ယာဂန်ကလော့

July 4, 2020

မန်စီတီးအသင်းကို ရှုံးနိမ့်ခဲ့ပေမယ့် ကစားသမာများကို ယာဂန်ကလော့ ကာကွယ်ပြောဆို

မန်စီတီးအသင်းကို ဂိုးပြတ်ရှုံးနိမ့်ခဲ့တဲ့ပွဲစဉ်မှာ လီဗာပူးလ်အသင်းသားတွေဟာ လုံလောက်တဲ့စိတ်အားထက်သန်မှုမျိုး မရှိခဲ့ဘူးဆိုတဲ့ ပြောဆိုချက်တွေကို လီဗာပူးနည်းပြ ယာဂန်ကလော့က ပယ်ချခဲ့ပါတယ်။  ဒီပွဲစဉ်မှာ အသင်းဟာ ရှုံးနိမ့်ခဲ့ပေမယ့် ကစားသမားတွေဟာ ကောင်းမွန်တဲ့ အခြေအနေတရပ်ကို ဖန်တီးပြသနိုင်ခဲ့တယ်လို့ သူကပြောပါတယ်။  လီဗာပူးအသင်းဟာ မန်စီတီးရဲ့ အီတီဟတ်ကွင်းကို ချန်ပီယံအသင်းသစ်အဖြစ် ဝင်ရောက်လာခဲ့ခြင်းဖြစ်ကာ မန်စီတီးအသင်းသားတွေရဲ့ guard of honour အဖြစ်ဂုဏ်ပြုခြင်းကိုလည်း ရရှိခဲ့ပါတယ်။  ဒါပေမယ့် ဒီဂုဏ်ပြုမှုတွေ၊ ဂုဏ်ယူစရာအခိုက်အတန့်တွေဟာ ပွဲမစခင်သာဖြစ်ပြီးတော့ ပွဲစချိန်မှာတော့ ဂွါဒီယိုလာရဲ့အသင်းက လီဗာပူးအသင်းကို ဘက်ပေါင်းစုံက တိုးနှက်တိုက်ခိုက်ခဲ့ကာ ပွဲပြီးချိန်မှာ လေးဂိုး - ဂိုးမရှိဆိုတဲ့ရလဒ်နဲ့  ပြတ်ပြတ်သားသားချေမှုန်းခဲ့ပါတယ်။  ဂွါဒီယိုလာရဲ့အသင်းဟာ ပထမပိုင်းမှာတင် ဒီဘရိုင်း၊ စတားလင်း၊ ဖိုဒန်တို့ရဲ့သွင်းဂိုးတွေနဲ့ သုံးဂိုး ပြတ်ဦးဆောင်ထားနိုင်ခဲ့ပါတယ်။ ဒါဟာ စတုတ်စီးတီးအသင်းကို ခြောက်ဂိုး - တစ်ဂိုးနဲ့ ရှုံးနိမ့်ခဲ့ပြီးနောက်ပိုင်း  