ယင်းမာပင် PDF

November 9, 2021

ယင်းမာပင် တိုက်ပွဲအတွင်း စစ်​ကောင်စီတပ်သား ၃၀ ခန့်ကျဆုံး၊ PDF ဘက်က ၁ ဦး ဒဏ်ရာရ

စစ်​ကိုင်းတိုင်း ယင်းမာပင်မြို့နယ် တယ်ပင်ကန်​ကျေးရွာအ​နီးမှာ စစ်​ကောင်စီတပ်ဖွဲ့နဲ့ ​ဒေသခံ PDF အဖွဲ့တို့ နိုဝင်ဘာ ၉ ရက် မနက်ပိုင်းက တိုက်ပွဲဖြစ်ပွားခဲ့တယ်လို့ သိရပါတယ်။

တယ်ပင်ကန်​ကျေးရွာအ​နောက်ဘက်နားမှာ တိုက်ပွဲဖြစ်ပွားခဲ့ကာ စစ်​ကောင်စီတပ်သား ၃၀ ဝန်းကျင်လောက် ကျဆုံးပြီး ​ဒေသခံ PDF အဖွဲ့က ၁ ဦး လက်​မောင်းထိမှန်(မစိုးရိမ်ရ)ဒဏ်ရာရရှိခဲ့တယ်လို့  PDF အဖွဲ့ဝင်​တွေက ​ပြောပါတယ်။ 

စစ်​ကောင်စီတပ်ဖွဲ့​တွေအလာမှာ ​ဒေသခံ PDF  အဖွဲ့က မိုင်းဆွဲတိုက်ခိုက်ရာက အပြန်အလှန်ပစ်ခတ်မှု​​တွေ ဖြစ်ပွားခဲ့တာလို့ ဆိုပါတယ်။ 

မနက် ၉ နာရီ​​ကျော်လောက်က စတင်ဖြစ်ပွားခဲ့ကာ တိုက်ပွဲကြာမြင့်ချိန် ၁ နာရီဝန်း​ကျင်​လောက်ထိ ပစ်ခတ်မှုဖြစ်ခဲ့တယ်လို့ သိရပါတယ်။ 

အဲဒီ​နောက် စစ်​ကောင်စီတပ်ဖွဲ့​တွေဟာ ယင်းမာပင်ဘက် ဆက်လက်ချီတက်ခဲ့ကြပြီး ​​နှောရိုး-ကောင်းဆင့်​ကျေးရွာအနီးမှာလည်း စစ်​ကောင်စီကား ၂ စီး ထပ်မံ မိုင်းဆွဲတိုက်ခိုက်ခံခဲ့ရတယ်လို့ ထိခိုက်ကျဆုံးမှုအ​ခြေ​နေကို​တော့ မသိရ​သေးဘူးလို့ ​ပြောပါတယ်။ 

စစ်​ကောင်စီကား မိုင်းဆွဲတိုက်ခိုက်ခံရအပြီး ​ကောင်းဆင့်​ကျေးရွာအပါအဝင် အနီးနားမှာရှိတဲ့ ​ကျေးရွာ​တွေက ​ဒေသခံပြည်သူ​တွေ ထွက်​ပြေး​နေကြရတယ်လို့ ​ဒေသခံ​တွေက​ပြောပါတယ်။ 

တိုက်ပွဲအတွင်း စစ်ကောင်စီတပ်သားတွေ သေဆုံးဒဏ်ရာမှုနဲ့ပတ်သက်ပြီး ဒီဗွီဘီက သီးခြားအတည်မပြုနိုင်သေးပါဘူး။

