ယိုကိုဟားမား

July 17, 2020

ဂျပန်ရောက်မြန်မာအမျိုးသား ၁ ဦး မဖွယ်မရာပြုလုပ်မှုဖြင့် ဖမ်းဆီးတရားစွဲခံရ

ဂျပန်နိုင်ငံ၊ ယိုကိုဟားမားအနီးရှိ မီယာမအဲမြို့၊ မီယာဇာကီရပ်ကွက်မှာ နေထိုင်တဲ့ အသက်  ၂၈ နှစ်အရွယ် အလုပ်လက်မဲ့ မြန်မာအမျိုးသားတစ်ဦးကို မဖွယ်မရာပြုလုပ်မှု၊ ဒဏ်ရာရအောင်လုပ်မှု၊ လုယက်မှုတို့နဲ့ ဂျပန်ရဲတပ်ဖွဲ့က ပြန်လည် ဖမ်းဆီးပြီး တရားစွဲလိုက်တယ်လို့  ဒေသထုတ်  Kanagawa သတင်းစာမှာ ဖော်ပြပါတယ်။ စီရင်စုရဲတပ်ဖွဲ့ရဲ့ စံစမ်းစစ်ဆေးမှုအရ မတ်လ ၁၄ ရက်နေ့ မနက် ၁ နာရီ ကျော်လောက်က  အဆိုပါရပ်ကွက်အနီး နေထိုင်တဲ့ အသက် ၃၃ နှစ်အရွယ် ရုံးပြန်ဝန်ထမ်း ဂျပန်အမျိုးသမီးတဦးကို အဆိုပါမြန်မာအမျိုးသားက အတင်းအဓမ္မ မဖွယ်မရာပြုကျင့်ဖို့ ကြိုးပမ်းခဲ့ပြီး ကိုယ်ခန္ဓာ အောက်ပိုင်းတစ်ဝက်ကို ဒဏ်ရာရရှိစေခဲ့တယ်လို့ သတင်းစာမှာ ရေးပါတယ်။ အဆိုပါမြန်မာအမျိုးသားဟာ ဇွန်လ ၄ ရက်နေ့ကလည်း အသက်၂၆ နှစ်အရွယ် တခြားဂျပန်ရုံး၀န်ထမ်းအမျိုးသမီးတစ်ဦးကို   မဖွယ်မရာကိုင်တွယ်မှုသံသယနဲ့  ရဲက ပထမအကြိမ် ဖမ်းဆီးခဲ့ပြီး အခု ဇူလိုင်လ ၁၆ ရက်နေ့မှာ နောက်တကြိမ် ထပ်မံ ဖမ်းဆီးလိုက်တာ ဖြစ်ပါတယ်၊၊ တိုကျိုမြို့နေ မြန်မာအမျိုးသမီးတဦးဖြစ်တဲ့ မတင်တင်ဝင်းက “ ဂျပန်နိုင်ငံမှာက အမျိုးသမီးတွေဟာလည်း ည ၁ နာရီ ၂ နာရီ လောက်အထိ အလုပ်လုပ်ရတာတွေရှိပြီး တယောက်တည်းစားသောက်သွားလာကြတာ၊ နောက်ဆုံးရထားနဲ့ သွားလာကြတာ ပုံမှန်ရှိနေကျပါ။ တချို့ နိုင်ငံခြားသားအမျိုးသားတွေက ဒါကို အခွင့်အရေးယူချင်တတ် ကြပါတယ်”လို့ ဒီဗွီဘီကို ပြောပြပါတယ်၊၊ ဖမ်းဆီးခံရတဲ့ မြန်မာအမျိုးသားအနေနဲ့ ပုဒ်မ ၂၄၃ အရ အမှုစွဲချက်တင်ခံရပြီး  အပြစ်ရှိတယ်လို့ တရားရုံးက ဆုံးဖြတ်ရင် အမြင့်ဆုံး ထောင်ဒဏ် ၇ နှစ်အထိ ချမှတ်ခံရနိုင်ပါတယ်။
10 months Ago
Up