ယာဉ်တိုက်မှု

December 5, 2022

လှိုင်သာယာတွင် ယာဥ်တိုက်မှု ၂ ခုဖြစ်ပွားပြီး လူ ၁ ဦးသေ၊ ၂ ဦးဒဏ်ရာရ

ရန်ကုန်တိုင်း၊  လှိုင်သာယာမြို့နယ်ဘက်အခြမ်း အောင်ဇေယျကြိုးတံတားနဲ့ ဘုရင့်နောင် အမှတ်-၂ တံတားတို့မှာ ဒီဇင်ဘာ ၄ ရက် ညပိုင်းက ယာဥ်တိုက်မှု ၂ ခုဖြစ်ပွားခဲ့ပြီး  အမျိုးသားတယောက် သေဆုံးကာ အမျိုးသားတယောက်နဲ့ အမျိုးသမီးတယောက် ဒဏ်ရာရရှိခဲ့တယ်လို့ မြို့ခံတွေဆီက သိရပါတယ်။

အင်းစိန်မြို့နယ်နဲ့ လှိုင်သာယာမြို့နယ်ကို ဆက်သွယ်ထားတဲ့ အောင်ဇေယျကြိုးတံတားအဆင်း လှိုင်သာယာမြို့နယ်ဘက်အခြမ်းမှာ မနေ့ည ၁၀ နာရီခွဲက ယာဥ်တိုက်မှုဖြစ်ပွားခဲ့တာမှာ ယာဉ်မောင်း တယောက် ဒဏ်ရာရခဲ့တာပါ။

ရပ်ကွက်နေသူတဦးက “ယာဥ်မောင်းက ကားခေါင်းခန်းမှာ ညပ်နေတာ၊ အဲ့ဒါကို မီးသတ်တွေရော ပရဟိတ အဖွဲ့တွေကပါ ဝိုင်းထုတ်ပေးတာ မသေဘူး၊ ဒဏ်ရာပဲရတယ်။”လို့ပြောပါတယ်။

အလားတူ မနေ့ည ၈ နာရီခွဲကလည်း အမှတ်-၂ ဘုရင့်နောင်တံတားအဆင်း လှိုင်သာယာမြို့နယ်ဘက်အခြမ်းမှာ ထော်လာဂျီယာဥ်တစီးကို တခြားယာဥ်တစီးက ဝင်တိုက်ခဲ့လို့ ထော်လာဂျီယာဥ်မောင်း သေဆုံးကာ ယာဥ်ပေါ်ပါ အမျိုးသမီးတယောက် ဒဏ်ရာရရှိခဲ့တယ်လို့ အုပ်ချုပ်ရေးနဲ့ နီးစပ်သူတဦးက ဒီဗွီဘီကို ပြောပါတယ်။

“ထော်လာဂျီကို တိုက်သွားတဲ့ကားက ထွက်ပြေးသွားတယ်။ ယာဥ်မောင်းက တံတားဘောင်တန်းနဲ့ သံကြိုးကြားမှာ ခေါင်းညပ်ပြီး သေဆုံးသွားတာ။ ကောင်မလေးက ယာဥ်ပေါ်ကပြုတ်ကျပြီး ဒဏ်ရာရတယ်။”

ယာဥ်တိုက်မှုမှာ သေဆုံးသူနဲ့ ဒဏ်ရာရရှိသူ နှစ်ယောက်ကို မီးသတ်တပ်ဖွဲ့နဲ့ ပရဟိတ အဖွဲ့အစည်းတွေက လှိုင်သာယာမြို့နယ်ဆေးရုံကို ပို့ဆောင်ပေးခဲ့တယ်လို့ မီးသတ်တပ်ဖွဲ့ရဲ့ ထုတ်ပြန်ချက်အရ သိရပါတယ်။

အဆိုပါ ယာဥ်တိုက်မှုနဲ့ပတ်သက်ပြီး လှိုင်သာယာမြို့မရဲစခန်းက စစ်ဆေးနေတယ်လို့ သိရပြီး ဘုရင့်နောင် အမှတ်-၂ တံတားမှာ တိုက်ပြေးသွားတဲ့ ယာဥ်မောင်းကို ဖမ်းဆီးရမိမှုရှိ၊ မရှိ မသိရသေးပါဘူး။

12 hours Ago

December 4, 2022

ရေး-သံဖြူဇရပ်ကားလမ်းတွင် ယာဉ်တိုက်မှုဖြစ်ပြီး လူ ၅ ဦး ဒဏ်ရာရ

မွန်ပြည်နယ်၊ ရေး-သံဖြူဇရပ်ကားလမ်းရှိ သံဖြူဇရပ်မြို့နယ်၊ ဝဲခမိကျေးရွာကားလမ်းတနေရာမှာ  ဒီဇင်ဘာ ၃ ရက် ည ၆ နာရီခွဲလောက်က    Probox ကားတစီးက ထင်းလုံးတင်တဲ့ကားတစီးကို အနောက်ကနေ ဝင်တိုက်လို့  လူ ၅ ယောက် ဒဏ်ရာရသွားတဲ့အကြောင်း ဒေသခံ လူမှုကယ်ဆယ်ရေးသမားတွေက ပြောပါတယ်။ 

ယာဉ်မတော်တဆမှုကြောင့် ထိခိုက်ဒဏ်ရာရတဲ့  အမျိုးသား လေးယောက်နဲ့  အမျိုးသမီး တယောက်တို့ကို ဝဲခမိတိုက်နယ်ဆေးရုံနဲ့   သံဖြူဇရပ်မြို့ပြည်သူ့ဆေးရုံကို  အရေးပေါ် ပို့ဆောင်ပေးရတာလို့ လူမှုကယ်ဆယ်ရေးသမားတွေက ပြောပါတယ်။

ဒေသခံတဦးက“ရာဘာထင်းတင်တဲ့ကားတွေကို ညဘက်ပေးမမောင်းသင့်ဘူး။ နောက်မီးမပါ ရှေ့မီးတစ်လုံးနဲ့လည်း မြို့လယ်ကောင်သွားလိုသွား၊ ညဘက်ဆိုလည်း ဘာမီးမှမပါပဲနဲ့လည်း ဓာတ်မီး တစ်ခုနဲ့သွားလို့သွား၊ လမ်ဘေးညအိပ်ရင်လည်း ဘေးမီးမထွန်းဘဲ လမ်းပေါ်မှာ ရှိနေတာကြောင့် ယာဥ်တိုက်မှုတွေက မကြာခဏဆိုသလိုဖြစ်ပါတယ်”လို့ ပြောပါတယ်။

ရေး-သံဖြူဇရပ်ကားလမ်းမှာဆို ယာဥ်မောင်းတွေ မဆင်မခြင်မောင်းနှင်မှုကြောင့် ယာဥ်တိုက်မှုတွေမှာ မကြာခဏဆိုသလို ဖြစ်ပွားလေ့ရှိပြီး အခုနှစ်အတွင်း လူပေါင်း ၁ ဒါဇင်နီးပါးလောက် အသက်ဆုံးရှုံးခဲ့ရပါတယ်။

2 days Ago
More News
Up