3 weeks Ago

August 26, 2021

စစ်ကောင်စီ ဒု-တပ်ကြပ် ၁ ဦးကို ယင်းမာပင် PDF က ဖမ်းမိ

စစ်ကိုင်းတိုင်း၊ ယင်းမာပင်မြို့နယ်မှာ သြဂုတ် ၂၅ ရက်ည​နေပိုင်းက ​ကျေးရွာတစ်ရွာအတွင်း ဝင်လာတဲ့ အမည်မသိ လူစိမ်းတစ်​ယောက်ကို မသင်္ကာလို့ စစ်​ဆေးရာမှာ ဒု-တပ်ကြပ်အဆင့်ရှိ စစ်​ကောင်စီတပ်သားတစ်ဦးဖြစ်တာတွေ့ရလို့  ယင်းမာပင် PDF အဖွဲ့က ဖမ်းဆီးလိုက်တယ်လို့ သိရပါတယ်။

သြဂုတ် ၂၅ ရက် ည​နေ ၅ နာရီ​လောက်မှာ ရွာထဲက ဆိုင်တစ်ဆိုင်မှာ ​စျေးဝယ်​နေတဲ့ အရပ်ဝတ်နဲ့ မျက်နှာစိမ်းတစ်​ယောက်ကို မသင်္ကာလို့ ​ဖမ်းဆီး​မေးမြန်းခဲ့တာလို့ ​ဒေသခံ PDF အဖွဲ့ဝင်တစ်​ယောက်က ပြောပါတယ်။

"တွေ့​တွေ့ခြင်း ​မေးမြန်းတုန်းက စကားကို ဟို​ပြောဒီ​ပြော ​ဖြေ​နေတာ။ သူ့မှာ ​ဆေးစွဲထားတဲ့ပုံစံ​။ ဒီ​နေ့ (သြဂုတ်၂၆)မနက် ​ကျမှ သူ့အမူအရာက ပုံမှန်ဖြစ်ပြီး စကား​ပြောတာ​တွေက မှန်သလိုဖြစ်​နေ​တော့ ထပ်မံ​မေးမြန်းကြည့်​တာ သူက ​နေပြည်​တော်က လာတာဖြစ်​ကြောင်း၊ ဒီနယ်ကို မလာချင်​ပေမယ့် လာရ​ကြောင်းနဲ့ ဆေးထိုး​ပေးတာခံရ​ကြောင်း ​ပြောတယ်။​သူ စစ်သားပါလို့လည်း ဝန်ခံတယ်၊ ဒုတပ်ကြပ်လို့လည်း ​ပြောတယ်။ ​နေပြည်​တော်က​နေ ၇ ​ယောက် လွှတ်လိုက်တာဖြစ်​ကြောင်း၊ မုံရွာမှာ ၂ ​ယောက်​နေခဲ့တယ်၊ မြစ်ကမ်းပါး​ဘေးမှာ ၂ ​ယောက်ကျန်ခဲ့တယ်၊ ဒီဘက်ကို​တော့ သူအပါအဝင် ၃ ​ယောက်လာတယ်လို့ ​ပြောတယ်။” 

နောက် ၂ ရက် ၃ ရက်​လောက်​နေရင် နေပြည်​တော်က တပ်ရင်း ၆ ခု​လောက်လာမှာဖြစ်ကြောင်းနဲ့ သူတို့က ဒီနယ်​မြေကိုလာပြီး အရင်​လေ့လာတာလို့လည်းဆိုပါတယ်။ 

ဖမ်းမိထားတဲ့သူဟာ ဒု တပ်ကြပ်အဆင့်ရှိ စည်သူငြိမ်း ဆိုသူဖြစ်ပြီး သူ့ရဲ့ လည်ပင်းမှာလည်း တုတ်​ချောင်းတစ်ခုခုနဲ့ ရိုက်ခံထားရတဲ့ အရာ  ၃ ​ကြောင်းတွေ့ရတယ်လို့လည်း ဆိုပါတယ်။

ဖမ်းမိထားတဲ့အဆိုပါ ဒုတပ်ကြပ်ကို ဘာမှမလုပ်​သေးဘဲ ယာယီထိမ်းသိမ်းထားတယ်လို့  ​ဒေသခံ PDF အဖွဲ့ဝင်တစ်​ယောက်က ​ပြောပါတယ်။

3 months Ago
Up