မွမ်ဘိုင်း

September 23, 2020

မွမ်ဘိုင်း၌ ပြိုကျသည့် တိုက်ခန်းတွဲ အပျက်အစီးများကြားမှ အသက်ရှင်သူ ၂ ဦးကို ကယ်ထုတ်

အိန္ဒိယနိုင်ငံ၊ မွမ်ဘိုင်းမြို့ပြင် အရှေ့မြောက်ဘက်က ဘီဝမ်ဒီမြို့မှာ စက်တင်ဘာ ၂၁ ရက်က ပြိုကျတဲ့ တိုက်ခန်းတွဲ အပျက်အစီးတွေထဲကနေ အမျိုးသား ၂ ယောက်ကို နောက်တနေ့မှာ ဆွဲထုတ်နိုင်ခဲ့ပါတယ်။ စက်တင်ဘာ ၂၂ ရက်ထိ သေဆုံးသူ အရေအတွက် အယောက် ၂၀ ရှိပြီး နောက်ထပ်လူ ၁၇ ယောက် ပျောက်ဆုံးနေဆဲလို့ မဟာရတ်ရှ်တျာပြည်နယ် လွှတ်တော် အတိုက်အခံ ခေါင်းဆောင် ပရာဘဲင်း ဒါရေကာက ပြောပါတယ်။ ၃ ထပ်ရှိပြီး တိုက်ခန်း ၅၄ ခန်းပါတဲ့ တိုက်ဟာ စက်တင်ဘာ ၂၁ ရက် မနက် အာရုံတက်က ပြိုကျချိန်မှာ  တိုက်ထဲက လူတွေက ရုံးတွေ ကျောင်းတွေ မသွားကြသေးဘဲ ပြင်ဆင်နေဆဲပါ။ ကယ်ဆယ်ရေးလုပ်သားတွေနဲ့ အနံ့ခံခွေးတွေက ရှင်သန်ကျန်ရစ်သူတွေကို ၂၄ နာရီပတ်လုံး အလှည့်ကျ ပိုက်စိပ်တိုက် ရှာနေပါတယ်။ ကယ်ဆယ်ရေးလုပ်ငန်းတွေကို ဘေးများပြီး ခက်ခဲတဲ့အခြေအနေကြားမှာ လုပ်နေရတယ်လို့ အမျိုးသားကပ်ဘေးတုံ့ပြန်ရေးတပ် အကြီးအကဲ စက်တီယာပရာဒန်က ပြောပါတယ်။ အိမ်ခြေကြပ်ညပ်နေတဲ့ လမ်းကြားထဲမှာ ရှိတာမို့ စက်ယန္တရားကြီးတွေ ဝင်လို့မရဘဲ အရေးပေါ်လုပ်သားတွေဟာ လက်နဲ့ တခြားတူးလို့ရတဲ့ ကိရိယာအသေးတွေကိုသုံးပြီး အပျက်အစီးတွေကို ဖယ်ရှားနေရပါတယ်။ နံရံတွေကနေ တွဲလောင်းကျနေတဲ့ မျက်နှာကြက်တွေ ကြမ်းခင်းတွေနဲ့ အင်္ဂတေစတွေရဲ့ ဘေးအန္တရာယ်ကိုလည်း ကယ်ဆယ်ရေးသမားတွေ ရင်ဆိုင်နေရပြီး ဘာကြောင့် ပြိုကျတယ် ဆိုတာတော့ မသိရသေးပါဘူး။ အိန္ဒိယမှာ တရားမဝင် ဆောက်လုပ်ထားတဲ့ အဆောက်အအုံတွေ၊ ဟောင်းနွမ်းပြီး မခိုင်တော့တဲ့ အိမ်တွေဟာ မိုးရာသီမှာ ပြိုကျလေ့ရှိပါတယ်။ အရင်လက မွမ်ဘိုင်းမြို့တောင်ပိုင်း မိုင်တရာအကွာက မာဟဒ်မြို့မှာ အဆောက်အအုံ ပြိုကျလို့ လူတဒါဇင်ကျော် သေဆုံးခဲ့ပါတယ်။
7 months Ago

August 25, 2020

အိန္ဒိယတွင် ၅ ထပ်အဆောက်အအုံ ပြိုကျ၊  လူ ၆၀ ကျော် ကယ်ထုတ်နိုင်

အိန္ဒိယနိုင်ငံမှာ ၅ ထပ်အဆောက်အအုံ ပြိုကျရာကနေ လူ ၆၀ ကျော်ကို အသက်ရှင်  ကယ်ထုတ်နိုင်ခဲ့တယ်လို့ အကြီးတန်းအရာရှိတစ်ဦးက သြဂုတ် ၂၅ ရက်မှာ ပြောပါတယ်။  မွမ်ဘိုင်းမြို့အနီးက စက်မှုဇုံမြို့တစ်ခုမှာ အခန်း ၄၇ ခန်းပါ အဆောက်အအုံ ပြိုကျခဲ့ပြီး နေထိုင်သူ ၂၀၀ လောက်ရှိတယ်လို့ သိရပါတယ်။ ပြိုကျမှုကနေ  လူ ၁ ယောက် သေဆုံးပြီး အယောက် ၃၀ လောက် ပိတ်မိနေကာ ရှာဖွေရေး ဆက်လုပ်နေပါတယ်။  ဒေသခံတွေနဲ့ ရဲတပ်ဖွဲ့ဝင်တွေ ပူးပေါင်းရှာဖွေရေး လုပ်နေသလို  လူနာတင်ယာဉ်တွေကလည်း ဒဏ်ရာရသူတွေကို နီးစပ်ရာဆေးရုံဆီ အမြန်ပို့ဆောင် ပေးနေပါတယ်။  အဆောက်အအုံ ပြိုကျရတဲ့ အကြောင်းရင်းကို သဲသဲကွဲကွဲ မသိရပေမယ့် အိန္ဒိယနိုင်ငံမှာ  အဆောက်အအုံ ပြိုကျတာတွေ မကြာခဏ ဖြစ်လေ့ရှိပါတယ်။ များသောအားဖြင့် ဆောက်လုပ်ရေး စည်းကမ်းတွေကို မလိုက်နာတာ၊  အရည်အသွေးမမီတဲ့ ပစ္စည်းအသုံးပြုတာနဲ့  ဖြစ်ကတတ်ဆန်း တည်ဆောက်တာတွေကြောင့်  ပြိုကျရတာ များတယ်လို့ ရိုက်တာက ရေးပါတယ်။
8 months Ago
More News
Up