လီဗာပူးအသင်းအတွက် ပထမဆုံးအကြိမ် ပထမပိုင်းအတွင်းဂိုးပြတ်ရှုံးနိမ့်မှုလည်း ဖြစ်ပါတယ်။  ချိန်ဘာလိန်ရဲ့  ကိုယ့်ဂိုးကိုယ်သွင်းယူမိခြင်းကြောင့် မန်စီတီးအသင်းဟာ စတုတ္တမြောက်အနိုင်ဂိုးကို ရရှိခဲ့တာဖြစ်ပါတယ်။  မာရက်ဇ်ရဲ့ ဂိုးကို VAR နဲ့ပယ်ဖျက်ခဲ့ခြင်းကြောင့်သာ လီဗာပူးအသင်းဟာ ခြောက်ဂိုးပြတ်နဲ့ ရှုံးနိမ့်မယ့် အရေးကနေ ကင်းလွတ်ခဲ့တာပဲဖြစ်ပါတယ်။  ဒီလိုအခြေအနေတွေကြောင့် ကလော့ရဲ့အသင်းဟာ ဒီပွဲအတွက် ကြိုတင်ပြင်ဆင်မှု ကောင်းကောင်းမလုပ်ခဲ့ဘူး၊ ပရီးမီးယားလိဂ်ဖလားရသွားပြီ ဖြစ်တာကြောင့် ကောင်းကောင်းမကစားခဲ့တာလား ဆိုပြီး ဝေဖန်သံတွေ ပေါ်ထွက်လာခဲ့ပါတယ်။  ဒီအပေါ် ကလော့က “မန်စီတီးအသင်းက ယှဉ်ပြိုင်ဖို့ခက်ခဲတာ အားလုံးသိပြီးသားပါ။ ကျနော်တို့အနေနဲ့ တည်ငြိမ်မှုအားနည်းခဲ့ပါတယ်။ ကျနော်တို့အတွက်ကောင်းမွန်တဲ့ အခိုက်အတန့်  တွေ၊ အခွင့်အရေးတွေရှိခဲ့ပေမယ့် ကျနော်တို့ အသုံးမချနိုင်ခဲ့ပါဘူး။ ဒါ့ကြောင့်ဒီရလဒ်ကို လက်ခံရပါမယ်။ အသင်းရဲ့အခြေအနေကို သဘောကျတယ်လို့ထပ်ပြောလိုပါတယ်။ မန်စီတီးအသင်းက အရမ်းကောင်းနေပေမယ့် နောက်တစ်သင်းကရော ချန်ပီယံမဖြစ်နိုင်ဘူးလား။ မန်စီတီးအသင်းဟာ တကယ်  ကောင်းမွန်တဲ့အသင်းပါ။ ကျနော်သူတို့ရဲ့ တရာသီလုံးကို စောင့်ကြည့်ခဲ့ပြီး သူတို့ဟာ တစ်ပွဲမှ ခြေစွမ်းမဆိုးရွားခဲ့ပါဘူး”  လို့ ပြောပါတယ်။ 
11 months Ago

