ယူနီဆက်

January 13, 2022

အာဖဂန်ရှိ ဒုက္ခသည်များကို ဆောင်းဒဏ်ခံပစ္စည်းများ ယူနီဆက်ဖြန့်ဝေ

အာဖဂန်နစ္စတန်နိုင်ငံ ဟီရတ်ပြည်နယ်ထဲက စစ်ဘေးဒုက္ခသည် စခန်းတွေထဲမှာ နေကြတဲ့ မိသားစုတွေကို ဆောင်းဒဏ်ခံပစ္စည်းတွေ ဖြန့်ဝေပေးနေတယ်လို့ ကုလသမဂ္ဂ ကလေးများ ရန်ပုံငွေအဖွဲ့ယူနီဆက်က ထုတ်ပြန်ပါတယ်။

အမျိုးသမီးတွေက ဦးဆောင်တဲ့ အိမ်ထောင်စုတွေ၊ မသန်စွမ်း ကလေးတွေ ရှိတဲ့ မိသားစုတွေနဲ့ ကိုယ်ဝန်ဆောင်တွေ ရှိတဲ့ မိသားစုတွေအတွက် ပစ္စည်းတွေကို ယူနီဆက်ဖ်က ဇန်နဝါရီ ၄ရက်က ဝေပေးနေတာပါ။

အမေရိကန်အစိုးရက အာဖဂန်အတွက် အမေရိကန်ဒေါ်လာ ၃၀၈ သန်း အပိုလှူဒါန်းဖို့ အစီအစဉ်ကို ထုတ်ပြောခဲ့လို့ ကုလသမဂ္ဂရဲ့ ဆောင်းရာသီ လှုပ်ရှားမှုကို စတင်ခဲ့တာပါ။

ဒါကြောင့် အောက်တိုဘာလက စပြီး အမေရိကန်က အာဖဂန်နဲ့ ဒေသတွင်းက အာဖဂန် ဒုက္ခသည်တွေအတွက် လှူဒါန်းငွေ စုစုပေါင်း အမေရိကန်ဒေါ်လာ ၇၈၂ သန်းထိ ရှိသွားခဲ့ပါတယ်။

အာဖဂန်လူဦးရေရဲ့ ၅၅ ရာခိုင်နှုန်းဖြစ်တဲ့ လူ ၂၃ သန်းနီးပါးဟာ အစွန်းရောက် ဆာလောင်မှုကို ခံစားနေရပြီး လူ ၉ သန်းနီးပါးက အငတ်ဘေး ကြုံနေရတယ်လို့ ကုလသမဂ္ဂက ပြောပါတယ်။

ဩဂုတ်လမှာ တာလီဘန်တွေက အာဖဂန်ကို သိမ်းပိုက်အပြီး အာဖဂန်ရဲ့ စီးပွားရေး အကြပ်အတည်း အရှိန်မြင့်တက်ခဲ့ပါတယ်။

အာဖဂန်ကို ထိန်းချုပ်ထားတဲ့ တာလီဘန် အုပ်ချုပ်သူတွေကတော့ စီစဉ်ထားတဲ့အကူအညီ အမေရိကန်ဒေါ်လာ ဘီလီယံချီကို စီမံခန့်ခွဲရာမှာ ညှိနှိုင်းဆောင်ရွက်ဖို့ နိုင်ငံတကာ ကိုယ်စားလှယ်တွေနဲ့ တာလီဘန် အရာရှိတွေ ပူးပေါင်းပါဝင်တဲ့ အဖွဲ့တခု ဖွဲ့စည်းဖို့ ဇန်နဝါရီ ၁၂ ရက်က အဆိုပြုခဲ့ပါတယ်။

တာလီဘန်တွေဟာ နိုင်ငံခြား အကူအညီတွေကို ဝေမျှ ဖြန့်ဖြူးရာမှာ ပိုကြီးတဲ့ အခန်းကဏ္ဍကနေ ပါဝင်ဖို့ ကြိုးစားနေတယ်လို့ ရိုက်တာသတင်းမှာ ဖော်ပြခဲ့ပါတယ်။

