ယာယီပိတ်သိမ်း

A d v e r t i s e m e n t With Us

January 10, 2021

မဟာအောင်မြေမြို့နယ်တွင် ကွာရန်တင်းစင်တာတစ်ခု ယာယီပိတ်သိမ်း

ကိုဗစ်-၁၉ ပိုးတွေ့နှုန်း ကျဆင်းလာတာကြောင့် မန္တလေးမြို့၊ မဟာအောင်မြေမြို့နယ်၊ စိန်ပန်းရပ်ကွက် အ. ထ. က (၂၄) မှာ ဖွင့်လှစ်ထားတဲ့ လူ ၁၅၀ ဆန့် ကွာရန်တင်းစင်တာကို ဇန်နဝါရီ ၉ ရက်နေ့ကစပြီး ယာယီပိတ်သိမ်းထားတယ်လို့ တိုင်းဒေသကြီး လွှတ်တော်ကိုယ်စားလှယ်က ပြောပါတယ်။

မဟာအောင်မြေမြို့နယ်အတွင်း ပိုးတွေ့ရှိနှုန်း ကျဆင်းလာတဲ့အပြင် ကိုဗစ်-၁၉ ကူးစက်မှုကို ထိမ်းချုပ်နိုင်တဲ့အတွက် မြို့နယ်အတွင်းမှာရှိတဲ့ ကွာရန်တင်းစင်တာ နှစ်ခုထဲက တစ်ခုကို ယာယီပိတ်တာလို့ မဟာအောင်မြေမြို့နယ်၊ တိုင်းဒေသကြီး အမှတ်(၂) လွှတ်တော်ကိုယ်စားလှယ် ဦးဇော်ဇော်အောင်က ပြောပါတယ်။

"မဟာအောင်မြေမြို့နယ်ထဲမှာက ကွာရန်တင်းစင်တာနှစ်ခုရှိတာဗျ။ ခု (၂၄) ကျောင်းမှာ ဖွင့်ထားတဲ့ ဟာကတော့ ယာယီ ခဏပိတ်လိုက်တဲ့ သဘောပါပဲဗျ။ ကျနော်တို့က မန္တလေးတက္ကသိုလ်ထဲမှာရှိတဲ့ ကုတင် ၆၀၀ မှာတော့ ဆက်လက်ပြီး ဖွင့်ထားလျက်ရှိတယ်ဗျ။ ခုဟာက နည်းနည်းလေး ပိုးတွေ့တာ ထိမ်းချုပ်နိုင်တော့ စင်တာနှစ်ခုနေရာက အရှေ့နဲ့ အနောက်နဲ့ အနောက်ပြင်လည်းဖြစ်နေလို့ တစ်ခုတည်း ပေါင်းလိုက်တဲ့ သဘောပါပဲဗျ။"

ဒါ့အပြင် contact person တွေကိုလည်း ထိမ်းချုပ်ထားနိုင်ပြီ ဖြစ်ပြီး လိုအပ်ပါက ပြန်လည် အသုံးပြုနိုင်ဖို့ ပြင်ဆင်ထားတယ်လို့ သိရပါတယ်။

ဇန်နဝါရီ ၉ ရက်နေ့မှာ စင်တာကနေ ကွာရန်တင်းဝင်နေသူအားလုံး ဆင်းသွားပြီဖြစ်တဲ့အတွက် နောက်ထပ် contact person တွေကို မန္တလေးတက္ကသိုလ်အတွင်းက ကုတင် ၆၀၀ဆန့် ကွာရန်တင်းစင်တာကို ပို့ဆောင်မယ်လို့ သိရပါတယ်။

အခုစင်တာဟာ ၂၀၂၀ ပြည့်နှစ် နိုဝင်ဘာလအတွင်းက ဖွင့်လှစ်ခဲ့ပြီး မန္တလေးခရိုင်အတွင်းမှာ ပထမဦးဆုံး ယာယီပိတ်လိုက်တဲ့ ကွာရန်တင်းစင်တာလည်း ဖြစ်ပါတယ်။ 

