက်လေယာဥ် ၂ စီးနဲ့ သြဂုတ် ၂၇ ရက် ညနေ ၄ နာရီ မိနစ် ၂၀ ကျော်မှာတကြိမ်၊ သြဂုတ် ၂၈ ရက် ညနေ ၃ နာရီ မိနစ် ၂၀ ကျော်မှာ တကြိမ်၊ သြဂုတ် ၃၀ ရက် နေ့လယ် ၁ နာရီခွဲမှာ တကြိမ်နဲ့ ဒီနေ့ သြဂုတ် ၃၁ ရက်နေ့ကလည်း လာရောက် တိုက်ခိုက်နေတာ ဖြစ်ပါတယ်။

ဘူးသီးတောင်-ရသေ့တောင် လမ်းမှာ သြဂုတ် ၃၀ ရက် ညကစပြီး စစ်ကောင်စီနဲ့ အေအေ တိုက်ပွဲပြန်ဖြစ်နေပြီး သြဂုတ် ၃၁ ရက် ဒီနေ့မှာ ရိက္ခာလာယူတဲ့ စစ်ကောင်စီစစ်ကြောင်းကို အေအေဘက်က ခြုံခိုတိုက်ခိုက်ခဲ့တာကြောင့် စစ်ကောင်စီတပ်ဖွဲ့ဝင် ၄ ယောက် သေဆုံးခဲ့တယ်လို့ အေအေနဲ့နီးစပ်တဲ့ အမည်မဖော်လိုသူ ဒေသခံတယောက်က ပြောပါတယ်။

“တိုက်ပွဲက မနေ့ညကတည်းက ဖြစ်နေကြတာ။ ဘူးသီးတောင်နဲ့ ရသေ့တောင်ကြားက မညင်းတောင်ကျေးရွာအနီးမှာ ဖြစ်ကြတာ။ ဒီနေ့မနက်မှာ မညင်းတောင်စခန်းကနေ ကုလားချောင်းကို ရိက္ခာဆင်းယူတဲ့ စစ်ကြောင်းကို အေအေက ခြုံခိုတိုက်ခိုက်တာ။ စစ်သား ၄ ဦး ကျသွားတယ်လို့ သိရပါတယ်။ အေအေဘက်ကတော့ ကျတာမရှိဘူး။”

အဆိုပါ စစ်သား ၄ ယောက် ကျဆုံးသွားတာနဲ့ပတ်သက်ပြီး အေအေနဲ့ စစ်ကောင်စီ နှစ်ဖက်လုံးက ထုတ်ပြန်တာ မရှိသေးပါဘူး။

ဘူးသီတောင်-ရသေ့တောင်စပ်ကြား မညင်းတောင်ကျေးရွာအနီးမှာလည်း သြဂုတ် ၃၀ ညနေ​ ၆ နာရီခွဲကနေ ညနေ ၇ နာရီကျော်ထိ တိုက်ပွဲဖြစ်ခဲ့ကြပြီး ဒီနေ့မနက်မှာတော့ စစ်ကောင်စီစစ်ကြောင်း ချုံခိုတိုက်ခံရကာ တိုက်ပွဲပြန်လည်ဖြစ်ပွားနေကြောင်း၊ မေယုမြစ်ထဲက စစ်ကောင်စီ ဇက်ရေယာဉ်က လက်နက်ကြီးပစ်ကူပေးနေတယ်လို့ ဒေသခံတွေက ပြောပါတယ်။

“မေယုမြစ်ထဲက ဇက်က မနေ့ညကတည်းက လက်နက်ကြီးလှမ်းပစ်နေတာ။ ဒီနေ့မနက် ပိုဆိုးလာတယ်။ ဒါကြောင့် ရွာသူ၊ ရွာသားတွေအားလုံး ထွက်ပြေးနေကြရတယ်။” လို့ ဒေသခံတဦးက ပြောပါတယ်။

ထွက်ပြေးနေကြရတဲ့ ကျေးရွာများမှာ ပြိန်းတော၊ ဗောဓိကုန်း၊ ကုန်တန်း၊ သမီးလှ၊ ရေစိုးချောင်း၊ ရေမျက် အစရှိတဲ့ ကျေးရွာတွေဖြစ်ပြီး ဒေသခံ ၅၀၀ ကျော်လောက် ဘေးလွတ်ရာကို ထွက်ပြေးနေကြရတယ်လို့ ဆိုပါတယ်။

၂၀၁၉ ခုနှစ်ကစပြီး ဘူးသီးတောင်-ရသေ့တောင် လမ်းမှာ စစ်ကောင်စီနဲ့ အေအေ တိုက်ပွဲများစွာ ဖြစ်ပွားခဲ့ပြီး ၂ဝ၂၁ ခုနှစ် စစ်အာဏာသိမ်းပြီးနောက်ပိုင်း တိုက်ပွဲတွေ ရပ်နားခဲ့ကြကာ အခုတဖန် တိုက်ပွဲတွေ ပြန်ဖြစ်လာတာလည်း ဖြစ်ပါတယ်။

1 month Ago
More News
Up