1 year Ago

March 19, 2021

စာသင်ကျောင်းများမှ တပ်များဖယ်ရှားပေးရန် Save the Children နှင့် ကုလအေဂျင်စီများတောင်းဆို

မြန်မာနိုင်ငံမှာ လုံခြုံရေးတပ်ဖွဲ့တွေက စာသင်ကျောင်းတွေမှာ တပ်စွဲထားတာဟာ ကလေးသူငယ်အခွင့်အရေးကို ကြီးလေးစွာချိုးဖောက်မှုဖြစ်တာမို့ ချက်ချင်းဖယ်ရှားပေးကြဖို့နဲ့ အသုံးမပြုကြဖို့ Save the Children ၊ ယူနက်စကိုနဲ့ ယူနီဆက်အဖွဲ့တို့မှ ပူးတွဲ ကြေညာချက်ထုတ်ပြန် တောင်းဆိုလိုက်ပါတယ်။

ကိုဗစ်-၁၉ ကပ်ရောဂါကြောင့် နေရာအနှံ့ ကျောင်းတွေပိတ်ထားကြရတဲ့ အကျိုး ဆက်ကြောင့် ဖိစီးမှုတွေ ကြုံနေကြရတဲ့ မြန်မာနိုင်ငံမှ ကလေးသူငယ်တွေနဲ့ လူငယ် ၁၂ သန်းနီးပါးအတွက် ခုလိုကိစ္စရပ်တွေဟာ သင်ယူလေ့လာရေး အကျပ်အတည်းကို ပိုမို ဆိုးရွားသွားစေနိုင်တယ်လို့ ဆိုပါတယ်။

ဒါကြောင့်မို့ လုံခြုံရေးတပ်ဖွဲ့တွေအနေနဲ့ တပ်စွဲထားတဲ့ အဆောက်အအုံ ဥပစာတွေကနေ ချက်ချင်းဖယ်ရှားပေးကြဖို့နဲ့ ကျောင်းတွေ၊ ပညာရေးအဆောက်အအုံတွေကို စစ်တပ်၊ ဒါမှမဟုတ် လုံခြုံရေး ဝန်ထမ်းတွေအနေနဲ့ အသုံးမပြုကြဖို့ တောင်းဆိုထားတာ ဖြစ်ပါတယ်။

ဒီကနေ့ မတ် ၁၉ ရက်အထိ ပြည်နယ်နဲ့ တိုင်းဒေသကြီး ၁၃ ခုမှာ လုံခြုံရေး တပ်ဖွဲ့ တွေဟာ စာသင်ကျောင်းနဲ့ တက္ကသိုလ်ပရိဝုဏ် ၆၀ ကျော်မှာ တပ်စွဲထားတယ်လို့ ထုတ်ပြန်ချက်ထဲမှာ ဖော်ပြပါတယ်။

လုံခြုံရေးတပ်ဖွဲ့တွေဟာ အဆောက်အအုံ ဥပစာတွေအတွင်း ဝင်ရောက်ချိန်မှာ ဆရာ/ဆရာမ ၂ ဦးကို ရိုက်နှက်ပြီး တခြားလူပေါင်းများစွာကို ထိခိုက်ဒဏ်ရာတွေ ရရှိ စေခဲ့ကြောင်းနဲ့ ဆေးရုံတွေအပါအဝင် တခြားအများပြည်သူပိုင်အဆောက်အအုံတွေမှာ လည်း တပ်စွဲထားကြတယ်လို့ ဆိုပါတယ်။

ဒါဟာ လက်ရှိအကျပ်အတည်း ဆက်လက်အရှိန်မြင့်တက်လာ‌တာကိုပြနေပြီး ကလေးသူငယ် အခွင့်အရေးတွေကို ပြင်းပြင်းထန်ထန် ချိုးဖောက်ရာရောက်ကြောင်းနဲ့ ဘယ်လိုအခြေအနေမျိုးမှာမှ ကျောင်းတွေကို လုံခြုံရေးတပ်ဖွဲ့ဝင်တွေက အသုံးမပြုရဘူးလို့ ဆို ပါတယ်။

