မှုခင်း

January 26, 2021

သပိတ်ကျင်းမြို့နယ်၌ အများသုံးရေကန်ထဲ sodium cyanide ခတ်သူနှင့် စေခိုင်းသူတို့ ဖမ်းမိ

မန္တလေးတိုင်း၊ သပိတ်ကျင်းမြို့နယ်၊ အုံးဇုံးကျေးရွာအုပ်စု၊ ဆင်မွှေးကျေးရွာမှာ ကျေးရွာသုံး သောက်သုံးရေကန်တွေထဲကို sodium cyanide ဓာတုပစ္စည်း‌တွေ ခတ်သူနဲ့ ခတ်ဖို့ စေခိုင်းသူ တို့ကို ဖမ်းမိထားပြီဖြစ်တယ်လို့ သပိတ်ကျင်းမြို့မရဲစခန်းက ပြောပါတယ်။

၂၀၂၀ ဒီဇင်ဘာလ ၂၁ ရက်နေ့ မနက်ပိုင်းက ဆင်မွှေးကျေးရွာက အများသုံး သောက်သုံးရေကန်က ရေကို အသုံးပြုပြီးနောက် အသက် ၄၁ နှစ်အရွယ် အမျိုးသမီးတစ်ယောက် သေဆုံးကာ အမျိုးသားတစ်ယောက်နဲ့ တခြားအမျိုးသမီးငယ်တစ်ယောက်  မူးဝေအော့အန် ဖြစ်ခဲ့ပါတယ်။

အဆိုပါ ရေတွင်းနဲ့ ရေကန်တွေကို စစ်ဆေးခဲ့တဲ့အခါ ရေကန်တစ်ခုရဲ့ ဘေးမှာ sodium  cyanide (ရွေသတ္တုထုတ်လုပ်သန့်စင်ရာတွင်အသုံးပြုသည့် ဓာတုပစ္စည်း)  တွေကို တွေ့ရှိခဲ့ပြီး သပိတ်ကျင်းမြို့မရဲစခန်းမှာ သေမှုသေခင်း ဖွင့်စစ်ဆေးခဲ့တယ်လို့ သိရပါတယ်။

အဲ့ဒီနောက် ရေကို ရန်ကုန်ဓာတ်ခွဲဌာနသို့ ပေးပို့စစ်ဆေးခဲ့တဲ့အခါ ရေထဲမှာ sodium cyanide  ပါဝင်တယ်လို့  အဖြေထွက်ခဲ့တာကြောင့်  ဇန်နဝါရီ ၇ ရက်နေ့မှာ ရာဇသတ်ကြီး ဥပဒေအရ ပုဒ်မ ၃၀၂/၃၂၈ တို့နဲ့ ပြောင်းလဲ အမှုဖွင့်ခဲ့တယ်လို့ သိရပါတယ်။

အဲ့ဒီနောက် ပြင်ဦးလွင်ခရိုင် ရဲတပ်ဖွဲ့က ကြီးကြပ်ပြီး သက်ဆိုင်ရာရဲတပ်ဖွဲ့နဲ့ တာဝန်ရှိသူတွေ ပူးပေါင်းစစ်ဆေးရှာဖွေခဲ့ရာက ဇန်နဝါရီလ ၂၃ ရက်နေ့မှာ sodium cyanide ခတ်သူ မင်းခန့်မောင်(ခ)ရှမ်းကြီးနဲ့ စေခိုင်းသူ ဝင်းနိုင်တို့ကို ဖမ်းဆီးရမိခဲ့ပါတယ်။

သူတို့ နှစ်ယောက်ကို ရဲတပ်ဖွဲ့က ရမန်ယူ စစ်ဆေးခဲ့ပြီး မင်းခန့်မောင်(ခ)ရှမ်းကြီးဟာ ဇန်နဝါရီ ၂၅ ရက်က သပိတ်ကျင်းမြို့နယ်တရားရုံးမှာ ပြစ်မှုကျူးလွန်ကြောင်း ဖြောင့်ချက်ပေးထားတယ်လို့  သိရပါတယ်။

သတင်း - ထိန်ထိန်လင်း၊ ဓာတ်ပုံ-သပိတ်ကျင်းမြို့နယ် ရဲတပ်ဖွဲ့

3 months Ago

October 12, 2020

မြစ်ကြီးနားတွင် တစ်ပတ်အတွင်း ကလေးငယ်အလောင်း၂ လောင်း လာပစ်ထား

ကချင်ပြည်နယ်၊ မြစ်ကြီးနားမြို့ မြေမြင့်ရပ်ကွက်နဲ့ ရမ်ပူရပ်ကွက်မှာ  တစ်ပတ်အတွင်း  ကလေးငယ် အလောင်း ၂ လောင်း ပစ်ထားမှု ဖြစ်ပွားခဲ့တယ်လို့ နယ်မြေရဲစခန်းက သိရပါတယ်။ အောက်တိုဘာ ၁၁ ရက်က ရမ်ပူရပ်ကွက်နယ်မြေ(၇)အတွင်းက လမ်းဘေးတစ်နေရာမှာ သေဆုံးနေတဲ့ ကလေးငယ်ရဲ့အလောင်းကို လာပစ်ထားတာတွေ့ခဲ့ရသလို  အောက်တိုဘာ ၆ ရက်ကလည်း မြေမြင့်ရပ်ကွက်၊ လမ်းသွယ်(၁၁)ထိပ်မှာ ရက်သားအရွယ် ကလေးအလောင်းကို ဓာတ်ဘူးထည့်တဲ့ ဂျပ်ဖာဘူးအခွံထဲမှာ အနှီးအဖြူနဲ့ထုတ်ထားပြီး အမှိုက်ပုံနားမှာ ပြင်ပဒဏ်ရာမရှိဘဲနဲ့ လာပစ်ထားတာဖြစ်ပါတယ်။ မြေမြင့်ရပ်ကွက်က ရက်သားအရွယ်ကလေးသေဆုံးမှုကို နယ်မြေရဲစခန်းမှာ ကလေး အလောင်းကို ဖျောက်ဖျက်ခြင်းနဲ့ မွေးဖွားမှုကို  ထိမ်ချန်ခြင်း ပုဒ်မ  ၃၁၈နဲ့ အမှုဖွင့်ထားကာ တရားခံကိုတော့ စုံစမ်းနေဆဲလို့ မြစ်ကြီးနား နယ်မြေ ရဲစခန်းက စခန်းမှူး နိုင်ဝင်းက ပြောပါတယ်။ မြစ်ကြီးနားမြို့၊ ရမ်ပူရပ်ကွက်အတွင်းက ကလေးမိခင်တဦး ကလေးဖျက်ချပြီးလာပစ်ထားတာ ဖြစ်နိုင်တယ်လို့ ဒေသခံတွေက ခန့်မှန်း ပြောဆိုနေကြပြီး အမှုဖွင့်ထားခြင်းမရှိဘူးလို့ နယ်မြေရဲစခန်းကနေ သိရပါတယ်။ သတင်း - မီးမီး
6 months Ago
More News
Up