မှုခင်း

December 6, 2022

ဂျာမနီတွင် ၁၄ နှစ်အရွယ် မိန်းကလေး ၁ ဦး တိုက်ခိုက်ခံရပြီး သေဆုံး

ဂျာမနီနိုင်ငံ အနောက်တောင်ပိုင်းက အီလာကာ့ချ်ဘာ့ဂ်မြို့မှာ ဒီဇင်ဘာ ၅ ရက်က အသက် ၁၄ နှစ်အရွယ် မိန်းကလေးတဦးဟာ အမည်မသိ အမျိုးသားတဦးရဲ့ တိုက်ခိုက်မှုကြောင့် ကျောင်းသွားရာလမ်းမှာ သေဆုံးခဲ့ကြောင်း ဒေသဆိုင်ရာရဲတပ်ဖွဲ့က ပြောပါတယ်။

မနက် ၇ နာရီ ၃၀ မိနစ်လောက်မှာ မိန်းကလေး နှစ်ဦး ဒဏ်ရာအပြင်းအထန် ရရှိပြီး ကယ်ဆယ်ရေးအဖွဲ့တွေက ဆေးရုံကို ခေါ်ဆောင်သွားကြောင်းနဲ့ စုံစမ်းစစ်ဆေးမှုတွေ အပြည့်အဝလုပ်နေကြောင်း ရဲပြောရေးဆိုခွင့်ရှိသူ ဝုဖှ်ဂန်းင် ယွာဂျန်းစ်က ပြောပါတယ်။

ပြစ်မှုကျူးလွန်သူ ထွက်ပြေးတိမ်းရှောင်သွားတဲ့ အနီးနားရှိ အဆောက်အအုံတခုမှာ အမျိုးသားသုံးဦးကို ရဲတွေက တွေ့ရှိပြီးနောက် သူတို့ကို စစ်ဆေးမေးမြန်းဖို့ ခေါ်ဆောင်သွားကြောင်းနဲ့ ပြစ်မှုကျူးလွန်သူဟာ သူတို့ရဲ့ အသိုင်းအဝိုင်းထဲက တယောက်လို့ သံသယရှိနေပြီးတော့ စုံစမ်းစစ်ဆေးမှုတွေ ဆက်လက်လုပ်ဆောင်နေတယ်လို့ ယွာဂျန်းစ်က ပြောပါတယ်။

တနင်္လာနေ့ မနက်ပိုင်းက ဒဏ်ရာအပြင်းအထန် ရနေကြတဲ့ မိန်းကလေးငယ်တွေကို တွေ့ရှိခဲ့ပြီး ဆေးရုံကို ပို့ဆောင်ခဲ့ပါတယ်။ ဒဏ်ရာရရှိသူတွေထဲက ၁၄ နှစ်အရွယ် မိန်းကလေးကတော့ သူ့ရဲ့ဒဏ်ရာကြောင့် နောက်ပိုင်းမှာ သေဆုံးသွားပါတယ်။

ရဲတပ်ဖွဲ့က တရားခံနဲ့ ဖမ်းဆီးခေါ်ဆောင်သွားခဲ့တဲ့ တခြားလူ နှစ်ယောက်နဲ့ပတ်သက်တဲ့ အသေးစိတ် အချက်အလက်တွေကို ပြောကြားခြင်းမရှိသလို တိုက်ခိုက်သူရဲ့ ဖြစ်နိုင်တဲ့ ရည်ရွယ်ချက်အပေါ်လည်း ဘာမှထုတ်မပြောထားပါဘူး။

မြူးနစ်ချ်မြို့အနောက်ဘက် ကီလိုမီတာ ၁၅၀ အကွာရှိ လူပေါင်း ၅,၀၀၀ လောက်နေထိုင်တဲ့ အီလာကာ့ချ်ဘာ့ဂ်မြို့ရဲ့ မြို့တော်ဝန် မားကပ်စ် ဟယ်အွိုက်စ်လာက ဒီတိုက်ခိုက်မှုအတွက် တုန်လှုပ်မိကြောင်း ပြောပါတယ်။

4 days Ago

November 23, 2022

ပြင်သစ်တွင် ၁၄ နှစ်အရွယ် မိန်းကလေး ၁ ဦး အဓမ္မပြုကျင့် သတ်ဖြတ်ခံရ

ပြင်သစ်နိုင်ငံတောင်ပိုင်း တွန်းနက်စ်မြို့မှာ အသက် ၁၄ နှစ်အရွယ် မိန်းကလေးတဦးကို အဓမ္မပြုကျင့် သတ်ဖြတ်ခဲ့တယ်လို့ သံသယရှိသူ အသက် ၃၁ နှစ်အရွယ် အမျိုးသားကို ရဲတပ်ဖွဲ့က နိုဝင်ဘာလ ၁၈ ရက်က ဖမ်းဆီးလိုက်ပါတယ်။

သံသယရှိသူဟာ ကျောင်းကနေထွက်လာတဲ့ ဗက်နီဆာကို ကားထဲ အတင်းထိုးထည့်ပြီး မုဒိမ်းကျင့် သတ်ဖြတ်ခဲ့တာဖြစ်ပြီး ဗက်နီဆာရဲ့အလောင်းကို လူမနေတော့တဲ့ အိမ်ထဲမှာ ထားခဲ့ကြောင်းနဲ့ သူ့ကို လုံခြုံရေးကင်မရာ မှတ်တမ်းကနေ အမြန်ဖော်ထုတ်နိုင်ခဲ့တယ်လို့ အာဏာပိုင်တွေက ပြောပါတယ်။

ပြင်သစ်နိုင်ငံတောင်ပိုင်း မားမွန်းဒ်မြို့က သူ့တိုက်ခန်းမှာ ရဲတွေက အဲဒီလူကို သွားဖမ်းတဲ့အခါ သူ့အပြစ်ကို ဝန်ခံခဲ့တယ်လို့ နိုင်ငံတောင်ပိုင်း၊ အားဂျန်းဒ်မြို့ရှိ အစိုးရရှေ့နေက သတင်းထောက်တွေကို စနေနေ့မှာ ပြောပါတယ်။

ဒီအမျိုးသားဟာ သူ့အသက် ၁၅ နှစ်လောက်ပဲရှိချိန် ၂၀၀၆ ခုနှစ်က တခြားကလေးငယ်တဦးကို လိင်ပိုင်းဆိုင်ရာ စော်ကားမှုနဲ့ ဆိုင်းငံ့ထောင်ဒဏ် ၁၅ ရက် ကျခံဖူးကြောင်း အာဏာပိုင်တွေက ပြောပါတယ်။ ဒီသတင်းကြောင့် အခုသီတင်းပတ်အတွင်း မြို့ခံတွေ ထိတ်လန့်တုန်လှုပ်ခဲ့ရပါတယ်။

လိင်ပိုင်းဆိုင်ရာ စော်ကားမှုတွေအတွက် ပြစ်မှုမှတ်တမ်းရှိပြီးသား ဒီလိုလူတွေကို လွတ်လွတ်လပ်လပ် မနေစေဘဲ တင်းကျပ်တဲ့ တရားစီရင်မှု ရှိသင့်ကြောင်းလည်း ပြောကြပါတယ်။

ဒီအမှုဟာ မြို့တော်ပါရီမှာ အသက် ၁၂ နှစ်အရွယ် မိန်းကလေး အသတ်ခံရမှုအပြီး သီတင်းပတ်တွေအကြာမှာ ထပ်ပြီး ပေါ်ပေါက်လာတဲ့အမှုလည်း ဖြစ်ပါတယ်။

2 weeks Ago
More News
Up