July 3, 2020

ဒဲဂလစ်ရှ်၊ ရှန်ကလေတို့လို ဂန္တဝင်နည်းပြတွေနဲ့ ဘယ်တော့မှနှိုင်းယှဉ်မှာမဟုတ်ပါဘူး - ကလော့

အသင်းနဲ့အတူ ပရီးမီးယားလိဂ်၊ ချန်ပီယံလိဂ် စတဲ့ဆုဖလားတွေ ရရှိထားပေမယ့် ကင်နီဒဲဂလစ်ရှ်၊ ဘီရှန်ကလေတို့လို ဂန္တဝင်နည်းပြကြီးတွေနဲ့ သူ့ကိုယ်သူနှိုင်းယှဉ်မှာ မဟုတ်ဘူးလို့ လီဗာပူးနည်းပြ ယာဂန်ကလော့ ထုတ်ဖော်ပြောဆိုလိုက်ပါတယ်။  ကလော့ရဲ့ လီဗာပူးလ်အသင်းဟာ နှစ် ၃၀ ကြာ စောင့်ဆိုင်းခဲ့ရတဲ့  ပရီးမီးယားလိဂ်ချန်ပီယံဆုကို ပြီးခဲ့တဲ့သီတင်းပတ်မှာရရှိဖို့ သေချာခဲ့ပြီး ချန်ပီယံလိဂ်ဆုဖလားကိုတော့ မနှစ်က  ဆွတ်ခူးနိုင်ခဲ့ပါတယ်။  ဒါ့ကြောင့် ကလော့ပ်ဟာဘော့ပရပ်စလေ၊ ဂျိုးဖာဂန် စတဲ့နည်းပြတွေနဲ့အတူ လီဗာပူးအသင်းသမိုင်းတလျှောက် ဒီဖလားကိုဆွတ်ခူးနိုင်ခဲ့တဲ့ တတိယမြောက်နည်းပြဖြစ်လာခဲ့ပြီပဲဖြစ်ပါတယ်။  ဒါဟာ ဘုရင်ကြီးလို့ တင်စားခံခဲ့ရတဲ့ ကင်နီဒဲဂလစ်ရှ်၊ ဘီရှန်ကလေ စတဲ့ ဂန္တဝင်နည်းပြကြီးတွေတောင် မစွမ်းဆောင်နိုင်ခဲ့တဲ့ မှတ်တမ်းလည်းဖြစ်ပါတယ်။  သူ့ကို ဒီလိုမျိုးအသင်းရဲ့အစဉ်အလာကြီးမားတဲ့ နည်းပြကြီးတွေ နဲ့ နှိုင်းယှဉ်တာမျိုးကို စိတ်မဝင်စားဘူးလို့ ကလော့က ပြောပါတယ်။  “ကျနော့်ကိုယ်ကျနော် သူတို့နဲ့ဘယ်တော့မှ  နှိုင်းယှဉ်မှာမဟုတ်ပါဘူး။ တကယ်တော့ သူတို့လို ဂန္တဝင်ကြီးတွေနဲ့ ဘယ်သူကိုမှလည်း မနှိုင်းယှဉ်သင့်ပါဘူး။ အသင်းတသင်းကို တည်ဆောက်၊ မောင်းနှင်တာနဲ့ပတ်သက်လို့ အချိန်တွေ ကွာခြားသွားခဲ့ပါပြီ။ ဒါဟာကြီးမားတဲ့  အောင်မြင်မှုဆိုတာ ကျနော်သိပါတယ်။ ဒီလိုအောင်မြင်မှုမျိုးအတွက် အသင်းနဲ့ သက်ဆိုင်တဲ့သူတွေ ဘယ်လောက်ထိ ကြိုးစားလုပ်ဆောင်ခဲ့ရလဲဆိုတာကိုလည်း ကျနော် သိပါတယ်။ ဒါဟာ လုံးဝကိုမလွယ်ကူခဲ့ပါဘူး။ ဒီလိုခက်ခဲမှုတွေကြောင့်လဲ ရရှိခဲ့တဲ့အောင်မြင်မှုတွေဟာ ပိုပြီးတော့ ထိုက်တန်မှု၊ တန်ဖိုးကြီးမားမှုနဲ့ ခံစားမှုတွေပိုကောင်းနေခဲ့တာဖြစ်ပါတယ်။” ကလော့နည်းတူပဲ လီဗာပူးလ်အသင်းခေါင်းဆောင် ဂျော်ဒန်ဟန်ဒါဆန်ဟာလည်း အမ်လင်ဟု၊ ဖီးလ်သွမ် ပဆင်၊ ဂရေမီဆောင်းနက်စ်တို့နဲ့အတူ အသင်းအတွက် ပရီးမီးယားလိဂ်ဖလား ဆွတ်ခူးပေးနိုင်ခဲ့တဲ့ ခေါင်း ဆောင်တွေအဖြစ်မှတ်တမ်းတင်ခံခဲ့ရပါတယ်။ ဟန်ဒါဆန်ဟာ လီဗာပူးအသင်းခေါင်းဆောင် ရာထူးကို စတီဗင်ဂျရတ်ထံကနေ ၂၀၁၅ ခုနှစ်မှာ လွှဲပြောင်းရယူခဲ့သူဖြစ်ပြီး အစပိုင်းက သူ့ကိုဝေဖန်ခဲ့သူ တွေ မှားယွင်းကြောင်းကို ပြီးခဲ့တဲ့ နှစ်ရာသီအတွင်း ထူးရှယ်ခြေစွမ်းနဲ့ သက်သေပြခဲ့သူလည်း ဖြစ်ပါတယ်။ 
11 months Ago
More News
Up