ကလေးသူငယ်အခွင့်အရေးများဆိုင်ရာ သဘောတူညီချက်စာချုပ်(CRC)၊ မြန်မာ နိုင်ငံ ကလေးသူငယ် အခွင့်အရေးများဆိုင်ရာ ဥပဒေနှင့် အမျိုးသားပညာရေးဥပဒေတွေ မှာ ဖော်ပြပါရှိတဲ့ မြန်မာနိုင်ငံရှိ ကလေးသူငယ်တွေနဲ့ လူငယ်တွေရဲ့ အခွင့်အရေးများ အားလုံးကို စောင့်ထိန်းလိုက်နာရမယ့် ဝတ္တရားတွေကို လုံခြုံရေးတပ်ဖွဲ့တွေအားလုံးက စောင့်ထိန်းလိုက်နာကြဖို့လည်း သတိပေးထားပါတယ်။

အမြင့်ဆုံးကန့်သတ်ထိန်းချုပ်မှုကို ကျင့်သုံးဖို့နဲ့ ပညာရေးဆိုင်ရာ အဆောက် အအုံတွေ၊ ဝန်ထမ်းတွေ၊ ကျောင်းသားတွေနဲ့ တခြားအများပြည်သူပိုင် အဆောက်အအုံ တွေကို သိမ်းပိုက်တာနဲ့ ဝင်ရောက်နှောက်ယှက်တဲ့ ပုံစံမျိုးစုံကို အဆုံးသတ်ဖို့ တောင်းဆို ကြောင်းလည်း   ထုတ်ပြန်ချက်ထဲမှာ ဖော်ပြထားပါတယ်။

ပြီးခဲ့တဲ့ ဖေဖော်ဝါရီ ၁ ရက်နေ့က စတင်ကာ နိုင်ငံတော် အတိုင်ပင်ခံပုဂ္ဂိုလ် ဒေါ် အောင်ဆန်းစုကြည်၊ သမ္မတ ဦးဝင်းမြင့်တို့ကို စစ်တပ်က အဓမ္မဖမ်းဆီးပြီး အာဏာသိမ်းမှုအပြီး နိုင်ငံတဝန်း လူထုဆန္ဒပြပွဲတွေ ပိုမို မြင့်တက်လာနေခဲ့တာပါ။

ဒီဆန္ဒပြပွဲတွေမှာ ကျောင်းသားလူငယ်တွေအပါအဝင် ပြည်သူတွေ ပါဝင်နေကြပြီး စစ်တပ်နဲ့ လုံခြုံရေးတပ်ဖွဲ့ဝင်တွေရဲ့ အကြမ်းဖက်ဖြိုခွင်းမှုတွေကြောင့် ကျဆုံးရသူတွေ ၂၀၀ ကျော်လာခဲ့ပြီ ဖြစ်ပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ)ရဲ့ စာရင်း ပြုစုမှုအရ ပြီးခဲ့တဲ့ ဖေဖော်ဝါရီ ၁ ရက်မှ မတ် ၁၈ ရက်အထိ စစ်အာဏာရှင်ဆန့်ကျင်ရေး လူထုဆန္ဒပြပွဲတွေအတွင်း မတရားအကြမ်းဖက်ဖြို ခွင်းမှုတွေကြောင့် ကျဆုံးသူဦးရေဟာ ၂၂၄ ယောက်နဲ့ ဖမ်းဆီး၊ တရားစွဲဆို၊ ပြစ်ဒဏ်ချမှတ်ခြင်းခံထားရသူ စုစုပေါင်း ၂၂၅၈  ယောက်ရှိနေတယ်လို့ ထုတ်ပြန်ထားပါတယ်။

2 years Ago
Up