ယီမင်နိုင်ငံ

February 17, 2022

ယီမင်နိုင်ငံအတွင်း ဟူသီစစ်တပ်က ဒရုန်းများလွှတ်တင်

ယီမင်နိုင်ငံအတွင်း ဘယ်နေရာက ဆိုတာ မသိရတဲ့ နေရာကနေ ဒရုန်းယာဉ်တွေ လွှတ်လိုက်တဲ့ ပုံကို ဟူသီစစ်တပ်ပိုင်မီဒီယာက ဖေဖော်ဝါရီ ၁၅ ရက်မှာ ထုတ်လွှင့် ပြသလိုက်ပါတယ်။

ဖေဖော်ဝါရီ ၁၄ ရက်က ယီမင်နိုင်ငံထဲမှာ တိုက်ပွဲဝင်နေတဲ့ ဆော်ဒီအာရေဗျ ဦးဆောင်တဲ့ ညွန့်ပေါင်းတပ်က စစ်လေယာဉ်တွေဟာ ဟူသီတွေ တပ်စွဲထားတဲ့ မြို့တော် စာနာက တယ်လီကွန် ဆက်သွယ်ရေး ခြံဝင်းကို တိုက်ခိုက်ခဲ့တယ်လို့ ဒေသခံတွေက ပြောပါတယ်။

ဒရုန်းယာဉ်တွေကို ထိန်းချုပ်ဖို့ သုံးတဲ့ ဟူသီတွေရဲ့ စနစ်ကို ဖျက်ဆီးပြီးပြီလို့ ညွန့်ပေါင်းတပ်က တနင်္လာနေ့မှာ ပြောခဲ့လို့ ဟူသီစစ်တပ်ပိုင် မီဒိယာက ခုလို တုံ့ပြန်လိုက်တာပါ။

ရန်လိုတဲ့ စစ်ဆင်ရေးတွေ လုပ်ဖို့ တယ်လီကွန် ဆက်သွယ်ရေး ဝန်ကြီးဌာန ဗဟိုဌာနချုပ်ကို အီရန်နဲ့ မိတ်ဖက် ဟူသီတွေက သုံးနေတယ်လို့လဲ ညွန့်ပေါင်းတပ်က စွပ်စွဲ ထားပါတယ်။

ဟူသီတယ်လီကွန်ဝန်ကြီး မစ်ဖှာ အယ်လ် နူမီယာ သူ့ ရုံးတွေကို စစ်ရေး ရည်ရွယ်ချက်နဲ့ သုံးနေတာ မဟုတ်ဘူးလို့ ငြင်းပါတယ်။

ဟူသီတွေက နိုင်ငံတကာ အသိအမှတ်ပြု အစိုးရကို မြို့တော် စာနာကနေ နှင်ထုတ်ပြီး ၂၀၁၅မှာ ဆော်ဒီ ဦးဆောင်တဲ့ ညွန့်ပေါင်းတပ်ဟာ ယီမင်နိုင်ငံရေးကို ဝင်ရောက် စွက်ဖက် ခဲ့တာပါ။

ဟူသီတွေကတော့ နိုင်ငံခြားက ရန်လိုမှုတွေနဲ့ အကျင့်ပျက် ခြစားနေတဲ့ စနစ်ကို တိုက်ပွဲဝင်နေတာ လို့ ပြောထားပါတယ်။ 

10 months Ago

November 23, 2021

ယီမင်နိုင်ငံတွင် ဟူသီ ထောက်ခံသူများ ဆန္ဒပြ

ယီမင်နိုင်ငံက ဟူသီတွေ ထိန်းချုပ်ထားတဲ့ မြို့တော်ဆာနာမှာ ဟူသီတွေကို ထောက်ခံသူ ထောင်ချီပြီး နိုဝင်ဘာ ၂၂ ရက်က ဆန္ဒပြခဲ့ပါတယ်။ 

ယီမင်နိုင်ငံအတွင်း လက်နက်ကိုင်ပဋိပက္ခမှာ ဆော်ဒီဦးဆောင်တဲ့ ညွန့်ပေါင်းစစ်တပ်ကို အမေရိကန်အစိုးရက ဘက်လိုက်နေတာ ရပ်တန့်ဖို့ တောင်းဆိုရင်း အမေရိကန် ဆန့်ကျင်ရေး ဆန္ဒပြခဲ့ကြတာပါ။

ယီမင်ပြည်သူတွေဟာ အမေရိကန်လွှမ်းမိုးခံ အုပ်ထိန်းခံ စွက်ဖက်ခံ စားပွဲပေါ်က ဒါမှမဟုတ် စားပွဲအောက်က အရာဝတ္ထုတွေ မဟုတ်ဘူးလို့ ဆန္ဒပြရာမှာပါဝင်တဲ့ ဟူသီဗိုလ်ချုပ်ကြီး အယ်လ်မာဒီက ရိုက်တာသတင်းဌာနကို  ပြောပါတယ်။

ယီမင်နိုင်ငံမှာ နိုင်ငံတကာအသိအမှတ်ပြု အစိုးရ အာဏာပြန်ရရေးအတွက် ဟူသီတွေကို တိုက်ဖို့ ၂၀၁၅ မှာ ဆော်ဒီအာရေဗျ ဦးဆောင်တဲ့ အာရပ်ညွန့်ပေါင်းတပ်က စွက်ဖက်ခဲ့ပါတယ်။

ယီမင် လက်နက်ကိုင်ပဋိပက္ခအတွင်း လူထောင်သောင်းချီ သေဆုံးခဲ့ပြီး သန်းချီ အိုးအိမ်စွန့်ခွာ ထွက်ပြေးခဲ့ရလို့ လူသားချင်းစာနာမှုအကျပ်အတည်း ဆိုက်ခဲ့ပါတယ်။

ဒီစစ်ပွဲဟာ အီရန်က ကျောထောက်နောက်ခံပေးထားတဲ့ ဟူသီသူပုန်တွေနဲ့ ဆော်ဒီက ကျောထောက်နောက်ခံပေးထားတဲ့ အစိုးရကြား ဖြစ်ခဲ့တာမို့ ဆော်ဒီနဲ့ အီရန်တို့ကြားက ကြားခံနယ်ရုပ်တွေရဲ့ စစ်ပွဲအဖြစ် ရှုမြင်နေကြပါတယ်။

အပစ်အခတ်ရပ်စဲရေးအတွက် ကုလသမဂ္ဂနဲ့ အမေရိကန်တို့က ဦးဆောင်အားထုတ်မှုတွေလည်း လောလောဆယ် ရပ်နေပါတယ်။

ဟူသီတွေက နိုင်ငံတကာအသိအမှတ်ပြု အစိုးရရဲ့ နိုင်ငံမြောက်ပိုင်းက နောက်ဆုံးခြေကုပ် မာရစ်ဘ်မြို့ကို ထိုးစစ်ဆင်နေသလို ယီမင်နိုင်ငံအတွင်း တခြားဒေသတွေကိုလည်း ထိုးစစ်ဆင် နေပါတယ်။

1 year Ago
More News
Up