မှော်ဘီနှင့် တွံတေး

September 6, 2021

မှော်ဘီနှင့် တွံတေးတွင် ပုဒ်မ ၁၄၄ ထုတ်ပြန်

ရန်ကုန်တိုင်း၊ မှော်ဘီမြို့နယ်နဲ့ တွံတေးမြို့နယ်တွေမှာ  ပုဒ်မ ၁၄၄ အမိန့် စစ်ကောင်စီက ထုတ်ပြန်လိုက်ပြီး ညမထွက်ဖို့နဲ့ လူ ၅ ယောက်ထက် ပိုမစုဖို့ တားမြစ်ကန့်သတ်လိုက်ပါတယ်။

အခုရက်ပိုင်းအများပြည်သူတွေရဲ့  လုံခြုံရေးနဲ့ တရားဥပဒေစိုးမိုးရေးကို ထိခိုက်ပျက်ပြားစေဖို့ ပြုမှုဆောင်ရွက်နေတာကို တွေ့ရှိရတယ်လို့ဆိုကာ တွံတေးမြို့နယ်ကို ရာဇဝတ် ကျင့်ထုံးဥပဒေပုဒ်မ ၁၄၄ အရ လူစုလူဝေးမပြုရန်နဲ့ ညမထွက်အရအမိန့်ကို စက်တင်ဘာ ၄ ရက်နေ့မှာ စစ်ကောင်စီက  ထုတ်ပြန်လိုက်​တာလို့  မြို့ခံတွေက ပြောပါတယ်။

မြို့နယ်အတွင်း လမ်းမကြီးတွေ၊ အများပြည်သူသွားရာလမ်း၊ လမ်းသွယ်၊ လမ်းကြား၊ ဥယျာဉ် (သို့မဟုတ်) အများပြည်သူနဲ့ သက်ဆိုင်တဲ့ နေရာတွေမှာ လူ ၅ ဦးထက်ပို စုဝေးခြင်းမပြုဖို့နဲ့  ည ၁၀ နာရီမှ မနက် ၄  နာရီအချိန်အတွင်း ညမထွက်မရအမိန့်ကို ထုတ်ပြန်လိုက်တာဖြစ်ပါတယ်။

မှော်ဘီမြို့နယ်ဟာ မင်္ဂလာဒုံမြို့နယ်၊ လှိုင်သာယာမြို့နယ်တို့နဲ့အတူ ရန်ကုန်တိုင်းအတွင်း ကိုဗစ်အကြောင်းပြ အထူးစစ်ဆေးဆောင်ရွက်မှု လုပ်ဆောင်ရမယ့် မြို့နယ်တွေအဖြစ် သတ်မှတ်ခံရတဲ့ မြို့နယ်လည်း ဖြစ်ပါတယ်။

စစ်ကောင်စီတပ်တွေက ကိုဗစ်အကြောင်းပြကာ ပြည်သူတွေကို တင်းကျပ် စစ်ဆေးနေတယ်လို့  မှော်ဘီ ဒေသခံ ပြည်သူတွေက ပြောပါတယ်။

စစ်တပ်တွေအခြေစိုက်တဲ့ မင်္ဂလာဒုံမြို့နယ်ရှိ  စစ်တပ်ပိုင် ပျဉ်းမပင်နို့ချက်စက်ရုံအနီးမှာ  စက်တင်ဘာ ၄ ရက်မနက်က  ပေါက်ကွဲမှုဖြစ်ပွားခဲ့ပါတယ်။

အဆိုပါပေါက်ကွဲမှုနဲ့ ပတ်သက်ပြီး  ပြည်သူ့ပြောက်ကျားတပ်ဖွဲ့(မင်္ဂလာဒုံမြို့နယ်)ကတော့ သူတို့ရဲ့ လက်ချက်ဖြစ်ကြောင်း ထုတ်ပြန်ကြေညာထားပါတယ်။

ဒါ့အပြင် မင်္ဂလာဒုံမြို့နယ်အတွင်းရှိ စစ်ကောင်စီရဲ့ လက်ပါးစေ လူပုဂ္ဂိုလ်တစ်ဦးချင်းဖြစ်စေ၊ အဖွဲ့ အစည်းဖြစ်စေ၊ စက်ရုံ၊အလုပ်ရုံဖြစ်စေ အခုထက်ပြိုပြီး ထိရောက်စွာ တိုက်ခိုက်သွားမယ်လို့လည်း သတိပေးကြေညာထားပါတယ်။

3 months Ago
Up