မန္တလေးနှင့် ဗန်းမော်ကြား ဧရာဝတီလင်းပိုင် တွေ့ရှိရမှု ယခင်နှစ်ထက် လျော့နည်း

April 7, 2019

မန္တလေးနှင့် ဗန်းမော်ကြား ဧရာဝတီလင်းပိုင် တွေ့ရှိရမှု ယခင်နှစ်ထက် လျော့နည်း

ဧရာဝတီလင်းပိုင်တွေ အဓိက ကျက်စားတဲ့ မန္တလေးနဲ့ ဗန်းမော်ကြားမှာ ဧရာဝတီလင်းပိုင် တွေ့ရှိရမှုဟာ အရင်နှစ်ကထက်စာရင် လျော့နည်းလာနေတယ်လို့ ဧရာဝတီလင်းပိုင် ထိန်းသိမ်းရေးတာဝန်ခံ သားငှက်ထိန်းသိမ်းရေးအဖွဲ့မှ ကိုကျော်လှသိန်းက ပြောပါတယ်။ မန္တလေး နဲ့ ဗန်းမော်ကြား ဧရာဝတီလင်းပိုင်တွေကို ၂၀၁၈ ခုနှစ် ဖေဖော်ဝါရီလမှာ ၇၆ ကောင်တွေ့ရှိရပြီး ၂၀၁၉ ခုနှစ် ဖေဖော်ဝါရီလမှာ ၇၂ ကောင် တွေ့ရှိရတယ်လို့ ပြောပါတယ်။ ဧရာဝတီလင်းပိုင် ထိန်းသိမ်းရေးတာဝန်ခံ သားငှက် ထိန်းသိမ်းရေးအဖွဲ့မှ ကိုကျော်လှသိန်း က “ဧရာဝတီ လင်းပိုင်သေတဲ့ပုံစံက ၃ မျိုးရှိတယ်။ တခုက အရွယ်ရောက်လို့ အသက်ကြီးလို့ ပုံမှန်အတိုင်းသေတာ၊ နောက်တခုကငါးဖမ်းပိုက်တွေမှာ ငြိတွယ်ပြီး သေဆုံးတယ်။ နောက်တခုက ဘထ္ထရီရှော့နဲ့မိပြီး သေဆုံးတာ တွေရှိတယ်။ ဘထ္ထရီရှော့တိုက်ငါးဖမ်းဆီးတာက တော်တော်လေး အန္တရာယ်များတယ်။ ငါးသယံဇာတကို မျိုးပြုန်းအောင်လုပ်တဲ့ ငါးဖမ်းနည်းဖြစ်တာပေါ့။ ဥကနေ အစ သားကောင်ပေါက် အကောင်ကြီးတွေအထိ အကုန်သေတာဖြစ်တဲ့အတွက် ငါးသယံဇာတ ပြုန်းတီးစေတဲ့ ငါးဖမ်းနည်းဖြစ်တယ်။ ဘထ္ထရီရှော့တိုက် ငါးဖမ်းတာက ဧရာဝတီလင်းပိုင်တွေအတွက် အန္တရာယ်အရှိဆုံး ငါးဖမ်းနည်းတခုပဲဖြစ်ပါတယ်”လို့ ပြောပါတယ်။ ၂၀၀၂ ခုနှစ်မှ စတင်ကာ ၂၀၁၉ ခုနှစ်အထိ နှစ်စဉ် မန္တလေးမှ ဗန်းမော်ကြား တနှစ်ကို တကြိမ် စစ်တမ်းကောက်ယူတဲ့လုပ်ငန်းကို လုပ်ဆောင်နေပြီး မန္တလေး-ဗန်းမော်ကြားမှာ ဧရာဝတီလင်းပိုင်ကို ပျမ်းမျှ ၇၀ ပတ်ဝန်းကျင်မှာ တွေ့ရှိရတယ်လို့ သိရပါတယ်။ ၂၀၁၈ ခုနှစ်မှာ ၇၆ ကောင်နဲ့ အများဆုံး စံချိန်တင်တွေ့ရပြီး ယခင်က ၇၃ ကောင်ပတ်ဝန်းကျင်မှာ တွေ့ရတယ်လို့ သိရပါတယ်။ ဧရာဝတီလင်းပိုင်တွေဟာ ကောင်ရေ ၇၀ ပတ်ဝန်းကျင်မှာရှိနေပြီး သေတဲ့အကောင်တွေ ရှိသလို ပြန်ပေါက်တဲ့ အကောင်တွေနဲ့ညီမျှနေတယ်။ တကယ်လို့ သေတဲ့ အကောင်တွေကို လျော့ချနိုင်မယ်ဆိုရင် အကောင်အရေအတွက် သိသိသာသာတိုးလာဖို့ရှိနေတယ်လို့ ဧရာဝတီ လင်းပိုင်ထိန်းသိမ်းရေး တာဝန်ခံ သားငှက်ထိန်းသိမ်းရေးအဖွဲ့မှ ကိုကျော်လှသိန်း က ပြောပါတယ်။ ကိုကိုလင်း(အင်းတော်)
2 years Ago
Up