မန္တလေးခရိုင်အတွင်း ခုနစ်မြို့နယ်မှာ  တစ်မြို့နယ်ကို ကွာရန်တင်းစင်တာ နှစ်ခုလောက်ရှိပြီး ကူးစက်မှုကို ထိမ်းချုပ်လို့ ရပြီဆိုတာနဲ့  စင်တာနှစ်ခုကို တစ်ခုတည်းပေါင်းဖို့ လုပ်ဆောင်နိုင်တယ်လို့လည်း ဦးဇော်ဇော်အောင်က ပြောပါတယ်။

ဒီဇင်ဘာလကုန်ပိုင်းကစပြီး မန္တလေးတိုင်းမှာ ကိုဗစ်-၁၉ ကူးစက်မှု ကျဆင်းလာတာကြောင့် ကွာရန်တင်းစင်တာတွေနဲ့ ပေါ့စတစ်လူနာထားရှိရာ နေရာတွေကို ပိတ်သိမ်းတာ၊ ပြန်ပေါင်းတာတွေ လုပ်ဆောင်မယ်လို့ ဝန်ကြီးချုပ် ဒေါက်တာဇော်မြင့်မောင်က ပြောကြားထားပါတယ်။

မန္တလေးတိုင်းဒေသကြီးအတွင်းမှာ ဇန်နဝါရီ ၈ ရက်နေ့အထိ ပိုးတွေ့လူနာပေါင်း ၁၄,၆၀၀ နဲ့ သေဆုံးသူ ၃၂၇ ဦး ရှိတယ်လို့ သိရပါတယ်။

ထိန်ထိန်လင်း

2 months Ago

August 25, 2020

ပုပ္ပါးတောင်ကလပ်ပေါ်တက်ရောက်ခွင့် ယာယီပိတ်သိမ်း

မန္တလေးတိုင်းဒေသကြီး၊ ညောင်ဦးခရိုင် ကျောက်ပန်းတောင်းမြို့နယ်ရှိ  ပုပ္ပါး တောင်ကလပ်ကို သြဂုတ် ၂၆ ရက်က စတင်ပြီး တောင်ပေါ်တက်ရောက်ခွင့် ယာယီ ပိတ်သိမ်းထားမှာ ဖြစ်တယ်လို့ ပုပ္ပါးတောင်ကလပ် ဂေါပက အဖွဲ့က ပြောပါတယ်။ ပုပ္ပါးတောင်ကလပ် ဂေါပကအဖွဲ့ အတွင်းရေးမှူး ဦးဌေးမြင့်က “တိုင်းအစိုးရညွှန်ကြားချက် အရပါပဲ။ မနက်ဖြန် စာရောက်မယ်လို့ သိရတယ်။ နှုတ်မိန့်က ကြိုရောက်လာလို့ တောင်ပေါ်တက်ရောက်ခွင့်ကို မနက်ဖြန်ကစပြီး ပိတ်လိုက်တာ”လို့ ပြောပါတယ်။ ပုပ္ပါးတောင်ကလပ်ကို မြန်မာနိုင်ငံအတွင်း  ကိုဗစ်-၁၉ရောဂါ အတည်ပြုလူနာ တွေ့ရှိပြီး ချိန်ကစတည်းက စတင်ပိတ်ထားခဲ့ရာက ဇူလိုင် ၁ ရက်က ကျန်းမာရေး လမ်းညွှန်ချက်တွေနဲ့အညီ ပြန်ဖွင့်ခဲ့တာပါ။ အခုလက်ရှိ ကိုဗစ်-၁၉ရောဂါ ပြည်တွင်း ကူးစက်မှု ပြန်များလာတဲ့အတွက်  တောင်ကလပ်ပေါ် တက်ရောက်ခွင့် ပြန်လည်ရပ်နားလိုက်တာလို့လည်း ဂေါပကအဖွဲ့ထံက သိရပါတယ်။ သတင်း- ကိုလင်း(ချောက်)
6 months Ago
More News
Up